يشُوع 8

عئي شھر رِي بربادي

پَڇي پرميشوَر يشُوع نَي ڪھيو ڪہ،”ٻيئاج نِي ھانَ پريشون نِي ھو۔ ݾجائِي جنگِي مِنک آپ ڀيڙا لَي ھانَ عئي شھر تي حملو ڪر، ڪيونڪہ مھَي عئي رو بادشاھ، اُوئي رو شھر ھانَ اُوئي را مِنک ٿارَي حوالي ڪيئا ھَي۔ ‏2 تُو عئي ھانَ اُوئي رَي بادشاھ ݾون اوج ڪري، جڪو ٿَي يريحُو شھر ھانَ اُوئي رَي بادشاھ ݾون ڪيئو ھتو۔ پڻ اِيئي گُھمرَي ٿي جِنار ھانَ مال ملڪيت آپ ڀيڙا راکي ݾگھو ھو۔ جڏي حملو ڪرو، تو شھر رَي لاري ݾون حملو ڪريا۔“

‏3 پَڇي يشُوع ݾجائِي جنگِي مِنک ڀيڙا لي عئي شھر تي حملو ڪرڻ رَي ݾارُو نڪريو۔ اُوئي آپرَي ݾجون ݾون ڪاريگر جنگِي مِنکون ۾ ٽيھ ھزار مِنک چُونڊيا ھانَ اُوئون نَي رات رو بَئير ڪري، ‏4 اَي حُڪم ڏينو ڪہ،”جوئو، ٿي شھر رَي لاري ݾون حملو ڪريا ھانَ شھر ݾون گھڻا اݪگا نِي جايا ھانَ تيار رھيا۔ ‏5 پَڇي ھُون ھانَ مھارا ساٿِي شھر رَي نيڙا آشون۔ جڏي او پيل آݪِي ڪار مھون ݾون بِڙھڻ رَي ݾارُو ٻاھر نڪرشَي، تو مھي اُوئون رَي آگھي ݾون ناݾي جاشون ‏6 ھانَ او مھورو لارو ڪرشَي۔ اِيئي نمُونَي مھي اُوئون نَي شھر ݾون اݪگا لي جاشون۔ او ݾمجھشَي ڪہ مھي اِيئي گُھمرَي اَگي آݪِي ڪار اُوئون رَي آگھي ݾون ناݾون پڙيا۔ جڏي مھي اُوئون رَي آگھي ݾون ناݾشون، ‏7 تو ٿي لِڪيوڙِي جگھا ݾون نڪري شھر تي قبضو ڪريا۔ پرميشوَر ٿونرو ايشوَر او شھر ٿونرَي حوالي ڪرشَي۔ ‏8 جڏي ٿي شھر تي قبضو ڪري ليئو، تو پَڇي اُوئي نَي ٻاݪي ڇوڙيا۔ اِيئوج ڪريا جون پرميشوَر ڪھيو ھَي۔ جوئو، مھَي ٿونَي حُڪم ڏينو ھَي۔“ ‏9 پَڇي يشُوع اُوئون نَي بَئير ڪيئا ھانَ او لِڪڻ آݪِي جگھا ڏيݾا بَئير ھويا۔ او مِنک بيت ايل ھانَ عئي شھر رَي بِچ ۾ لِڪي ٻيٺا، جڪو عئي رَي آٿوڻَي پاݾَي ھَي، پڻ يشُوع اُوئي رات آپرَي مِنکون ڀيڙو اوٿج رھيو۔

‏10 يشُوع ݾاڪݪي تارھي اُٺيو ھانَ مِنک ڀيڙا ڪيئا۔ پَڇي يشُوع ھانَ اِسرائيلي قوم را اَگووڻ مِنکون آگھي آگھي عئي شھر ڏيݾا بَئير ھويا۔ ‏11 ݾجائِي جنگِي مِنک جڪو اُوئي ڀيڙا ھتا ماٿَي جائي عئي رَي نيڙا پُگا ھانَ شھر رَي ݾومھا آيا ھانَ اُوئون شھر رَي ڏکڻ ۾ آپرا تنٻُو لگايا۔ اُوئون رَي ھانَ شھر رَي بِچ ۾ ھيڪ وادِي ھتِي۔ ‏12 يشُوع اندازن پونچ ھزار مِنک شھر رَي آٿوڻَي پاݾَي بيت ايل ھانَ عئي شھر رَي بِچ ۾ لِڪائي ٻيݾاڙيا۔ ‏13 اِسرائيليون آپرَي ڪئينڪہ جنگِي مِنکون را تنٻُو شھر رَي اُتر ڏيݾا لگايا ھانَ ڪئينڪہ جنگِي مِنکون نَي شھر رَي آٿوڻَي پاݾَي اُڀاڙيا ھانَ يشُوع او رات وادِي ۾ رھيو۔ ‏14 جڏي عئي رَي بادشاھ اَي ڏيٺو، تو او ھانَ اُوئي شھر را ݾجائِي مِنک ݾاڪݪي تارھي اُٺيا ھانَ ڇيڪا تيار ھوئي اِسرائيليون ݾون جنگ ڪرڻ رَي ݾارُو ارابا علائقَي رَي ميدون ڏيݾا بَئير ھويا۔ اُوئون نَي خبر ڀِي ڪونھي ھتِي ڪہ شھر لاري ڪو مِنک لِڪيوڙا ھَي۔

‏15 پَڇي يشُوع ھانَ ݾجائِي اِسرائيلي اُوئون رَي آگھي ݾون رڻ پَٽ ڏيݾا اِيئون ناٺا جھڙِي اُوئون ھار منِي ھووَي۔ ‏16 شھر رَي ٻيجَي مِنکون نَي ڀِي اِسرائيليون رو لارو ڪرڻ رَي ݾارُو اَڻايا۔ پَڇي اُوئون رو لارو ڪيئو ھانَ او عئي شھر ݾون تموم گھڻا اݪگا نڪري گيا۔ ‏17 عئي ھانَ بيت ايل شھر ۾ ھيڪ ڀِي آڏمي باقي ڪونھي ھتو، جڪو اِسرائيليون لاري نِي گيو ھووَي، اِيئي نمُونَي اُوئون شھر نَي کُليو ڦِٽو ڪيئو۔

‏18 پَڇي پرميشوَر يشُوع نَي ڪھيو ڪہ،”جڪو ڀالو ٿارَي ھاٿ ۾ ھَي، او عئي شھر ڏيݾا ڪر، ڪيونڪہ اَي شھر ھُون ٿارَي ھاٿ ۾ ڏئين۔“ پَڇي يشُوع او ڀالو جڪو اُوئي رَي ھاٿ ۾ ھتو شھر ڏيݾا ڪيئو۔ ‏19 جڏي اُوئي آپرو ھاٿ ماٿَي ڪيئو، تو جڪو لِڪي ٻيٺا ھتا، او ڇيڪا ھوئي آپرِي جگھا ݾون نڪريا ھانَ ناݾي جائي شھر ۾ گيا۔ اُوئون شھر تي قبضو ڪيئو ھانَ ڇيڪائِي ڪري شھر نَي ٻاݪي ڇوڙيو۔ ‏20 جڏي عئي رَي مِنکون پاڇل ڦوري ڏيٺو، تو شھر ݾون ڌُونئو نڪري آڪاش ڏيݾا جاوتو پڙيو، تو اُوئون نَي ݾمجھ ڪونھي آئِي ڪہ ڪيئا ناݾون، ڪيونڪہ اِسرائيلي جڪو رڻ پَٽ ۾ ڏيݾا ناݾتا پڙيا، او يڪدم پاڇا ھٽيا ھانَ لارو ڪرڻ آݪون تي حملو ڪيئو۔ ‏21 جڏي يشُوع ھانَ ݾجَي اِسرائيليون ڏيٺو ڪہ مھورَي لِڪيوڙَي مِنکون شھر تي قبضو ڪيئو ھَي ھانَ شھر ݾون ڌُونئو نڪرَي پڙيو، تو او پاڇا ڦِري عئي شھر رَي مِنکون نَي مارڻ لاگا۔ ‏22 ٻيجا مِنک ڀِي اُوئون ݾون بِڙھڻ رَي ݾارُو شھر ݾون نڪريا۔ ھمَي عئي را مِنک ٻيئي پاݾَي اُوئون رَي بِچ ۾ آئي گيا ھتا۔ پَڇي اِسرائيليون ݾجون نَي ماري ڇوڙيا ھانَ ڪو ڀِي بچي ناٺو ڪونھي۔ ‏23 او رُگو عئي رَي بادشاھ نَي جھالي يشُوع ڪڍي لي آيا۔

‏24 اِسرائيليون عئي رَي ݾجَي ريوَڻ آݪون نَي رڻ پَٽ رَي اُوئي ميدون ۾ تلوار ݾون ماريا، جڪو اُوئون رو لارو ڪرتا پڙيا۔ جڏي اُوئون ݾجون نَي تلوار ݾون ماريا، تو ݾجائِي اِسرائيلي عئي شھر ۾ پاڇا آيا ھانَ بچوڙَي ݾجَي مِنکون نَي ڀِي ماري ڇوڙيا۔ ‏25 او ݾجائِي جڪو اُوئي ڏِن عئي شھر ۾ ماريجا، او آڏميون ھانَ لُگايون ݾُوڌا ٻارھَي ھزار مِنک ھتا۔ ‏26 يشُوع اُوئي ٽيم توڻي آپرو ڀالو کڻي راکيو، جترِي توڻي عئي شھر را ݾجائِي ريوَڻ آݪا ماريجا ڪونھي۔ ‏27 جون پرميشوَر يشُوع نَي حُڪم ڏينو ھتو ڪہ ھمَي اِسرائيلي قوم عئي شھر ݾون کوݾيوڙا جِنار ھانَ مال ملڪيت آپ ڪڍي راکي ݾگھَي ھَي، اِيئي رَي ڪري اُوئون اِيئوج ڪيئو۔ ‏28 يشُوع عئي شھر نَي ٻاݪي ھميشا رَي ݾارُو راک رو ڍِگ ٺائي ڇوڙيو ھانَ اَي آج توڻي ويرون ھَي۔ ‏29 پَڇي اُوئي عئي رَي بادشاھ رو لاش شام توڻي بَڻ ماٿَي لٽڪايو۔ جڏي ڏِن آٿوئڻ لاگو، تو يشُوع رَي حُڪم تي مِنکون اُوئي رو لاش بَڻ ݾون اُتاريو ھانَ شھر رَي در رَي ݾومھو نوکيو ھانَ اُوئي تي پٿرون رو ھيڪ موٽو ڍِگ ٺاھيو، جڪو آج توڻي موجُود ھَي۔

عيبال جبل تي شريعت پڙھڻ

‏30 پَڇي يشُوع عيبال جبل تي پرميشوَر اِسرائيل رَي ايشوَر رَي ݾارُو ٻَليدون رِي جگھا ٺائِي۔ ‏31 جھڙَي نمُونَي پرميشوَر رَي شيواداري مُوسيٰ اِسرائيليون نَي حُڪم ڏينو ھتو، جون مُوسيٰ رِي لِکيوڙِي شريعت رَي ڪِتاب ۾ ھَي، اُوئيج نمُونَي ٻَليدون رِي جگھا ٺائِي۔ اُوئي اَڻ گھڙيا پٿر لگايا ھانَ اُوئون پٿرون تي ڪَي ڀِي نمُونَي رو لوھ رو اوزار ڪونھي لگايو۔ اُوئون اُوئي تي پرميشوَر رَي ݾارُو ٻاݪڻ آݪا ھانَ خيريت آݪا ٻَليدون ڪيئا۔ ‏32 پَڇي اُوئي اِسرائيل قوم آگھي مُوسيٰ رِي لِکيوڙِي شريعت اُوئون پٿرون ماٿَي لِکي۔ ‏33 ݾجِي اِسرائيلي قوم، اُوئي را اَگووڻ، ݾردار، آفيسر، ديسي، پرديسي، ݾجائِي پرميشوَر رَي وچن رِي ݾنڏُوڪ ھانَ اُوئي نَي کڻڻ آݪَي لاوِي قبيلَي رَي پُوجاريون رَي ٻيئون پاݾَي اُڀا ھتا۔ اُوئون ۾ آڌا گرزيم جبل رَي ݾومھا ھانَ آڌا عيبال جبل رَي ݾومھا ھتا۔ جھڙَي نمُونَي پرميشوَر رَي شيواداري مُوسيٰ پيل اِسرائيليون نَي برڪت ڏيوَڻ رو حُڪم ڏينو ھتو۔ ‏34 پَڇي يشُوع شريعت رَي ݾجَي برڪتون ھانَ لعنتون آݪَي باتون پڙھي ݾُڻائَي، جڪو مُوسيٰ رِي شريعت رَي ڪِتاب ۾ لِکيوڙَي ھتَي۔ ‏35 جڪَي باتون رو حُڪم مُوسيٰ ڏينو ھتو، اُوئون ۾ ھيڪ ڀِي بات اھڙِي ڪونھي ھتِي، جڪو يشُوع ݾجِي اِسرائيلي قوم آگھي پڙھِي نِي ھووَي۔ اوٿ لُگائَي، ٻاݪ ھانَ پرديسي ڀِي ھتا، جڪو اُوئون ڀيڙا ريتا۔