فليمُون رَي نون خط
جَئي پرڀُو رِي ھانَ پراٿنا
1
اَي خط مھَي پولُوس ھانَ آپڻَي ڀائي تيمٿيس رَي طرفون ھَي۔ ھُون پولُوس مَسيح يسُوع رو پرچار ڪرڻ رَي ڪري قيد ۾ ھون۔ اَي خط مھَي ڀيڙو شيواداري پيارَي ڀائي فليمُون، 2 ٻائِي اَفيا ھانَ مھون آݪِي ڪار مَسيح رو سپاھي ارخپُس ھانَ فليمُون رَي گھري ڀيڙِي ھوئڻ آݪِي وِشواسي مَنڊلِي رَي نون ھَي۔3 ٿون تي آپڻَي ايشوَر پِتا ھانَ پرڀُو يسُوع مَسيح رِي ڪِرپا ھانَ شانتِي ھوتِي رَي۔
فليمُون رو وِشواس ھانَ پريم
4 اي فليمُون، ھُون جڏي ڀِي پراٿنا ڪرون ھون، تو ٿنَي ياد ڪري ھميشا ايشوَر رو شُڪر ڪرون ھون 5 ڪيونڪہ ھُون ݾُڻتو رون ھون ڪہ ٿارو وِشواس پرڀُو يسُوع تي ھَي ھانَ تُو ݾجَي وِشواسيون ݾون پريم راکَي ھَي۔ 6 مھارِي پراٿنا ھَي ڪہ ٿونرو ميل جول جڪو وِشواس راکڻ رَي ڪري ھَي اِترو گھڻو بڌَي ڪہ آپي اُوئون برڪتون نَي ݾُٺَي نمُونَي ݾمجھي ݾگھون جڪو آپون نَي مَسيح ۾ ملَي ھَي۔ 7 اي ڀائي، ٿارو پريم ڏيکي مھنَي تموم گھڻِي خُوشِي ھانَ تسلِي مِلي ھَي ڪيونڪہ اِيئي ݾون وِشواسيون را من خُوشِي ݾون ڀريجا ھَي۔
اُنيسمُس رَي ݾارُو مِنٿ
8 مھنَي مَسيح ۾ دليرِي ھَي ڪہ ھُون ٿنَي حُڪم ڏيئون ڪہ ٿنَي ڪِي ڪرڻ کپَي 9 پڻ ھُون ٿنَي حُڪم ڪونھي ڏيتو پڻ ڏوڪرو ھانَ مَسيح يسُوع رَي ݾارُو قيد ھوئڻ رَي ڪري پريم ݾون ٿنَي عرض ڪرون ھون۔ 10 اُنيسمُس مھارَي ڏيڪرَي آݪِي ڪار ھَي ڪيونڪہ جڏي ھُون قيد ھتو، تو اُوئي مَسيح تي وِشواس راکيو۔ اُوئي رَي ݾارُو ھُون ٿنَي مِنٿ ڪرون ھون ڪہ 11 پيل او ٿارَي ڪَي ڀِي ڪوم رو ڪونھي ھتو پڻ ھمَي او شيوا رَي ڪوم ۾ نِي رُگو ٿارَي پڻ مھارِي ڀِي مدد ڪري ݾگھَي ھَي۔ 12 او مھنَي تموم گھڻو پيارو ھَي پڻ تو ڀِي ھُون اُوئي نَي ٿَي ڪڍي پاڇو ميلون پڙيو۔
13 مھارِي مرضِي ھتِي ڪہ ھُون اُنيسمُس نَي آپ ڪڍي راکون ڪہ جترِي توڻي ھُون خُوشِي رِي خبر رَي ڪري ايٿ قيد ھون، تو اَي ٿارَي طرفون مھارِي شيوا ڪرَي۔ 14 ھُون ٿارِي موڪل ݾون ٽاݪ ڪئين ڪونھي ڪري ݾگھتو ڪہ تُو جڪو ڀِي مھربونِي ڪرَي او مجبُورِي ݾون نا، پڻ خُوشِي ݾون ڪرَي۔ 15 ھوئي ݾگھَي ھَي ڪہ او ٿَي ݾون اِيئي رَي ڪري ٿوڙِي دير رَي ݾارُو اݪگو ھويو ڪہ او ھميشا رَي ݾارُو ٿَي ڀيڙو رَي۔ 16 ھمَي او ٿارَي ݾارُو غُلوم ڪونھي پڻ اِيئي ݾون وڌيڪ يعني ڀائي آݪِي ڪار ھَي ھانَ او مھنَي تموم گھڻو پيارو ھَي۔ آج ݾون پَڇي تُو اِيئي نَي غُلوم نا، پڻ پرڀُو يسُوع ۾ آپرو پيارو ڀائي ݾمجھي۔
17 جي تُو مھنَي ايشوَر رِي شيوا ۾ آپرو ساٿِي ݾمجَھي ھَي، تو اِيئي رو اھڙو اِستقبال ڪري جھڙو ھُون آپ ٿَي ڪڍي آيو ھون۔ 18 جي اِيئي ٿارو ڪئين نُقصون ڪيئو ھَي جون ٿارو قرضِي ھَي، تو او مھارَي نون تي لِک۔ 19 ھُون پولُوس آپرَي ھاٿ ݾون اَي لِکون پڙيو ڪہ او قرض ھُون آپ پاڇو آئي ڏئين۔ مھنَي اَي ياد ڏيراوڻ رِي ضرُورت ڪونھي ڪہ تُو مھارو قرضِي ھَي ڪيونڪہ ٿَي ڀِي مھارَي پرچار رَي ڪري پرڀُو يسُوع تي وِشواس راکيو ھَي۔ 20 اِيئي رَي ڪري اي ڀائي، پرميشوَر رَي واسطي مھَي تي مھربونِي ڪر ھانَ مھارِي بات من ڪہ مَسيح ۾ مھارو من خُوش ھوئي جاوَي۔
21 ھُون اِيئي رَي ڪري لِکون پڙيو ڪيونڪہ مھنَي ڀروسو ھَي ڪہ تُو مھارِي بات منِي پڻ مھنَي خبر ھَي ڪہ جڪو ڪئين ھُون ڪونھ پڙيو تُو اِيئي ݾون ڀِي وڌيڪ مھارَي ݾارُو ڪرِي۔ 22 ھُون ھيڪ ٻيجِي مِنٿ ڪرون ھون ڪہ مھارَي ريوَڻ رو بندوبست ڪر ڪيونڪہ مھنَي اُميد ھَي ڪہ ھُون ٿونرَي پراٿنائون رَي وسيلَي ڇيڪو ٿون ڪڍي پاڇو آئين۔
آخري باتون
23 اِپفراس جڪو مَسيح يسُوع رَي ڪري مھَي ڀيڙو قيد ھَي، ٿنَي جَئي پرڀُو را ڪَي ھَي۔ 24 اِيئي نمُونَي مرقس، ارسترخُس، ديماس ھانَ لُوقا جڪو شيوا رَي ڪوم ۾ مھَي ڀيڙا ھَي، ٿنَي جَئي پرڀُو را ڪَي ھَي۔
25 آپڻَي پرڀُو يسُوع مَسيح رِي ڪِرپا ٿون ݾجون رِي آتما ڀيڙِي ھووَي۔ [آمين۔]