5
اموري قوم را ݾجائِي بادشاھ جڪو آٿوڻَي پاݾَي ريتا ھانَ ڪنعانيون را ݾجائِي بادشاھ جڪو ݾمُوندر ڪڍي ريتا، جڏي اُوئون نَي خبر پڙِي ڪہ پرميشوَر اِسرائيلي قوم رَي رُوبرو يردن دريا رو پوڻي ݾُڪويو ھتو، جترِي توڻي ݾجائِي لنگھيا ڪونھي ھتا، تو او اِسرائيلي قوم ݾون ٻيئاجي ھِمت ھاري گيا۔نُوئِي نسل رو کَتنو
2 پَڇي پرميشوَر يشُوع نَي ڪھيو ڪہ، ”تُو چقمق پٿر رَي ڇُرَي ٺا ھانَ پيل آݪِي ڪار اِسرائيلي قوم رِي نُوئِي نسل رو کَتنو ڪر۔“ 3 پَڇي يشُوع چقمق پٿر رَي ڇُرَي ٺائَي ھانَ ھيڪِي جگھا تي اِسرائيليون رِي نُوئِي نسل رو کَتنو ڪيئو ھانَ اُوئي جگھا رو نون جِبعت ھرلوٿ راکيو۔ (جِبعت ھرلوٿ رو مطلب ھَي”کَتنَي رو جبل۔“) 4 يشُوع اَي کَتنا اِيئي رَي ڪري ڪيئا ڪہ او ݾجائِي جنگِي آڏمي جڪو مِصر مُلڪ ݾون نڪري آيا ھتا، او ݾجائِي اوٿ ݾون نڪرڻ ݾون پَڇي، رڻ پَٽ رَي مارگ ۾ مري گيا ھتا۔ 5 او ݾجائِي آڏمي جڪو مِصر ݾون نڪري آيا ھتا، اُوئون ݾجون رو کَتنو ڪيئوڙو ھتو، پڻ اوٿ ݾون نڪرڻ ݾون پَڇي، جڪو رڻ پَٽ رَي مارگ ۾ جايا ھتا، اُوئون رو کَتنو ڪونھي ڪيئوڙو ھتو۔
6 اِسرائيلي قوم چاليھ ݾال رڻ پَٽ ۾ ڀٽڪتِي رئِي، جترِي توڻي مِصر مُلڪ ݾون نڪرڻ آݪِي ݾجِي قوم، يعني ݾجائِي جنگِي آڏمي جڪو مِصر ݾون نڪريا ھتا، او مُوئا ڪونھي۔ ڪيونڪہ اُوئون پرميشوَر رِي بات ڪونھي منِي، اِيئي رَي ڪري پرميشوَر ݾونݾ لي اُوئون نَي ڪھيو ھتو ڪہ او اُوئون نَي او مُلڪ جوئڻ ڀِي ڪونھي ڏَي، جڪو خُوشحال ھانَ آباد ھَي، جڪَي نَي ڏيوَڻ رو ݾونݾ پرميشوَر اُوئون رَي ٻاپ ڏاڏون ݾون ليئو ھتو۔ 7 اِيئي رَي ڪري پرميشوَر اُوئون رِي جگھا تي اُوئون را ڇوڪرا راکيا، جڪون رو کَتنو يشُوع ڪيئو ھتو، ڪيونڪہ مارگ ۾ اُوئون رو کَتنو ڪونھي ڪيئوڙو ھتو۔ 8 جڏي ݾجَي آڏميون رو کَتنو ھويو، تو او ݾاجا ھوئڻ توڻي آپرَي آپرَي تنٻُو ۾ رھيا۔ 9 پَڇي پرميشوَر يشُوع نَي ڪھيو ڪہ، ”آج مھَي ٿون تي مِصر مُلڪ رو لاگوڙو داگ مِٽائي ڇوڙيو ھَي۔“ اِيئي رَي ڪري آج توڻي اُوئي جگھا رو نون جِلجال ھَي۔
10 پَڇي اِسرائيليون جِلجال ۾ آپرا تنٻُو لگايا ھانَ اُوئون يريحُو شھر رَي ميدون ۾ اُوئي مھيڻَي رِي چئوڏَي تاريخ رِي شام رو فَسح رو پَرٻ ملھايو۔ 11 فَسح پَرٻ رَي ٻيجَي ڏِن اُوئي مُلڪ رَي ڌون رِي بِنا کَمير ٻاٽِي ھانَ ڀُونجوڙا آنڀُو کاڌا۔ 12 اُوئي مُلڪ رو ڌون کاوڻ ݾون پَڇي، ٻيجَي ڏِن اُوئون نَي من نون رو آڪاشِي ڌون ڪونھي مِليو ھانَ اُوئي ݾون پَڇي، اِسرائيلي قوم نَي ڀڙي ڪڏي ڀِي آڪاشِي ڌون ڪونھي مِليو ھانَ اُوئيج ݾال اُوئون ڪنعان مُلڪ رِي پوک رو ڌون کاڌو۔
يشُوع رِي فريشتَي ݾون مُلاقات
13 جڏي يشُوع يريحُو شھر رَي نيڙو پُگو، تو اُوئي ݾومھو ڏيٺو ڪہ اُوئي آگھي مارگ ۾ ھيڪ مِنک ھاٿ ۾ تلوار لي اُڀو ھَي۔ اِيئي تي يشُوع اُوئي رَي نيڙو گيو ھانَ پُوڇو ڪہ، ”تُو مھورَي پاݾَي ھَي، جون مھورَي دُشمنون رَي؟“ 14 اُوئي ڪھيو ڪہ، ”نا، ھُون تو پرميشوَر رِي فوج رو آفيسر ھوئي آيو ھون۔“ پَڇي يشُوع اُوئي رَي پگون ۾ جُھڪيو ھانَ ڪھيو ڪہ،”اي مھارا مالڪ، آپرَي ٻونھَي رَي ݾارُو ڪھڙو حُڪم ھَي؟“ 15 اِيئي تي پرميشوَر رَي فوج رَي آفيسر يشُوع نَي ڪھيو ڪہ، ”تُو آپرَي پگون ݾون جُتا اُتار، ڪيونڪہ جيٿ تُو اُڀو ھَي، اَي پويتر جگھا ھَي۔“ پَڇي يشُوع اِيئوج ڪيئو۔