او بادشاھ جڪون نَي مُوسيٰ قتل ڪيئا
12
اِسرائيليون اُوگوڻَي ڏيݾا يردن دريا رَي پار جڪون بادشاھون نَي قتل ڪيئا ھانَ اُوئون رَي علائقون تي قبضو ڪيئو، يعني ارنون وادِي ݾون لي حرمُون جبل توڻي ھانَ اُوگوڻَي ڏيݾا ݾجَي ارابا علائقَي توڻي، او بادشاھ اَي ھَي۔ 2 اموريون رو بادشاھ سيحُون جڪو حشبُون شھر ۾ ريتو۔ اُوئي رِي بادشاھي رِي حد ارنون وادِي رَي ڪپ رَي شھر عروعير ݾون لي يبوق دريا رَي ڪپ تي ھتِي، جڪو عمُون رِي حد ھَي ھانَ اَي حد جِلعاد علائقَي رو آڌو حِصو ھَي۔ 3 اِيئي ݾون ٽاݪ اُوئي رِي بادشاھي ارابا رَي ڪِنرت، يعني مُردار ݾمُوندر ݾون لي اُوگوڻَي ڏيݾا بيت يسيموت رَي ميدون توڻي ھَي ھانَ او ڏکڻ ۾ پسگا رِي لاھِي رَي آخر توڻي ھَي۔ 4 بسن علائقَي رو بادشاھ عوج، جڪو آپرِي رفائيم قوم ݾون بچو ھتو۔ او عستارات شھر ھانَ ادرعي شھر ۾ ريتو۔ 5 او حرمُون جبل، سلڪا، بسن، جسُوريون ھانَ معڪاتيون رِي حد توڻي ھانَ آڌَي جِلعاد ۾ جڪو حشبُون رَي بادشاھ سيحُون رِي حد ھتِي، بادشاھي ڪرتو۔ 6 پرميشوَر رَي شيواداري مُوسيٰ ھانَ اِسرائيليون اِيئون ٻيئون بادشاھون نَي ھرايو ھتو۔ پَڇي مُوسيٰ اَي علائقو روبن، جد ھانَ مُنسي رَي آڌَي قبيلَي نَي وِراثت ۾ ڏينو ھتو۔او بادشاھ جڪون نَي يشُوع قتل ڪيئا
7 پَڇي يشُوع ھانَ اِسرائيليون جڪَي بادشاھون نَي قتل ڪيئا، اُوئون را علائقا يردن دريا پار آٿوڻَي پاݾَي بعل جد ݾون جڪو لبنان وادِي ۾ ھَي، ايٿ ݾون لي خلق جبل توڻي ھَي، جڪو شعير ڏيݾا ماٿَي جاوَي ھَي۔ اَي ݾجو علائقو يشُوع اِسرائيلي قبيلون نَي وِراثت ۾ ڏينو، 8 يعني جابلُو علائقو، ماٿلو جابلُو علائقو، ارابا، آٿوڻَي ۾ ھيٺلو جابلُو علائقو، رڻ پَٽ ھانَ اُتر رو علائقو۔ پيل اَي علائقا حِتي، اموري، ڪنعاني، فرزي، حوِي ھانَ يبُوسي قوم ڪڍي ھتا۔
9 يشُوع جڪون بادشاھون نَي قتل ڪيئا، او اَي ھتا۔ يريحُو رو بادشاھ، عئي رو بادشاھ جڪو بيت ايل رَي نيڙو ھَي۔ 10 يروشلم رو بادشاھ، حبرُون رو بادشاھ، 11 يرموت رو بادشاھ، لڪيس رو بادشاھ، 12 عجلُون رو بادشاھ، جزر رو بادشاھ، 13 دبير رو بادشاھ، جدر رو بادشاھ، 14 حُرما رو بادشاھ، عراد رو بادشاھ، 15 لِبنا رو بادشاھ، عدُلام رو بادشاھ، 16 مقيدا رو بادشاھ، بيت ايل رو بادشاھ، 17 تفُوح رو بادشاھ، حِفر رو بادشاھ، 18 افيق رو بادشاھ، لشرون رو بادشاھ، 19 مدون رو بادشاھ، حصُور رو بادشاھ، 20 سمرون مرون رو بادشاھ، اڪشاف رو بادشاھ، 21 تعناڪ رو بادشاھ، مجدو رو بادشاھ، 22 قادس رو بادشاھ، يُقنعام رو بادشاھ، جڪو ڪرمل علائقَي ۾ ھَي، 23 ݾمُوندر رَي ڪپ آݪَي دور علائقَي رو بادشاھ، جوئيم رو بادشاھ، جڪو جِلجال ۾ ھَي 24 ھانَ تِرضا رو بادشاھ۔ اَي ݾجائِي ايڪٽِي بادشاھ ھتا۔