رُوت 4

بُوعز رو رُوت ݾون بيئان

اُوئيج ڏِن بُوعز بيت لحم شھر رَي موٽَي در ڪڍي ٻيݾي رھيو، جيٿ فيصلا ھوتا۔ پَڇي جڪَي نيڙَي عزيز رَي بارَي ۾ بُوعز ڪھيو ھتو، او اوٿ ݾون لنگھيو۔ تو بُوعز اُوئي نَي ڪھيو ڪہ،”ايٿ مھَي ڪڍي آئي ٻيݾ۔“ پَڇي او آئي اُوئي ڪڍي ٻيٺو۔ ‏2 پَڇي بُوعز شھر رَي ڏَݾ اَگووڻون نَي ڪھيو ڪہ، ”ايٿ آئي ٻيݾو۔“ پَڇي او ڀِي آئي ٻيٺا۔ ‏3 پَڇي بُوعز اُوئي نيڙڪَي عزيز نَي ڪھيو ڪہ، ”آپڻَي عزيز اليملڪ رِي بيواھ نومِي موآب مُلڪ ݾون پاڇِي آئِي ھَي ھانَ اُوئي رِي مرضِي ھَي ڪہ او اليملڪ رِي ٻنِي بيچَي۔ ‏4 مھَي ݾوچو ڪہ ھُون پيل ٿنَي ݾُڻائُون، ڪيونڪہ ٿَي ݾون وڌيڪ اُوئي رو عزيز ھانَ نيڙو ڪو ڀِي ڪونھي۔ اِيئي رَي ڪري جي او ٻنِي ٿنَي ليوَڻِي ھَي، تو تُو آج اَگووڻون ھانَ ݾجون رَي رُوبرو مول لَي، ڪيونڪہ پيلڪو حق ٿارو ھَي، نِي تو ھُون مول لئين، ڪيونڪہ ٿَي ݾون پَڇي اُوئي رو ٻيجو حق مھارو ھَي۔“ اِيئي تي اُوئي آڏمي ڪھيو ڪہ، ”ٺيڪ ھَي، او ٻنِي ھُون مول لئين۔“ ‏5 پَڇي بُوعز اُوئي نَي ڪھيو ڪہ، ”ٺيڪ ھَي۔ جڏي تُو او ٻنِي نومِي ݾون مول لئِي، تو ٿنَي اُوئي موآبي رُوت ݾون بيئان ڪرڻو پڙشَي ڪہ رُوت ݾون جايوڙا ٻاݪ اُوئي ٻنِي را بارݾ ھووَي ھانَ اليملڪ رَي خاندان رو نون بيتو رَي۔“ ‏6 اِيئي تي اُوئي آڏمي ڪھيو ڪہ، ”ھُون اِيئون ڪونھي ڪرون، ڪيونڪہ جي مھَي اِيئون ڪيئو، تو مھارَي آپرَي ٻاݪون نَي مھارِي ملڪيت ۾ گھٽ حِصو ملشَي۔ اِيئي رَي ڪري ڀلي تُو او ٻنِي مول لَي۔“

‏7 اُوئي زمونَي ۾ اِسرائيلي قوم ۾ اَي رواج ھتو ڪہ جڪو ڀِي آپرِي ٻنِي جون حق ڪَي ٻيجَي نَي ڏيتو، تو بات پڪِي ڪرڻ رَي ݾارُو او آپرَي جُتون ۾ ھيڪ جُتِي اُتاري ثبُوت رَي ݾارُو ٻنِي ليوَڻ آݪَي نَي ڏيتو۔ اِسرائيلي قوم ۾ اِيئون ڪرڻ ݾون بات پڪِي ݾمجِھي جاوتِي۔ ‏8 پَڇي اُوئي آڏمي بُوعز نَي ڪھيو ڪہ، ”اَي ٻنِي تُو مول لَي۔“ اِيئي تي اُوئي آپرِي ھيڪ جُتِي اُتارِي ھانَ اُوئي بُوعز نَي ڏينِي۔

‏9 پَڇي بُوعز اَگووڻون ھانَ ݾجون رَي رُوبرو ڪھيو ڪہ، ”ٿي ݾجائِي اِيئي بات را گواھ ھو ڪہ آج مھَي نومِي ݾون اُوئي رَي ڌڻِي اليملڪ ھانَ اُوئي رَي ڏيڪرون ڪليون ھانَ محلون رِي ݾجِي ٻنِي مول لِي ھَي۔ ‏10 ھُون موآبي رُوت ݾون بيئان ڪرڻ رَي ݾارُو ڀِي تيار ھون، جڪو محلون رِي بيواھ ھَي ڪہ اُوئي ݾون جايوڙا ٻاݪ اُوئي ٻنِي را بارݾ ھووَي ھانَ اُوئي رو نون آپڻَي خاندان ھانَ آپڻَي مِنکون ۾ بيتو رَي۔ آج ݾون ٿي ݾجائِي اِيئي بات را گواھ ھو۔“

‏11 اِيئي تي اوٿ ٻيٺوڙَي ݾجَي اَگووڻون ھانَ ݾجَي مِنکون ڪھيو ڪہ، ”مھي اِيئي بات را گواھ ھون۔

پرميشوَر ڪرَي ڪہ،

ٿارِي ھوئڻ آݪِي لُگائِي رُوت نَي اترِي برڪت ملَي

جترِي برڪت راخل ھانَ ليھا نَي ملِي ھَي،

جڪون ݾون آپڻِي ݾجِي اِسرائيلي قوم جنم ليئو ھَي۔

پرميشوَر ڪرَي ڪہ تُو اِفراتي خاندان ۾ ترقي ڪرَي

ھانَ بيت لحم شھر ۾ ٿارو نون مشھُور ھووَي۔

‏12 پرميشوَر ٿنَي ھانَ ٿارِي ھوئڻ آݪِي لُگائِي نَي اِترا اولاد ڏَي،

جِترا اولاد تمر ھانَ يھُودا رَي ڏيڪرَي فارص رَي خاندان نَي ڏينا ھتا۔“

‏13 پَڇي بُوعز رُوت ݾون بيئان ڪيئو۔ او آپرِي لُگائِي رُوت ڪڍي گيو ھانَ او پرميشوَر رِي ڪِرپا ݾون اُميد ݾون ھوئِي ھانَ اُوئي رو ڏيڪرو جايو۔ ‏14 اِيئي تي اوٿ رَي لُگايون نومِي نَي ڪھيو ڪہ، ”پرميشوَر رِي بڏائي ھووَي، جڪَي ٿنَي آج رَي ڏِن پوترو ڏينو ھَي ڪہ او ٿنَي ݾنڀالَي۔ پرميشوَر اِيئي رو نون اِسرائيلي قوم ۾ مشھُور ڪرَي۔ ‏15 اَي ٿارَي بُوڍاپَي ۾ ٿارِي شيوا ڪري ٿارِي ݾنڀال ڪرشَي۔ ٿارِي بوئارِي جڪو ٿارو تموم گھڻو خيال راکَي ھَي ھانَ جڪَي ݾات ڏيڪرون ݾون ڀِي وڌيڪ ٿارِي شيوا ڪِي ھَي، اُوئي اِيئي نَي جنم ڏينو ھَي۔“

‏16 پَڇي نومِي اُوئي ٻاݪ نَي آپرَي کوڙَي ۾ ليئو ھانَ اُوئي نَي ݾنڀالڻ لاگِي۔ ‏17 اُوئي ݾون پَڇي گون رَي لُگايون اُوئي ڇوڪرَي رو نون عوبيد راکيو۔ پَڇي اُوئون ۾ اَي بات مشھُور ڪِي ڪہ، ”نومِي رَي ݾارُو ھيڪ پوترو جايو ھَي۔“

عوبيد ݾون يَسي جايو، جڪو دائُود بادشاھ رو اَبا ھتو۔

بُوعز را اولاد ھانَ پيڙھِي

‏18 فارص را اولاد اَي ھَي۔

فارص رو ڏيڪرو حصرون،

‏19 حصرون رو ڏيڪرو راما،

راما رو ڏيڪرو عمينداب،

‏20 عمينداب رو ڏيڪرو نحسون،

نحسون رو ڏيڪرو سلمون،

‏21 سلمون رو ڏيڪرو بُوعز،

بُوعز رو ڏيڪرو عوبيد،

‏22 عوبيد رو ڏيڪرو يَسي

ھانَ يَسي رو ڏيڪرو دائُود بادشاھ ھتو۔