حڪُومت ھانَ مھورِي ذميوارِي
13
ھر ھيڪ رو فرض ھَي ڪہ حڪُومت رِي بات منَي، ڪيونڪہ ڪو ڀِي اھڙِي حڪُومت ڪونھي جڪو ايشوَر رَي طرفون نِي ھووَي۔ جڪو ڀِي حڪُومتون ھَي، او ايشوَر رَي طرفون ھَي۔ 2 اِيئي رَي ڪري جڪو ڀِي حڪُومت رَي خلاف ھَي، تو او ايشوَر رَي قانُون رَي خلاف ھَي۔ خلاف بات ڪرڻ آݪون نَي سزا ملشَي۔ 3 ݾُٺا ڪوم ڪرڻ آݪَي نَي نا، پڻ خراب ڪوم ڪرڻ آݪَي نَي حاڪم رو ٻِي ھووَي ھَي۔ اِيئي رَي ڪري جي ڪُڻ بِنا ٻِي زندگِي گُذارَي ھَي، تو پَڇي او ݾُٺا ڪوم ڪرَي۔ اِيئي نمُونَي اُوئي رِي بکوڻ ھوشَي۔ 4 او ٿونرِي ڀلائي رَي ݾارُو ايشوَر رو شيواداري ھَي۔ پڻ جي ڪُڻ بُڇڙائي ڪرشَي، تو اُوئي نَي ٻيئاجڻ کپَي، ڪيونڪہ ايشوَر ڪڍي سزا ڏيوَڻ رِي طاقت ھَي۔ او ايشوَر رو شيواداري ھَي ڪہ ايشوَر آپرَي ڪھر ݾون بُڇڙون نَي سزا ڏَي۔ 5 اِيئي رَي ڪري ضرُوري ھَي ڪہ نِي رُگو سزا ݾون بچڻ رَي ݾارُو، پڻ من ݾون حڪُومت رِي بات منو۔6 اِيئي نمُونَي ٿي اُوئون نَي ٽيڪس ڀِي ڏيئو ھو، ڪيونڪہ او ݾجو ڪئين ھر ٽيم ايشوَر رِي شيوا رَي ݾارُو ڪرَي ھَي۔ 7 ھر ھيڪ نَي اُوئون رو حق ڏيئو۔ ٽيڪس آݪَي نَي ٽيڪس ھانَ ناڪَي آݪَي نَي ناڪو۔ جڪَي ݾون ٻيئاجڻ کپَي، اُوئي ݾون ٻيئاجو۔ جڪَي رِي عِزت ڪرڻ کپَي، اُوئي رِي عِزت ڪرو۔
ھيڪَي ٻيجَي رِي ذميوارِي
8 ھيڪَي ٻيجَي رَي پريم ݾون ٽاݪ ڪَي ڀِي بات را قرضِي نِي ھوئو، ڪيونڪہ جڪو ٻيجون ݾون پريم ڪرَي ھَي، اوج شريعت پُورِي ڪرَي ھَي۔ 9 ڪيونڪہ اَي ݾجائِي حُڪم ڪہ،
”زنا نِي ڪر، خُون نِي ڪر، چورِي نِي ڪر، لالچ نِي ڪر۔“
اِيئي ݾون ٽاݪ ٻيجا جِترا ڀِي حُڪم ھَي، او ݾجائِي اِيئي ھيڪِي حُڪم ۾ آئي جاوَي ھَي ڪہ،
”آپرَي پاڙَي آݪَي ݾون آپ جِترو پريم ڪر۔“
10 جڪو آپرَي پاڙَي آݪَي ݾون پريم راکَي ھَي، او اُوئي ݾون بُرائي ڪونھي ڪرتو۔ اِيئي رَي ڪري پريم راکڻ، شريعت پُورِي ڪرڻ ھَي۔
11 ٿي ٽيم نَي اوݪکو ھانَ اِيئوج ڪرو، ڪيونڪہ اُونگ ݾون جاگڻ رو ٽيم آيو رو۔ آپڻِي مُگتي رو ڏِن اُوئي ٽيم ݾون وڌيڪ نيڙو ھَي، جڏي آپي وِشواسي ھويا ھتا۔ 12 رات ختم ھوئڻ آݪِي ھَي ھانَ مُگتي رو ڏِن نيڙو ھَي۔ اِيئي رَي ڪري آپي انڌارَي آݪا ڪوم ڇوڙي، اُجاݪَي آݪا ھٿيار ٻونڌون۔ 13 آئو آپي اھڙَي مِنکون آݪِي ڪار رون، جڪو اُجاݪَي ۾ بَي ھَي ڪہ ݾجائِي مِنک ڏيکَي۔ انڌارَي ۾ بيوَڻ آݪون جھڙا نِي ھوئون، جڪو عياشِي، شراب پيئڻ، زنا، بُڇڙائي، جھيڙو ھانَ ڪِروڌ ۾ رَي ھَي۔ 14 ٿي آپرا ݾَرير خراب خواھشون پُورَي ڪرڻ رَي ݾارُو اِستعمال نِي ڪرو۔ پڻ پرڀُو يسُوع مَسيح جھڙِي زندگِي گُذارو۔