اڀراھيم رو وِشواس
4
آپي جڪو ڏاڏَي اڀراھيم رِي نسل را ھون، اُوئي رَي بارَي ۾ ڪِي ڪونھ ڪہ او ڪيڪر ايشوَر رِي نظر ۾ نيڪ ھويو؟ 2 ڪيونڪہ جي اڀراھيم ݾُٺَي ڪومون رَي ڪري نيڪ ھويو ھووَنت، تو آپرو آپ تي بڏائو ڪري ݾگھتو، پڻ ايشوَر آگھي نا۔ 3 ايشوَر رَي شاستر ۾ ڪِي لِکيوڙو ھَي؟ اَي ڪہ،”اڀراھيم ايشوَر تي وِشواس راکيو
ھانَ اِيئي بات اُوئي نَي ايشوَر رِي نظر ۾ نيڪ ٺاھيو۔“
4 جي ڪو مِنک مزُورِي ڪرڻ ݾون پَڇي مزُورِي لَي ھَي، تو اَي اُوئي رو حق ھَي، نِي ڪہ اِنوم۔ 5 پڻ جي ڪُڻ ڪوم ڪونھي ڪرتو، پڻ ايشوَر تي وِشواس راکَي ھَي، جڪو پاپ معاف ڪرَي ھَي، تو اُوئي رِي اِيئي وفادارِي رَي ڪري، او ايشوَر رِي نظر ۾ نيڪ ھووَي ھَي۔ 6 جڪَي نَي ايشوَر ݾُٺَي ڪوم بِنا، نيڪ ٺاوَي ھَي اھڙَي مِنک نَي دائُود ڀِي برڪت آݪو ڪَي ھَي، 7 ڪيونڪہ لِکيوڙو ھَي ڪہ،
”ڌن ھَي او جڪون را ايشوَر پاپ معاف ڪيئا
ھانَ جڪون را پاپ اُوئي ڍڪيا۔
8 ڌن ھَي او جڪون رَي پاپون رو حِساب پرميشوَر ڪونھي ڪرتو۔“
9 ڪِي اَي برڪت رُگو کَتنو ڪراوڻ آݪون رَي ݾارُو ھَي، جون کَتنو نِي ڪراوڻ آݪون رَي ݾارُو ڀِي ھَي؟ ڪيونڪہ مھون پيل ڪھيو ھتو ڪہ اڀراھيم ايشوَر تي وِشواس راکيو ھانَ اِيئي بات اُوئي نَي ايشوَر رِي نظر ۾ نيڪ ڪيئو۔ 10 اڀراھيم ڪڏي نيڪ ھويو؟ ڪِي اُوئي ٽيم جڏي اُوئي کَتنو ڪرايو، جون اُوئي ݾون پيل؟ اَي بات اُوئي رَي کَتنَي ڪراوڻ ݾون پيل رِي ھَي، نِي ڪہ پَڇي رِي۔ 11 اڀراھيم کَتنو ڪراوڻ ݾون پيل وِشواس راکي، نيڪ ھويو ھانَ پَڇي اُوئي کَتنو ڪرايو جڪو اُوئي رَي وِشواس تي ٺَپو نِشون ھويو۔ اِيئي نمُونَي اڀراھيم اُوئون ݾجون رو پِتا ھَي، جڪو بِنا کَتنَي آݪا ھَي، پڻ او وِشواس راکڻ ݾون نيڪ ھووَي ھَي۔ 12 اڀراھيم اُوئون رو ڀِي پِتا ھووَي ھَي، جڪون رو کَتنو ھويو رو ھانَ او اڀراھيم آݪِي ڪار وِشواس ڀِي راکَي ھَي۔ اھڙو وِشواس جڪو اڀراھيم کَتنو ڪراوڻ ݾون پيل راکتو۔
وِشواس ھانَ ايشوَر رو واعدو
13 ايشوَر جڪو واعدو اڀراھيم ھانَ اُوئي رِي نسل ݾون ڪيئو ھتو ڪہ او دُنيا را بارݾ ھوشَي، او واعدو شريعت رَي ڪري نا، پڻ وِشواس راکي نيڪ ھوئڻ رَي ڪري ڪيئو ھتو۔ 14 جي ايشوَر بارݾ ھوئڻ رو واعدو رُگو اُوئون ݾون ڪيئو ھووَنت، جڪو شريعت تي بَي ھَي، تو پَڇي ايشوَر تي وِشواس راکڻ اجايو ھتو ھانَ اُوئي رو واعدو ڀِي ختم ھوئي جائُون تو۔ 15 شريعت رَي ڪري ايشوَر سزا ڏَي ھَي، پڻ جڪون ڪڍي شريعت ڪونھي، تو اُوئون نَي سزا ڀِي ڪونھي ملَي۔
16 آپي وِشواس راکڻ ݾون بارݾ ھوئون ھون، ڪيونڪہ اَي واعدو ايشوَر رِي ڪِرپا ݾون آج توڻي اڀراھيم رِي ݾجِي نسل ݾون ھَي۔ اَي واعدو شريعت تي بيوَڻ آݪون ھانَ اڀراھيم آݪِي ڪار وِشواس راکڻ آݪون رَي ݾارُو ھَي۔ اِيئي نمُونَي اڀراھيم وِشواس راکڻ آݪون رو پِتا ھَي۔ 17 جون شاستر ۾ لِکيوڙو ھَي ڪہ،
”مھَي ٿنَي تموم گھڻَي قومون رو پِتا ٺاھيو ھَي۔“
اَي واعدو ايشوَر رو ھَي ھانَ اڀراھيم اُوئي ايشوَر تي وِشواس راکيو ڪہ او مُوئوڙون نَي جيتا ڪرَي ھَي ھانَ حُڪم ڏي اُوئون شيون نَي ٺاوَي ھَي، جڪو ڪونھي ھوتَي۔ 18 جڏي ڪو ڀِي اُميد ڪونھي ھتِي، تو اڀراھيم اُميد راکِي ھانَ ايشوَر رَي واعدَي رو وِشواس ڪيئو ڪہ او اُوئي نَي تموم گھڻَي قومون رو پِتا ٺاشَي ھانَ اُوئي رِي نسل تموم گھڻِي بڌشَي۔ 19 جڏي او اندازن ݾئو ݾال رو ھتو، تو اُوئي رو ݾَرير ڪمزور ھتو ھانَ اُوئي رِي لُگائِي ݾارون ڀِي اُوئي عُمر ۾ ٻاݪ جِڻڻ جھڙِي ڪونھي ھتِي، پَڇي ڀِي اڀراھيم رو وِشواس گھٽ ڪونھي ھويو۔ 20 اُوئي وِشواس ڪونھي ڇوڙيو ھانَ نَڪو ايشوَر رَي واعدَي تي شَڪ ڪيئو، پڻ وِشواس پڪو راکي ايشوَر رِي بکوڻ ڪِي۔ 21 اُوئي رو پڪو وِشواس ھتو ڪہ جڪو واعدو ايشوَر ڪيئو ھَي، اُوئي نَي او ضرُور پُورو ڪرشَي۔ 22 اِيئي نمُونَي اڀراھيم آپرَي وِشواس رَي ڪري ايشوَر رِي نظر ۾ نيڪ ھويو۔ 23 اَي بات رُگو اڀراھيم رَي ݾارُو ڪونھي لِکيوڙِي ڪہ، ”او وِشواس ݾون نيڪ ھويو۔“ 24 پڻ آپڻَي ݾارُو ڀِي لِکيوڙِي ھَي ڪہ ايشوَر آپون نَي ڀِي نيڪ ڪرشَي، ڪيونڪہ آپڻو اُوئي ايشوَر تي وِشواس ھَي، جڪَي آپڻَي پرڀُو يسُوع نَي مُوئوڙون ݾون جيتو ڪيئو۔ 25 پرڀُو يسُوع نَي آپڻَي پاپون رَي ڪري موت رِي سزا ملِي ھانَ آپون نَي نيڪ ڪرڻ رَي ݾارُو ايشوَر اُوئي نَي ڀڙي جيتو ڪيئو۔