يشُوع 13

باقي علائقون تي قبضو ڪرڻ رو حُڪم

جڏي يشُوع ڏوڪرو ھويو، تو پرميشوَر اُوئي نَي ڪھيو ڪہ،”ھمَي تُو تموم گھڻو ڏوڪرو ھويو رو ھانَ قبضو ڪرڻ رَي ݾارُو اَڃون توڻي تموم گھڻا علائقا باقي ھَي۔ ‏2 جڪو علائقا باقي ھَي، او اَي ھَي۔ فلستِي ھانَ جسُوري قوم را ݾجائِي علائقا، ‏3 سيحُور ندِي جڪو مِصر رَي اُوگوڻَي پاݾَي ھَي، اوٿ ݾون لي اُتر ڏيݾا عقرُون شھر رِي حد توڻي، اَي ݾجو علائقو ڪنعانيون رو ڪھيجَي ھَي، يعني فلستِي ݾردارون را اَي پونچ علائقا، غزا، اشدُود، اسقلون، جات، عقرُون ھانَ اِيئون ݾون ٽاݪ ڏکڻ ۾ عوِيم رو علائقو۔ ‏4 اُتر ݾون ڪنعانيون رو ݾجو علائقو ھانَ صيدانيون رَي شھر مغارا ݾون لي اموريون رَي علائقَي افيق توڻي ‏5 ھانَ جبلِي قوم رو ݾجو علائقو، اُوگوڻَي پاݾَي ݾجو لبنان، يعني حرمُون جبل رَي ھيٺا بعل جد ݾون لي حمات رِي حد توڻي، ‏6 لبنان ݾون لي مِسرفات المائم رَي جابلُو علائقَي رَي ݾجَي ريوَڻ آݪون نَي صيدانيون ݾُوڌا، ھُون اَي قومون اِسرائيليون رَي آگھي ݾون ڪاڍي ڇوڙين۔ جھڙَي نمُونَي مھَي ٿنَي حُڪم ڏينو ھَي، تُو رُگو اوج علائقو اِسرائيليون نَي وِراثت ۾ بِݪائي ڏئي۔ ‏7 ھمَي تُو اَي علائقو نَئو قبيلون ھانَ مُنسي رَي آڌَي قبيلَي نَي وِراثت ۾ بِݪائي ڏئي۔“

‏8 روبن رَي قبيلَي، جد رَي قبيلَي ھانَ مُنسي رَي آڌَي قبيلَي پيل ݾون آپرِي وِراثت رو حِصو مُوسيٰ ݾون ليئو ھتو۔ پرميشوَر رَي شيواداري مُوسيٰ اُوئون نَي يردن پار اُوگوڻَي پاݾَي، اَي حِصو ڏينو ھتو، ‏9 يعني عروعير شھر جڪو ارنون وادِي رَي ڪپ تي ھَي، او شھر جڪو وادِي رَي بِچ ۾ ھَي ھانَ ݾجو ميدون، جڪو ميدبا شھر ݾون ديبون توڻي ھَي ‏10 ھانَ اموريون رو بادشاھ سيحُون، جڪو حشبُون ۾ بادشاھي ڪرَي ھَي، اُوئي رَي ݾجَي شھرون ݾون لي عمُون رِي حد توڻي، ‏11 جِلعاد، جسُوريون، معڪاتيون رَي علائقَي، حرمُون رو ݾجو جبل ھانَ سلڪا شھر توڻي بسن رو ݾجو علائقو ‏12 ھانَ عوج بادشاھ، ݾجَي بسن علائقَي رَي عستارات ھانَ ادرعي شھر ۾ بادشاھي ڪرتو ھانَ او آپرِي رفائيم قوم ۾ بچي گيو ھتو۔ اُوئي نَي مُوسيٰ ھرائي اوٿ ݾون ڪاڍيو ھتو، ‏13 پڻ اِسرائيليون جسُوريون ھانَ معڪاتيون نَي ڪونھي ڪاڍيا، اِيئي رَي ڪري او آج توڻي اِسرائيليون ڀيڙا رَي ھَي۔

‏14 رُگو لاوِي قبيلَي نَي اُوئي ڪو ڀِي وِراثت ڪونھي ڏينِي، ڪيونڪہ پرميشوَر اِسرائيل رَي ايشوَر رَي ݾارُو ٻاݪڻ آݪا ٻَليدون اُوئون رِي وِراثت ھَي، جھڙَي نمُونَي پرميشوَر مُوسيٰ نَي حُڪم ڏينو ھتو۔

روبن قبيلَي رو علائقو

‏15 مُوسيٰ روبن رَي قبيلَي نَي اُوئون رَي خاندان رَي حِساب ݾون وِراثت ڏينِي۔ ‏16 اُوئون رَي حدون اَي ھتَي۔ عروعير شھر جڪو ارنون وادِي رَي ڪپ تي ھَي، او شھر جڪو وادِي رَي بِچ ۾ ھَي ھانَ ميدبا توڻي ݾجو ميدون۔ ‏17 حشبُون ھانَ اُوئي را ݾجائِي شھر جڪو ميدون ۾ ھَي، يعني ديبون ھانَ بامات بعل ھانَ بيت بعل معُون، ‏18 يھصا، قديمات، مفعت، ‏19 قريتام، سبما، ضرت السحر، جڪو وادِي رَي جبل تي ھَي، ‏20 بيت فغُور، پسگا رِي لاھِي آݪِي ٻنِي ھانَ بيت يسيموت ‏21 ھانَ ميدون را ݾجائِي شھر ھانَ اموريون رو بادشاھ سيحُون، جڪو حشبُون رَي ݾجَي علائقَي تي بادشاھي ڪرتو، جڪَي نَي مُوسيٰ مدياني ݾردارون، يعني اوي، رقم، صُور، حُور ھانَ ربع ڀيڙو ماري ڇوڙيو، جڪو سيحُون بادشاھ را ساٿِي ھتا ھانَ او اُوئون علائقون ۾ ريتا۔ ‏22 اِسرائيليون بعُور رَي ڏيڪرَي بلعام نَي ڀِي تلوار ݾون ماريو، جڪو جادُوگر ھتو۔ ‏23 يردن ھانَ اُوئي رَي آݾَي پاݾَي آݪو علائقو روبن قبيلَي رو ھتو۔ اَي شھر ھانَ اُوئي را گون روبن قبيلَي نَي اُوئون رَي خاندان رَي حِساب ݾون وِراثت ۾ مِليا۔

جد قبيلَي رو علائقو

‏24 مُوسيٰ جد رَي قبيلَي نَي اُوئون رَي خاندان رَي حِساب ݾون وِراثت ڏينِي۔ ‏25 اُوئون را علائقا اَي ھتا۔ يعزير، جِلعاد را ݾجائِي شھر، عمُونيون رو آڌو علائقو، جڪو عروعير توڻي ھَي، اَي ربا رَي ݾَڦا ݾومھو ھَي۔ ‏26 حشبُون ݾون رامت المصفا ھانَ بطُونيم توڻي ھانَ محنايم ݾون دبير رَي علائقَي توڻي ‏27 ھانَ يردن دريا رِي وادِي ۾ بيت ھارم، بيت نِمرا، سُڪات، صفون يعني حشبُون رَي بادشاھ سيحُون رو باقي علائقو، يردن دريا رَي آخري ڪپ آݪو علائقو ھانَ اُوگوڻَي ڏيݾا ڪِنرت رِي ڊنڍ توڻي۔ ‏28 اَي شھر ھانَ گون جد قبيلَي نَي اُوئون رَي خاندان رَي حِساب ݾون وِراثت ۾ مِليا۔

مُنسي رَي آڌَي قبيلَي رو علائقو

‏29 پَڇي مُوسيٰ مُنسي رَي آڌَي قبيلَي نَي ڀِي وِراثت ڏينِي۔ اَي وِراثت مُنسي رَي قبيلَي رَي خاندانون رَي حِساب ݾون آڌَي قبيلَي رَي ݾارُو ھتِي۔ ‏30 اُوئون را علائقا اَي ھتا۔ محنايم شھر ݾون لي بسن رو ݾجو علائقو، بسن رَي بادشاھ عوج رو ݾجو علائقو ھانَ يائير را ݾجائِي گون، جڪو بسن شھر ۾ ھَي۔ اَي ݾجائِي سٺ گون ھَي۔ ‏31 جِلعاد رو آڌو علائقو، عستارات ھانَ ادرعي جڪو بسن رَي بادشاھ عوج را شھر ھتا۔ اَي علائقا مُنسي رَي ڏيڪرَي مڪير رَي ݾجَي اولادون نَي مِليا۔ اَي وِراثت مڪير رَي ݾجَي اولادون رَي آڌَي مِنکون نَي اُوئون رَي خاندان رَي حِساب ݾون ملِي۔

‏32 اَي او علائقا ھَي، جڪو مُوسيٰ يريحُو شھر رَي ݾومھو موآب رَي ميدون ۾ يردن دريا رَي اُوئي پاݾَي اُوگوڻَي ڏيݾا وِراثت ۾ بِݪائي ڏينا ھتا۔ ‏33 پڻ لاوِي قبيلَي نَي مُوسيٰ ڪو ڀِي وِراثت ڪونھي ڏينِي، ڪيونڪہ پرميشوَر اِسرائيل رو ايشوَر اُوئون رِي وِراثت ھَي۔ جھڙَي نمُونَي اُوئي آپ اُوئون ݾون واعدو ڪيئو ھتو۔