رُوميون 8

پويتر آتما ۾ زندگِي

ھمَي جڪو مَسيح يسُوع تي وِشواس راکَي ھَي، اُوئون تي سزا رو حُڪم ڪونھي۔ ‏2 ڪيونڪہ مَسيح يسُوع تي وِشواس راکڻ ݾون زندگِي ڏيوَڻ آݪو پويتر آتما آپون نَي اُوئي پاپ ݾون آزاد ڪراوَي ھَي، جڪو موت ڏيݾا لي جاوَي ھَي۔ ‏3 جڪو ڪوم اِنسونِي ڪمزورِي رَي ڪري شريعت ڪري ڪونھي ݾگھِي، او ڪوم ايشوَر ڪيئا۔ اُوئي آپرَي ڏيڪرَي نَي اِنسونِي رُوپ ۾ ميليو ڪہ او آپڻَي پاپون رَي ڪري ٻَليدون ھووَي۔ اِيئي نمُونَي ايشوَر، اِنسون رَي پاپون رَي خلاف سزا رو فيصلو ڪيئو۔ ‏4 ايشوَر اِيئي رَي ڪري اَي ڪيئو ڪہ آپڻَي ݾارُو شريعت پُورِي ڪرَي ھانَ آپي اِنسونِي ݾوچ تي نا، پڻ پويتر آتما رَي ڪيوَڻ تي بيتا رون۔ ‏5 جڪو اِنسونِي ݾوچ تي بَي ھَي، او دُنياوِي باتون رَي بارَي ۾ ݾوچتا رَي ھَي، پڻ جڪو پويتر آتما رَي ڪيوَڻ تي بَي ھَي، او آتمڪ باتون رَي بارَي ۾ ݾوچتا رَي ھَي، ‏6 اِنسونِي ݾوچ رَي باتون موت ڏيݾا لي جاوَي ھَي، پڻ پويتر آتما رَي باتون زندگِي ھانَ ايشوَر ݾون صُلح ڏيݾا لي جاوَي ھَي۔ ‏7 اِنسونِي ݾوچ ھميشا ايشوَر ݾون اݪگا لي جاوَي ھَي، ڪيونڪہ اُوئي نَڪو ڪڏي ايشوَر رِي شريعت منِي ھانَ نَڪو ڪڏي منَي۔ ‏8 جڪو آپرِي مرضِي تي بَي ھَي، او ڪڏي ڀِي ايشوَر نَي خُوش ڪري ڪونھي ݾگھتا، ‏9 پڻ ٿي آپرِي مرضِي تي ڪونھي بيتا، پڻ پويتر آتما رِي مرضِي تي بو ھو، ڪيونڪہ ايشوَر رِي آتما ٿون ۾ رَي ھَي۔ جڪَي رو وِشواس مَسيح تي ڪونھي، اُوئي ۾ آتما ڀِي ڪونھي۔ ‏10 پڻ جي ٿونرو وِشواس مَسيح تي ھَي، تو ڀلي پاپ رَي ڪري ٿونرو ݾَرير مري جاوَي، پڻ ٿونرِي آتما جيتِي ريشَي، ڪيونڪہ ايشوَر ٿونَي نيڪ ٺاھيا ھَي۔ ‏11 ايشوَر رو پويتر آتما ٿون ۾ ھَي، ايشوَر اُوئيج آتما ݾون مَسيح يسُوع نَي مُوئوڙون ݾون جيتو ڪيئو۔ او اُوئيج آتما ݾون ٿونرَي مرڻ آݪَي ݾَرير نَي ڀِي جيتا ڪرشَي۔ ‏12 اِيئي رَي ڪري اي وِشواسيون، آپڻِي ڪو ڀِي مجبُورِي ڪونھي ڪہ آپي آپرِي مرضِي ݾون زندگِي گُذارون، ‏13 ڪيونڪہ جي ٿي آپرِي مرضِي ݾون بيشو، تو ضرُور مرشو، پڻ جي ٿي پويتر آتما رَي وسيلَي بُڇڙا ڪوم ڇوڙشو، تو جيتا ريشو۔

‏14 اوج ايشوَر را ڏيڪرا ھَي، جڪو اُوئي رَي پويتر آتما رِي مرضِي تي بَي ھَي۔ ‏15 ڪيونڪہ ٿونَي او آتما ڪونھي ملِي، جڪَي ݾون ٿي غُلوم ھوئو ھانَ ٻيئاجتا رو، پڻ ايشوَر ٿونَي آپرِي آتما ڏي آپرا ٻاݪ ٺاھيا ھَي۔ ھمَي آپي اُوئي نَي اَبا يعني پِتا ڪئي ݾگھو ھون۔ ‏16 پويتر آتما آپ آپڻِي آتما ݾون مِلي اَي گواھِي ڏَي ھَي ڪہ آپي ايشوَر را ٻاݪ ھون۔ ‏17 جي آپي اُوئي را ٻاݪ ھون، تو پَڇي مَسيح آݪِي ڪار اُوئي را بارݾ ڀِي ھون۔ اِيئي رَي ڪري جي آپي مَسيح ڀيڙا ڏُک ڏيکون ھون، تو اُوئي رَي مونَ مرتبَي ۾ ڀِي ڀيڙا ھوشون۔

ايشوَر ݾون مِلڻ آݪو مونَ

‏18 ھُون ݾمجھون ھون ڪہ آپون نَي اُوئي مِلڻ آݪَي مونَ مرتبَي رَي مُقابلَي ۾ اِيئي دُنيا را ڏُک تڪليف ڪئين ڪونھي۔ ‏19 ڪيونڪہ پُورِي دُنيا موٽِي اُميد ݾون اُوئي ڏِن رَي اِنتظار ۾ ھَي، جڏي ايشوَر اَي ظاھر ڪرشَي ڪہ حقيقت ۾ ڪُڻ اُوئي را ٻاݪ ھَي۔ ‏20 ݾجِي دُنيا آپرِي مرضِي ݾون نا، پڻ ايشوَر رِي لعنت ݾون ختم ھوئي جاشَي، تو ڀِي اُوئون نَي اَئيج اُميد ھَي ‏21 ڪہ ھيڪ ڏِن او ڀِي ختم ھوئڻ آݪِي غُلومي ݾون آزاد ھوشَي ھانَ ايشوَر رَي ٻاݪون رِي مونَ مرتبَي آݪِي آزادي ۾ شامل ھوشَي۔ ‏22 ڪيونڪہ آپون نَي خبر ھَي ڪہ اَڃون توڻي پُورِي دُنيا اھڙَي ڏُک ھانَ تڪليف ۾ ھَي، جھڙَي نمُونَي لُگائِي ٻاݪ جِڻڻ رَي ٽيم ڏُک ۾ ھووَي ھَي۔ ‏23 نِي رُگو دُنيا، پڻ آپي ڀِي آپرَي ݾَرير ۾ ڏُک ھانَ تڪليف ۾ ھون، جڪون نَي مِلڻ آݪَي مونَ مرتبَي رو پيلڪو ڦل پويتر آتما ڏينوڙو ھَي۔ آپون نَي اُميد ھَي ڪہ آپڻَي اِيئي ݾَرير نَي مُگتي ملشَي ھانَ آپي اُوئي ڏِن رَي اِنتظار ۾ ھون، جڏي ايشوَر آپون نَي آپرا ٻاݪ ھوئڻ رو پُورو حق ھانَ واعدو ڪيئوڙو نُوئو ݾَرير ڏيشَي۔ ‏24 اِيئي نمُونَي آپون نَي اُميد ݾون مُگتي ملِي، پڻ جي اُوئي شئي رِي اُميد راکون جڪو نظر آوَي، تو پَڇي اُميد ڪئِي بات رِي؟ ڪِي ڪو مِنک ڏيکيجڻ آݪَي شيون رِي اُميد راکشَي؟ ‏25 جي آپي اُوئي شئي رِي اُميد راکون، جڪو ڏيکيجتِي ڪونھي، تو آپي صبر ݾون اُوئي رو اِنتظار ڪرشون۔ ‏26 اِيئي نمُونَي پويتر آتما آپڻِي ڪمزورِي ۾ مدد ڪرَي ھَي، ڪيونڪہ آپون نَي خبر ڪونھي ڪہ آپي ڪيڪر پراٿنا ڪرون۔ پويتر آتما ݾُڏڪا ڀري ڀري آپڻِي پارت ڪرَي ھَي، جڪَي رو ݾُڻاوڻ ڏُکيو ھَي۔ ‏27 آپڻا من اوݪکڻ آݪَي ايشوَر نَي خبر ھَي ڪہ پويتر آتما رِي ڪھڙِي مرضِي ھَي۔ اِيئي رَي ڪري پويتر آتما اُوئي رِي مرضِي ݾون نيڪ مِنکون رِي پارت ڪرَي ھَي۔ ‏28 آپون نَي خبر ھَي ڪہ ايشوَر ھر ھيڪ بات ۾ اُوئون ݾون ڀلائي ڪرَي ھَي، جڪو اُوئي ݾون پريم ڪرَي ھَي ھانَ اُوئي رِي مرضِي تي اَڻايوڙا ھَي۔ ‏29 ڪيونڪہ جڪون نَي ايشوَر پيل چُونڊيا اُوئون نَي ايشوَر پيل ݾون راکيا ڪہ او اُوئي رَي ڏيڪرَي آݪِي ڪار ھووَي ھانَ ڏيڪرو تموم گھڻَي ڀايون ۾ موڀِي ھووَي۔ ‏30 جڪون نَي ايشوَر پيل ݾون چُونڊيا، اُوئي اُوئون نَي آپ ڪڍي ڀِي اَڻايا۔ اُوئي جڪون نَي اَڻايا، اُوئون نَي نيڪ ڀِي ڪيئا ھانَ جڪون نَي نيڪ ڪيئا، اُوئون نَي مونَ مرتبو ڀِي ڏينو۔

ايشوَر رَي پريم ݾون جُدائِي

‏31 آپي اِيئي باتون رَي بارَي ۾ ڪِي ڪونھ؟ جي ايشوَر آپون ڀيڙو ھَي، تو پَڇي ڪُڻ آپڻَي خلاف ھوشَي؟ ‏32 اُوئي تو آپڻَي ݾارُو آپرو ھيڪج ڏيڪرو ميليو ھانَ ݾجون رَي ݾارُو اُوئي نَي موت رَي حوالي ڪيئو۔ جڏي اُوئي آپرو ڏيڪرو آپڻَي ݾارُو ڏينو، تو پَڇي ٻيجِي ڪئِي شئي ھَي، جڪو آپون نَي ڪونھي ڏَي؟ ‏33 ھمَي ڪو ڀِي ايشوَر رَي چُونڊيوڙَي مِنکون تي الزوم ڪونھي ھڻَي، ڪيونڪہ ايشوَر آپ اُوئون نَي پاپون رِي معافي ڏينِي ھَي۔ ‏34 ھمَي ڪيو آپون تي الزوم لگاشَي؟ ڪو ڀِي ڪونھي، ڪيونڪہ مَسيح يسُوع آپڻَي ݾارُو ٻَليدون ھويو ھانَ مُوئوڙون ݾون جيتو ھويو۔ او ايشوَر رَي ݾاجَي ھاٿ عِزت ھانَ اِختياري ݾون ٻيٺو ھَي، جيٿ ݾون او آپڻِي پارت ڪرَي ھَي۔

‏35 ڪيو آپون نَي مَسيح رَي پريم ݾون ڌار ڪرشَي؟ مُصيبت، تنگِي، ظُلم، ڏُڪاݪ، غريبي، خطرو جون موت؟ ڪو ڀِي ڪونھي۔ ‏36 جون شاستر ۾ لِکيوڙو ھَي ڪہ،

”ٿارَي ڪري مھي ھر ٽيم موت رَي مُونھ ۾ رون ھون،

مِنک مھونَي بڍيجڻ آݪَي رڍون ݾمجَھي ھَي۔“

‏37 پڻ مَسيح آپون ڀيڙو ھَي ھانَ او آپون ݾون پريم ڪرَي ھَي۔ اِيئي رَي ڪري آپي اُوئي رَي وسيلَي اِيئي ݾجَي خطرون ۾ تموم گھڻِي ݾَوَلائِي ݾون ڪامياب ھوئون ھون، ‏38 ڪيونڪہ مھنَي ڀروسو ھَي، نَڪو موت، نَڪو زندگِي، نَڪو فريشتا، نَڪو حڪُومتون، نَڪو اِيئي ٽيم رَي شيون، نَڪو آوڻ آݪَي ٽيم رَي شيون، ‏39 نَڪو آڪاش رَي ماٿلَي ڪو شيون، نَڪو زمين رَي ھيٺلَي ڪو شيون، نَڪو ٻيجَي ٺاھيوڙَي شيون آپون نَي ايشوَر رَي اُوئي پريم ݾون ڌار ڪري ݾگھَي ھَي، جڪو اُوئي نَي پرڀُو مَسيح يسُوع ۾ آپون ݾون ھَي۔