رُوميون 14

وِشواسيون تي الزوم لگاوڻ

جڪون رو وِشواس گھٽ ھَي، اُوئون نَي خُوشِي ݾون وِشواسي مَنڊلِي ۾ شامل ڪرو، پڻ اُوئون ݾون اجايو بَحث نِي ڪرو ڪہ اُوئون نَي ڪِي ڪرڻ کپَي، جون ڪِي نا۔ ‏2 جي ھيڪَي مِنک رو وِشواس ھَي ڪہ او ھر شئي کائي ݾگھَي ھَي، پڻ ٻيجَي رو وِشواس گھٽ ھَي ڪہ او رُگو ݾاگ کاشَي۔ ‏3 جڪو ھر ھيڪ شئي کاوَي ھَي، او ٻيجَي نَي گھٽ نِي ݾمجَھي۔ اِيئي نمُونَي جڪو ڪونھي کاوتو، تو او اُوئي نَي گھٽ نِي ݾمجَھي، ڪيونڪہ ايشوَر ٻيئون نَي قبُول ڪيئو ھَي۔ ‏4 تُو ڪُڻ ھَي جڪو ٻيجَي رَي نوڪر تي الزوم لگاوَي ھَي؟ اُوئي رو مالڪ آپ فيصلو ڪرشَي ڪہ او صحيح ھَي، جون نا۔ او اوج ڪرشَي جون اُوئي رَي مالڪ رِي مرضِي ھَي، ڪيونڪہ مالڪ اُوئي نَي اِيئي لائق ݾمجَھي ھَي۔

‏5 اِيئي نمُونَي ڪئينڪہ مِنک ݾمجَھي ھَي ڪہ ھيڪ ڏِن باقي ڏِنون ݾون گھڻو خاص ھَي، پڻ ٻيجا ݾمجَھي ھَي ڪہ ݾجائِي ڏِن برابر ھَي۔ ھر ھيڪ آپرَي آپرَي خيال ۾ پڪو رَي۔ ‏6 جي ڪُڻ ڪَي ڏِن نَي خاص ݾمجَھي ھَي، تو او پرڀُو رَي ݾارُو ݾمجَھي ھَي۔ جي ڪُڻ ڪئين کاوَي ھَي، تو او ڀِي پرڀُو رَي ݾارُو کاوَي ھَي، ڪيونڪہ او ايشوَر رو شُڪر ڪرَي ھَي ھانَ جي ڪُڻ ڪونھي کاوتو، تو او ڀِي پرڀُو رَي ݾارُو ڪونھي کاوتو ھانَ ايشوَر رو شُڪر ڪرَي ھَي۔ ‏7 آپون ۾ ڪو ڀِي آپرَي ݾارُو جيتو ڪونھي ريتو ھانَ نَڪو آپرَي ݾارُو مرتو۔ ‏8 جي آپي جيتا ھون، تو پرڀُو رَي ݾارُو ھانَ جي مرون ھون، تو ڀِي پرڀُو رَي ݾارُو۔ اِيئي رَي ڪري آپڻو جيتو ريوَڻ ھانَ مرڻ پرڀُو رَي ݾارُو ھَي۔ ‏9 مَسيح اِيئي رَي ڪري مُوئو ھانَ جيتو ھويو ڪہ او جيتون ھانَ مُوئوڙون، ٻيئون رو پرڀُو ھووَي۔ ‏10 پَڇي تُو ڪيئون آپرَي ڀائي تي الزوم ھڻَي ھَي ھانَ ڪيئون اُوئي رَي وِشواس نَي گھٽ ݾمجَھي ھَي؟ ياد راک، آپي ݾجائِي ايشوَر رِي عدالت ۾ حاضر ھوشون ھانَ او آپڻو فيصلو ڪرشَي۔ ‏11 جون شاستر ۾ لِکيوڙو ھَي ڪہ،

”پرميشوَر ڪَي ھَي ڪہ،

ھُون آپرو ݾونݾ ليئون ھون،

ھر ھيڪ مِنک مھَي آگھي آپرا گوڏا کوڙشَي

ھانَ ݾجائِي مھارِي بکوڻ ڪرشَي۔“

‏12 اِيئي نمُونَي آپون ۾ ھر ھيڪ مِنک ايشوَر نَي آپرو حِساب ڏيشَي۔

ھيڪَي ٻيجَي تي الزوم نِي لگائو

‏13 ھمَي آپي ھيڪَي ٻيجَي تي الزوم لگاوڻ ڇوڙون ھانَ اَي فيصلو ڪرون ڪہ ڪو ڀِي مِنک آپرَي ڀائي رِي اھڙِي بات نِي ڪرَي جڪَي ݾون اُوئي رو وِشواس خراب ھووَي ھانَ او پاپ ڪرَي۔ ‏14 مھنَي خبر ھَي، پڻ پرڀُو يسُوع ۾ مھنَي ڀروسو ھَي ڪہ ڪو ڀِي شئي آپرو آپ ۾ پليت ڪونھي۔ او اُوئي رَي ݾارُو پليت ھَي، جڪو اُوئي نَي پليت ݾمجَھي ھَي۔ ‏15 جي ٿارَي کاوڻ رَي ڪري ٿارَي ڀائي نَي ڏُک ملَي، تو ٿَي ۾ ڪو ڀِي پريم ڪونھي۔ تُو کاوڻ پيئڻ ݾون اُوئي رو وِشواس خراب نِي ڪر، جڪَي رَي پريم ۾ مَسيح ٻَليدون ھويو۔ ‏16 اِيئون نِي ھووَي ڪہ جڪو شئي ٿارَي ݾارُو ݾُٺِي ھَي، ٻيجا اُوئي نَي خراب ݾمجَھي۔ ‏17 ڪيونڪہ ايشوَر رِي بادشاھي رو مقصد کاوڻ پيئڻ تي ڪونھي، پڻ نيڪِي، صُلح ھانَ اُوئي خُوشِي ݾون ھَي جڪو پويتر آتما ڏَي ھَي۔ ‏18 جي ٿي اِيئي نمُونَي مَسيح رِي شيوا ڪرشو، تو ايشوَر ٿونَي پسند ڪرشَي ھانَ مِنک ڀِي ٿونرِي نيڪِي ڪرشَي۔

‏19 ھمَي آئو آپي اھڙا ڪوم ڪرون جڪَي ݾون صُلح ھانَ ھيڪَي ٻيجَي رِي ترقي ھووَي۔ ‏20 ٿي کاوڻ رَي ڪري ايشوَر رو ڪوم خراب نِي ڪرو۔ ياد راکو، کاوڻ رَي ݾجَي شيون حِلال ھَي، پڻ اھڙَي شيون کاوڻ صحيح ڪونھي جڪَي ݾون ڪيرو وِشواس خراب ھووَي۔ ‏21 ٿونرَي ݾارُو ݾُٺو اَي ھَي ڪہ نِي موݾ کائو، نِي انگُورون رو رس پيئو ھانَ نِي اھڙو ڪوم ڪرو جڪَي ݾون ٿونرَي ڀائي رو وِشواس خراب ھووَي۔ ‏22 اِيئون باتون رَي بارَي ۾ ٿونرو جڪو ڀِي وِشواس ھَي، او ٿونرَي ھانَ ايشوَر رَي بِچ ۾ ھَي۔ ڌن ھَي او مِنک جڪو آپرو آپنَي اُوئون ڪوم رَي ڪري ڏوھي ڪونھي ڪرتو، جڪَي نَي او جائز ݾمجَھي ھَي۔ ‏23 جي ڪو مِنک ڪَي شئي رَي بارَي ۾ شَڪ ڪرَي، پڻ تو ڀِي کاوَي ھَي، تو او ڏوھي ھوشَي، ڪيونڪہ او آپرَي وِشواس رَي خلاف ڪرَي ھَي۔ اھڙو ڪوم جڪَي رَي بارَي ۾ وِشواس ھَي ڪہ او صحيح ڪونھي، تو اَي پاپ ھَي۔