رُوميون 6

مَسيح ۾ نُوئِي زندگِي

اي وِشواسيون، تو پَڇي آپي ڪِي ڪونھ؟ ڪِي آپي پاپ ڪرتا رون ڪہ ايشوَر رِي ڪِرپا وڌيڪ ھووَي؟ ‏2 ڪڏي ڀِي نا۔ جھڙَي نمُونَي مُوئوڙون رو واسطو زندگِي ݾون ختم ھوئي جاوَي ھَي، اِيئج نمُونَي آپڻو واسطو پاپ ݾون ختم ھويو ھَي۔ اِيئي رَي ڪري ھمَي آپون نَي پاپ ۾ بيوَڻ نِي کپَي۔ ‏3 ڪِي ٿونَي خبر ڪونھي ڪہ آپي جڪو پويتر سِنون لي مَسيح يسُوع ۾ ھيڪ ھويا ھون، تو اُوئي رِي موت ۾ ڀِي ھيڪ ھويا ھون۔ ‏4 پويتر سِنون اِيئي بات رو نِشون ھَي ڪہ آپي اُوئي ڀيڙا مري ٻُوريجا ھون۔ اِيئج نمُونَي جڏي مَسيح آپرَي پِتا رِي مھما آݪِي قُدرت ۾ مُوئوڙون ݾون جيتو ھويو، تو آپي ڀِي اُوئي ۾ نُوئِي زندگِي گُذارون۔

‏5 جھڙَي نمُونَي آپي مَسيح رِي موت ۾ اُوئي ڀيڙا ھيڪ ھويا ھون، اُوئيج نمُونَي اُوئي رَي ڀڙي جيتَي ھوئڻ ۾ ڀِي اُوئي ڀيڙا ھيڪ ھوشون۔ ‏6 آپون نَي خبر ھَي ڪہ آپي پِروڻِي زندگِي ۾ مَسيح ڀيڙا ݾُولِي تي چڙھيا ڪہ آپون ۾ پاپ ختم ھوئي جاوَي ھانَ ھمَي آپي پاپ رِي غُلومي ۾ ڪونھي بيتا۔ ‏7 ڪيونڪہ جڪو مَسيح ڀيڙو مُوئو، تو او پاپ رَي اِختيار ݾون آزاد ھويو۔ ‏8 جڏي آپي مَسيح ڀيڙا مُوئا ھون، تو آپڻو وِشواس ھَي ڪہ اُوئي ڀيڙا جيتا ڀِي ريشون۔ ‏9 آپون نَي خبر ھَي ڪہ مَسيح مُوئوڙون ݾون جيتو ھويو ھانَ ڀڙي ڪڏي ڀِي ڪونھي مرَي، ڪيونڪہ اُوئي تي موت رو ڪو ڀِي اِختيار ڪونھي رھيو۔ ‏10 جڏي او مُوئو، تو اُوئي ھميشا رَي ݾارُو پاپ رَي اِختيار نَي ختم ڪيئو، پڻ ھمَي او ڀڙي جيتو ھَي، تو اُوئي رِي زندگِي ايشوَر رَي ݾارُو ھَي۔ ‏11 ٿي ڀِي آپرو آپنَي اِيئون ݾمجھو ڪہ ٿي مري پاپ رَي اِختيار ݾون نڪري گيا ھو، اِيئي رَي ڪري مَسيح يسُوع تي وِشواس راکي، آپرِي زندگِي ايشوَر رَي ݾارُو گُذارو۔ ‏12 پاپ ٿونرِي زندگِي ۾ بادشاھي نِي ڪرَي ھانَ نِي ٿي اُوئي رِي مرضِي تي بو۔ ‏13 آپرَي ݾَرير رو ڪو ڀِي عُضوو پاپ رَي ݾارُو اِستعمال نِي ڪرو ھانَ نِي اُوئي نَي بُڇڙائي را ھٿيار ھوئڻ ڏيئو۔ پڻ آپرو آپنَي مُوئوڙون ݾون جيتا ݾمجھي، آپرَي زندگَي ايشوَر رَي ھاٿ ۾ ڏيئو ھانَ آپرا عُضوا نيڪ ڪومون رَي ݾارُو اِستعمال ڪرو۔ ‏14 آج ݾون پَڇي ٿون تي پاپ رو اِختيار ڪونھي، ڪيونڪہ ھمَي ٿي شريعت تي نا، پڻ ايشوَر رِي ڪِرپا ݾون بو ھو۔

ݾچائي را غُلوم

‏15 اي وِشواسيون، ھمَي آپي ڪِي ڪونھ؟ ڪِي آپي پاپ ڪرون، ڪيونڪہ آپون نَي شريعت تي بيوَڻ رِي ضرُورت ڪونھي، پڻ آپون تي ايشوَر رِي ڪِرپا ھَي؟ ڪڏي ڀِي نا۔ ‏16 ڪِي ٿونَي خبر ڪونھي ڪہ جي ٿي ڪيرو ڪيوَڻ منون ھو، تو آپرو آپنَي اُوئي رو غُلوم ٺائو ھو؟ ھمَي جي ٿي پاپ ڪرشو، تو اُوئي رِي سزا موت ھَي، پڻ جي ايشوَر رو حُڪم منشو، تو اُوئي رو نتيجو ݾچائي ھَي۔ ‏17 پيل ٿي پاپ را غُلوم ھتا، پڻ ايشوَر رو شُڪر ھَي ڪہ ھمَي ٿون ݾاچَي من ݾون ايشوَر رَي باتون منئَي جڪو مھون ٿونَي ݾيکائَي ھَي۔ ‏18 ھمَي ٿي پاپ رِي غُلومي ݾون آزاد ھوئي ݾچائي را غُلوم ھويا ھو۔ ‏19 اِنسونِي ݾمجھ ڪمزور ھَي، اِيئي رَي ڪري ھُون ٿونَي مِثال ڏي ݾمجھائُون ھون ڪہ جھڙَي نمُونَي ٿون آپرو آپنَي بُڇڙَي ڪومون ھانَ بُڇڙَي خيالون رَي حوالي ڪيئا ھتا ھانَ اُوئون را غُلوم ھتا۔ اِيئج نمُونَي ھمَي آپرو آپنَي پويتر ڪرڻ رَي ݾارُو ݾچائي رَي حوالي ڪرو ھانَ اُوئي را غُلوم ھوئي جائو۔ ‏20 جڏي ٿي پاپ را غُلوم ھتا، تو ايشوَر رِي ݾچائي ݾون آزاد ھتا۔ ‏21 جڪَي ڪومون تي ھمَي ٿي شرمائو ھو، او ڪرڻ ݾون ٿونَي ڪھڙو فائدو مِليو؟ ڪئين ڪونھي، ڪيونڪہ اھڙَي ڪومون رو نتيجو موت ھَي۔ ‏22 پڻ ھمَي ٿي پاپ رِي غُلومي ݾون آزاد ھو ھانَ ايشوَر را غُلوم ھو۔ ھمَي ٿي او ڪوم ڪرو ھو جڪو ٿونَي پويتر ڪرَي ھَي، جڪَي رو نتيجو اَمر جيوَن ھَي۔ ‏23 ڪيونڪہ پاپ رِي مزُورِي موت ھَي، پڻ ايشوَر رِي ڪِرپا آپڻَي پرڀُو مَسيح يسُوع رَي وسيلَي آپون نَي اَمر جيوَن مُکت ۾ ڏينو ھَي۔