يشُوع 11

اُتر آݪَي بادشاھون نَي ھراوڻ

جڏي حصُور رَي بادشاھ يابين نَي اِيئون باتون رِي خبر پڙِي، تو اُوئي اِيئون بادشاھون نَي نياپو ميليو، يعني مدون رَي بادشاھ يوباب، سمرون رَي بادشاھ، اڪشاف رَي بادشاھ ‏2 ھانَ اُوئون بادشاھون نَي جڪو اُتر آݪَي جبلون، ڪِنرت رَي ڏکڻ آݪَي ارابا علائقَي، جڪو ھيٺلَي جابلُو علائقون ھانَ آٿوڻَي ڏيݾا ݾمُوندر رَي ڪپ آݪَي دور علائقَي ۾ ريتا۔ ‏3 اِيئون ݾون ٽاݪ اُوئي اُوگوڻَي ھانَ آٿوڻَي ڏيݾا ڪنعاني، اموري، حِتي، فرزي، يبُوسي ھانَ مِصفا علائقَي رَي حوِي قوم نَي ڀِي اَڻايو، جڪو حرمُون جبل ھيٺا ريتا۔ ‏4 پَڇي او آپرِي فوج ڀيڙا گھوڙون ھانَ گھوڙَي گاڏون تي جنگ ڪرڻ رَي ݾارُو نڪريا، جڪو تعداد ۾ ݾمُوندر رِي بيݪُو جِترا تموم گھڻا ھتا۔ ‏5 اَي ݾجائِي بادشاھ ڀيڙا ھوئي آيا ھانَ ميرُوم رِي ڊنڍ تي آپرا تنٻُو لگايا ڪہ اِسرائيليون ݾون جنگ ڪرَي۔

‏6 پَڇي پرميشوَر يشُوع نَي ڪھيو ڪہ،”اُوئون ݾون نِي ٻيئاج، ڪيونڪہ ݾووارَي اِيئج ٽيم ھُون اُوئون ݾجون نَي اِسرائيليون رَي رُوبرو ماري ڇوڙين۔ تُو اُوئون را گھوڙا مَنڊا ڪري ھانَ اُوئون را گھوڙا گاڏا ڀِي ٻاݪي ڇوڙي۔“ ‏7 پَڇي يشُوع ھانَ ݾجَي جنگِي مِنکون ميرُوم رِي ندِي تي آئي اوچتو اُوئون تي حملو ڪيئو۔ ‏8 پرميشوَر او مِنک اِسرائيليون رَي ھاٿ ۾ ڏينا۔ پَڇي اُوئون موٽَي شھر صيدا، مِسرفات المائم ھانَ اُوگوڻَي پاݾَي مِصفا رِي وادِي توڻي، اُوئون رو لارو ڪري اُوئون نَي ماري ڇوڙيا، اترِي توڻي ڪہ اُوئون ۾ ھيڪ ڀِي جيتو ڪونھي ڇوڙيو۔ ‏9 يشُوع پرميشوَر رَي حُڪم تي اُوئون را گھوڙون مَنڊا ڪيئا ھانَ گھوڙا گاڏا ٻاݪي ڇوڙيا۔

‏10 پَڇي يشُوع اُوئيج ٽيم پاڇو آيو ھانَ اُوئي حصُور شھر تي قبضو ڪري اُوئي رو بادشاھ تلوار ݾون ماري ڇوڙيو، ڪيونڪہ حصُور شھر رو بادشاھ اُوئي ٽيم رَي ݾجَي بادشاھون رو ݾردار ھتو۔ ‏11 اُوئون اُوئي شھر را ݾجائِي مِنک تلوار ݾون ماريا، ڪينَي ڀِي جيتو ڪونھي ڇوڙيو ھانَ حصُور شھر نَي ڀِي ٻاݪي ڇوڙيو۔ ‏12 اِيئي نمُونَي يشُوع اُوئون بادشاھون رَي ݾجَي شھرون تي قبضو ڪيئو ھانَ ݾجائِي بادشاھ تلوار ݾون ماري ڇوڙيا، جھڙَي نمُونَي پرميشوَر رَي شيواداري مُوسيٰ حُڪم ڏينو ھتو۔ ‏13 پڻ جڪو شھر چوٽِي ماٿَي ٺاھيوڙا ھتا، اُوئون نَي اِسرائيليون ڪونھي ٻاݪيا، يشُوع رُگو حصُور شھر نَي ٻاݪيو۔ ‏14 اِسرائيليون اُوئون شھرون را مال ملڪيت ھانَ ٻيجَي کوݾيوڙَي شيون آپرَي ݾارُو راکئَي، پڻ جڪو مِنک بچا ھتا، اُوئون نَي تلوار ݾون ماريا، ڪينَي ڀِي جيتو ڪونھي ڇوڙيو۔ ‏15 جڪو حُڪم پرميشوَر آپرَي شيواداري مُوسيٰ نَي ڏينو ھتو، اوج حُڪم مُوسيٰ يشُوع نَي ڏينو ھانَ يشُوع اِيئوج ڪيئو۔ پرميشوَر جڪو ڀِي حُڪم مُوسيٰ نَي ڏينو ھتو، يشُوع ݾجو ڪئين اِيئوج ڪيئو۔

او شھر جڪون نَي يشُوع ھرايا

‏16 اِيئي نمُونَي يشُوع ݾجَي مُلڪ تي قبضو ڪيئو، يعني جابلُو علائقو، اُتر رو ݾجو علائقو، جشن رو ݾجو علائقو، ھيٺلو جابلُو علائقو، ارابا ھانَ اِسرائيل را جبل ھانَ اُوئون را ميدون۔ ‏17 پَڇي يشُوع شعير شھر ڏيݾا ماٿَي جاوڻ آݪَي خلق جبل ݾون لي بعل جد توڻي لبنان رَي علائقَي ۾ جڪو حرمُون جبل ھيٺا ھَي، اُوئون را ݾجائِي بادشاھ ھرائي ماري ڇوڙيا۔ ‏18 يشُوع تموم گھڻو ٽيم اُوئون بادشاھون ݾون جنگ ڪِي۔ ‏19 جِبعون شھر ۾ ريوَڻ آݪِي حوِي قوم ݾون ٽاݪ ڪَي ٻيجَي شھر آݪون اِسرائيلي قوم ݾون صُلح ڪونھي ڪِي۔ اِيئي نمُونَي اِسرائيليون ݾجون ݾون جنگ ڪري اُوئون تي قبضو ڪيئو۔ ‏20 اَي پرميشوَر رَي طرفون ھتو ڪہ او اُوئون را من ڪاٺا ڪرَي۔ او اِسرائيليون ݾون جنگ ڪرَي ڪہ پرميشوَر اُوئون نَي ݾَڦا ختم ڪري ڇوڙَي ھانَ اُوئون تي پرميشوَر دايا نِي ڪرَي، اترِي توڻي ڪہ دُنيا ۾ اُوئون رو نون نِشون مِٽائي ڇوڙَي، جھڙَي نمُونَي پرميشوَر مُوسيٰ نَي حُڪم ڏينو ھتو۔

‏21 پَڇي اُوئي ٽيم يشُوع آئي عناقي قوم آݪون نَي ماريا، جڪو جابلُو علائقَي، حبرُون شھر، دبير شھر، عناب شھر، يھُودا رَي ݾجَي جابلُو علائقَي ھانَ اِسرائيليون رَي ݾجَي علائقَي ۾ ھتا۔ اِيئي نمُونَي يشُوع اُوئون را ݾجائِي شھر برباد ڪري ڇوڙيا۔ ‏22 اِسرائيليون رَي علائقَي ۾ ھيڪ ڀِي عناقي جيتو ڪونھي بچو۔ رُگو غزا، جات ھانَ اشدُود شھر ۾ ڪئينڪہ مِنک بچي گيا۔

‏23 جھڙَي نمُونَي پرميشوَر مُوسيٰ نَي ڪھيو ھتو، اُوئيج نمُونَي يشُوع ݾجَي مُلڪ تي قبضو ڪيئو ھانَ او مُلڪ اِسرائيليون نَي اُوئون رَي قبيلون رَي حِساب ݾون وِراثت ۾ بِݪائي ڏينو۔ پَڇي جنگ ختم ھوئِي ھانَ مُلڪ ۾ ھر جگھا امن ھويو۔