عبرانيون رَي نون خط
ايشوَر رِي يسُوع مَسيح رَي وسيلَي بات
1
پِروڻَي زمونَي ۾ ايشوَر آپڻَي ٻاپ ڏاڏون ݾون فرق فرق ٽيم ھانَ فرق نمُونَي آپرَي نبيون رَي وسيلَي بات ڪِي، 2 پڻ اِيئي جگت رِي پڇاڙِي ۾ اُوئي آپون ݾون آپرَي ڏيڪرَي رَي وسيلَي بات ڪِي جڪَي نَي اُوئي ݾجَي شيون رو مالڪ ڪيئو ھانَ جڪَي رَي وسيلَي اُوئي ݾجِي دُنيا ٺائِي۔ 3 او ايشوَر رَي چمتڪار رو اُجاݪو ھانَ اُوئي رو پُورو رُوپ ھَي۔ او آپرَي قُدرت آݪَي حُڪم ݾون ݾجَي شيون ݾنڀالَي ھَي۔ اُوئي آپڻا پاپ ڌويا ھانَ آڪاش ۾ قُدرت آݪَي پرميشوَر رَي ݾاجَي پاݾَي جائي ٻيٺو۔ 4 اِيئي نمُونَي او ݾجَي فريشتون ݾون مھانَ ھويو ھانَ ايشوَر وِراثت ۾ اُوئي نَي ݾجون ݾون موٽو نون ڏينو۔ايشوَر رو ڏيڪرو ھانَ فريشتا
5 ڪِي ايشوَر فريشتون ۾ ڪينَي اَي ڪھيو ھَي ڪہ،
”تُو مھارو ڏيڪرو ھَي،
آج ݾون ھُون ٿارو پِتا ھون“؟
جون ڪڏي ڪَي فريشتَي رَي بارَي ۾ اَي ڪھيو ھَي ڪہ،
”ھُون اُوئي رو پِتا ھوئين
ھانَ او مھارو ڏيڪرو ھوشَي“؟
6 پَڇي جڏي ايشوَر آپرو موڀِي جگت ۾ ميلَي ھَي، تو ڪَي ھَي ڪہ،
”مھارا ݾجائِي فريشتا اُوئي آگھي شيش نِماوَي۔“
7 فريشتون رَي بارَي ۾ ايشوَر اَي ڪَي ھَي ڪہ،
”ھُون آپرا شيوا ڪرڻ آݪا فريشتا،
بائيرو ھانَ باݾڏي رَي جھاݪون ٺائُون ھون۔“
8 پڻ آپرَي ڏيڪرَي رَي بارَي ۾ ڪَي ھَي ڪہ،
”اي ايشوَر، ٿارو تخت ھميشا ريشَي،
ھانَ تُو اِنصاف ݾون آپرَي مِنکون تي بادشاھي ڪرَي ھَي۔
9 ٿَي ݾچائي ݾون پريم ڪيئو
ھانَ بُڇڙائي ݾون نفرت ڪِي
اِيئي رَي ڪري مھَي يعني ٿارَي ايشوَر،
ٿارَي ماٿَي تي خُوشِي رو تيل لگائي ٿنَي چُونڊيو
ھانَ ٿنَي ݾجون ݾون وڌيڪ عِزت ڏينِي۔“
10 او ڏيڪرَي رَي بارَي ۾ اَي ڀِي ڪَي ھَي ڪہ،
”اي پرڀُو، ٿَي شرُوع ݾون ڌرتي ٺائِي
ھانَ ٿَي آڪاش ٺاھيا۔
11 او ݾجائِي برباد ھوئي جاشَي،
پڻ تُو ھميشا رئِي۔
او ݾجائِي گاڀون آݪِي ڪار پِروڻا ھوئي جاشَي۔
12 تُو اُوئون نَي چادر آݪِي ڪار ݾونٽِي،
ھانَ گاڀون آݪِي ڪار بدلائي ڇوڙِي،
پڻ تُو جھڙو ھَي اھڙوج رئِي
ھانَ ھميشا جيتو رئِي۔“
13 ايشوَر فريشتون ۾ ڪيرَي بارَي ۾ ڪڏي ڀِي اَي ڪونھي ڪھيو ھَي ڪہ،
”تُو مھارَي ݾاجَي پاݾَي ٻيݾ
جترِي توڻي ھُون ٿارا دُشمن ھرائي
ٿارَي پگون ھيٺا نِي ڪرون۔“
14 پَڇي فريشتا ڪِي ھَي؟ او ݾجائِي ايشوَر رِي شيوا ڪرڻ آݪَي آتمائون ھَي جڪو نَي ايشوَر آپ مُگتي مِلڻ آݪون رِي شيوا رَي ݾارُو ميلَي ھَي۔