رُوت 3

رُوت رو بُوعز رِي پناھ ۾ آوڻ

ھيڪ ڏِن نومِي آپرِي بوئارِي رُوت نَي ڪھيو ڪہ، ”ڏيڪرِي، مھارِي مرضِي ھَي ڪہ ٿنَي ڪو ݾُٺو ڌڻِي ملَي ھانَ تُو آپرَي گھري ݾُکِي رَي۔ ‏2 ٿنَي خبر ھَي ڪہ بُوعز، جڪَي رَي نوڪروڻيون ڀيڙِي تُو جاوتِي، او آپڻو نيڙو عزيز ھَي۔ جو، آج رات بُوعز کݪَي تي جَئو باورڻ جاشَي۔ ‏3 ھمَي تُو جِھيلي ݾُٺا گاڀا پير ھانَ خُوشبو لگائي کݪَي تي جا۔ جترِي توڻي او کاوَي پيئَي نِي، تُو اُترِي توڻي اُوئي نَي ڏيکاڙو نِي ڏئي۔ ‏4 پڻ تُو اُوئي نَي جوتِي رئي ڪہ او ڪيٿ ݾُوئَي ھَي، جڏي او اُونگاجَي، تو تُو اُوئي رَي پگون ڪڍي ݾُوئي رئي، اِيئي تي او ݾمجھي جاشَي ڪہ تُو اُوئي نَي مِنٿ ڪرَي پڙِي ھانَ پَڇي تُو اُوئي رَي پگون ݾون چادر رو پلو پرھو ڪري آپ تي اوڍي۔ پَڇي تُو اِنتظار ڪري جڏي او جاگشَي، تو او ݾمجھي جاشَي ڪہ ٿنَي اُوئي رِي پناھ رِي ضرُورت ھَي۔ پَڇي او ٿنَي ݾُڻاشَي ڪہ ھمَي ٿنَي ڪِي ڪرڻو ھَي۔“ ‏5 اِيئي تي رُوت اُوئي نَي ڪھيو ڪہ، ”جون ٿَي ڪھيو ھَي، ھُون اِيئوج ڪرين۔“

‏6 پَڇي رُوت کݪَي تي گئِي ھانَ جون اُوئي رِي ݾاݾُو ڪھيو ھتو، اِيئوج ڪيئو۔

‏7 جڏي بُوعز کائي پيئي ڍئو ڪيئو، تو او ڏوڻون رَي ڍِگ ڪڍي ݾُوئي رھيو۔ اُوئي ݾون پَڇي رُوت ھݪَي ھݪَي آئِي ھانَ اُوئي رَي پگون ڪڍي ݾُوئي رئِي ھانَ اُوئي رَي پگون ݾون چادر پَرھي ڪري آپ تي لِي۔ ‏8 پَڇي آڌِي رات رو جڏي بُوعز پاݾو ڦوريو، تو ڇِݪڪ کائي اُٺيو ھانَ ڏيٺو ڪہ ھيڪ لُگائِي آپرَي پگون ڪڍي ݾُوتِي پڙِي ھَي۔ ‏9 بُوعز پُوڇو ڪہ، ”تُو ڪُڻ ھَي؟“ اُوئي بݪتِي ڏينِي ڪہ، ”ھُون ٿارِي ٻونھِي رُوت ھون۔ تُو مھارَي ڌڻِي رو نيڙو عزيز ھَي ھانَ ٿارو فرض ھَي ڪہ تُو مھَي ݾون بيئان ڪرَي۔“ ‏10 اِيئي تي بُوعز ڪھيو ڪہ، ”ڇوڪرِي پرميشوَر ٿنَي برڪت ڏَي۔ آج توڻي ٿَي آپرِي ݾاݾُو رِي شيوا ڪري اُوئي تي تموم گھڻِي مھربونِي ڪِي ھَي، پڻ ھمَي تُو مھنَي بيئان رو ڪئي آپرَي خاندان تي اِيئي ݾون ڀِي وڌيڪ مھربونِي ڪرَي پڙِي، ڪيونڪہ تُو ڪَي اَمير جون غريب ݾون بيئان ڪري ݾگھتِي، پڻ ٿَي اِيئون ڪونھي ڪيئو۔ ‏11 پڻ ھمَي تُو گڻتِي نِي ڪر، ھُون آپرو فرض ضرُور پُورو ڪرين ھانَ جون تُو ڪَي ھَي، ھُون اِيئوج ڪرين۔ شھر رَي ݾجَي مِنکون نَي خبر ھَي ڪہ تُو تموم گھڻِي نيڪ لُگائِي ھَي۔ ‏12 اَي بات ݾاچِي ھَي ڪہ ھُون ٿارو نيڙو عزيز ھون، پڻ مھَي ݾون ڀِي وڌيڪ ھيڪ ٻيجو عزيز ھَي، جڪَي رو پيلڪو حق ھَي۔ ‏13 ھمَي رات ايٿج رَي ھانَ ھُون ݾاڪݪي تارھي اُوئي ڪڍي جائي پُوڇين ڪہ ڪِي او آپرو فرض پُورو ڪرشَي؟ جي او ڪرشَي، تو ٺيڪ ھَي، نِي تو ھُون پرميشوَر رو ݾونݾ لي ڪونھ ھون ڪہ ھُون اَي فرض ضرُور پُورو ڪرين، پڻ تُو ݾاڪݪي ھوئڻ توڻي ݾُوئي رَي۔“ ‏14 پَڇي رُوت اُوئي رَي پگون ڪڍي ݾُوئي رئِي ھانَ ڏِن اُگڻ ݾون پيل جڏي انڌارو ھتو ڪہ ڪو ڀِي ڪينَي اوݪکَي نِي، تو او جاگِي۔ اُوئي ٽيم بُوعز ݾوچڻ لاگو ڪہ،”اِيئون نِي ھووَي ڪہ ڪينَي خبر پڙَي ڪہ اَي لُگائِي کݪَي تي آئِي ھتِي۔“ ‏15 پَڇي بُوعز اُوئي نَي ڪھيو ڪہ، ”جڪو چادر ٿَي ڪڍي ھَي، او ايٿ بِڇا۔“ اِيئي تي بُوعز جَئو را ڇَي ڇاجڙا ڀري چادر تي ڍاڙيا ھانَ ٻونڌائي اُوئي رَي ماٿَي تي راکيا۔ پَڇي رُوت آپرَي گھري گئِي۔

‏16 جڏي رُوت گھري پُگِي، تو اُوئي رِي ݾاݾُو پُوڇو ڪہ، ”تُو آئِي ڏيڪرا، ݾُڻا بُوعز ٿنَي ڪِي ڪھيو؟“ اِيئي تي رُوت آپرِي ݾاݾُو نَي ݾجِي بات ݾُڻائِي۔ ‏17 رُوت آپرِي ݾاݾُو نَي اَي ڀِي ݾُڻايو ڪہ، ”بُوعز مھنَي ڪھيو ڪہ، ’تُو آپرِي ݾاݾُو ڪڍي کالِي ھاٿ نِي جا۔‘ اَي جو، اُوئي مھنَي جَئو را ڇَي ڇاجڙا ڀري ڏينا ھَي۔“ ‏18 اِيئي تي اُوئي رِي ݾاݾُو ڪھيو ڪہ، ”ڏيڪرِي، ھمَي تُو گڻتِي نِي ڪر، پڻ اِنتظار ڪر ڪہ آج ڪِي ھوشَي، ڪيونڪہ بُوعز اھڙو مِنک ھَي، جترِي توڻي او اَي ڪوم پُورو نِي ڪرَي، اُترِي توڻي او آروم ݾون ڪونھي ٻيݾَي۔“