نُوئَي وچن را شيواداري
3
ڪِي ٿونَي اِيئون لاگَي ھَي ڪہ مھي ڀڙي آپرِي بکوڻ ڪرون پڙيا؟ جون مھونَي ڪئين مِنکون آݪِي ڪار سفارشي خط ٿون ڪڍي لي آوڻ، جون ٿون ݾون ليوَڻ رِي ضرُورت ھَي؟ 2 نا، مھورو خط، تو ٿي آپ ھو، جڪو مھورَي من تي لِکيوڙو ھَي ھانَ اُوئي نَي ݾجائِي مِنک اوݪکَي ھَي ھانَ پڙھي ݾگھَي ھَي۔ 3 اِيئي بات ۾ ڪو ڀِي شَڪ ڪونھي ڪہ ٿي مَسيح را او خط ھو، جڪو مھون پرچار رَي وسيلَي لِکيو ھَي۔ او مَس ݾون نا، پڻ جيتَي ايشوَر رِي آتما ݾون لِکيوڙو ھَي۔ او پٿر رَي تڪتيون تي نا، پڻ موݾ رَي تڪتيون تي يعني مِنکون رَي من تي لِکيوڙو ھَي۔ 4 مھي اَي بات اِيئي رَي ڪري ڪئي ݾگھون ھون ڪہ مھي مَسيح رَي وسيلَي ايشوَر تي ڀروسو راکون ھون۔ 5 مھي آپ اِيئي لائق ڪونھي ڪہ اَي ڪئي ݾگھون ڪہ مھي اَي ڪوم ڪري ݾگھون ھون، پڻ مھورِي ڏاھپ ايشوَر رَي طرفون ھَي، 6 جڪَي مھونَي مَسيح رَي وسيلَي نُوئَي وچن را شيواداري ھوئڻ رَي ݾارُو چُونڊيا۔ مھي لِکيوڙَي وچن را نا، پڻ پويتر آتما را شيواداري ھون، ڪيونڪہ لِکيوڙَي وچن تي نِي بيوَڻ رِي سزا موت ھَي، پڻ نُوئَي وچن تي پويتر آتما زندگِي ڏَي ھَي۔ 7 جڏي او وچن جڪَي رِي سزا موت ھَي، پٿرون تي کوتريوڙو ھتو، تو ايشوَر رو اُجاݪو ظاھر ھويو، جڪو مُوسيٰ رَي موڏَي تي اُجاݪَي ڪار چمڪڻ لاگو۔ او اُجاݪو ھݪَي ھݪَي گھٽ ھوئڻ لاگو، تو ڀِي اِسرائيلي قوم اُوئي نَي چِٽائي جوئي ڪونھي ݾگھيا۔ 8 تو ڪِي پويتر آتما رَي وچن رو اُجاݪو اُوئي ݾون وڌيڪ ڪونھي ھووَي؟ 9 ڪيونڪہ جڏي ڏوھي ڪرڻ آݪو وچن اِترو اُجاݪَي آݪو ھتو، تو ڪِي ݾچائي آݪو وچن اُوئي ݾون وڌيڪ اُجاݪَي آݪو ڪونھي ھووَي؟ 10 حقيقت ۾ جڪو پيلڪو وچن اُجاݪَي آݪو ھتو، او نُوئَي اُجاݪَي رِي ڀيٽ ۾ ڪئين ڪونھي۔ 11 ڪيونڪہ جي او مِٽڻ آݪِي شئي اُجاݪَي آݪِي ھتِي، تو پَڇي اَي ھميشا ريوَڻ آݪِي شئي گھڻِي اُجاݪَي آݪِي ڪيئون ڪونھي ھووَي؟ 12 اِيئي رَي ڪري مھي اھڙِي اُميد رَي ڪري تموم گھڻِي دليرِي ݾون پرچار ڪرون ھون۔ 13 مھي مُوسيٰ آݪِي ڪار ڪونھي ھون، جڪَي آپرو مونڏو ڍڪيو ڪہ اِسرائيلي قوم او گھٽ ھوئڻ آݪو چمتڪار جوئي نِي ݾگھَي۔ 14 پڻ اُوئون را دِماگ بند ھوئي گيا، ڪيونڪہ آج توڻي وچن رو پِروڻو شاستر پڙھڻ رَي ٽيم اُوئون رَي من تي اوج پڙدو پڙيوڙو رَي ھَي ڪہ او ݾاچ نَي ݾمجَھي نِي۔ او پڙدو رُگو مَسيح تي وِشواس راکڻ ݾون اݪگو ھووَي ھَي۔ 15 ھاوي، آج توڻي جڏي ڀِي مُوسيٰ رو شاستر پڙھيو جاوَي ھَي، تو اُوئون رَي من تي پڙدو پڙيوڙو رَي ھَي۔ 16 پڻ جڏي ڀِي ڪيرو من پرميشوَر ڏيݾا ڦِرشَي، تو او پڙدو اݪگو ھوئي جاشَي۔17 پرميشوَر آتما ھَي ھانَ جيٿ ڀِي پرميشوَر رِي آتما ھَي، اوٿ پاپون ݾون آزادي ھَي۔ 18 ھمَي جڏي مھون ݾجون رَي موڏَي تي پڙدو اݪگو ھويو رو، تو پرميشوَر رو اُجاݪو آپون ۾ اِيئون ڏيکيجَي ھَي، جھڙَي نمُونَي آريݾِي ۾ مونڏو، تو اُوئي پرميشوَر رَي وسيلَي جڪو آتما ھَي، مھي ھݪَي ھݪَي اُجاݪَي آݪَي رُوپ ۾ بدليجتا جائُون ھون۔