ايشوَر ھانَ اُوئي را مِنک
9
ھُون مَسيح ۾ ݾاچِي ڪونھ ھون، ڪُوڙ ڪونھي ٻولتو ھانَ مھارو من ڀِي پويتر آتما ۾ گواھِي ڏَي ھَي۔ 2 مھارَي من ۾ آپرَي مِنکون يعني يھُودي ٻين ڀايون رَي ݾارُو تموم گھڻو ڏُک رَي ھَي۔ 3 جي اِيئون ڪرڻ ݾون اُوئون نَي مُگتي ملَي، تو اُوئون رَي ڪري ھُون آپ مَسيح ݾون ڌار ھوئڻ رَي ݾارُو تيار ھون۔ 4 او اِسرائيلي ھَي ھانَ اُوئون نَي ايشوَر آپرا ٻاݪ ھوئڻ رَي ݾارُو چُونڊيا ھَي۔ ايشوَر اُوئون تي آپرِي مھما ظاھر ڪِي ھَي۔ اُوئي اُوئون ݾون وچن ڪيئا ھانَ آپرا حُڪم اُوئون نَي ڏينا۔ اُوئي اُوئون نَي آپرِي ڀگتي ڪرڻ ھانَ واعدون رو حق ڏينو۔ 5 اوج ݾجائِي اڀراھيم، اضحاق ھانَ يعقُوب رِي پيڙھِي آݪا ھَي۔ مَسيح آپ ڀِي اِسرائيلي قوم ݾون ھتو ھانَ اِنسونِي رُوپ ۾ اُوئون رِي نسل ݾون آيو۔ او ايشوَر ھَي، جڪو ݾجون تي بادشاھي ڪرَي ھَي۔ اُوئي رِي ھميشا بکوڻ ھوتِي رَي۔ آمين۔6 بات اَي ڪونھي ڪہ ايشوَر اِسرائيليون ݾون آپرو واعدو پُورو ڪونھي ڪيئو، پڻ بات اَي ھَي ڪہ او جڪو اِسرائيلي قوم ݾون جايا، او ݾجائِي ايشوَر را چُونڊيوڙا ڪونھي۔ 7 او جڪو اڀراھيم رِي نسل ݾون ھَي، او ݾجائِي اڀراھيم را اولاد ڪونھي، ڪيونڪہ ايشوَر اڀراھيم نَي ڪھيو ھتو ڪہ،
”جڪو واعدو مھَي ٿَي ݾون ڪيئو ھتو،
او اضحاق رِي نسل ݾون پُورو ھوشَي۔“
8 اِيئي رو مطلب اَي ھَي ڪہ اڀراھيم رِي ݾجِي نسل ايشوَر را اولاد ڪونھي، پڻ رُگو اوج ھَي جڪو ايشوَر رَي ڪيئوڙَي واعدَي تي اڀراھيم را اولاد ھَي۔ 9 ڪيونڪہ ايشوَر جڏي واعدو ڪيئو ھتو ڪہ،
”ھُون آوڻ آݪَي ݾال ڀڙي پاڇو آئين
ھانَ اُوئون ڏِنون ۾ ٿارِي لُگائِي ݾارون نَي ڏيڪرو ھوشَي۔“
10 رُگو اَي ڪونھي، پڻ جڏي آپڻَي ڏاڏَي اضحاق رِي لُگائِي ربقا نَي ٻيلو ڏيڪرا ھوئڻ آݪا ھتا، 11 تو او جِڻڻ جون اُوئون رو ݾُٺا جون خراب ڪوم ڪرڻ ݾون پيل، ايشوَر آپرِي مرضِي ݾون اُوئون ۾ ھيڪَي ڏيڪرَي نَي چُونڊيو، جڪَي ݾون خبر پڙَي ھَي ڪہ ايشوَر مِنکون نَي اُوئون رَي ڪومون رَي ڪري نا، پڻ آپرِي مرضِي ݾون چُونڊَي ھَي۔ 12 اِيئي رَي ڪري ربقا نَي ڪھيو ڪہ،
”موٽو ڏيڪرو نِنئي رِي شيوا ڪرشَي۔“
13 جون شاستر ۾ لِکيوڙو ھَي ڪہ،
”مھَي يعقُوب ݾون پريم ڪيئو،
پڻ عيسُو ݾون نا۔“
”ھُون جڪَي تي مھربون ھوئون ھون، اُوئي تي مھربونِي ڪرين
ھانَ جڪَي تي دايا ڪرڻ رِي مرضِي ھَي، اُوئي تي دايا ڪرين۔“
16 اِيئي رَي ڪري اَي اِنسون رِي مرضِي جون ڪومون ݾون نا، پڻ ايشوَر رَي دايا رَي ڪري ھَي۔ 17 ڪيونڪہ شاستر ۾ لِکيوڙو ھَي ڪہ اُوئي فرعُون نَي ڪھيو ڪہ،
”مھَي ٿنَي اِيئي رَي ڪري بادشاھ ٺاھيو ڪہ ٿنَي آپرِي قُدرت بتائُون
ھانَ ݾجِي دُنيا را مِنک مھارَي نون رِي بکوڻ ڪرَي۔“
18 اِيئي رَي ڪري ايشوَر رِي جڪَي تي مرضِي ھووَي، اُوئي تي دايا ڪرَي ھَي ھانَ جڪَي تي مرضِي ھووَي اُوئي رو من ڪاٺو ڪرَي ھَي۔
ايشوَر رو ڪھر ھانَ دايا
19 ٿي مھنَي ڪشو ڪہ، ”جي اَي بات ھَي، تو ڪو ڀِي ايشوَر رِي مرضِي رو مُقابلو ڪري ڪونھي ݾگھتو، تو پَڇي ايشوَر مِنکون نَي ڪيئون ڏوھي ڪرَي ھَي؟“ 20 پڻ اي اِنسون، تُو ڪُڻ ھَي، جڪو ايشوَر ݾون سوال پُوڇَي ھَي؟ ڪِي ٺاھيوڙِي شئي آپرَي ٺاوڻ آݪَي ݾون پُوڇي ݾگھَي ھَي ڪہ، ”ٿَي مھنَي ڪيئون اھڙو ٺاھيو؟“ 21 ڪُنڀار رِي مرضِي ھَي ڪہ جڏي او ٺيڪر ٺاوَي، تو ݾاگي مٽِي ݾون ھيڪ خاص ٺيڪر ٺاوَي ھانَ ٻيجو عام۔ 22 اِيئي نمُونَي جي ايشوَر رِي مرضِي ھووَي، تو او آپرِي ريݾ ھانَ قُدرت ظاھر ڪري ݾگھَي ھَي، پڻ اُوئي گھڻَي صبر ݾون اُوئون نَي برداش ڪيئا، جڪون تي اُوئي رِي ريݾ ھَي ھانَ جڪو مرڻ رَي لائق ھَي۔ 23 ايشوَر اَي اِيئي رَي ڪري ڪيئو ڪہ او آپرِي موٽِي مھما اُوئون تي ظاھر ڪرَي، جڪون تي اُوئي رِي دايا ھَي ھانَ جڪو اُوئي رِي مھما ۾ شامل ھوئڻ رَي ݾارُو پيل ݾون ٺاھيوڙا ھَي۔ 24 نِي رُگو آپي يھُودي پڻ ٻيجَي قومون ڀِي اُوئون ۾ ھَي، جڪون نَي اُوئي چُونڊيا ھَي۔ 25 ٻيجَي قومون رَي بارَي ۾ ايشوَر ھوسيع رَي شاستر ۾ ڪھيو ھَي ڪہ،
”جڪو مھارا مِنک ڪونھي ھتا،
ھمَي ھُون اُوئون نَي آپرا مِنک ڪئين
ھانَ ھمَي ھُون اُوئون ݾون پريم ڪرين،
جڪون ݾون ھُون پريم ڪونھي ڪرتو۔“
26 جيٿ ايشوَر اُوئون نَي ڪھيو ڪہ، ”ٿي مھارا مِنک ڪونھي ھو۔“ اوٿ اُوئون نَي ڪھيو جاشَي ڪہ، ”ٿي زندگِي ڏيوَڻ آݪَي ايشوَر را ٻاݪ ھو۔“ 27 اِيئي ݾون ٽاݪ يسعياھ نبِي، اِسرائيلي قوم رَي بارَي ۾ زور ݾون ڪَي ھَي ڪہ،
”بيشڪ اِسرائيلي قوم بڌي ݾمُوندر رِي بيݪُو رَي برابر ھوئي جاشَي،
پڻ تو ڀِي اُوئون ۾ ٿوڙَي مِنکون نَي مُگتي ملشَي۔
28 ڪيونڪہ پرميشوَر تموم ڇيڪو ݾجِي دُنيا رو فيصلو ڪرشَي۔“
29 يسعياھ نبِي اِيئي بات رِي اگڪٿِي ڪِي ڪہ،
”جي قُدرت آݪو پرميشوَر آپڻِي نسل ݾون ڪئينڪہ مِنک جيتا نِي راکون تو،
تو آپي دُنيا ݾون سدُوم ھانَ عمُورا رَي شھرون آݪِي ڪار مِٽي جائُون تو۔“
اِسرائيلي قوم ھانَ خُوشِي رِي خبر
30 ھمَي آپي ڪِي ڪونھ؟ ٻيجَي قومون نيڪ ھوئڻ رَي بارَي ۾ ڪونھي ݾوچو، پڻ او نيڪ ھويا ھانَ اَي ݾجو ڪئين وِشواس راکڻ ݾون ھويو۔ 31 پڻ اِسرائيلي قوم جڪو شريعت تي بيوَڻ رَي وسيلَي نيڪ ھوئڻ رِي ڪوشش ۾ ھتا۔ او شريعت تي نيڪ ڪونھي ھويا۔ 32 ڪيئون؟ ڪيونڪہ اُوئون وِشواس ݾون نا، پڻ آپرَي ڪومون ݾون نيڪ ھوئڻ رِي ڪوشش ڪِي۔ اِيئي نمُونَي اُوئون مارگ آݪَي پٿر يعني پرڀُو يسُوع ݾون ٿاٻڙيجا۔ 33 اِيئي رَي بارَي ۾ شاستر ۾ لِکيوڙو ھَي ڪہ،
”جوئو، ھُون صيئون ۾ اھڙو پٿر راکين،
جڪَي ݾون مِنک ٿاٻڙيجي کرشَي۔
پڻ جڪو اُوئي تي وِشواس راکشَي،
او ڪڏي ڀِي شرماوَي ڪونھي۔“