ڪُلسيون 2

ھُون ٿونَي اَي ݾُڻائُون ھون ڪہ ھُون ٿونرَي ݾارُو، لوديڪيا شھر رِي وِشواسي مَنڊلِي ھانَ اُوئون وِشواسيون رَي ݾارُو جڪون مھنَي ڏيٺو ڀِي ڪونھي تموم گھڻِي محنت ڪرون پڙيو۔ ‏2 مھارِي مرضِي ھَي ڪہ اُوئون رو حوصلو بڌَي ھانَ آپت ۾ پريم ݾون ھيڪ ھوئي رَي۔ اُوئون نَي پُورِي ݾمجھ ݾون پڪو ڀروسو ھووَي ڪہ او ايشوَر رَي ڀيد يعني مَسيح نَي اوݪکَي، ‏3 جڪَي ۾ عقل ھانَ ڏاھپ را ݾجائِي خزونا لِڪيوڙا ھَي۔

‏4 ھُون ٿونَي اَي اِيئي رَي ڪري ݾُڻائُون ھون ڪہ ڪو ڀِي مِنک آپرَي ميٺَي ميٺَي باتون ݾون ٿونَي گُھمراھ نِي ڪرَي۔ ‏5 بيشڪ ھُون آپ اوٿ ڪونھي ھون پڻ مھارِي مرضِي ٿون ڀيڙِي ھَي۔ ھُون خُوش ھون ڪيونڪہ مھنَي خبر ھَي ڪہ ٿي ايشوَر رِي مرضِي تي بو ھو ھانَ مَسيح تي پڪو وِشواس راکو ھو۔

نُوئِي زندگِي

‏6 ھمَي جھڙَي نمُونَي ٿون مَسيح يسُوع نَي آپرو پرميشوَر منيو ھَي اُوئيج نمُونَي اُوئي ۾ زندگِي گُذارتا رو۔ ‏7 ٿونرِي پاݪ اُوئي ۾ پڪِي ھوتِي جاوَي ھانَ ٿونرَي زندگَي اُوئي ۾ بڌتَي جاوَي۔ ٿي اُوئي وِشواس ۾ پڪا رو جڪَي رَي بارَي ۾ ٿونَي ݾيکايوڙو ھَي ھانَ ھر ٽيم ايشوَر رو شُڪر ڪرتا رو۔

‏8 خبردار، ڪيٿ اِيئون نِي ھووَي ڪہ ڪو ٿونَي اجائَي ھانَ ڪُوڙَي باتون ݾُڻائي ٿونَي ڦيراوَي ڪيونڪہ اھڙَي باتون مَسيح رَي طرفون نا، پڻ اِنسونِي ريتون ھانَ دُنياوِي شرُوعاتِي باتون تي ھَي، ‏9 ڪيونڪہ ايشوَر رَي ݾجَي خُوبَي مَسيح رِي اِنسونِي حالت ۾ ھَي ‏10 ھانَ ٿونَي ڀِي پرڀُو يسُوع ۾ او ݾجَي خُوبَي مِلئَي ھَي ڪيونڪہ او ھر ھيڪ حڪُومت ھانَ اِختيار آݪَي رو مالڪ ھَي۔

‏11 مَسيح ۾ ٿونرو اھڙو کَتنو ھويو ھَي جڪو جِسموني نا، پڻ مَسيح رَي وسيلَي ھويو يعني اُوئي ٿون ۾ پاپي عادتون ختم ڪيئَي ھَي۔ ‏12 جڏي ٿون پويتر سِنون ليئو، تو ٿي اُوئي ڀيڙا ٻُوريجا ڪيونڪہ ٿون ايشوَر رِي قُدرت تي وِشواس راکيو جڪَي مَسيح نَي مُوئوڙون ݾون جيتو ڪيئو ھانَ ٿونَي ڀِي اُوئي ڀيڙِي نُوئِي زندگِي ملِي۔ ‏13 پيل ٿي آپرَي پاپون ھانَ اِنسونِي عادتون رَي ڪري مُوئوڙا ھتا يعني ايشوَر ݾون اݪگا ھتا پڻ ھمَي ايشوَر ٿونَي نُوئِي زندگِي ڏي مَسيح ڀيڙا جيتا ڪيئا ھَي ھانَ آپڻا ݾجائِي پاپ معاف ڪيئا ھَي۔ ‏14 اُوئي آپون تي لاگوڙا ڏوھ مِٽايا ھانَ آپڻَي ڏوھون رِي سزا نَي ݾُولِي تي ڪوڪا ھڻي آپون ݾون اݪگا ڪري ڇوڙيا۔ ‏15 اِيئي نمُونَي اُوئي حڪُومت ھانَ اِختيار آݪون نَي ھرايو ھانَ ݾُولِي تي آپرِي جيت رَي وسيلَي اُوئون نَي مِنکون آگھي شرمندا ڪيئا۔

‏16 اِيئي رَي ڪري ڪو ڀِي ٿون تي کاوڻ پيئڻ، پَرٻ ملھاوڻ جون نُوئَي چندر ھانَ پويتر ڏِن رَي ريتون رَي ڪري الزوم نِي لگاوَي۔ ‏17 ڪيونڪہ اَي ريتون رُگو آوڻ آݪَي شيون رِي ڇان ھَي پڻ حقيقت مَسيح آپ ھَي۔ ‏18 ڪو ڀِي مِنک ظاھري پويترتائي جون فريشتون رِي پُوجا ڪري ٿونَي گُھمراھ نِي ڪرَي ڪيونڪہ اھڙا مِنک ݾپنون رَي باتون بڌائي ݾُڻاوَي ھَي ھانَ آپرِي اِنسونِي عقل رَي ڪري مگرُور ھوئي جاوَي ھَي۔ ‏19 اُوئون رو واسطو مَسيح ݾون ڪونھي ريتو جڪو ݾَرير رو مالڪ ھَي ھانَ جڪَي ݾون ݾجو ݾَرير جوڙون ھانَ نوَزون ݾون ٺَئي ھانَ ھيڪ ھوئي ايشوَر رِي مدد ݾون ترقي ڪرَي ھَي۔

مَسيح ڀيڙو مرڻ جيئڻ

‏20 جڏي ٿي دُنياوِي شرُوع آݪَي باتون رَي ڪري مَسيح ڀيڙا مري گيا ھو، تو اُوئون اصُولون ھانَ ݾيکايوڙَي باتون تي ڪيئون بو ھو جڪون رو واسطو دُنيا ݾون ھَي۔ ‏21 جھڙَي نمُونَي اَي نِي ليئو، اَي نِي چاکو، اِيئي نَي ھاٿ نِي لگائو۔ ‏22 اَي اصُول ھانَ ݾيکايوڙَي باتون ختم ھوئي جاوڻ آݪَي شيون ھَي ڪيونڪہ اَي ݾجائِي اِنسون را ٺاھيوڙا اصُول ھَي۔ ‏23 اَي اصُول ݾُٺا تو لاگَي ھَي ڪيونڪہ اَي آپرِي ٺاھيوڙِي ڀگتي ڪرڻ، آپرَي ضرُورتون ڇوڙڻ ھانَ آپرو ݾَرير ڪاٻُو راکڻ رو ڪَي ھَي پڻ جِسموني خواھشون نَي ڪاٻُو راکڻ رَي ݾارُو اِيئون اصُولون رو ڪو ڀِي فائدو ڪونھي ھَي۔