اِسرائيل قوم تي ايشوَر رِي دايا
11
ھمَي ھُون پُوڇون ھون ڪہ، ”ڪِي ايشوَر آپرَي مِنکون يعني اِسرائيليون نَي ڦِٽا ڪيئا را؟“ ڪڏي ڀِي نا۔ ھُون آپ اِسرائيلي ھون ھانَ اڀراھيم رِي نسل ھانَ بنيامين رَي قبيلَي رو ھون۔ 2 ايشوَر آپرَي مِنکون نَي ڪونھي پونتريو، جڪون نَي اُوئي پيل ݾون چُونڊيا ھتا۔ ڪِي ٿونَي خبر ڪونھي ڪہ شاستر ۾ ايلياھ رَي بارَي ۾ ڪِي لِکيوڙو ھَي؟ جڏي اُوئي اِسرائيليون رَي بارَي ۾ ايشوَر نَي دانھن ڏينِي ڪہ،3 ”اي پرميشوَر، اُوئون ٿارا نبِي ماري ڇوڙيا
ھانَ ٿارَي ٻَليدون رَي جگھائون بِکوري ڇوڙئَي۔
ھمَي رُگو ھُونج بچو ھون
ھانَ ھمَي او مھنَي ڀِي مارڻ رَي ݾارُو ڪرَي ھَي۔“
4 تو ڪِي ايشوَر اُوئي نَي اَي بݪتِي ڪونھي ڏينِي ڪہ،
”مھَي آپرَي ݾارُو ݾات ھزار مِنک بچايا ھَي،
جڪو بعل ڏيوتا آگھي جُھڪيا ڪونھي۔“
5 اِيئي نمُونَي آج ڀِي ڪئينڪہ اِسرائيلي بچي گيا ھَي، جڪون نَي ايشوَر آپرِي ڪِرپا ݾون چُونڊيا ھَي۔ 6 ايشوَر اُوئون نَي اُوئون رَي ڪومون رَي ڪري نا، پڻ آپرِي ڪِرپا ݾون چُونڊيا ھَي۔ جي اِيئون نِي ھووَنت، تو اُوئي رِي ڪِرپا رو ڪو ڀِي فائدو ڪونھي ھتو۔ 7 اِيئي رو مطلب ھَي ڪہ اِسرائيلي قوم آݪا او شئي جوئي ڪونھي ݾگھيا، جڪَي رِي اُوئون نَي تلاش ھتِي۔ او رُگو اُوئون نَي ملِي جڪو ايشوَر را چُونڊيوڙا ھتا، اُوئون ݾون ٽاݪ باقي ݾجون را من ڪاٺا ڪري ڇوڙيا۔ 8 جون شاستر ۾ لِکيوڙو ھَي ڪہ،
”ايشوَر اُوئون را من ڪاٺا ڪري ڇوڙيا،
آج رَي ڏِن توڻي اُوئون رَي اونکَي بند ھَي ڪہ او جوئي نِي ݾگھَي
ھانَ اُوئون را ڪونَ بند ھَي ڪہ او ݾُڻي نِي ݾگھَي۔“
9 دائُود ڀِي ڪَي ھَي ڪہ،
”اُوئون رو کاوڻ پيئڻ اُوئون رَي ݾارُو جاݪ ھانَ ڦاݾِي ھوشَي،
ڪہ او ٿاٻڙيجَي ھانَ اُوئون نَي سزا ملَي۔
10 او اونکيون ݾون اونڌا ھوئي جاوَي ڪہ او جوئي نِي ݾگھَي،
ھانَ اُوئون را پُٺا تڪليف رَي ڪري جُھڪي جاوَي۔“
11 ھمَي ھُون پُوڇون ھون ڪہ ڪِي اِسرائيلي ٿاٻڙيجي ھميشا رَي ݾارُو کِريا را؟ ڪڏي ڀِي نا۔ اُوئون رَي کِرڻ رَي ڪري ٻيجَي قومون نَي مُگتي ملِي ھَي ڪہ اَي جوئي اُوئون نَي ڪئين شرم آوَي۔ 12 جڏي اِسرائيليون رَي کِرڻ رَي ڪري ݾجِي دُنيا نَي فائدو ھويو ھَي ھانَ اُوئون رَي گھٽ ھوئڻ رَي ڪري ٻيجَي قومون بڌي گئَي، تو اِسرائيليون رو پرڀُو يسُوع تي وِشواس راکڻ رَي ڪري ٻيجا ڪِترا گھڻا بڌي جاشَي؟
ٻيجَي قومون رَي ݾارُو مُگتي
13 اي ٻيجِي قوم آݪون، ھمَي ھُون ٿونَي ڪونھ ھون، ڪيونڪہ ھُون ٿون ۾ پرچار ڪرڻ رَي ݾارُو ميليوڙو ھون ھانَ ھُون آپرِي اِيئي شيوا رَي ڪوم تي بڏائو ڪرون ھون۔ 14 ھوئي ݾگھَي ھَي ڪہ مھارَي اِيئي ڪوم رَي ڪري مھارِي قوم نَي غيرت آوَي ھانَ اُوئون ۾ ڪئينڪہ مِنکون نَي مُگتي ملَي۔ 15 جڏي ايشوَر اِسرائيليون نَي رد ڪيئا، تو دُنيا نَي ايشوَر ݾون صُلح رو موقعيو مِليو، تو پَڇي اُوئون رو ڀڙي قبُول ڪرڻ ڪھڙو ھوشَي؟ او اِيئون ھوشَي جھڙو ڪو مُوئوڙون ݾون جيتو ھووَي۔ 16 اِيئي رَي ڪري اِسرائيليون رَي ڪري ٻيجِي قوم آݪا ڀِي پويتر ھوئي جاوَي ھَي۔ ڪيونڪہ جي ڪُڻ پيلڪِي پوک رَي آٽَي رِي ٻاٽِي گھڙي ايشوَر رَي نون رِي ڪرَي ھَي، تو باقي گويوڙو آٽو ڀِي پويتر ھوئي جاوَي ھَي۔ اِيئي نمُونَي جي بَڻ رِي پاݪ ايشوَر رَي نون رِي ھَي، تو اُوئي رَي ٽاݪَي ڀِي پويتر ھوئي جاوَي ھَي۔ 17 اِسرائيلي قوم جڪو لگايوڙَي زيتُون رَي بَڻ آݪِي ڪار ھَي، اُوئي رَي ڪئينڪہ ٽاݪَي توڙي ڇوڙئَي ھانَ اُوئون رِي جگھا تي جھنگلِي زيتُون را ٽاݪ جوڙي ڇوڙيا۔ ٿي ٻيجِي قوم آݪا اُوئي جھنگلِي زيتُون رَي ٽاݪيون آݪِي ڪار ھو، جڪو جوڙيا گيا ڪہ او اُوئي زيتُون رَي بَڻ رِي پاݪ ھانَ رس ۾ شامل ھوئي جائو۔ 18 پڻ ٿي آپرو آپنَي اُوئي توڙيوڙَي ٽاݪيون ݾون موٽا نِي ݾمجھو، پڻ اَي بات ياد راکو، ٿي رُگو ٽاݪَي ھو، ڪيونڪہ ٿي پاݪ نَي نا، پڻ پاݪ ٿونَي ݾنڀالَي ھَي۔ 19 بيشڪ، ٿي اِيئون ڪشو ڪہ، ”اَي ٽاݪَي اِيئي رَي ڪري توڙئَي گئَي ڪہ مھي جُڙي جائُون۔“ 20 ھاوي، پڻ ياد راکو، او ٽاݪَي اِيئي رَي ڪري توڙئَي، ڪيونڪہ اُوئون وِشواس ڪونھي راکيو ھانَ ٿونَي اِيئي رَي ڪري لگايا، ڪيونڪہ ٿون وِشواس راکيو۔ اِيئي رَي ڪري ٿي بڏائو نِي ڪرو، پڻ ٻيئاجتا رو، 21 ڪيونڪہ جي ايشوَر اَصل ٽاݪيون نَي معاف ڪونھي ڪيئو، تو ٿونَي ڀِي معاف ڪونھي ڪرَي۔ 22 جوئو، ايشوَر ڪِترو مھربون ھانَ سخت ھَي۔ او اُوئون رَي ݾارُو سخت ھَي جڪو ڀٽڪيوڙا ھَي، پڻ جي ٿي اُوئي رِي مھربونِي تي وِشواس راکو، تو او ٿون تي مھربون ھَي، نِي تو ٿي ڀِي ٽاݪيون آݪِي ڪار توڙيا جاشو۔ 23 جڏي اِسرائيلي وِشواس راکشَي، تو اُوئون نَي ڀِي ٽاݪيون آݪِي ڪار جوڙيا جاشَي، ڪيونڪہ ايشوَر اُوئون نَي اُوئي بَڻ ۾ جوڙڻ رِي طاقت راکَي ھَي۔ 24 ٿي جڪو جھنگلِي زيتُون را ٽُوٽوڙا ٽاݪ ھو اُوئي زيتُون ۾ جوڙيا گيا ھو، تو پَڇي جڪو ٽاݪَي اَصلي ھَي، او تو وڌيڪ ݾَوَلَي نمُونَي اُوئي زيتُون رَي بَڻ ۾ جوڙئَي جاشَي۔
ݾجون تي ايشوَر رِي دايا
25 اي وِشواسيون، مھارِي مرضِي ھَي ڪہ ٿونَي اُوئي ڀيد رَي بارَي ۾ خبر پڙَي، اِيئي رَي ڪري ٿي آپرو آپ تي بڏائو نِي ڪرو۔ او ڀيد اَي ھَي ڪہ ڪئينڪہ اِسرائيليون را من اُوئي ٽيم توڻي ڪاٺا ريشَي، جترِي توڻي ٻيجَي قومون ايشوَر ڏيݾا نِي آوَي۔ 26 پَڇي ݾجَي اِسرائيليون نَي مُگتي ملشَي۔ جون شاستر ۾ لِکيوڙو ھَي ڪہ،
”بچاوڻ آݪو صيئون ݾون آشَي
ھانَ يعقُوب رِي نسل ݾون بُڇڙائي ختم ڪرشَي۔
27 مھارو اُوئون ݾون اَي وچن ھوشَي
ڪہ ھُون اُوئون را پاپ ختم ڪرين۔“
28 تموم گھڻَي اِسرائيليون خُوشِي رِي خبر قبُول ڪونھي ڪِي، اِيئي رَي ڪري او ايشوَر را دُشمن ھويا ھانَ ٿون ٻيجَي قومون رو فائدو ھويو، پڻ ايشوَر اُوئون رَي ٻاپ ڏاڏون نَي چُونڊيا۔ اِيئي رَي ڪري او آج ڀِي ايشوَر را پيارا ھَي، 29 ڪيونڪہ ايشوَر رَي برڪتون ھانَ اُوئي رو چُونڊڻ ڪڏي ڀِي بدلتو ڪونھي۔ 30 جون پيل ٿي ٻيجِي قوم آݪا ايشوَر نَي ڪونھي منتا، پڻ ھمَي اِسرائيليون رِي نافرمونِي رَي ڪري ايشوَر ٿون تي دايا ڪِي ھَي، 31 اِيئي نمُونَي ھمَي اِسرائيلي ڀِي ايشوَر نَي ڪونھي منتا ھانَ ايشوَر رِي دايا ٿون تي ھَي ڪہ او ٿونرَي ڪري اُوئون تي ڀِي دايا ڪرَي۔ 32 ايشوَر اِيئي رَي ڪري ݾجون نَي نافرمون ريوَڻ ڏينا ڪہ او ݾجون تي دايا ڪرَي۔
33 واھ، ايشوَر رِي دايا، عقل ھانَ ݾمجھ، حد ݾون وڌيڪ ھَي۔ اُوئي را فيصلا ݾمجھ ݾون ٻاھر ھَي ھانَ اُوئي رَي منصُوبون رِي خبر ڪونھي۔ 34 شاستر ۾ لِکيوڙو ھَي ڪہ،
”پرميشوَر رِي ݾمجھ نَي ڪُڻ اوݪکَي ھَي؟
ڪُڻ اُوئي نَي صلاح ڏي ݾگھَي ھَي؟
35 ڪَي پيل اُوئي نَي ڪئين ڏينو ھَي
ڪہ او پَڇي اُوئي ݾون پاڇو لَي؟“
36 ڪيونڪہ ايشوَر ھر ھيڪ شئي ٺائِي ھَي ھانَ او اُوئي رَي وسيلَي ݾون ھَي ھانَ اُوئي رَي ݾارُو ھَي۔ ايشوَر رِي بکوڻ ھميشا ھوتِي رَي۔ آمين۔