3
تو پَڇي يھُودي ھوئڻ ڪھڙِي موٽِي بات ھَي ھانَ کَتنَي رو ڪھڙو فائدو؟ 2 ٻيئي باتون فائدَي آݪَي ھَي۔ موٽِي بات اَي ھَي ڪہ ايشوَر رَي باتون ݾجون ݾون پيل يھُوديون رَي حوالي ھوئَي۔ 3 جي اُوئون ۾ ڪئين نافرمون ھوئي گيا، تو ڪِي ھويو؟ ڪِي اُوئون رِي نافرمونِي ݾون ايشوَر رِي وفادارِي ختم ھوئي جاشَي؟ 4 ڪڏي ڀِي نا، ايشوَر ھميشا ݾاچو ريشَي، اِنسون ڀلي ڪُوڙا ھووَي۔ جون شاستر ۾ لِکيوڙو ھَي ڪہ،”تُو آپرَي باتون ۾ ݾاچو رئِي
ھانَ جڏي ٿارو فيصلو ھوشَي، تو تُو کٽي جائِي۔“
5 جي آپڻَي بُڇڙَي ڪومون رَي ڪري ايشوَر رو اِنصاف ظاھر ھووَي ھَي، تو آپون نَي ڪِي ڪيوَڻ کپَي؟ ڪِي اَي ڪونھ ڪہ، ”ايشوَر بي اِنصاف ھَي، جڪو آپون تي آپرو ڪھر ڪرَي ھَي۔“ (ھُون اَي بات اِنسونِي ݾوچ ݾون ڪونھ ھون۔) 6 ڪڏي ڀِي نا۔ جي اِيئون ھووَي، تو ايشوَر دُنيا رو اِنصاف ڪيڪر ڪرشَي؟ 7 جي مھارَي ڪُوڙ رَي ڪري ايشوَر رِي ݾچائي پڌرِي ھووَي ھَي ھانَ اُوئي نَي مھما ملَي ھَي، تو پَڇي ڪيئون ايشوَر مھنَي پاپي آݪِي ڪار سزا رو حُڪم ڏيشَي؟ 8 تو پَڇي آپي بُڇڙائي ڪيئون نِي ڪرون ڪہ ڀلائي ھووَي؟ ڪئينڪہ مِنک مھونَي بدنوم ڪرڻ رَي ݾارُو اَي الزوم لگاوَي ھَي ڪہ مھي اَئيج ݾيکائُون ھون۔ اِنصاف اَي ھَي ڪہ اھڙا مِنک ڏوھي ڪيئا جاوَي۔
ڪو ڀِي نيڪ ڪونھي
9 تو پَڇي ڪِي آپي يھُودي قوم آݪا ٻيجَي قومون ݾون ڀلا ھون؟ ڪڏي ڀِي نا، پڻ مھون پيل ݾون يھُوديون ھانَ ٻيجِي قوم آݪون تي اَي الزوم لگايو ھَي ڪہ ٿي ݾجائِي پاپون ۾ بو پڙيا۔ 10 جون شاستر ۾ لِکيوڙو ھَي ڪہ،
”ڪو ڀِي نيڪ ڪونھي، ھيڪ ڀِي ڪونھي۔
11 ڪو ڀِي ݾمجھدار ڪونھي،
ڪو ڀِي ايشوَر رِي تلاش ۾ ڪونھي۔
12 ݾجائِي ڀٽڪي گيا ھانَ ايشوَر ݾون مونڏو ڦيرائي ڇوڙيو۔
ڪو ڀِي ڀلائي ڪرڻ آݪو ڪونھي، ھيڪ ڀِي ڪونھي۔
13 اُوئون را مونڏا کُليوڙَي مُڪومون جھڙا ھَي۔
او ٺَگِي آݪَي باتون ڪرَي ھَي،
اُوئون رَي موڏَي آݪا آکر ناگ رَي زھر جھڙا ھَي۔
14 اُوئون را مونڏا لعنت ھانَ نفرت ݾون ڀريوڙا ھَي۔
15 او خُون ڪرڻ ۾ ڇيڪائِي ڪرَي ھَي۔
16 او بربادي ھانَ مُصيبت ڦيلاوَي ھَي۔
17 اُوئون نَي صُلح رَي مارگ رِي خبر ڪونھي۔
18 نَڪو او ايشوَر ݾون ٻيئاجتا۔“
19 آپون نَي خبر ھَي ڪہ شريعت اُوئون رَي ݾارُو ھَي، جڪون نَي ڏينوڙِي ھَي ڪہ ھر ھيڪ رو مونڏو بند ھوئي جاوَي ھانَ ايشوَر ݾجِي دُنيا نَي سزا ڏَي۔ 20 شريعت تي بَئي ڪو ڀِي ايشوَر آگھي نيڪ ھوئي ڪونھي ݾگھتو، ڪيونڪہ شريعت ݾون آپون نَي رُگو پاپون رِي خبر پڙَي ھَي۔
ايشوَر ݾون وفادارِي
21 ھمَي ايشوَر آپون نَي ݾچائي رو مارگ بتايو ھَي، جڪَي ݾون آپي بِنا شريعت ايشوَر آگھي نيڪ ھوئي ݾگھون ھون۔ توريت شاستر ھانَ نبِي اِيئي بات را گواھ ھَي۔ 22 جڪو ڀِي يسُوع مَسيح ݾون وفادار ھَي، ايشوَر اُوئون ݾجون نَي نيڪ ٺاوَي ھَي، بيشڪ ڪو ڀِي ھووَي۔ 23 ݾجون پاپ ڪيئو ھانَ ايشوَر رِي مھما ݾون اݪگا ھَي، 24 پڻ ايشوَر آپرِي ڪِرپا ڪري مَسيح يسُوع رَي وسيلَي آپڻَي پاپون رِي قيمت ڏينِي ھانَ آپون نَي مُکت ۾ نيڪ ٺاھيا۔ 25 ايشوَر پرڀُو يسُوع نَي ميليو ڪہ او مِنکون رَي پاپون رِي معافي رَي ݾارُو ٻَليدون ھووَي۔ اُوئي تي وِشواس راکڻ ݾون پاپون رِي معافي ملَي ھانَ ايشوَر رو اِنصاف پُورو ھووَي۔ اِيئي ݾون پيل ايشوَر صبر ڪري اِنسون را پاپ برداش ڪيئا۔ 26 ايشوَر آج ڀِي اِيئون ڪري آپرو اِنصاف پُورو ڪرَي ھَي ھانَ پرڀُو يسُوع ݾون وفادار ريوَڻ آݪَي ھر ھيڪ نَي نيڪ ٺاوَي ھَي۔
27 ھمَي آپي ڪئِي بات تي بڏائو ڪرون؟ شريعت تي بڏائو ڪرڻ رِي ڪو ڀِي ضرُورت ڪونھي، ڪيونڪہ مُگتي، شريعت تي بيوَڻ ݾون نا، پڻ وِشواس راکڻ ݾون ملَي ھَي۔ 28 اِيئي رو مطلب اَي ھويو ڪہ اِنسون شريعت تي بيوَڻ ݾون نا، پڻ پرڀُو يسُوع ݾون وفادار ريوَڻ ݾون ايشوَر رِي نظر ۾ نيڪ ھووَي ھَي۔ 29 ڪِي ايشوَر رُگو يھُوديون رو ھَي ھانَ ٻيجَي قومون رو ڪونھي؟ ݾاچيلي او ٻيجَي قومون رو ڀِي ايشوَر ھَي، 30 ڪيونڪہ رُگو ھيڪج ايشوَر ھَي، جڪو کَتنو ڪراوڻ آݪون ھانَ بِنا کَتنو ڪراوڻ آݪون نَي وفادار ھوئڻ رَي ڪري نيڪ ٺاشَي۔ 31 تو ڪِي اِيئي رو مطلب اَي ھَي ڪہ وفادار ريوَڻ ݾون آپي شريعت نَي بيڪار ݾمجھون ھون؟ ڪڏي ڀِي نا، پڻ اِيئون ڪرڻ ݾون آپي منون ھون ڪہ شريعت صحيح ھَي۔