يشُوع 1

يشُوع

يشُوع نَي اَگووڻ چُونڊڻ

پرميشوَر رَي شيواداري مُوسيٰ رَي مرڻ ݾون پَڇي پرميشوَر، مُوسيٰ رَي مددگار نُونَ رَي ڏيڪرَي يشُوع نَي ڪھيو ڪہ، ‏2 ”مھارو شيواداري مُوسيٰ مري گيو ھَي۔ اِيئي رَي ڪري ھمَي تُو اُٺ ھانَ اَي ݾجائِي مِنک ڀيڙا لي يردن دريا پار ڪر ھانَ اُوئي مُلڪ ۾ جا، جڪو ھُون اِسرائيلي قوم نَي ڏئين۔ ‏3 جيٿ جيٿ ٿي پگ راکشو، او زمين ھُون ٿونَي ڏئين، جڪَي رو واعدو مھَي مُوسيٰ ݾون ڪيئو ھتو۔ ‏4 رڻ پَٽ ݾون لي لبنان رَي جبل توڻي، موٽَي دريا فرات ݾون لي حِتيون رو پُورو علائقو ھانَ آٿوڻَي پاݾَي موٽَي ݾمُوندر توڻي ٿونرِي حد ھوشَي۔ ‏5 جترِي توڻي تُو جيتو ھَي، ڪو ڀِي مِنک ٿارَي ݾومھو اُڀي ڪونھي ݾگھَي، جون ھُون مُوسيٰ ڀيڙو ھتو، اِيئوج ٿَي ڀيڙو ڀِي ھوئين۔ ھُون ٿنَي ڪڏي ڀِي ھيکلو ڪونھي ڇوڙون۔ ‏6 اِيئي رَي ڪري تُو مضبُوط ھو ھانَ دلير ھو، ڪيونڪہ تُو اِيئي قوم نَي اُوئي مُلڪ را بارݾ ڪرِي، جڪَي نَي ڏيوَڻ رو ݾونݾ مھَي اُوئون رَي ٻاپ ڏاڏون نَي ڏينو ھتو۔ ‏7 اِيئي رَي ڪري تُو مضبُوط ھو ھانَ دلير ھو۔ ڌھيون ڏي اُوئي شريعت تي بَي، جڪَي رو حُڪم مھارَي شيواداري مُوسيٰ ٿنَي ڏينو ھَي۔ تُو ڪو ڀِي حُڪم توڙي نِي، پَڇي تُو جيٿ ڀِي جائِي، ڪامياب ھوئِي۔ ‏8 شريعت رو اَي ڪِتاب ٿارَي موڏَي ݾون اݪگو نِي رَي۔ ڏِن رات ٿارو ڌھيون اُوئي تي ھووَي ھانَ تُو اُوئي ۾ لِکيوڙَي ݾجَي حُڪمون تي بيتو رَي۔ پَڇي تُو ھر ھيڪ ڪوم ۾ خُوشحال ھانَ ڪامياب ھوئِي۔ ‏9 ھُون ٿنَي ڀڙي حُڪم ڏيئون ھون ڪہ تُو مضبُوط ھو ھانَ دلير ھو، نِي ٻيئاج ھانَ ھِمت راک۔ ڪيونڪہ تُو جيٿ ڀِي جائِي ھُون پرميشوَر ٿارو ايشوَر ٿَي ڀيڙو ھوئين۔“

يشُوع رو مِنکون نَي حُڪم ڏيوَڻ

‏10 پَڇي يشُوع اِسرائيلي قوم رَي اَگووڻون نَي حُڪم ڏينو ڪہ، ‏11 ”ٿي جائي تنٻُوئون ۾ مِنکون نَي ڪو ڪہ، ’کاوڻ پيئڻ رو بندوبست ڪرو، ڪيونڪہ تينون ڏِنون ݾون پَڇي ٿي يردن دريا پار ڪري اُوئي مُلڪ تي قبضو ڪرشو، جڪو پرميشوَر ٿونرو ايشوَر ٿونَي ڏيشَي۔‘“ ‏12 پَڇي يشُوع روبن، جد ھانَ مُنسي رَي آڌَي قبيلَي نَي ڪھيو ڪہ، ‏13 ”ياد ڪرو، پرميشوَر رَي شيواداري مُوسيٰ ٿونَي حُڪم ڏينو ھتو ڪہ، ’پرميشوَر ٿونرو ايشوَر ٿونَي آروم ڏيشَي ھانَ اَي مُلڪ ٿونَي ڏيشَي۔‘ ‏14 ٿونرَي لُگائَي، ٻاݪ ھانَ جِنار اِيئي مُلڪ ۾ ريشَي، جڪو مُوسيٰ يردن دريا رَي اِيئي پاݾَي ٿونَي ڏينا ھَي۔ باقي ٿون ۾ ݾجائِي مضبُوط ھانَ جنگِي آڏمي آپرا ھٿيار کڻي آپرَي ڀايون آگھي بَي ھانَ اُوئون رِي مدد ڪرَي، ‏15 جترِي توڻي پرميشوَر ٿونرَي ڀايون نَي ٿون آݪِي ڪار آروم نِي ڏَي ھانَ اُوئي مُلڪ تي قبضو نِي ڪرَي، جڪو پرميشوَر ٿونرو ايشوَر اُوئون نَي وِراثت ۾ ڏيشَي۔ اُوئي ݾون پَڇي ٿي پاڇا جائي آپرَي اِيئي مُلڪ ۾ مالڪ ھوئي رھيا، جڪو پرميشوَر رَي شيواداري مُوسيٰ ٿونَي يردن دريا رَي اُوگوڻَي ڪپ تي ڏينو ھتو۔“ ‏16 اِيئي تي اُوئون يشُوع نَي ڪھيو ڪہ، ”جڪو حُڪم ٿَي مھونَي ڏينو ھَي، مھي او ݾجو ڪئين ڪرشون ھانَ جيٿ تُو مھونَي ميلِي، مھي اوٿ جاشون۔ ‏17 جون مھي مُوسيٰ رِي ھر ھيڪ بات منتا، اِيئوج مھي ٿارِي ڀِي ھر ھيڪ بات منشون۔ پرميشوَر ٿارو ايشوَر جھڙَي نمُونَي مُوسيٰ ڀيڙو ھتو، اُوئيج نمُونَي ٿَي ڀيڙو ڀِي ھووَي۔ ‏18 جڪو مِنک ٿارو حُڪم ڪونھي منَي ھانَ جڪو ڪئين ٿَي ڪھيو ھَي، او ڪونھي ڪرَي، تو او ضرُور قتل ڪيئو جاوَي۔ تُو رُگو مضبُوط ھو ھانَ دلير ھو۔“