يشُوع 3

اِسرائيليون رو يردن دريا پار ڪرڻ

يشُوع ݾاڪݪي تارھي اُٺيو۔ پَڇي او ھانَ اِسرائيلي قوم را مِنک شطيم علائقَي ݾون نڪري يردن دريا رَي نيڙا پُگا ھانَ او دريا پار ڪرڻ ݾون پيل اوٿ اُڀا۔ ‏2 تينون ڏِنون ݾون پَڇي اَگووڻ تنٻُوئون رَي بِچ ݾون لنگھيا ‏3 ھانَ مِنکون نَي حُڪم ڏينو ڪہ، ”جڏي ٿي لاوِي قبيلَي نَي جڪو ايشوَر را پُوجاري ھَي، پرميشوَر آپڻَي ايشوَر رِي وچن رِي ݾنڏُوڪ کڻيوڙِي ڏيکو، تو ٿي آپرِي جگھا ݾون اُٺي اُوئي ݾنڏُوڪ لاري بَيا۔ ‏4 پڻ ٿي اُوئي ݾون اندازن ھيڪ ڪِلو ميٽر اݪگا رھيا ھانَ اُوئي رَي نيڙا نِي جايا ڪہ ٿونَي خبر پڙَي ڪہ ڪيئا جاوڻو ھَي، ڪيونڪہ اِيئي ݾون پيل ٿي اِيئي مارگ ݾون ڪڏي ڀِي ڪونھي لنگھيا۔“ ‏5 پَڇي يشُوع مِنکون نَي ڪھيو ڪہ، ”ٿي آپرو آپنَي پويتر ڪرو، ڪيونڪہ ݾاڪݪي تارھي پرميشوَر ٿون ۾ عجيب ڪوم ڪرشَي۔“ ‏6 پَڇي يشُوع ايشوَر رَي پُوجاريون نَي ڪھيو ڪہ، ”ٿي وچن رِي ݾنڏُوڪ کڻي مِنکون آگھي آگھي دريا پار ڪريا۔“ پَڇي او وچن رِي ݾنڏُوڪ کڻي مِنکون لاري لاري بُوئا۔

‏7 پرميشوَر يشُوع نَي ڪھيو ڪہ، ”آج ݾون ھُون ٿنَي ݾجِي اِسرائيلي قوم رَي رُوبرو تموم گھڻِي عِزت ڏئين ڪہ اُوئون نَي خبر پڙَي ڪہ جون ھُون مُوسيٰ ڀيڙو ھتو، اِيئوج ٿَي ڀيڙو ڀِي رئين۔ ‏8 تُو وچن رِي ݾنڏُوڪ کڻڻ آݪَي پُوجاريون نَي حُڪم ڏئي ڪہ، ’جڏي ٿي يردن دريا تي پُگو، تو ٿي دريا رَي ڪپ تي پوڻي ۾ اُڀِي رھيا۔‘“

‏9 پَڇي يشُوع اِسرائيليون نَي ڪھيو ڪہ، ”ايٿ نيڙا آئو ھانَ پرميشوَر آپرَي ايشوَر رَي باتون ݾُڻو، ‏10 جڪَي ݾون ٿونَي خبر پڙشَي ڪہ جيتو ايشوَر ٿون ڀيڙو ھَي ھانَ او ڪنعاني، حِتي، حوِي، فرزي، جرجاسي، اموري ھانَ يبُوسي قوم نَي ٿون ݾون ھٽائي ڇوڙشَي۔ ‏11 جوئو، ݾجِي دُنيا رَي مالڪ رِي وچن رِي ݾنڏُوڪ ٿون آگھي آگھي يردن دريا ݾون لنگھڻ آݪِي ھَي۔ ‏12 ھمَي ٿي اِسرائيلي قبيلَي ۾ ٻارھَي مِنک چُونڊو۔ ھر ھيڪ قبيلَي ݾون ھيڪ ھيڪ مِنک ھووَي۔ ‏13 جڏي ݾجِي دُنيا رَي مالڪ، يعني پرميشوَر رَي وچن رِي ݾنڏُوڪ کڻڻ آݪا پُوجاري آپرا پگ يردن دريا رَي پوڻي ۾ راکشَي، تو يردن رو بيوَڻ آݪو پوڻي اُڀي ريشَي ھانَ او ھيڪِي جگھا تي ڀيڙو ھوئي جاشَي۔“

‏14 پَڇي مِنک يردن دريا پار ڪرڻ رَي ݾارُو آپرَي آپرَي تنٻُوئون ݾون نڪري بَئير ھويا ھانَ وچن رِي ݾنڏُوڪ کڻڻ آݪا پُوجاري مِنکون آگھي آگھي بُوئا۔ ‏15 اُوئي ٽيم پوک لُڻڻ رِي مُند ھتِي ھانَ دريا رو پوڻي ڪپ ݾون ٻاھر بيتو پڙيو۔ وچن رِي ݾنڏُوڪ کڻڻ آݪا پُوجاري يردن دريا رَي ڪپ تي پُگا ھانَ جڏي اُوئون آپرا پگ پوڻي ۾ گھاتيا، ‏16 تو بيوَڻ آݪو پوڻي اُڀي رھيو ھانَ اݪگِي ڀون ݾون ادم شھر رَي نيڙو ڀيڙو ھويو، جڪو ضرتان شھر ڪڍي ھَي ھانَ جڪو پوڻي ارابا ݾمُوندر، يعني مُردار ݾمُوندر ڏيݾا بيتو پڙيو ھانَ او ݾجو اُتري گيو۔ پَڇي ݾجَي مِنکون ݾُوڪو دريا پار ڪيئو۔ اَي جگھا يريحُو شھر رَي ݾَڦا ݾومھِي ھتِي۔ ‏17 پرميشوَر رَي وچن رِي ݾنڏُوڪ کڻڻ آݪا پُوجاري يردن دريا رَي بِچ ۾ ݾُوڪِي زمين تي اُڀي رھيا ھانَ باقي مِنک ݾُوڪِي زمين تي بَئي دريا پار ڪيئو۔ جترِي توڻي اِسرائيليون ݾُوڪِي زمين ݾون دريا پار ڪونھي ڪيئو، اُترِي توڻي او پُوجاري دريا ۾ اُڀا رھيا۔