1-سيموئيل
القانا ھانَ اُوئي رو خاندان
1
اِفرائيم رَي جابلُو علائقَي رَي راماتيم صوفيم يعني، راما شھر ۾ ھيڪ مِنک ريتو، جڪَي رو نون القانا ھتو۔ اُوئي رَي ٻاپ رو نون يروحام، يروحام رَي ٻاپ رو نون اليھو، اليھو رَي ٻاپ رو نون توحُو ھانَ توحُو رَي ٻاپ رو نون صُوف ھتو۔ 2 القانا رَي ٻي لُگائَي ھتَي، ھيڪِي رو نون حنا ھانَ ٻيجِي رو نون فِننا ھتو۔ فِننا را اولاد ھتا، پڻ حنا رو ڪو ڀِي اولاد ڪونھي ھتو۔ 3 ھر ݾال القانا آپرَي شھر ݾون ٻيجَي شھر سيلا ۾ قُدرت آݪَي پرميشوَر رِي ڀگتي ڪرڻ ھانَ ٻَليدون ڪرڻ جاوتو۔ اوٿ اُوئيج شھر ۾ عيلي پُوجاري را ٻي ڏيڪرا حُفني ھانَ فينحاس پرميشوَر را پُوجاري ھتا۔ 4 القانا جڏي ڀِي ٻَليدون ڪرتو، تو او آپرِي لُگائِي فِننا ھانَ اُوئي رَي ݾجَي اولادون نَي اُوئي ٻَليدون رَي موݾ رو حِصو ڏيتو۔ 5 القانا آپرِي لُگائِي حنا ݾون پريم ڪرتو، اِيئي رَي ڪري اُوئي نَي موݾ رو ٻيڻو حِصو ڏيتو، پڻ پرميشوَر حنا نَي ڪو ڀِي اولاد ڪونھي ڏينو ھتو۔ 6 حنا بونجڪِي ھتِي، اِيئي رَي ڪري اُوئي رِي ݾوڪ اُوئي نَي مھيڻا ڏي پريشون ڪرتِي۔ 7 ھر ݾال جڏي او پرميشوَر رَي گھر ۾ جاوتا، تو فِننا اُوئي نَي پريشون ڪرتِي، اِيئي تي حنا روتِي ھانَ ٻاٽِي ڀِي ڪونھي کاوتِي۔ 8 اِيئي رَي ڪري اُوئي رَي ڌڻِي القانا حنا نَي ڪھيو ڪہ،”تُو ڪيئون روئَي پڙِي ھانَ ٻاٽِي ڪونھي کاوتِي؟ تُو ڪيئون اُداس ھَي؟ ڪِي ھُون ٿارَي ݾارُو ڏَݾون ڏيڪرون ݾون وڌيڪ ڪونھي؟“حنا ھانَ عيلي پُوجاري
9 جڏي اُوئون سيلا شھر ۾ کائي پيئي ھئو ڪيئو، تو حنا پراٿنا رَي ݾارُو اُٺِي۔ اُوئي ٽيم عيلي پُوجاري پرميشوَر رَي گھر رَي در ڪڍي ڪُرسِي تي ٻيٺو ھتو۔ 10 حنا تموم گھڻِي پريشون ھتِي، اِيئي رَي ڪري او زار زار روئي پرميشوَر ݾون پراٿنا ڪرڻ لاگِي۔ 11 حنا پرميشوَر نَي مِنٿ ڪري ڪھيو ڪہ، ”اي قُدرت آݪا پرميشوَر، تُو آپرِي ٻونھِي تي نظر ڪر ھانَ مھارا ڏُک جو، تُو آپرِي ٻونھِي نَي پونتر نِي۔ جي تُو مھنَي ھيڪ ڏيڪرو ڏَي، تو ھُون اُوئي نَي ݾجِي حياتِي ٿنَي ڏئين ھانَ اُوئي را ماٿَي را باݪ ڪڏي ڀِي ڪونھي ڪُترون۔“
12 جڏي حنا پرميشوَر ݾون پراٿنا ڪرتِي پڙِي، تو عيلي اُوئي رَي موڏَي ڏيݾا جوتو پڙيو، 13 ڪيونڪہ حنا من ۾ پراٿنا ڪرتِي پڙِي ھانَ رُگو اُوئي را ھوٺ چُݪڪتا پڙيا، پڻ آواز ڪونھي آوتو، اِيئي رَي ڪري عيلي ݾمجھو ڪہ اَي نشَي ۾ ھَي۔ 14 عيلي اُوئي نَي ڪھيو ڪہ، ”تُو ڪترِي توڻي نشَي ۾ رئِي؟ تُو ھوش ۾ آ۔“ 15 تو حنا ڪھيو ڪہ، ”نا مھارا مالڪ، مھَي نَڪو شراب پيئو ھانَ نَڪو ھُون ڪَي نشَي ۾ ھون، پڻ ھُون ڏُکون رِي ماريوڙِي ھون، ھُون آپرو ڏُک پرميشوَر نَي ݾُڻائُون پڙِي۔ 16 تُو آپرِي ٻونھِي نَي خراب لُگائِي نِي ݾمجھ۔ ھُون آپرَي گھڻَي ڏُکون ھانَ پريشونِي رَي ڪري پراٿنا ڪرون پڙِي۔“ 17 اِيئي تي عيلي اُوئي نَي ڪھيو ڪہ، ”تُو خيريت ݾون جا، اِسرائيل رو ايشوَر ٿارَي من رِي مُراد پُورِي ڪرَي، جڪو ٿَي اُوئي ݾون مونگيو ھَي۔“ 18 اَي بات ݾُڻي حنا رِي پريشونِي ختم ھوئِي۔ پَڇي حنا ڪھيو ڪہ، ”ٿارِي ٻونھِي تي دايا رِي نظر ھووَي۔“ پَڇي او اوٿ ݾون بُئِي گئِي ھانَ جائي ٻاٽِي کاڌِي۔
سيموئيل رو جنم
19 پَڇي القانا ھانَ اُوئي رو خاندان ٻيجَي ڏِن ݾاڪݪي تارھي اُٺي پرميشوَر آگھي شيش نِمايا ھانَ پَڇي او راما شھر پاڇا آپرَي گھري گيا۔ القانا آپرِي لُگائِي حنا ڪڍي گيو ھانَ پرميشوَر حنا رِي پراٿنا ݾُڻِي۔ 20 پَڇي اِيئون ھويو ڪہ حنا اُميد ݾون ھوئِي ھانَ اُوئي رو ڏيڪرو جايو، حنا اُوئي رو نون اَي ڪئي سيموئيل راکيو ڪہ،”مھَي اِيئي نَي پرميشوَر ݾون مونگي ليئو ھَي۔“
سيموئيل نَي ايشوَر رَي نون ڪرڻ
21 پَڇي ھر ݾال آݪِي ڪار القانا آپرَي ݾجَي خاندان ڀيڙو پرميشوَر رَي ݾارُو ٻَليدون ڪرڻ ھانَ آپرِي مِنٿ پُورِي ھوئڻ رو ٻَليدون ڪرڻ گيو۔ 22 پڻ حنا اُوئون ڀيڙِي ڪونھي گئِي۔ اُوئي آپرَي ڌڻِي نَي ڪھيو ڪہ،”جڏي اَي ٻاݪ ڏُوڌ پيئڻ ڇوڙشَي، تو پَڇي ھُون اِيئي نَي پرميشوَر آگھي لي جائين ڪہ اَي ھميشا اوٿج رَي۔“ 23 اِيئي تي القانا ڪھيو ڪہ،”جون ٿارِي مرضِي اِيئوج ڪر۔ جترِي توڻي تُو اِيئي رو ڏُوڌ ڪونھي ڇوڙاوَي، اُترِي توڻي تُو ايٿج رَي ھانَ پرميشوَر رو واعدو پُورو ھووَي۔“ پَڇي حنا آپرَي گھري ٻيٺِي ھانَ ٻاݪ رو ڏُوڌ ڇوڙاوڻ توڻي اُوئي رِي ݾنڀال ڪرتي رئِي۔
24 پَڇي جڏي سيموئيل ڏُوڌ پيئڻ ڇوڙيو، تو حنا تينون ݾالون رو ٽوگھڙو، اندازن اَڌ مَڻ آٽو ھانَ انگُورون رَي رس رِي ھيڪ ڏيڙِي لي سيلا شھر ۾ پرميشوَر رَي گھر ۾ گئِي۔ سيموئيل اَڃون توڻي ٻاݪ ھتو۔ 25 اوٿ اُوئون ھيڪ ٽوگھڙو باڍيو ھانَ سيموئيل نَي عيلي پُوجاري ڪڍي لي آيا۔ 26 حنا، عيلي نَي ڪھيو ڪہ،”اي مھارا مالڪ، ٿارو ݾونݾ، ھُون اوج لُگائِي ھون، جڪَي ٿَي ڪڍي ايٿ اُڀي پرميشوَر ݾون پراٿنا ڪِي ھتِي۔ 27 مھَي اِيئي ڇوڪرَي رَي ݾارُو پراٿنا ڪِي ھتِي ھانَ پرميشوَر مھارِي مُراد پُورِي ڪِي، جڪو مھَي اُوئي ݾون مونگيو ھتو۔ 28 اِيئي رَي ڪري مھَي اِيئي ڇوڪرَي نَي پرميشوَر رَي نون رو ڪيئو ھَي ھانَ آج ݾون اِيئي رِي ݾجِي زندگِي پرميشوَر رَي ݾارُو ھَي۔“ پَڇي اُوئون پرميشوَر آگھي شيش نِمايا۔