ڪِرنٿيون رَي نون ٻيجو خط
جَئي پرڀُو رِي ھانَ پراٿنا
1
اَي خط مھَي پولُوس رَي طرفون ھَي، جڪو ايشوَر رِي مرضِي ݾون مَسيح يسُوع رو سنت ھون ھانَ ڀائي تيمٿيس رَي طرفون ھَي۔ اَي خط ڪِرنٿس شھر رِي وِشواسي مَنڊلِي ھانَ اَخيا صُوبَي رَي ݾجَي وِشواسيون رَي نون لِکيوڙو ھَي۔ 2 ٿونَي آپڻَي ايشوَر پِتا ھانَ پرڀُو يسُوع مَسيح رِي ڪِرپا ھانَ ݾُک مِلتو رَي۔ايشوَر رو شُڪر
3 آپڻَي پرڀُو يسُوع مَسيح رَي ايشوَر ھانَ پِتا رِي بکوڻ ھووَي، جڪو دايالُو پِتا ھانَ ھر نمُونَي رِي تسلِي ڏيوَڻ آݪو ايشوَر ھَي۔ 4 او آپون نَي ھر ھيڪ ڏُک ۾ تسلِي ڏَي ھَي ڪہ آپي اُوئي رِي ڏينوڙِي تسلِي رَي ڪري اُوئون نَي ڀِي تسلِي ڏيئون، جڪو ڪَي ڏُکون ۾ ھَي۔ 5 ڪيونڪہ جھڙَي نمُونَي مَسيح رَي پرچار رَي ڪري آپي تموم گھڻا ڏُک برداش ڪرون ھون، اِيئج نمُونَي مَسيح ۾ آپون نَي تموم گھڻِي تسلِي ملَي ھَي۔ 6 جي مھون تي ڏُک آوَي ھَي، تو او ٿونرِي تسلِي ھانَ مُگتي رَي ݾارُو ھَي ھانَ جي مھونَي تسلِي ملَي ھَي، تو او ڀِي ٿونرَي ݾارُو ھَي۔ او تسلِي ٿونَي صبر ڪرڻ ھانَ اُوئون ڏُکون نَي برداش ڪرڻ رِي ھِمت ڏَي ھَي، جڪو مھي ڀِي برداش ڪرون پڙيا۔ 7 مھونَي ٿون تي پڪو ڀروسو ھَي، ڪيونڪہ مھونَي خبر ھَي ڪہ جھڙَي نمُونَي ٿي مھورَي ڏُکون ۾ ڀيڙا ھو، اُوئيج نمُونَي تسلِي ۾ ڀِي ھو۔
8 اي وِشواسيون، مھورِي اَي مرضِي ھَي ڪہ ٿونَي اُوئون ڏُکون رَي بارَي ۾ ݾُڻائُون، جڪو مھون تي آسيا صُوبَي ۾ آيا ھتا۔ او ڏُک اِترا تو گھڻا ھتا ڪہ مھورِي سَھپ ݾون ٻاھر ھتا۔ او اِترا تو گھڻا ھتا ڪہ مھورَي جيتَي ريوَڻ رِي ڪو ڀِي اُميد ڪونھي ھتِي۔ 9 حقيقت ۾ مھونَي مھورِي موت رو پڪو ڀروسو ھتو۔ اَي اِيئي رَي ڪري ھويو ڪہ مھي آپرو آپ تي ڀروسو نِي راکون، پڻ ايشوَر تي ڀروسو راکون، جڪو مُوئوڙا جيتا ڪرَي ھَي۔ 10 اُوئي مھونَي موت رَي خطرَي ݾون بچايا ھَي ھانَ بچاوتو رَي ھَي ھانَ اُميد ھَي ڪہ او آوڻ آݪَي ٽيم ۾ ڀِي بچاوتو ريشَي۔ 11 جي ٿي ڀيڙا ھوئي مھورَي ݾارُو پراٿنا ڪرو، تو اُوئون پراٿنائون رَي ڪري ايشوَر مھون تي ڪِرپا ڪرشَي ھانَ مھونَي بچاشَي ھانَ مھورَي ڪري تموم گھڻا مِنک ايشوَر رو شُڪر ڪرشَي۔
سفر رو منصُوبو بدلاوڻ
12 مھونَي مھورِي دِل رِي گواھِي تي بڏائو ھَي ڪہ مھي دُنيا ۾ ھانَ خاص ڪري ٿون ڀيڙا آپرَي آڇَي اُوجݪَي من ھانَ ݾچائي ݾون بُوئا ھون، جڪو ايشوَر رَي طرفون ھَي۔ مھون اَي آپرِي اِنسونِي عقل ݾون نا، پڻ ايشوَر رِي ڪِرپا ݾون ڪيئو ھَي۔ 13 مھي ٿونَي اھڙَي باتون ڪونھي لِکتا، جڪو ٿي پڙھي جون ݾمجھي نِي ݾگھو ھانَ مھنَي اُميد ھَي ڪہ ٿي آخر توڻي پُورَي نمُونَي ݾمجھي جاشو، 14 بيشڪ ھڻون ٿي ݾجو ڪئين ڪونھي ݾمجھتا۔ جھڙَي نمُونَي مھونَي ٿون تي بڏائو ھَي، اُوئيج نمُونَي ٿي ڀِي آپڻَي پرڀُو يسُوع رَي آوڻ آݪَي ڏِن تي مھون تي بڏائو ڪرشو۔
15 مھنَي اِيئي بات تي پُورو ڀروسو ھتو، اِيئي رَي ڪري مھارِي مرضِي ھتِي ڪہ ھُون پيل ٿون ڪڍي آئُون ڪہ ٿونَي ڀڙي برڪت ملَي۔ 16 پَڇي ٿون ݾون ھوئي مَڪدُونيا صُوبَي ڏيݾا جائُون ھانَ اوٿ ݾون پاڇو ٿون ڪڍي آئُون۔ پَڇي ٿي مھنَي اوٿ ݾون يھُوديا صُوبَي ڏيݾا بَئير ڪريا۔ 17 ڪِي ٿي اَي ݾمجھو ھو ڪہ مھَي جڪو اِرادو ڪيئو ھتو، او ھرُوڀرُو ڪيئو ھتو؟ ڪِي ھُون دُنياوِي مِنکون آݪِي ڪار ڪرون ھون، جڪو ڪڏي ھاوي ڪرون ھانَ ڪڏي نا؟ 18 جھڙَي نمُونَي ايشوَر ݾاچو ھَي، اُوئيج نمُونَي مھورِي بات ڀِي ݾاچِي ھَي ڪہ جڏي مھي ھاوي ڪونھ، تو مطلب ھاوي ھانَ نا ڪونھ، تو مطلب نا ھَي۔ 19 ڪيونڪہ ايشوَر رو ڏيڪرو يسُوع مَسيح، جڪَي رو پرچار مھَي سِلوانُس ھانَ تيمٿيس ڀيڙو ٿون ۾ ڪيئو ھَي، اُوئي ۾ ايشوَر ڪڏي ڀِي ھاوي جون نا، ڪونھي ڪِي، پڻ ھميشا ھاوي ڪِي ھتِي۔ 20 ڪيونڪہ ايشوَر را جِترا ڀِي واعدا ھَي، او ݾجائِي مَسيح ۾ ھاوي ھَي۔ اِيئي رَي ڪري مھي مَسيح ۾ آمين ڪونھ ھون ڪہ ايشوَر رِي بکوڻ ھووَي۔ 21 او ايشوَر ھَي جڪو مھورو واسطو مَسيح ۾ ٿون ڀيڙو پڪو راکَي ھَي، جڪَي آپون نَي چُونڊيا ھَي۔
22 اُوئي آپڻَي من تي ٺَپو ھڻيو، جڪو ثابُوتِي ھَي ڪہ آپي اُوئي را ھون ھانَ اُوئي آپرو پويتر آتما آپڻَي من ۾ ڏي زمونت ڏينِي ھَي ڪہ او آپرَي ڪيئوڙَي واعدَي تي ݾجَي برڪتون ڏيشَي۔ 23 ايشوَر گواھ ھَي ڪہ ھُون ڪِرنٿس شھر ۾ اِيئي رَي ڪري ڪونھي آيو، ڪيونڪہ مھارِي مرضِي ڪونھي ھتِي ڪہ ھُون ٿونَي ڇينڀي ڪو ڏُک ڏيئون۔ 24 مھورِي مرضِي ڪونھي ھَي ڪہ مھي ٿون تي وِشواس رَي بارَي ۾ حُڪم ھلائُون۔ مھونَي خبر ھَي ڪہ ٿي آپرَي وِشواس ۾ پڪا ھو ھانَ مھي ٿونرِي خُوشِي ۾ ٿون ڀيڙا ھون۔