يشُوع 19

شمعُون قبيلَي رو علائقو

پَڇي جڏي ٻيجو گُھمرو پُکو گھاتيو، تو شمعُون رَي قبيلَي ھانَ اُوئي رَي خاندانون نَي وِراثت رو ٻيجو حِصو مِليو۔ اُوئون رِي وِراثت يھُودا رَي قبيلَي رِي وِراثت رَي بِچ ۾ ھتِي۔ ‏2 اُوئون رِي وِراثت را شھر اَي ھتا۔ بيرسبع يعني سبع، مولادا، ‏3 حصار سوعول، بالا، عضم، ‏4 التولد، بتُول، حُرما، ‏5 صِقلاج، بيت مرڪبوت، حصار سُوسا، ‏6 بيت لبائوت ھانَ ساروحن۔ اَي تيرھَي شھر ھانَ اُوئون را گون ھتا۔ ‏7 عين، رمون، عتر ھانَ عسن۔ اَي چار شھر ھانَ اِيئون را گون ڀِي ھتا۔ ‏8 اِيئون شھرون رَي آݾَي پاݾَي بعلات بير، يعني ڏکڻ رَي راما شھر توڻي ݾجائِي گون ڀِي شمعُون رَي قبيلَي نَي مِليا۔ شمعُون رَي قبيلَي نَي اَي ݾجِي وِراثت اُوئي رَي خاندانون رَي حِساب ݾون ملِي۔ ‏9 شمعُون قبيلَي نَي يھُودا رَي قبيلَي ݾون وِراثت ڏينِي، ڪيونڪہ يھُودا نَي تموم گھڻو حِصو مِليو ھتو، اِيئي رَي ڪري شمعُون قبيلَي نَي اُوئون رَي بِچ ݾون اَي حِصو مِليو۔

زبولُون قبيلَي رو علائقو

‏10 پَڇي جڏي تيجو گُھمرو پُکو گھاتيو، تو زبولُون قبيلَي ھانَ اُوئي رَي خاندانون نَي وِراثت ۾ تيجو حِصو مِليو۔ اُوئون نَي ساريد شھر رِي حد توڻي وِراثت ملِي۔ ‏11 اُوئون رِي حد آٿوڻَي ݾون مرعلا شھر ݾون ھوئي دباست شھر توڻي پُگِي ھانَ اُوئي رِي ندِي توڻي پُگِي، جڪو يُقنعام شھر رَي ݾومھو ھَي۔ ‏12 اَي حد ساريد شھر ݾون ڦِري اُوگوڻَي پاݾَي ڪِسلوت تبُور توڻي پُگِي ھانَ ايٿ ݾون دبرت ݾون ھوئي ماٿَي يفيع توڻي اَي حد پُگِي۔ ‏13 پَڇي اوٿ ݾون اُوگوڻَي پاݾَي جات حِفر ھانَ عتا قاضين ݾون ھوئي رمون شھر توڻي پُگِي، جڪو نيعا شھر توڻي ھَي۔ ‏14 اوٿ ݾون اَي حد اُتر ݾون ھوئي حناتون شھر ڏيݾا گئِي ھانَ اِفتاح ايل رِي وادِي توڻي جائي ختم ھوئِي۔ ‏15 زبولُون قبيلَي نَي جڪو شھر وِراثت ۾ مِليا، او اَي ھَي۔ قطات، نحلال، سمرون، ادالا ھانَ بيت لحم۔ اَي ݾجائِي ٻارھَي شھر ھانَ اُوئون را گون ڀِي ھتا ‏16 زبولُون قبيلَي ھانَ اُوئي رَي خاندانون نَي وِراثت ۾ جڪو شھر ھانَ اُوئون را گون مِليا، او اَئيج ھتا۔

اشڪار قبيلَي رو علائقو

‏17 پَڇي جڏي چوٿُون گُھمرو پُکو گھاتيو، تو اشڪار قبيلَي ھانَ اُوئي رَي خاندانون نَي وِراثت ۾ چوٿُون حِصو مِليو۔ ‏18 اُوئون رَي شھرون رَي حدون اَي ھتَي۔ يزرعيل، ڪسُولوت، شونيم، ‏19 حفاريم، شيُون، اناخرات، ‏20 ربيت، قسيون، ابض، ‏21 ريمت، عين جنيم، عين حدا ھانَ بيت فصيص توڻي ھتِي۔ ‏22 او حد تبُور، شخصيما ھانَ بيت شمس توڻي گئِي۔ اُوئون رِي حد يردن دريا توڻي ختم ھوئِي۔ اَي ݾجائِي ݾوڙَي شھر ھانَ اُوئون را گون ھتا۔ ‏23 اشڪار قبيلَي ھانَ اُوئي رَي خاندانون نَي وِراثت ۾ جڪو شھر ھانَ اُوئون را گون مِليا، او اَئيج ھتا۔

آشر قبيلَي رو علائقو

‏24 پَڇي جڏي پونچوون گُھمرو پُکو گھاتيو، تو آشر قبيلَي ھانَ اُوئي رَي خاندانون نَي وِراثت ۾ پونچوون حِصو مِليو۔ ‏25 اِيئون شھرون رِي حد اَي ھتِي۔ خلقت، حلي، بطن، اڪشاف، ‏26 الملڪ، عماد ھانَ مِسال۔ آٿوڻَي ڏيݾا اَي حد ڪرمل جبل ھانَ سيحُور لِبنات توڻي پُگِي۔ ‏27 اَي حد اُوگوڻَي ݾون ڦِري بيت دجون توڻي پُگِي ھانَ اوٿ ݾون زبولُون ھانَ اِفتاح ايل رِي وادِي رَي اُتر ڏيݾا پُگي، بيت العمق ھانَ نفي ايل توڻي پُگِي ھانَ اُتر ڏيݾا ڪبول شھر توڻي پُگِي۔ ‏28 اوٿ ݾون عبرُون، رحوب، حمون، قانا ھانَ موٽَي شھر صيدا توڻي پُگِي۔ ‏29 پَڇي اوٿ ݾون اَي حد راما شھر ݾون ھوئي ڪوٽ آݪَي صُور شھر ڏيݾا ڦِري حوسا توڻي پُگِي ھانَ پَڇي اڪزيب رَي نيڙِي ݾمُوندر تي ختم ھوئِي۔ ‏30 عُما، افيق ھانَ رحوب شھر ڀِي اُوئون نَي مِليو۔ اَي ݾجائِي ٻاوِي شھر ھانَ اُوئي را گون ھتا۔ ‏31 آشر قبيلَي ھانَ اُوئون رَي خاندان نَي وِراثت ۾ جڪو شھر ھانَ اُوئون را گون مِليا، او اَئيج ھتا۔

نفتالي قبيلَي رو علائقو

‏32 پَڇي جڏي ڇھون گُھمرو پُکو گھاتيو، تو نفتالي قبيلَي ھانَ اُوئي رَي خاندانون نَي وِراثت ۾ ڇھُون حِصو مِليو۔ ‏33 اُوئون رَي شھرون رَي حدون حلف شھر ݾون شرُوع ھوئي، ضعننيم رَي بلُوط رَي بَڻ ݾون ھوئي، ادامي نقب ھانَ يبني ايل ݾون لقُوم توڻي پُگِي ھانَ يردن دريا تي اَي حد ختم ھوئِي۔ ‏34 اَي حد آٿوڻَي ݾون ڦِري ازنُوت تبُور ݾون ھوئي، حُقوق توڻي پُگِي ھانَ ڏکڻ ۾ زبولُون ھانَ آٿوڻَي ۾ آشر ھانَ اُوگوڻَي ۾ يردن دريا تي يھُودا قبيلَي رِي حد توڻي اَي حد پُگِي۔ ‏35 ڪوٽ آݪا شھر اَي ھَي۔ صديم، صير، حمات، رقت، ڪِنرت، ‏36 اداما، راما، حصُور، ‏37 قادس، ادرعي، عين حصُور، ‏38 ارون، مِجدال ايل، حُريم، بيت عنات ھانَ بيت شمس۔ اَي ݾجائِي اُگڻيݾ شھر ھانَ اُوئون را گون ڀِي ھتا۔ ‏39 نفتالي قبيلَي ھانَ اُوئي رَي خاندانون نَي وِراثت ۾ جڪو شھر ھانَ اُوئون را گون مِليا، او اَئيج ھتا۔

دان قبيلَي رو علائقو

‏40 پَڇي جڏي ݾاتوون گُھمرو پُکو گھاتيو، تو دان قبيلَي ھانَ اُوئي رَي خاندانون نَي وِراثت ۾ ݾاتوون حِصو مِليو۔ ‏41 اُوئون رَي شھرون رَي حدون اَي ھتَي۔ صُرعا، استال، عيرشمس، ‏42 شعلبين، ايالُون، اِتلا، ‏43 ايلون، تِمناتا، عقرُون، ‏44 التقيا، جِبتون، بعلات، ‏45 يھُود، بنِي برق، جات رمون، ‏46 مي يرقُون ھانَ يافا شھر رَي ݾومھو رقُون مع رو علائقو۔ ‏47 جڪو علائقو دان رَي قبيلَي نَي مِليو، او اُوئي تي قبضو ڪري ڪونھي ݾگھيا، اِيئي رَي ڪري اُوئون لشم شھر تي حملو ڪيئو ھانَ اوٿ رَي مِنکون نَي تلوار ݾون ماري ڇوڙيا۔ پَڇي اُوئي شھر تي قبضو ڪيئو ھانَ اوٿج ريوَڻ لاگا ھانَ آپرَي ٻاپ ڏاڏَي رَي نون تي لشم شھر رو نون دان راکيو۔ ‏48 دان قبيلَي ھانَ اُوئي رَي خاندانون نَي وِراثت ۾ جڪو شھر ھانَ اُوئون را گون مِليا، او اَئيج ھتا۔

يشُوع رِي وِراثت

‏49 پَڇي جڏي اُوئون اُوئي مُلڪ رَي حدون رِي وِراثت رو ڪوم پُورو ڪيئو، تو پَڇي اِسرائيلي قوم آݪون نُونَ رَي ڏيڪرَي يشُوع نَي ڀِي آپرَي بِچ ۾ وِراثت ڏينِي۔ ‏50 پرميشوَر رَي حُڪم تي اُوئون يشُوع نَي اِفرائيم رَي جابلُو علائقَي ۾ تِمنت سرح شھر ڏينو، جڪو اُوئي مونگيو ھتو۔ يشُوع اُوئي شھر نَي ڀڙي ٺاھيو ھانَ اُوئي ۾ ريوَڻ لاگو۔

‏51 اَي ݾجِي او وِراثت ھتِي، جڪو سيلا شھر ۾ پرميشوَر ݾون مُلاقات آݪَي تنٻُو رَي در تي پُوجاري اليعزر، نُونَ رَي ڏيڪرَي يشُوع ھانَ ݾجَي اِسرائيلي اَگووڻون پرميشوَر آگھي پُکو گھاتي بِݪائِي ھتِي۔ اِيئي نمُونَي اِيئي علائقَي نَي بِݪاوڻ رو ڪوم پُورو ھويو۔