موٽِي مُگتي
2
اِيئي رَي ڪري ضرُوري ھَي ڪہ جڪو باتون آپون ݾُڻئَي ھَي اُوئون تي اَڃون ڀِي وڌيڪ ڌھيون ڏيئون، ڪيٿ اِيئون نِي ھووَي ڪہ آپي اُوئون ݾون ڦِري جائُون۔ 2 جڪو ڪئين فريشتون رَي وسيلَي ݾُڻايو او ھميشا رَي ݾارُو ھتو۔ جڪو ايشوَر رَي باتون تي ڪونھي بُوئو ھانَ اُوئي رِي نافرمونِي ڪِي اُوئي نَي اِنصاف تي سزا ملِي۔ 3 تو پَڇي اترِي موٽِي مُگتي تي ڌھيون نِي ڏي آپي ڪيڪر بچشون؟ اُوئي مُگتي رو ايلون پيل پرڀُو يسُوع آپ ڪيئو ھانَ پَڇي جڪون او باتون ݾُڻئَي اُوئون مھونَي ݾُڻايو ڪہ اَي ݾجَي باتون ݾاچَي ھَي۔ 4 ايشوَر ڀِي آپرِي مرضِي تي نِشون، عجيب ڪومون، تموم گھڻَي پرچون ھانَ پويتر آتما رَي نعمتون رَي وسيلَي اُوئي رِي گواھِي ڏيتو رھيو۔پرڀُو يسُوع مُگتي داتا
5 آوڻ آݪِي نُوئِي دُنيا جڪَي رَي بارَي ۾ آپي باتون ڪرون ھون، ايشوَر او دُنيا فريشتون رَي ھاٿ ۾ ڪونھي ڏينِي۔ 6 ڪَي شاستر ۾ ڪھيو ھَي ڪہ،
”اي ايشوَر، اِنسون ڪِي ھَي جڪَي رو تُو فِڪر ڪرَي؟
جون اِنسون را اولاد ڪِي ھَي جڪون رو تُو خيال راکَي؟
7 ٿَي اِنسون نَي فريشتون ݾون ڪئين گھٽ ٺاھيو
ھانَ اُوئي نَي مونَ ھانَ عِزت آݪو تاج پيرايو۔
8 ٿَي ݾجَي شيون اُوئي رَي ھاٿ ۾ ڏينَي ھَي۔“
اِيئي رَي ڪري جڏي ايشوَر ݾجَي شيون اِنسون رَي اِختيار ۾ ڏينَي ھَي، تو اُوئي ڪو ڀِي اھڙِي شئي ڪونھي ڇوڙِي جڪو اِنسون رَي اِختيار ۾ نِي ھووَي۔ تو ڀِي آپي اَڃون توڻي ھر ھيڪ شئي اِنسون رَي اِختيار ۾ ڪونھي ڏيکتا۔ 9 پڻ آپڻِي نظر پرڀُو يسُوع تي ھَي جڪو ٿوڙو ٽيم فريشتون ݾون گھٽ ڪيئو گيو ڪہ او ايشوَر رِي ڪِرپا ݾون ھر ھيڪ اِنسون رَي ݾارُو آپرِي جان ڏَي۔ ڪيونڪہ اُوئي موت رو ڏُک برداش ڪيئو اِيئي رَي ڪري ايشوَر اُوئي نَي مونَ ھانَ عِزت آݪو تاج پيرايو۔
10 ايشوَر، جڪَي رَي ڪري ھانَ جڪَي رَي وسيلَي ݾجَي شيون ٺاھئَي، اُوئي نَي اَي ݾُٺو لاگو ڪہ او مُگتي ڏيوَڻ آݪَي يسُوع نَي ڏُکون رَي وسيلَي ڪامل اَگووڻ ٺاوَي ھانَ ايشوَر رَي تموم گھڻَي ٻاݪون نَي آپرِي مھما ۾ لَي۔ 11 جھڙَي نمُونَي پويتر ڪرڻ آݪَي يسُوع رو ھانَ ݾجون پويتر ھوئڻ آݪون رو پِتا ھيڪ ھَي، اُوئيج نمُونَي او اُوئون نَي ڀائي ڪيوَڻ ݾون ڪونھي شرماوتو۔ 12 اِيئي رَي ڪري او ڪَي ھَي ڪہ،
”ھُون آپرَي ڀايون نَي ٿارو نون ݾُڻائين
ھانَ مَنڊلِي ۾ ٿارِي بکوڻ را گيت گائين۔“
13 او پَڇي اَي ڪَي ھَي ڪہ، ”ھُون ايشوَر تي ڀروسو راکين۔“ او اَي ڀِي ڪَي ھَي ڪہ، ”ھُون اُوئون ٻاݪون ݾُوڌو ايشوَر آگھي حاضر ھون، جڪو مھنَي اُوئي ڏينا ھَي۔“
14 جھڙَي نمُونَي ٻاݪ لوئِي ھانَ موݾ را ٺھيوڙا اِنسون ھَي اُوئيج نمُونَي پرڀُو يسُوع آپ اُوئون ڀيڙو ھوئي اُوئون جھڙو ھويو ڪہ آپرِي موت ݾون موت تي اِختيار راکڻ آݪَي شيطون نَي برباد ڪرَي۔ 15 اِيئي نمُونَي او اُوئون ݾجون نَي ڇوڙاوَي جڪو موت رَي ٻِي ۾ ݾجِي عُمر غُلومي ۾ ريتا۔ 16 ھمَي اَي بات ظاھر ھَي ڪہ پرڀُو يسُوع فريشتون رِي نا، پڻ اڀراھيم رِي پيڙھِي رِي مدد ڪرَي ھَي۔ 17 اِيئي رَي ڪري اَي ضرُوري ھتو ڪہ او ھر نمُونَي آپرَي ڀايون آݪِي ڪار ھووَي ڪہ او ايشوَر رِي شيوا ڪرڻ ۾ اھڙو ايشوَر رَي پُوجاريون رو ݾردار ھووَي جڪو دايالُو ھانَ وفادار ھووَي ھانَ مِنکون رَي پاپون رِي معافي رَي ݾارُو آپرِي جان ڏَي۔ 18 ڪيونڪہ پرڀُو يسُوع آزمُوتَي ۾ پُورو اُتريو ھانَ ڏُک ݾَھيا اِيئي رَي ڪري ھمَي او اُوئون رِي مدد ڪري ݾگھَي ھَي جڪو آزمُوتَي ۾ پڙَي ھَي۔