ھدايتون
4
اِيئي رَي ڪري اي پيارَي وِشواسيون، ھُون ٿون ݾون پريم راکون ھون ھانَ مھنَي ٿون ڪڍي آوڻ رِي تموم گھڻِي ݾِڪ ھَي ڪيونڪہ ٿي مھارِي خُوشِي ھانَ مھارو تاج ھو۔ اي پيارون، پرڀُو ۾ اِيئج نمُونَي پڪا رو۔2 ٻائِي يوئوديا ھانَ ٻائِي سنتخِي، ھُون ٿونَي مِنٿ ڪرون ھون ڪہ پرڀُو ۾ ھيڪ ھوئڻ رَي ڪري ٿي آپت ۾ ھيڪ ھوئي جائو۔ 3 ھاوي، مھَي ڀيڙو شيوا ڪرڻ آݪا، ھُون ٿنَي مِنٿ ڪرون ھون ڪہ اُوئون ٻايون رِي مدد ڪر ڪيونڪہ اُوئون ڪليمينس ھانَ ٻيجَي شيوا ڪرڻ آݪَي ساٿيون ھانَ مھَي ڀيڙِي خُوشِي رِي خبر رو پرچار ڪرڻ ۾ تموم گھڻِي محنت ڪِي۔ اِيئون را نون زندگِي رَي ڪِتاب ۾ لِکيوڙا ھَي۔
4 پرميشوَر ۾ ھر ٽيم خُوش رو، ڀڙي ڪونھ ھون ڪہ خُوش رو۔
5 ٿونرو نِرمل من ݾجائِي مِنک ڏيکَي۔ ياد راکو، پرڀُو يسُوع آوڻ آݪو ھَي۔ 6 ڪَي ڀِي بات رو فِڪر نِي ڪرو پڻ جڏي پراٿنا ڪرو، تو شُڪر ڪري پراٿنائون ھانَ مِنٿ ايشوَر آگھي ڪرو۔ 7 تو پَڇي ايشوَر رو ݾُک جڪو اِنسونِي ݾمجھ ݾون ٻاھر ھَي، تو او ٿونرا من ھانَ خيال مَسيح يسُوع ۾ پڪا راکشَي۔
8 آخر ۾ اي وِشواسيون، جڪو باتون ݾاچَي ھَي، جڪو باتون عِزت رَي لائق ھَي، جڪو ضرُوري ھَي، جڪو پويتر ھَي، جڪو ݾجون نَي پسند ھَي، جڪو من نَي ڀلَي لاگَي ھَي مطلب اَي ھَي ڪہ جڪو نيڪِي ھانَ بکوڻ رَي باتون ھَي اُوئي ݾجَي باتون تي ڌھيون ڏيتا رو۔ 9 جڪو باتون ٿون مھَي ݾون ݾيکئَي، حاصل ڪيئَي، ݾُڻئَي جون مھَي ۾ ڏيٺَي ھَي اُوئون تي بيتا رو، تو ايشوَر جڪو ݾُک ݾون ڀريوڙو ھَي، ٿون ڀيڙو ريشَي۔
مدد رَي ݾارُو شُڪر
10 ھُون پرڀُو يسُوع ۾ تموم گھڻو خُوش ھون ڪہ اترَي ٽيم ݾون پَڇي ٿونَي مھارو فِڪر ھويو۔ بيشڪ ٿي پيل ڀِي مھارو فِڪر ڪرتا پڻ ٿونَي ڪڏي ڀِي موقعيو ڪونھي مِليو۔ 11 اِيئي رو مطلب اَي ڪونھي ڪہ ھُون آپرِي ضرُورت رَي ڪري ڪونھ پڙيو ڪيونڪہ مھَي ھر حال ۾ خُوش ريوَڻ ݾيکيو ھَي۔ 12 مھَي غريبي ھانَ اَميري ٻيئي ڏيٺَي ھَي، مھَي ھر بات ۾ ھانَ ھر حال ۾ ڍئو ڪري کاوڻ، بُوکو ريوَڻ، بڌڻ ھانَ گھٽڻ ݾيکيو ھَي۔ 13 پرڀُو يسُوع جڪو مھنَي طاقت ڏَي ھَي اُوئي ݾون ھُون ݾجَي باتون رو مُقابلو ڪري ݾگھون ھون۔ 14 پَڇي ڀِي ٿون ڀلو ڪيئو ڪہ مُصيبت ۾ مھَي ڀيڙا رھيا۔
15 اي فِلپي شھر رَي وِشواسيون، ٿونَي آپ خبر ھَي ڪہ خُوشِي رِي خبر رَي پرچار رَي شرُوع آݪَي ڏِنون ۾ جڏي ھُون مَڪدُونيا ݾون بَئير ھويو، تو ٿون ݾون ٽاݪ ڪَي ڀِي وِشواسي مَنڊلِي آݪون مھارِي مالِي مدد ڪونھي ڪِي۔ 16 جڏي ھُون ٿيسلينڪي شھر ۾ ھتو، تو اُوئي ٽيم مھارَي ضرُورتون پُورَي ڪرڻ رَي ݾارُو ٿون ھيڪ گُھمرو نا، پڻ ٻي گُھمرا مھارَي ݾارُو مدد ميلِي۔ 17 مھارِي اَي مرضِي ڪونھي ڪہ ٿي مھنَي دون ڏيتا رو پڻ اَي ڪہ ٿونرَي دون ڏيوَڻ ݾون ايشوَر ٿونَي تموم گھڻِي برڪت ڏَي۔ 18 مھَي ڪڍي ݾجو ڪئين ھَي پڻ ضرُورت ݾون وڌيڪ ھَي۔ جڪو شيون ٿون اِپفروديتُس رَي ھاٿون ميلئَي او مھارِي ضرُورت ݾون ڀِي وڌيڪ ھَي۔ ٿونرو دون خُوشبو آݪَي ٻَليدون آݪِي ڪار ھَي جڪو ايشوَر نَي پسند ھَي۔ 19 مھارو ايشوَر آپرَي مھما آݪَي خزونَي ݾون مَسيح يسُوع ۾ ٿونرِي ھر ھيڪ ضرُورت پُورِي ڪرشَي۔ 20 آپڻَي ايشوَر پِتا رِي بکوڻ ھميشا ھوتِي رَي۔ آمين۔
آخري جَئي پرڀُو رِي
21 ھر ھيڪ وِشواسي نَي مَسيح يسُوع ۾ جَئي پرڀُو رِي ڪھيا۔ جڪو ڀائي مھَي ڀيڙا ھَي او ڀِي ٿونَي جَئي پرڀُو را ڪَي ھَي۔ 22 ݾجائِي وِشواسي خاص ڪري قيصر رَي گھر آݪا ٿونَي جَئي پرڀُو را ڪَي ھَي۔
23 پرڀُو يسُوع مَسيح رِي ڪِرپا ٿونرِي آتما ڀيڙِي رَي۔