خُوشِي رِي خبر رو اُجاݪو
4
مھونَي ايشوَر رِي دايا ݾون خُوشِي رِي خبر رَي پرچار رو ڪوم مِليو ھَي، اِيئي رَي ڪري مھي ھِمت ڪونھي ھارتا۔ 2 پڻ مھون بي شرمِي آݪَي لِڪيوڙَي باتون ڇوڙي ڏينَي ھَي۔ نَڪو مھي چالاڪِي ݾون ڪوم ڪرتا ھانَ نَڪو ايشوَر رَي باتون بدلاوتا، پڻ ݾچائي ظاھر ڪري ايشوَر آگھي ھر ھيڪ مِنک رَي من ۾ آپرِي نيڪِي ظاھر ڪرون ھون۔ 3 پڻ جي مھورِي ݾُڻايوڙِي خُوشِي رِي خبر رَي پرچار تي پڙدو پڙيوڙو ھَي، تو رُگو مرڻ آݪون رَي ݾارُو ھَي۔ 4 يعني اُوئون وِشواس نِي راکڻ آݪون رَي ݾارُو جڪون رِي عقل نَي اِيئي دُنيا رَي ݾردار يعني شيطون اونڌا ڪري ڇوڙيا ھَي۔ اُوئي رِي مرضِي ڪونھي ڪہ مَسيح جڪو ايشوَر رو رُوپ ھَي، اُوئي رَي چمتڪار رَي بارَي ۾ خُوشِي رِي خبر رو اُجاݪو مِنکون تي چمڪَي۔ 5 ڪيونڪہ مھي آپرو نا، پڻ يسُوع مَسيح رو پرچار ڪرون ھون ڪہ اوج پرڀُو ھَي ھانَ آپرَي ݾارُو اَي ڪونھ ھون ڪہ يسُوع رَي ڪري مھي ٿونرا غُلوم ھون۔ 6 ايشوَر ڪھيو ڪہ، ”انڌارَي ۾ اُجاݪو چمڪَي۔“ اُوئي آپرو اُجاݪو آپڻَي من ۾ چمڪايو ھَي ڪہ آپي اُوئي رو اُجاݪو اوݪکون، جڪو يسُوع مَسيح رَي موڏَي تي چمڪَي ھَي۔مٽِي رَي ٺيڪرون ۾ خزونو
7 خُوشِي رِي خبر رَي نياپَي رو خزونو مٽِي رَي ٺيڪرون يعني آپڻَي ݾَرير ۾ راکيوڙو ھَي، اِيئي رَي ڪري اَي ظاھر ھووَي ڪہ اَي تموم گھڻِي قُدرت مھورِي نا، پڻ ايشوَر رَي طرفون ھَي۔ 8 مھي چوڌاري ڏُک تو برداش ڪرون ھون، پڻ ھِمت ڪونھي ھارتا، پريشون تو ھوئون ھون، پڻ نا اُميد ڪونھي ھوتا۔ 9 ڏُک تو ملَي ھَي، پڻ ايشوَر مھونَي ھيکلا ڪونھي ڇوڙتو۔ ماريا جائُون ھون، پڻ مرتا ڪونھي۔ 10 يعني مھي پرڀُو يسُوع رِي موت نَي ھر ٽيم آپ ڀيڙِي لي ڦِرون ھون ڪہ اُوئي رِي زندگِي مھورَي ݾَرير ݾون ڏيکيجَي۔ 11 ڪيونڪہ مھي جيتَي جِي پرڀُو يسُوع رَي ڪري ھر ٽيم موت رَي مُونھ ۾ رون ھون ڪہ پرڀُو يسُوع رِي زندگِي ڀِي مھورَي فانِي ݾَرير ݾون ڏيکيجَي۔ 12 پرڀُو يسُوع رو پرچار ڪرڻ رَي ڪري مھي آپ موت رَي خطرون ۾ رون ھون، اِيئي نمُونَي ٿونَي اُوئي تي وِشواس راکڻ ݾون اَمر جيوَن ملَي ھَي۔
13 مھون ۾ اوج وِشواس آݪِي آتما ھَي، جڪَي رَي بارَي ۾ پويتر شاستر ۾ لِکيوڙو ھَي ڪہ، ”مھَي وِشواس راکيو، اِيئي رَي ڪري ٻوليو۔“ اِيئي نمُونَي مھي ڀِي وِشواس راکڻ رَي ڪري ٻولون ھون۔ 14 ڪيونڪہ مھونَي خبر ھَي ڪہ جڪَي پرڀُو يسُوع نَي مُوئوڙون ݾون جيتو ڪيئو، اوج يسُوع ڀيڙا ھوئڻ رَي ڪري آپون ݾجون نَي جيتا ڪري آپ آگھي اُڀاڙشَي۔ 15 اَي ݾجَي شيون ٿونرَي فائدَي رَي ݾارُو ھَي ڪہ تموم گھڻَي مِنکون رَي ڪري ڪِرپا گھڻِي ھوتِي رَي ھانَ ايشوَر رِي بکوڻ رَي ݾارُو مِنک شُڪر ڪرڻ ۾ بڌتا جاوَي۔
وِشواس تي بيوَڻ
16 اِيئي رَي ڪري مھي ھِمت ڪونھي ھارتا، بيشڪ مھورو ݾَرير مِٽتو جاوَي پڙيو، پڻ تو ڀِي مھورِي آتما ھروز نُوئِي ھوتِي جاوَي ھَي۔ 17 جڪو ڏُک مھي ڏيکون پڙيا، او نِنيا ھانَ ڪئينڪہ ڏِنون را ھَي ھانَ او مھورَي ݾارُو اھڙو اُجاݪو پيدا ڪرَي ھَي، جڪو تموم گھڻو موٽو ھانَ ھميشا رَي ݾارُو ھَي۔ 18 اِيئي رَي ڪري مھي اِيئي ڏيکيجڻ آݪَي شيون تي ڌھيون ڪونھي لگاوتا، پڻ اَڻ ڏيٺوڙَي شيون تي، ڪيونڪہ ڏيکيجڻ آݪَي شيون ٿوڙَي ڏِنون رَي ھَي، پڻ اَڻ ڏيٺوڙَي شيون ھميشا رَي ݾارُو ھَي۔