يشُوع 15

يھُودا قبيلَي رو علائقو

پَڇي يھُودا رَي قبيلَي نَي اُوئي رَي خاندان رَي حِساب ݾون ڪنعان مُلڪ رو ڏکڻ آݪو حِصو مِليو، جڪو پُکا گھاتي بِݪايو ھتو۔ اِيئي علائقَي رَي حدون ادُوم مُلڪ ݾون لي ڏکڻ ۾ صين رَي رڻ پَٽ رَي ڇيڙَي توڻي ھتَي، ‏2 اُوئون رَي ڏکڻ آݪَي حدون مُردار ݾمُوندر رَي ڏکڻ ݾون شرُوع ھوئي، ‏3 عقربيم رِي چڙھائِي رَي ڏکڻ حِصَي ݾون لي ھانَ صين ݾون ھوئي قادس برنيع رَي ڏکڻ توڻي ھتَي۔ اَي حدون حصرون ݾون ماٿَي جاوڻ آݪَي نِنئي شھرون ادار ھانَ قرقع ڏيݾا ڦِرَي ھَي۔ ‏4 پَڇي اَي حدون عضمُون شھر ھانَ مِصر رِي ندِي ݾون ھوئي ݾمُوندر توڻي پُگَي، اَي يھُودا رَي ڏکڻ آݪَي حدون ھتَي۔

‏5 اُوگوڻَي پاݾَي اُوئون رَي حدون مُردار ݾمُوندر ݾون يردن دريا رَي ڇيڙَي توڻي ھانَ اُتر رِي حد مُردار ݾمُوندر رِي پُڇڙِي ݾون لي يردن رَي آخري ڪپ توڻي۔ ‏6 اَي حد ماٿلَي پاݾَي جائي بيت حجلا ݾون ھوئي اُتر رَي بيت عرابا ݾون روبن رَي ڏيڪرَي بوھن رَي پٿر توڻي پُگِي۔ ‏7 پَڇي اوٿ ݾون اَي حد ماٿَي عڪُور رِي وادِي ݾون ھوئي دبير شھر ڏيݾا ھانَ اُتر ڏيݾا جِلجال ڏيݾا ڦِرَي ھَي۔ جِلجال اُدميم رِي چڙھائِي رَي ٻيجَي پاݾَي ھَي ھانَ اَي چڙھائِي ندِي رَي ڏکڻ ۾ ھَي۔ پَڇي اوٿ ݾون اَي حد عين شمس رَي نديون ݾون ھوئي عين راجل توڻي پُگِي۔ ‏8 اوٿ ݾون اَي حد ھنوم رَي ڏيڪرَي رِي وادِي ݾون يبُوسي قوم رَي شھر يروشلم رَي ڏکڻ ݾون آگھي اُوئي جبل ڏيݾا جاوَي ھَي، اِيئي ندِي رَي آٿوڻَي ڏيݾا ھانَ رفائيم رِي وادِي رَي اُتر ڏيݾا ھَي۔ ‏9 پَڇي اَي حد جبل ݾون ڦِري نفتوح رِي ندِي ڏيݾا ھانَ پَڇي عقرُون جبل رَي شھرون ݾون ھوئي بعلا شھر ڏيݾا ڦِرَي ھَي۔ جڪَي نَي قريت يعريم ڀِي ڪَي ھَي۔ ‏10 اَي حد بعلا ݾون آٿوڻَي ݾون ڦِري شعير رَي جبل توڻي ھَي ھانَ يعريم جبل رِي وادِي، يعني اُتر ڏيݾا ڪسلُون شھر ݾون ھوئي بيت شمس شھر ڏيݾا ھيٺا تِمناتا شھر توڻي ھَي۔ ‏11 پَڇي اَي حد اوٿ ݾون عقرُون شھر رَي اُتر توڻي پُگِي ھانَ او سڪرُون ݾون ھوئي بعلا جبل ݾون ھوئي يبني ايل شھر توڻي پُگِي۔ اَي حد مُردار ݾمُوندر تي ختم ھووَي ھَي۔ ‏12 يھُودا قبيلَي نَي جڪو علائقو اُوئي رَي خاندانون رَي حِساب ݾون مِليو، اُوئي رِي حد آٿوڻَي پاݾَي موٽَي ݾمُوندر رَي ڪپ توڻي ھَي۔

ڪالب رِي جيت

‏13 پَڇي پرميشوَر رَي حُڪم تي يشُوع يُفنا رَي ڏيڪرَي ڪالب نَي حبرُون شھر ڏينو۔ جڪو يھُودا قبيلَي رَي علائقَي رَي بِچ ۾ ھَي۔ اَي شھر عناق رَي ٻاپ اربع رو ھتو، جڪَي نَي قريت اربع ڀِي ڪَي ھَي۔ ‏14 پَڇي ڪالب اوٿ ݾون تينون عناقي قبيلون نَي تگڙي ڪاڍيا، يعني سيسي، اخيمان ھانَ تلمي، اَي عناق را اولاد ھتا۔ ‏15 اِيئي ݾون پَڇي او دبير رَي مِنکون ݾون مُقابلو ڪرڻ گيو، دبير رو پِروڻو نون قريت سِفر ھتو۔ ‏16 پَڇي ڪالب ڪھيو ڪہ،”جڪو ڀِي قريت سِفر شھر تي حملو ڪري اُوئي تي قبضو ڪرشَي، تو ھُون آپرِي ڏيڪرِي عڪسا رو بيئان اُوئي ݾون ڪرائين۔“ ‏17 اِيئي تي ڪالب رَي ڀائي قنز رَي ڏيڪرَي غتني ايل، اُوئي شھر تي قبضو ڪيئو، تو ڪالب آپرِي ڏيڪرِي عڪسا رو بيئان اُوئي ݾون ڪرايو۔

‏18 پَڇي ݾاݾري جاوتي بِݪا عڪسا آپرَي ڌڻِي غتني ايل نَي ݾيکائي ڪھيو ڪہ،”تُو مھارَي اَبا ݾون ٻنِي مونگ۔“ پڻ جڏي او آپرَي گڏَي ݾون اُترِي، تو ڪالب اُوئي ݾون پُوڇو ڪہ،”ڪِي بات ھَي؟“ ‏19 عڪسا ڪھيو ڪہ،”مھنَي برڪت رِي آشيش ڏي، ڪيونڪہ ٿَي مھنَي ڏکڻ ڏيݾا نجب آݪِي غير آباد ٻنِي ڏينِي ھَي۔ ھمَي تُو مھنَي پوڻي رَي ندَي ڀِي ڏي۔“ پَڇي ڪالب اُوئي نَي جابلُو ھانَ ميدونِي علائقون رَي ندَي ڀِي ڏينَي۔

يھُودا را شھر

‏20 يھُودا قبيلَي رِي وِراثت اُوئي رَي خاندانون رَي حِساب ݾون اَي ھَي ‏21 ھانَ يھُودا قبيلَي رَي شھرون رَي حدون اَي ھَي۔ ادُوم ݾون لي ڏکڻ ڏيݾا آخر توڻي، يعني قبضي ايل، عيدر، يجُور، ‏22 قينا، ديمونا، عدعدا، ‏23 قادس، حصُور، اتنان، ‏24 زيف، تلم، بعلوت ‏25 حصُور حدتا، قريت حصرون يعني حصُور، ‏26 امام، سمع، مولادا، ‏27 حصار جدا، حشمون، بيت فلط، ‏28 حصار سوعول، بيرسبع، بزيوتيا، ‏29 بعلا، عييم، عضم، ‏30 التولد، ڪسيل، حُرما، ‏31 صِقلاج، مدمنا، سنسنا، ‏32 لبائوت، سلحيم، عين ھانَ رمون۔ اَي ݾجائِي اُڻٽِي شھر ھانَ اُوئون را گون ھتا۔

‏33 جبل آݪا ھيٺلا شھر اَي ھَي۔ استال، صُرعا، اسنا، ‏34 زنُوح، عين جنيم، تفُوح، عينام، ‏35 يرموت، عدُلام، شوڪا، عزيقا، ‏36 شعريم، عديتيم، جديرا، يعني جديرتيم۔ اَي ݾجائِي چئوڏَي شھر ھانَ اُوئون را گون ھتا۔ ‏37 اَي شھر ڀِي اُوئون رِي وِراثت ۾ ھتا۔ ضنان، حداشا، مجدال جد، ‏38 دِلعان، مِصفا، يقتي ايل، ‏39 لڪيس، بصقت، عجلُون، ‏40 ڪبُون، لحمام، ڪتليس، ‏41 جديروت، بيت دجون، نعما ھانَ مقيدا۔ اَي ݾجائِي ݾوڙھَي شھر ھانَ اُوئون را گون ھتا۔ ‏42 اِيئون شھرون ݾون ٽاݪ اَي شھر ڀِي ھتا۔ لِبنا، عتر، عسن، ‏43 يفتاح، اسنا، نصِيب، ‏44 قعيلا، اڪزيب ھانَ مريسا۔ اَي ݾجائِي نَئو شھر ھانَ اُوئون را گون ھتا۔ ‏45 اِيئون شھرون ݾون ٽاݪ اَي شھر ڀِي ھتا۔ عقرُون ھانَ اُوئي را آݾَي پاݾَي آݪا شھر ھانَ گون۔ ‏46 عقرُون جبل ݾون لي ݾمُوندر توڻي اشدُود رَي آݾَي پاݾَي آݪا ݾجائِي علائقا ھانَ اُوئون را شھر ھانَ گون۔ ‏47 اشدُود شھر ھانَ اُوئي را گون، غزا شھر ھانَ اُوئي را گون، مِصر رِي ندِي ݾون لي موٽَي ݾمُوندر رَي ڪپ توڻي ‏48 ھانَ جابلُو علائقون ۾ سمير، يتير، شوڪا، ‏49 داناھ، قريت سنا يعني دبير، ‏50 عناب، اِستمو، عنيم، ‏51 جشن، حولُون ھانَ جلوا۔ اَي ݾجائِي اِگيارَي شھر ھانَ اُوئون را گون ھتا۔ ‏52 اِيئون شھرون ݾون ٽاݪ اَي شھر ڀِي ھتا۔ اراب، دوما، اشعان، ‏53 ينيم، بيت تفُوح، افيقا، ‏54 حُمطا، قريت اربع، يعني حبرُون ھانَ صيعُور۔ اَي ݾجائِي نَئو شھر ھانَ اُوئون را گون ھتا۔ ‏55 اِيئون شھرون ݾون ٽاݪ اَي شھر ڀِي ھتا۔ معُون، ڪرمل، زيف، يُوطا، ‏56 يزرعيل، يقدعام، زنُوح، ‏57 قين، جِبع ھانَ تِمناتا۔ اَي ݾجائِي ڏَݾ شھر ھانَ اُوئون را گون ھتا۔ ‏58 اِيئون شھرون ݾون ٽاݪ اَي شھر ڀِي ھتا۔ حلحُول، بيت صُور، جدُور، ‏59 معرات، بيت عنوت ھانَ التقون۔ اَي ݾجائِي ڇَي شھر ھانَ اُوئون را گون ھتا۔ ‏60 اِيئون شھرون ݾون ٽاݪ اَي شھر ڀِي ھتا۔ قريت بعل، يعني قريت يعريم ھانَ ربا۔ اَي ٻي شھر ھانَ اُوئون را گون ھتا۔ ‏61 رڻ پَٽ ۾ بيت عرابا، مدين، سڪاڪا، ‏62 نبسان، لُوڻ رو شھر ھانَ عين جدِي۔ اَي ݾجائِي ڇَي شھر ھانَ اُوئون را گون ھتا۔

‏63 يبُوسي قوم نَي يھُودا قبيلَي آݪا تگڙي ڪونھي ݾگھيا، جڪو يروشلم شھر ۾ ريتا۔ اِيئي رَي ڪري يبُوسي قوم آݪا آج ڀِي يھُودا قبيلَي ڀيڙا يروشلم ۾ رَي ھَي۔