وِشواسي مَنڊلِي را ݾنڀالڻ آݪا
3
اَي بات ݾاچِي ھَي ڪہ جڪو ڀِي وِشواسي مَنڊلِي رِي ݾنڀال ڪرڻ رو ݾوچَي ھَي، تو او ھيڪَي ݾُٺَي ڪوم رِي خواھش ڪرَي ھَي۔ 2 اِيئي رَي ڪري ضرُوري ھَي ڪہ ݾنڀال ڪرڻ آݪَي تي ڪو ڀِي الزوم نِي ھووَي۔ او آپرِي لُگائِي ݾون وفادار، پرھيزگار، ݾمجھدار، اصُول آݪو، مھمان نواز ھانَ ݾيکاوڻ آݪو ھووَي۔ 3 او نِي شرابِي، نِي مارا ڪُوٽو ڪرڻ آݪو پڻ نِرمل ھووَي۔ او جھيڙالُو جون رُپيون رو لالچي نِي ھووَي۔ 4 او آپرَي گھر رو ݾُٺَي نمُونَي ݾنڀال ڪرڻ آݪو ھووَي، ٻاݪ اُوئي رِي عِزت ڪرتا ھووَي ھانَ اُوئي رَي ڪيوَڻ ۾ ھووَي۔ 5 ڪيونڪہ جي ڪُڻ آپرو گھر ڀِي ڪونھي ݾنڀالتو، تو پَڇي او ايشوَر رِي مَنڊلِي رِي ڪيڪر ݾنڀال ڪرشَي؟ 6 نُوئو وِشواسي، مَنڊلِي رو اَگووڻ نِي ھووَي۔ ڪيٿ اِيئون نِي ھووَي ڪہ او بڏائو ڪرَي ھانَ شيطون آݪِي ڪار اُوئي تي سزا رو فيصلو ھووَي۔ 7 اِيئي ݾون ٽاݪ مَنڊلِي ݾون ٻاھر آݪون ۾ ڀِي اُوئي رِي عِزت ھووَي۔ ڪيٿ اِيئون نِي ھووَي ڪہ او بدنوم ھوئي شيطون رَي جاݪ ۾ ڦاݾي جاوَي۔وِشواسي مَنڊلِي را شيوادار
8 اِيئي نمُونَي جڪو وِشواسي مَنڊلِي را شيواداري ھَي اُوئون رو ڪِردار ڀِي نيڪ ھووَي او ٻي چَپرا، شرابِي ھانَ لالچي نِي ھووَي۔ 9 او وِشواس رَي ڀيد نَي صاف من ۾ ݾنڀالي راکَي۔ 10 اَي ڀِي ضرُوري ھَي ڪہ پيل او پَرکيا جاوَي۔ جي اُوئون رَي خلاف ڪو ڀِي الزوم نِي ھووَي، تو پَڇي او شيوا رو ڪوم ڪرَي۔
11 اِيئي نمُونَي ھر ھيڪ شيوادار رِي لُگائِي ڀِي ݾُٺَي ڪِردار آݪِي ھوئڻ کپَي۔ او الزوم ھڻڻ آݪِي نِي ھووَي پڻ آپنَي ڪاٻُو راکڻ آݪِي ھووَي ھانَ ݾجَي باتون ۾ وفادار ھووَي۔ 12 ھر ھيڪ شيواداري آپرِي لُگائِي رو وفادار ھووَي ھانَ آپرَي ٻاݪون ھانَ آپرَي گھر رِي ݾُٺَي نمُونَي ݾنڀال ڪرڻ آݪو ھووَي۔ 13 ڪيونڪہ جڪو شيوا رو ڪوم ݾُٺَي نمُونَي ڪرَي ھَي، مِنکون ۾ اُوئي رِي عِزت بڌَي ھَي ھانَ او مَسيح يسُوع تي آپرَي وِشواس رَي بارَي ۾ دليرِي ݾون بات ڪري ݾگھَي ھَي۔
خاص ڀيد
14 مھنَي اُميد ھَي ڪہ ھُون ڇيڪو ٿَي ڪڍي آئين، تو ڀِي ھُون ٿنَي اَي باتون اِيئي رَي ڪري لِکون پڙيو ڪہ، 15 جي مھنَي آوڻ ۾ دير ھوئي جاوَي، تو ٿنَي خبر ھوئڻ کپَي ڪہ جيتَي ايشوَر رو گھر يعني وِشواسي مَنڊلِي جڪو ݾاچ رو ٿونڀو ھانَ بُنياد ھَي، اُوئي ۾ مِنکون رو ڪِردار ڪھڙو ھوئڻ کپَي۔ 16 اِيئي ۾ ڪو ڀِي شَڪ ڪونھي ڪہ وِشواس رو ڀيد مھانَ ھَي يعني
او جڪو اِنسونِي رُوپ ۾ ظاھر ھويو،
پويتر آتما ۾ ݾاچو ثابت ھويو
ھانَ فريشتون اُوئي نَي ڏيٺو،
ٻيجَي قومون ۾ اُوئي رو پرچار ھويو،
دُنيا ۾ اُوئي تي وِشواس راکيجو
ھانَ او مونَ آݪَي ايشوَر ڏيݾا ݾُرگ تي کڻيجو۔