پرڀُو يسُوع رو ڀڙي آوڻ
5
اي وِشواسيون، ٿونَي اَي لِکڻ رِي ضرُورت ڪونھي ڪہ اَي ݾجو ڪئين ڪڏي ھوشَي۔ 2 ڪيونڪہ ٿونَي ݾُٺَي نمُونَي خبر ھَي ڪہ ھيڪ ڏِن پرڀُو اوچتو آشَي جھڙَي نمُونَي رات رو چور آوَي ھَي۔ 3 جڏي مِنک اَي ڪيتا ھوشَي ڪہ، ”ݾُک ھانَ شانتِي ھَي۔“ تو جھڙَي نمُونَي اُميد آݪِي لُگائِي نَي اوچتا ڏوکن ھووَي ھَي اِيئوج اُوئون تي ڪھر آشَي ھانَ او بچَي ڪونھي ݾگھَي۔ 4 پڻ اي وِشواسيون، ٿي انڌارَي ۾ ڪونھي ريتا ڪہ پرڀُو رَي آوڻ رو ڏِن اوچتو چور آݪِي ڪار آوَي ھانَ ٿونَي خبر ڀِي نِي پڙَي۔ 5 ٿون ݾجون رو واسطو اُجاݪَي ھانَ ڏِن ݾون ھَي۔ پڻ آپڻو انڌارَي ھانَ رات رَي ڪومون ݾون ڪو ڀِي واسطو ڪونھي۔ 6 اِيئي رَي ڪري ٻيجون آݪِي ڪار اُونگ ۾ نِي رو، پڻ جاگتا ھانَ ݾُجاگ رو۔ 7 ڪيونڪہ رات رو ݾُوئڻ آݪا ݾُوئَي ھَي ھانَ رات رو پيئڻ آݪا نشَي ۾ رَي ھَي 8 پڻ آپي اُجاݪَي آݪا ھون اِيئي رَي ڪري آپي پرڀُو يسُوع تي وِشواس ھانَ پريم نَي فولاد رَي بکتر آݪِي ڪار ھانَ مُگتي رِي اُميد نَي فولاد رَي بکتر آݪَي ڪار پيري ھوشيار رون۔ 9 ايشوَر آپون نَي سزا ڏيوَڻ رَي ݾارُو نا، پڻ اِيئي رَي ڪري چُونڊيا ھَي ڪہ آپون نَي پرڀُو يسُوع مَسيح رَي وسيلَي مُگتي ملَي۔ 10 پرڀُو يسُوع آپڻَي ݾارُو آپرِي جان ڏينِي ڪہ آپي اُوئي ڀيڙا بيتا رون، بيشڪ آپي اُوئي رَي ڀڙي آوڻ آݪَي ڏِن جيتا رون جون مُوئوڙا۔ 11 اِيئي رَي ڪري ٿي ھيڪَي ٻيجَي نَي حوصلو ڏي وِشواس ۾ آگھي بڌتا جائو، جھڙَي نمُونَي ٿي ڪرو ھو۔آخري باتون
12 اي وِشواسيون، مھي ٿونَي مِنٿ ڪرون ھون ڪہ ٿي اُوئون رِي عِزت ڪرو جڪو ٿون ۾ محنت ڪرَي ھَي ھانَ پرميشوَر ۾ ٿونرا اَگووڻ ھَي ھانَ ٿونَي ھدايت ڪرَي ھَي۔ 13 اُوئون رِي محنت رَي ڪري پريم ݾون اُوئون رِي تموم گھڻِي عِزت ڪرو ھانَ ھيڪَي ٻيجَي رِي ٻڌِي ۾ رو۔
14 اي وِشواسيون، مھي ٿونَي مِنٿ ڪرون ھون ڪہ سُست مِنکون نَي ݾمجھائو۔ جڪون نَي اُميد ڪونھي اُوئون نَي حوصلو ڏيئو، ڪمزورن رِي مدد ڪرو ھانَ ݾجون ݾون صبر ݾون بو۔ 15 خبردار، ڪو ڀِي مِنک ڪَي ݾون بُڇڙائي رَي بدلَي بُڇڙائي نِي ڪرَي پڻ ٿي ھر حال ۾ آپت ۾ ھانَ ݾجون ݾون ڀلائي ڪرتا رو۔ 16 ھر ٽيم خُوش رو۔ 17 ھر ٽيم پراٿنا ڪرتا رو۔ 18 ھر حال ۾ شُڪر ڪرو ڪيونڪہ ايشوَر رِي مرضِي ھَي ڪہ ٿي اَي ݾجو ڪئين مَسيح يسُوع رَي وسيلَي ڪرو۔ 19 پويتر آتما نَي آپرِي زندگِي ۾ ڪوم ڪرڻ ݾون پالو نِي۔ 20 جي ڪُڻ اگڪٿِي ڪرَي، تو اُوئي رو قدر ڪرو 21 پڻ ھر ھيڪ اگڪٿِي آزمائو ڪہ او ايشوَر رَي طرفون ھَي جون نا۔ جڪو ايشوَر رَي طرفون ھووَي، تو اُوئي نَي منو۔ 22 ھر نمُونَي رِي بُڇڙائي ݾون اݪگا رو۔
23 ھمَي ايشوَر جڪو ھر نمُونَي رو ݾُک ڏَي ھَي، ٿونَي پُورَي نمُونَي پويتر ڪرَي ھانَ پرڀُو يسُوع مَسيح رَي آوڻ توڻي ٿونرِي آتما، من ھانَ ݾَرير نَي بي عيب ھانَ ݾنڀالتو رَي۔ 24 ايشوَر جڪَي ٿونَي اَڻايا ھَي او اِيئوج ڪرشَي ڪيونڪہ او وفادار ھَي۔
25 اي وِشواسيون، مھورَي ݾارُو ڀِي پراٿنا ڪرو۔ 26 ݾجَي وِشواسيون نَي پريم ݾون جَئي پرڀُو رِي ڪو۔ 27 ھُون ٿونَي پرميشوَر رَي نون ݾون مِنٿ ڪرون ھون ڪہ ٿي اَي خط ݾجَي وِشواسيون رَي رُوبرو پڙھي ݾُڻايا۔
28 آپڻَي پرڀُو يسُوع مَسيح رِي ڪِرپا ٿون تي ھوتِي رَي۔