يشُوع 20

پناھ را شھر

پَڇي پرميشوَر يشُوع نَي ڪھيو ڪہ، ‏2 ”اِسرائيليون نَي ڪَي ڪہ آپرَي ݾارُو پناھ رو شھر چُونڊَي، جھڙَي نمُونَي مھَي مُوسيٰ رَي وسيلَي حُڪم ڏينو ھتو۔ ‏3 جي ڪَي ݾون غلطِي ݾون، جون بِنا اِرادَي ڪيرو خُون ھووَي، تو او اوٿ ݾون ناݾي پناھ رَي شھر ۾ جاوَي ڪہ او خُون رو بدلو ليوَڻ آݪَي ݾون بچوڙو رَي۔ ‏4 او اُوئي شھرون ۾ ھيڪَي شھر ڏيݾا ناݾي جاوَي ھانَ اُوئي شھر رَي در تي اُڀو رَي ھانَ اُوئي شھر رَي اَگووڻ نَي آپرِي بات ݾُڻاوَي۔ پَڇي اَگووڻ اُوئي نَي آپرَي شھر ۾ آوڻ ڏَي ھانَ آپ ڀيڙو ريوَڻ رِي جگھا ڏَي۔ ‏5 جي خُون رو بدلو ليوَڻ آݪو اُوئي رو لارو ڪرَي، تو او اُوئي خُونِي نَي اُوئي رَي حوالي نِي ڪرَي، ڪيونڪہ اُوئي آپرَي پاڙَي آݪَي نَي بِنا اِرادَي ماريو ھتو ھانَ اِيئي ݾون پيل اُوئي رِي اُوئي ݾون ڪو ڀِي دُشمنِي ڪونھي ھتِي۔ ‏6 جترِي توڻي فيصلو نِي ھووَي ھانَ اُوئي ٽيم رو پُوجاريون رو ݾردار مرَي نِي، اُترِي توڻي او خُونِي اُوئي شھر ۾ رَي۔ اِيئي ݾون پَڇي او آپرَي گھري اُوئي شھر ۾ پاڇو جاوَي، جيٿ ݾون او ناݾي آيو ھتو۔“

‏7 پَڇي اِسرائيليون لِڪڻ رَي ݾارُو اَي شھر چُونڊيا۔ نفتالي رَي جابلُو علائقَي ۾ گليل رو قادس شھر، اِفرائيم رَي جابلُو علائقَي ۾ سِڪم شھر، يھُودا رَي جابلُو علائقَي ۾ قريت اربع، يعني حبرُون شھر۔ ‏8 يريحُو شھر ڪڍي يردن دريا پار اُوگوڻَي پاݾَي رڻ پَٽ ۾ بصر شھر، جڪو روبن قبيلَي رو ميدونِي علائقو ھَي، جِلعاد علائقَي ۾ راما شھر، جڪو جد قبيلَي رو علائقو ھَي ھانَ بسن رَي علائقَي رو جولان شھر، جڪو مُنسي رَي قبيلَي رو علائقو ھَي۔

‏9 اَي ݾجائِي او شھر ھَي، جڪو اِسرائيليون ھانَ اُوئون رَي بِچ ۾ ريوَڻ آݪون مُسافرون رَي ݾارُو چُونڊيا ھتا۔ اَي شھر اِيئي رَي ڪري چُونڊيا ڪہ جي ڪُڻ بِنا اِرادَي ماريجَي، تو او اُوئا جائي پناھ لَي ھانَ جترِي توڻي اَگووڻ فيصلو نِي ڪرَي، اُترِي توڻي او اُوئي شھر ۾ رَي، ڪيٿ اِيئون نِي ھووَي ڪہ بدلو ليوَڻ آݪو اُوئي نَي ماري ڇوڙَي۔