ايشوَر رِي مرضِي تي بيوَڻ
4
ھمَي اي وِشواسيون، جون ٿون مھون ݾون ݾيکيو ھَي ڪہ ٿونَي ڪيڪر بيوَڻ ھانَ ڪيڪر ايشوَر نَي خُوش ڪرڻ کپَي ھانَ ٿي اُوئيج نمُونَي آپرِي زندگِي ۾ بو پڙيا، اِيئي رَي ڪري ھمَي مھي پرڀُو يسُوع رَي نون ݾون ٿونَي مِنٿ ڪري حوصلو ڏيئون ھون ڪہ اِيئي ۾ اَڃون ڀِي وڌيڪ آگھي بڌتا جائو 2 ڪيونڪہ ٿونَي خبر ھَي ڪہ مھون پرڀُو يسُوع رَي طرفون ٿونَي ݾجائِي حُڪم ݾُڻايا را۔ 3 ايشوَر رِي اَي مرضِي ھَي ڪہ ٿي پويتر ھوئو يعني زنا نِي ڪرو۔ 4 ٿون ۾ ھر ھيڪ آپرو ݾَرير پويتر ھانَ عِزت ݾون ڪاٻُو ۾ راکڻ ݾيکَي۔ 5 ٿي اُوئون قومون آݪِي ڪار بُڇڙَي خواھشون رَي جوش ۾ آپرَي زندگَي نِي گُذارو جڪو ايشوَر نَي ڪونھي اوݪکتا۔ 6 ڪو ڀِي مِنک آپرَي وِشواسي ڀائي ݾون ٺَگِي ڪري اھڙو ڪوم نِي ڪرَي ڪيونڪہ پرميشوَر اِيئي ݾجَي پاپون رِي سزا ڏيشَي۔ اِيئي رَي ڪري مھون پيل ݾون ٿونَي سختِي ݾون ھدايت ڪِي ھتِي۔ 7 ايشوَر آپون نَي بُڇڙائي رَي ݾارُو نا، پڻ پويتر زندگِي گُذارڻ رَي ݾارُو اَڻايا ھَي۔ 8 اِيئي رَي ڪري جڪو اَي باتون ڪونھي منتو، او اِنسون رِي نا، پڻ ايشوَر رِي ڪونھي منتو جڪو ٿونَي آپرو پويتر آتما ڏَي ھَي۔9 مھنَي اَي لِکڻ رِي ضرُورت ڪونھي ڪہ ٿي ھيڪَي ٻيجَي ݾون ڀايون جھڙو پريم ڪرو ڪيونڪہ ايشوَر آپ ٿونَي ھيڪَي ٻيجَي ݾون پريم ڪرڻ ݾيکايو ھَي۔ 10 ٿي مَڪدُونيا رَي ݾجَي وِشواسيون ݾون پريم راکو ھو پڻ تو ڀِي اي وِشواسيون، مھي ٿونَي مِنٿ ڪرون ھون ڪہ اِيئي پريم ۾ آگھي بڌتا جائو۔ 11 جون مھون ٿونَي ݾُڻايو ھتو ڪہ صبر ݾون رو ھانَ رُگو آپرَي ڪوم ݾون واسطو راکو۔ ٿي آپرَي ھاٿون ݾون محنت ڪري ڪمائو 12 ڪہ ٿونَي ڪَي ڀِي شئي رِي کوٽ نِي ھووَي ھانَ غير وِشواسي مِنک ٿونرِي عِزت ڪرَي۔
پرڀُو يسُوع رو ڀڙي آوڻ
13 اي وِشواسيون، ٿونَي اُوئون وِشواسيون رَي بارَي ۾ خبر ھوئڻ کپَي جڪو مري گيا ھَي، اِيئي رَي ڪري ٿي ٻيجَي قومون آݪِي ڪار پريشون نِي ھوئو جڪون نَي ڪو ڀِي اُميد ڪونھي، 14 ڪيونڪہ جھڙَي نمُونَي آپون نَي پڪو وِشواس ھَي ڪہ پرڀُو يسُوع مري گيو ھانَ ڀڙي جيتو ھويو، اُوئيج نمُونَي ايشوَر اُوئون نَي ڀِي ڀڙي جيتا ڪرشَي جڪو ݾُوتوڙا ھَي ھانَ اُوئون نَي پرڀُو يسُوع رَي وسيلَي آپ ڪڍي اَڻاشَي۔ 15 اَي ݾجَي باتون جڪو مھي ٿونَي ݾُڻائُون پڙيا او پرڀُو يسُوع رَي ڪھيوڙَي باتون ھَي ڪہ جڏي او آشَي، تو آپي جڪو جيتا ھون ݾُوتوڙون ݾون آگھي ڪونھي بڌون 16 ڪيونڪہ خاص فريشتو زور ݾون ھيلو ڪرشَي ھانَ ايشوَر رو نَر ݾِينگو بجايو جاشَي۔ اُوئي ٽيم پرڀُو يسُوع آپ آڪاش ݾون اُترشَي ھانَ اُوئون ݾجون نَي حُڪم ڏي جيتا ڪرشَي جڪو مَسيح ۾ مُوئا ھَي۔ 17 اِيئي ݾون پَڇي ايشوَر آپون نَي ڀِي جڪو جيتا ھوشون اُوئون ڀيڙا باڏݪون تي کڻشَي ڪہ بائيرَي ۾ پرڀُو ݾون مِلون۔ پَڇي آپي ھميشا اُوئي ڀيڙا ريشون۔ 18 اِيئي رَي ڪري ٿي اِيئون باتون ݾون ھيڪَي ٻيجَي نَي حوصلو ڏيتا رو۔