تيمٿيس رَي نون پيلڪو خط
جَئي پرڀُو رِي ھانَ پراٿنا
1
اَي خط مھَي پولُوس رَي طرفون ھَي جڪو آپڻَي مُگتي داتا ايشوَر ھانَ آپڻِي اُميد يعني مَسيح يسُوع رَي حُڪم ݾون سنت ھون۔ 2 اَي خط تيمٿيس رَي نون ھَي جڪو وِشواس ۾ مھارَي ݾگَي ڏيڪرَي آݪِي ڪار ھَي۔ايشوَر پِتا ھانَ آپڻَي پرڀُو مَسيح يسُوع رَي طرفون ٿَي تي ڪِرپا، دايا ھانَ شانتِي ھوتِي رَي۔
ڪُوڙِي ݾِکيا رَي بارَي ۾ ھدايت
3 جھڙَي نمُونَي مھَي مَڪدُونيا صُوبَي ڏيݾا جاوتي بِݪا ٿنَي ݾمجھايو ھتو ڪہ تُو اِفسِس شھر ۾ رئي، اوٿ ڪئينڪہ مِنک ڪُوڙِي تعليم ڏَي ھَي اِيئي رَي ڪري تُو اُوئون نَي حُڪم ڏي ڪہ او اِيئون نِي ڪرَي۔ 4 اُوئون نَي ݾُڻا ڪہ اُوئي ڪُوڙَي باتون ھانَ ٻاپ ڏاڏون رِي پيڙھِي تي ڌھيون نِي ڏَي۔ اھڙَي باتون تي رُگو بَحث ھووَي ھَي پڻ ايشوَر رِي مُگتي رَي منصُوبَي رو ڪو ڀِي فائدو ڪونھي ھوتو ڪيونڪہ رُگو مَسيح تي وِشواس راکڻ ݾون ايشوَر رو ڪوم آگھي بڌي ݾگھَي ھَي۔ 5 مھارَي اِيئي حُڪم رو مقصد اَي ھَي ڪہ آپت ۾ اھڙو پريم ھووَي جڪو صاف من، نيڪ نيت ھانَ ݾاچو وِشواس راکڻ ݾون ھووَي ھَي۔ 6 ڪئينڪہ مِنک اَي باتون ڇوڙي اجائَي بَحث ۾ پڙيا ھَي۔ 7 اُوئون رِي مرضِي ھَي ڪہ او ڌرمي گُرو ھووَي پڻ جڪو باتون او ڪرَي ھانَ پُورَي ڀروسَي ݾون ݾيکاوَي ھَي، او آپ اُوئون باتون نَي ݾمجھتا ڀِي ڪونھي۔
8 آپون نَي خبر ھَي ڪہ شريعت ݾُٺِي ھَي پڻ شرط اَي ھَي ڪہ او صحيح نمُونَي اِستعمال ڪِي جاوَي۔ 9 آپون نَي ياد راکڻ کپَي ڪہ شريعت نيڪ مِنکون رَي ݾارُو نا، پڻ اھڙَي مِنکون رَي ݾارُو ھَي جڪو نافرمون، ڏوھي، بِنا ڌرم آݪا، پاپي، پليت، ايشوَر را اِنڪاري، ما ٻاپ را قاتل، خُونِي، 10 زناڪار، لوڦر، اغوا ڪرڻ آݪا، ڪُوڙا، ڪُوڙا ݾونݾ ليوَڻ آݪا ھانَ اِيئي ݾون ٽاݪ صحيح تعليم نَي غلط ڪيوَڻ آݪون رَي ݾارُو ڀِي ھَي۔ 11 اَي ݾيکايوڙَي باتون برڪت آݪَي ايشوَر رِي اُوئي مھما آݪِي خُوشِي رِي خبر رَي مُطابق ھَي جڪو مھارَي حوالي ڪيئوڙِي ھَي۔
ايشوَر رِي دايا رَي ݾارُو شُڪر
12 ھُون آپڻَي پرڀُو مَسيح يسُوع رو شُڪر ڪرون ھون جڪو مھنَي ھِمت ڏَي ھَي ھانَ اُوئي مھنَي ايموندار ݾمجھي آپرَي پرچار رَي ݾارُو چُونڊيو ھَي۔ 13 ھُون وِشواس راکڻ ݾون پيل يسُوع مَسيح رَي خلاف ٻولڻ آݪو، وِشواسيون نَي تنگ ڪرڻ آݪو، بي عِزتي ڪرڻ آݪو ھتو، تو ڀِي ايشوَر مھَي تي دايا ڪِي ڪيونڪہ مھَي اَي ݾجائِي ڪوم بي خبرِي ۾ ڪيئا جڏي ھُون پرڀُو يسُوع تي وِشواس ڪونھي راکتو۔ 14 مھَي تي آپڻَي پرميشوَر رِي ڪِرپا حد ݾون وڌيڪ ھوئِي ھانَ مھنَي مَسيح يسُوع ۾ ھوئڻ رَي ڪري وِشواس ھانَ مِنکون رَي ݾارُو پريم مِليو ھَي۔ 15 اَي بات ݾاچِي ھانَ ھر نمُونَي منڻ آݪِي ھَي ڪہ،
”مَسيح يسُوع پاپيون نَي مُگتي ڏيوَڻ رَي ݾارُو جگت ۾ آيو۔“
اُوئون ݾجون ۾ موٽو پاپي ھُون ھون۔ 16 پڻ مھَي تي دايا اِيئي رَي ڪري ھوئِي ڪہ مَسيح يسُوع مھَي موٽَي پاپي تي آپرو پُورو صبر ظاھر ڪري مھنَي اُوئون رَي ݾارُو ھيڪ نمُونو ٺاھيو ڪہ او اُوئي تي وِشواس راکي اَمر جيوَن حاصل ڪرَي۔ 17 ھمَي اُوئي ھميشا رَي بادشاھ، نِي مرڻ آݪَي ھانَ نِي ڏيکيجڻ آݪَي ھيڪَي ايشوَر رِي عِزت ھانَ بکوڻ ھميشا ھوتِي رَي۔ آمين۔
18 اي مھارا ڏيڪرا تيمٿيس، ٿارَي بارَي ۾ ايشوَر رَي طرفون پيل ڪھيوڙَي باتون تي، ھُون ٿنَي حُڪم ڏيئون ھون ڪہ تُو خُوشِي رِي خبر رَي ݾارُو ݾُٺَي نمُونَي بِڙھتو رَي 19 ھانَ وِشواس راکي آپرَي صاف من تي پڪو رَي ڪيونڪہ ڪئينڪہ مِنکون اَي باتون ڇوڙي آپرَي وِشواس رو ٻيڙو ٻوڙي ڇوڙيو ھَي۔ 20 ھُمنيس ھانَ سڪندر ڀِي اُوئون مئيلا ھَي جڪون نَي مھَي وِشواسيون ݾون ڌار ڪري سزا رَي ݾارُو شيطون رَي حوالي ڪيئا ڪہ او ݾيکَي ڪہ ايشوَر رَي خلاف ٻولڻ نِي کپَي۔