رُوميون 12

آپرِي زندگِي ايشوَر رِي شيوا ۾

اي وِشواسيون، ايشوَر ٿون تي دايا ڪِي ھَي، اِيئي رَي ڪري ھُون ٿونَي مِنٿ ڪرون ھون ڪہ آپرا ݾَرير ايشوَر رَي نون را ڪرو ھانَ ٿونرَي زندگَي بي عيب ٻَليدون آݪِي ڪار ھووَي، جڪو اُوئي نَي پسند آوَي۔ اُوئي رِي ڀگتي رو صحيح طريقو اَئيج ھَي۔ ‏2 اِيئي دُنيا رَي مِنکون آݪِي ڪار نِي بو، پڻ آپرِي ݾوچ بدلائو ھانَ ايشوَر نَي آپرِي زندگِي ۾ ڪوم ڪرڻ ڏيئو۔ تو پَڇي ٿي ايشوَر رِي ݾُٺِي، پسند آوڻ آݪِي ھانَ پُورِي مرضِي اوݪکي ݾگھشو۔

‏3 ايشوَر رِي مھَي تي ڪِرپا رَي ڪري ھُون ݾجون نَي ڪونھ ھون ڪہ جِترو ݾمجھڻ کپَي اُوئي ݾون وڌيڪ ڪو ڀِي آپنَي نِي ݾمجَھي۔ ھر ھيڪ آپنَي اِترو ݾمجَھي، جِترو ايشوَر اُوئي نَي وِشواس ڏينو ھَي۔ ‏4 جھڙَي نمُونَي آپڻَي ݾَرير ۾ تموم گھڻا عُضوا ھَي ھانَ ھر ھيڪ رو آپرو آپرو ڪوم ھَي۔ ‏5 اِيئي نمُونَي آپي جڪو تموم گھڻا ھون، مَسيح ۾ ھيڪ ݾَرير ھانَ آپت ۾ ھيڪَي ٻيجَي را عُضوا ھون۔ ‏6 ايشوَر آپرِي ڪِرپا ݾون آپون نَي فرق فرق نعمتون ڏينَي ھَي۔ اِيئي رَي ڪري جڪَي نَي اگڪٿِي ڪرڻ رِي نعمت ملِي ھَي، تو او آپرَي وِشواس ݾون اگڪٿِي ڪرَي۔ ‏7 جي ايشوَر رِي شيوا رِي نعمت ملِي ھَي، تو شيوا رو ڪوم ڪرتو رَي۔ جي ݾيکاوڻ رِي نعمت ملِي ھَي، تو ݾيکاوتو رَي۔ ‏8 جي حوصلو ڏيوَڻ رِي نعمت ملِي ھَي، تو حوصلو ڏَي۔ جي ٻيجون رِي مدد ڪرڻ رِي نعمت ملِي ھَي، تو دِل کولي مدد ڪرَي۔ جي اَگووڻِي ڪرڻ رِي نعمت ملِي ھَي، تو ذميوارِي ݾون اَگووڻِي ڪرَي۔ جي دايا ڪرڻ رِي نعمت ملِي ھَي، تو خُوشِي ݾون دايا ڪرَي۔ ‏9 ٿونرو پريم ٺَگِي آݪو نِي ھووَي، پڻ ݾاچو ھووَي۔ بُڇڙائي ݾون نفرت ڪرو۔ ھميشا ڀلائي ڪرو۔ ‏10 ھيڪَي ٻيجَي ݾون ڀايون جھڙو پريم ڪرو۔ ٻيجون رِي آپ ݾون وڌيڪ عِزت ڪرو۔ ‏11 ڪڏي ڀِي سُست نِي ھوئو، پڻ جِي ݾون پرڀُو رِي شيوا رو ڪوم ڪرتا رو۔ ‏12 اُميد ۾ خُوش رو۔ ڏُک ۾ صبر ڪرو۔ ھر ٽيم پراٿنا ڪرتا رو۔ ‏13 جڏي وِشواسي ڪَي شئي را مُحتاج ھووَي، تو اُوئون رِي مدد ڪرو۔ ميموڻِي ڪرتا رو۔

‏14 جڪو ٿونَي ݾتاوَي، اُوئون رَي ݾارُو ايشوَر ݾون برڪت مونگو۔ اُوئون نَي پِٽو نِي، پڻ اُوئون رَي ݾارُو پراٿنا ڪرو۔ ‏15 خُوشِي ڪرڻ آݪون ڀيڙا خُوشِي ڪرو ھانَ روئڻ آݪون ڀيڙا روئو۔ ‏16 ھيڪَي ٻيجَي رِي ٻڌِي ۾ رو۔ آپنَي موٽا نِي ݾمجھو، پڻ غريبون ڀيڙا اُٺو ٻيݾو۔ آپرو آپنَي عقل آݪا نِي ݾمجھو۔ ‏17 بُڇڙائي رَي بدلَي بُڇڙائي نِي ڪرو۔ اوج ڪرو جڪو ݾجون رَي ݾارُو ڀلو ھَي۔ ‏18 جِترو ڀِي ھووَي ݾجون ݾون صُلح ۾ بو۔ ‏19 اي عزيزون، ڪڏي ڀِي بدلو نِي ليئو، پڻ ايشوَر تي ڇوڙو ڪہ اوج سزا ڏَي۔ ڪيونڪہ شاستر ۾ لِکيوڙو ھَي ڪہ،

”پرميشوَر ڪھيو ڪہ،

بدلو ليوَڻ مھارو ڪوم ھَي۔

بدلو ھُون لئين۔“

‏20 اِيئي ݾون ٽاݪ،

”جي ٿارو دُشمن بُوکيو ھووَي، تو اُوئي نَي ٻاٽِي کَݪا۔

جي تِرݾيو ھووَي، تو اُوئي نَي پوڻي پياڙ۔

ڪيونڪہ جي تُو اِيئون ڪرِي، تو او شرميدو ھوشَي۔“

‏21 بُڇڙائي آگھي ھار نِي منو، پڻ ڀلائي ڪري بُڇڙائي نَي ھرائو۔