يشُوع 9

جِبعوني قوم رو يشُوع نَي دوکو ڏيوَڻ

يردن دريا رَي ٻيجَي پاݾَي ريوَڻ آݪَي حِتي، اموري، ڪنعاني، فرزي، حوِي ھانَ يبُوسي قومون جڪو ماٿلَي جابلُو علائقون، ھيٺلَي جابلُو علائقون ھانَ موٽَي ݾمُوندر رَي اُوئي ڪپ تي ريتا، جڪو لبنان رَي ݾومھو ھَي۔ جڏي اُوئون رَي بادشاھون نَي خبر پڙِي، ‏2 تو او ݾجائِي ڀيڙا ھويا ڪہ مِلي يشُوع ھانَ اِسرائيلي قوم ݾون جنگ ڪرَي۔

‏3 جڏي جِبعون شھر رَي مِنکون نَي خبر پڙِي ڪہ يشُوع يريحُو شھر ھانَ عئي شھر ݾون ڪِي ڪيئو ھَي، ‏4 تو اُوئون چالاڪِي ڪِي ھانَ آپرا ڪئينڪہ مِنک نياپو لي جاوڻ آݪون رَي بيݾ ۾ بَئير ڪيئا۔ اُوئون رَي گڏون تي پِروڻَي ٻورَي ھانَ انگُورون رَي رس رَي اھڙَي پِروڻَي ھانَ ڦاٽوڙَي ڏيڙَي ھتَي، جڪو گھڙِي گھڙِي ݾيڙيوڙَي ھتَي۔ ‏5 اُوئون را چتَي لاگوڙا جُتا ھانَ پِروڻا ڦاٽوڙا گاڀا پيريوڙا ھتا۔ سفر رَي ݾارُو جڪو ٻاٽِي اُوئون ڪڍي ھتِي، او ݾُوڪوڙِي ھانَ باݾِي ھتِي۔ ‏6 او مِنک جِلجال رَي تنٻُوئون ۾ يشُوع ڪڍي آيا۔ پَڇي اُوئون يشُوع ھانَ اِسرائيليون نَي ڪھيو ڪہ، ”مھي تموم گھڻَي اݪگَي مُلڪ ݾون آيا ھون۔ ھمَي ٿي ݾونݾ لي مھون ݾون وچن ڪرو۔“

‏7 پَڇي اِسرائيليون حوِي قوم آݪون نَي ڪھيو ڪہ،”مھونَي لاگَي ھَي ڪہ ٿي مھورَي نيڙا رو ھو، تو پَڇي مھي ٿون ݾون ڪيڪر وچن ڪرون؟“ ‏8 اُوئون يشُوع نَي ڪھيو ڪہ،”مھي ٿارا ٻونھا ھون۔“ يشُوع اُوئون ݾون پُوڇو ڪہ، ”ٿي ڪُڻ ھو ھانَ ڪيٿ ݾون آيا ھو؟“ ‏9 اُوئون يشُوع نَي ڪھيو ڪہ،”مھي ٿارا ٻونھا تموم اݪگَي مُلڪ ݾون پرميشوَر ٿارَي ايشوَر رِي بکوڻ ݾُڻي آيا ھون، ڪيونڪہ مھون اُوئي رِي مشھُورِي ھانَ جڪو ڪئين اُوئي مِصر مُلڪ ۾ ڪيئو ھَي، او ݾُڻيو ھَي ‏10 ھانَ اُوئي اموريون رَي ٻيئون بادشاھون ݾون جڪو يردن دريا رَي پار ھتا، يعني حشبُون رو بادشاھ سيحُون ھانَ بسن رو بادشاھ عوج جڪو عستارات ۾ ھتو، جڪو ڪئين اُوئون ݾون ڪيئو، او مھون ݾُڻيو ھَي۔ ‏11 مھورَي اَگووڻون ھانَ مھورَي مُلڪ رَي ݾجَي ريوَڻ آݪون مھونَي ڪھيو ڪہ ٿي سفر رَي ݾارُو کاوڻ پيئڻ رَي شيون لي اُوئون ݾون مِلڻ جائو ھانَ اُوئون نَي ڪو ڪہ، ’مھي ٿارا ٻونھا ھون، ٿي مھون ݾون وچن ڪرو۔‘ ‏12 جڪَي ڏِن مھي ٿون ڪڍي آوڻ رَي ݾارُو بَئير ھويا، مھي آپرَي گھر ݾون اُونَي ٻاٽَي لي آيا ھتا، ٿي ھمَي جوئي ݾگھو ھو ڪہ ھڻون اَي ٻاٽَي ݾُوڪي باݾِي ھوئَي ھَي۔ ‏13 انگُورون ݾون ڀريوڙَي اَي ڏيڙَي جوئو، ڀرتي بِݪا اَي ڏيڙَي ݾَڦا نُوئَي ھتَي، پڻ ھمَي اَي ڦاٽَي رَي۔ مھورا گاڀا ھانَ جُتا ڀِي تموم گھڻَي سفر رَي ڪري پِروڻا ھويا را۔“

‏14 پَڇي اِسرائيليون کاوڻ پيئڻ رَي شيون اُوئون ݾون ليئَي، پڻ اِيئي بات رِي صلاح اُوئون پرميشوَر ݾون ڪونھي لِي۔ ‏15 يشُوع اُوئون مِنکون ݾون صُلح ڪِي ھانَ اُوئون نَي جيتا راکڻ رَي ݾارُو ݾونݾ لي وچن ڪيئو ھانَ مَنڊلِي رَي اَگووڻون ڀِي ݾونݾ ليئو۔

‏16 پَڇي وچن ڪرڻ رَي تينون ڏِنون ݾون پَڇي، اُوئون اِسرائيليون ݾون ݾُڻيو ڪہ اَي مھورا پاڙَي آݪا ھانَ مھورَي نيڙا رَي ھَي۔ ‏17 پَڇي اِسرائيلي اوٿ ݾون بَئير ھويا ھانَ تيجَي ڏِن اُوئون مِنکون رَي شھرون ۾ پُگا۔ اُوئون را شھر اَي ھتا۔ جِبعون، ڪفيرا، بيروت ھانَ قريت يعريم۔ ‏18 اِسرائيليون اُوئون تي حملو ڪونھي ڪيئو، ڪيونڪہ مَنڊلِي رَي ݾردارون اُوئون ݾون پرميشوَر اِسرائيل رَي ايشوَر رو ݾونݾ ليئو ھتو۔ اِيئي رَي ڪري ݾجِي مَنڊلِي آݪا اُوئون ݾردارون رَي خلاف ڪُرڪڻ لاگا۔ ‏19 پڻ ݾجَي ݾردارون ݾجِي مَنڊلِي نَي بݪتِي ڏينِي ڪہ،”مھون اُوئون ݾون پرميشوَر اِسرائيل رَي ايشوَر رو ݾونݾ ليئو ھَي، اِيئي رَي ڪري مھي اُوئون نَي ھاٿ ڀِي ڪونھي لگائُون۔ ‏20 مھي اُوئون نَي جيتا ڇوڙشون ھانَ او ݾونݾ ڪونھي ڀونگون، جڪو مھون اُوئون ݾون ليئون ھَي، متان اِيئون نِي ھووَي ڪہ مھون تي ڪو ڪھر آوَي۔“ ‏21 ݾردارون اُوئون نَي ڪھيو ڪہ،”اِيئون نَي جيتا ڇوڙو۔“ اِيئي رَي ڪري اِسرائيليون اُوئون نَي ݾجِي مَنڊلِي رَي ݾارُو لڪڙَي باڍڻ آݪا ھانَ پوڻي ڀرڻ آݪا راکيا۔ اِيئي نمُونَي او ݾردار آپرَي ݾونݾ تي پڪا رھيا۔

‏22 پَڇي يشُوع اُوئون نَي اَڻائي ڪھيو ڪہ، ”ٿون مھون ݾون اَي ڪئي ڪيئون دوکو ڪيئو ڪہ، ’مھي ٿون ݾون تموم گھڻا اݪگا رون ھون۔‘ حقيقت ۾ ٿي مھورَي نيڙا رو ھو۔ ‏23 اِيئي رَي ڪري ھمَي ٿي لعنتِي ھو۔ ٿي لڪڙَي باڍڻ آݪا ھانَ پوڻي ڀرڻ آݪا ھوئي ھميشا رَي ݾارُو مھارَي ايشوَر رَي گھر ۾ شيوا ڪرشو۔“

‏24 پَڇي اُوئون يشُوع نَي ڪھيو ڪہ،”مھي ٿارا ٻونھا ھون۔ مھونَي چِٽو ݾُڻايو ھتو ڪہ پرميشوَر ٿارَي ايشوَر آپرَي شيواداري مُوسيٰ نَي حُڪم ڏينو ھتو ڪہ ھُون اَي ݾجو مُلڪ ٿونَي ڏئين ھانَ اُوئي مُلڪ ۾ ريوَڻ آݪا ݾجائِي ٿونرَي آگھي ماري ڇوڙين۔ مھونَي آپرَي مرڻ رو ٻِي ھتو، اِيئي رَي ڪري مھون اِيئون ڪيئو۔ ‏25 مھي ھمَي ٿارَي ھاٿ ۾ ھون۔ جڪو ٿنَي ڀلو لاگَي، تُو اوج مھون ݾون ڪر۔“ ‏26 پَڇي يشُوع اُوئون نَي اِسرائيلي قوم ݾون بچايو ھانَ اُوئون نَي مارڻ ڪونھي ڏينا۔ ‏27 پَڇي يشُوع اُوئيج ڏِن اُوئون نَي مَنڊلِي ھانَ ٻَليدون رِي اُوئي جگھا جڪو پرميشوَر ݾُڻاشَي، لڪڙَي باڍڻ آݪا ھانَ پوڻي ڀرڻ آݪا ٺائي ڪوم تي راکيا۔ جڪو آج توڻي اوج ڪوم ڪرتا رَي ھَي۔