ڌُوپ ڪرڻ رِي جگھا ٺاوڻ رو حُڪم
30
پَڇي پرميشوَر مُوسيٰ نَي ڪھيو ڪہ، ”تُو ٻَٻڙ رِي لڪڙِي ݾون ڌُوپ ڪرڻ رِي جگھا ٺائي۔ 2 تُو اُوئي نَي چوڪُنڊِي ٺائي، اُوئي رِي لونٻائي ھانَ ويڪرائِي ڏوڍ ڏوڍ ڦُٽ ھووَي ھانَ اُوئي رِي اُونچائي تين ڦُٽ ھووَي۔ اُوئي ماٿَي چارون ڪُنڊون تي ݾِينگ ٺائي۔ اَي ݾجِي جگھا ٻَٻڙ رِي لڪڙِي رَي ھيڪَي ٽُڪڙَي ݾون ٺائي۔ 3 تُو اُوئي رَي ماٿَي، چوڌاري ھانَ ݾِينگون تي نِج ݾونو چاڙھي ھانَ اُوئي ماٿَي چوڌاري ݾونَي را ڪِنارا ٺائي۔ 4 تُو ݾونَي رَي ڪِنارَي ھيٺا اُوئي رَي ٻيئي پاݾَي ݾونَي را ٻي ٻي ڪڙا ٺائي ڪہ اُوئون ڪڙون ۾ ڏنڊا گھاتي او کڻيجَي۔ 5 او ڏنڊا ٻَٻڙ رِي لڪڙِي را ٺائي ھانَ اُوئون تي ݾونو چاڙھي۔ 6 تُو اُوئي نَي پڙدَي آگھي راکي، جڪو وچن رِي ݾنڏُوڪ رَي ݾومھو ھَي۔ او وچن رِي ݾنڏُوڪ رَي ڍڪ رَي ݾومھو ھووَي، جيٿ ݾون ھُون ٿنَي درشن ڏيتو رئين۔ 7 ھارُون ھروز ݾاڪݪي تارھي ڏِيئا صحيح ڪرتي بِݪا ٻَليدون رِي جگھا تي ݾُرو ڌُوپ ڪرَي۔ 8 ڏِن آٿوئڻ رَي ٽيم جڏي ڏِيئا صحيح ڪرَي، تو ڀِي اُوئي ٽيم ڌُوپ ڪرَي۔ اَي ݾُرو ڌُوپ مھارَي ݾارُو ٿونرِي ھيڪِي پيڙھِي ݾون ٻيجِي پيڙھِي توڻي ھميشا ڪيئو جاوَي۔ 9 خبردار، ٿي اُوئي ماٿَي ٻيجو ڪو ڀِي ڌُوپ نِي ڪريا۔ تُو اُوئي ماٿَي ٻاݪڻ آݪو ٻَليدون جون دون رو ٻَليدون نِي ڪري ھانَ نِي اُوئي ماٿَي انگُورون رو رس ڍوڙي۔ 10 ھارُون ݾال ۾ ھيڪ گُھمرو ٻَليدون رِي جگھا نَي پويتر ڪرڻ رَي ݾارُو اُوئي رَي ݾِينگون تي ايوَزَي رَي ڏِن ڪيئوڙَي ٻَليدون رو لوئِي لگاوَي۔ ٿي ھيڪِي پيڙھِي ݾون ٻيجِي پيڙھِي توڻي ݾال ۾ ھيڪ گُھمرو اِيئوج ڪرتا رھيا، ڪيونڪہ اَي مھارَي ݾارُو ݾجون ݾون وڌيڪ پويتر ھَي۔“پويتر تنٻُو رَي ݾارُو دون رو حُڪم
11 پَڇي پرميشوَر مُوسيٰ نَي ڪھيو ڪہ، 12 ”جڏي تُو اِسرائيلي قوم نَي گِڻَي، تو جڪو جڪو گِڻيجَي، تو ھر ھيڪ آڏمي گِڻتَي بِݪا مھارَي ݾارُو آپرِي جان رو ايوَزو ڏَي ڪہ گِڻڻ ݾون پَڇي اُوئون ۾ ڪو ڀِي بيمارِي نِي آوَي۔ 13 ھر ھيڪ مِنک جڪو گِڻيوڙون ڀيڙو شامل ھووَي، تو او پويتر تنٻُو رَي ھيڪَي تولَي چوندِي رَي ݾِڪَي رَي وزن رَي حِساب ݾون آڌو تولو چوندِي رو ݾِڪو مھارَي ݾارُو دون ۾ ڏَي۔ 14 بيݾ ݾال جون اُوئي ݾون موٽو ھر ھيڪ مِنک جڪو گِڻيوڙون ڀيڙو شامل ھوتو جاوَي، او مھارَي ݾارُو اَي دون ڏَي۔ 15 جڏي او آپرِي جان رَي ايوَزَي رَي ݾارُو مھَي پرميشوَر نَي دون ڏَي، تو اَمير ھانَ غريب ٻيئي ھيڪ جِترو ڏَي، يعني آڌَي ݾِڪَي ݾون گھٽ جون وڌ نِي ڏَي۔ 16 تُو اِسرائيلي قوم ݾون ايوَزَي را پَشا لئي ھانَ او پويتر تنٻُو رَي ڪوم ۾ لگائي ڪہ او مھارَي ݾارُو يادگيرِي ھووَي ڪہ اِسرائيلي قوم آپرِي جان رو ايوَزو ڏينو ھَي۔“
پيتل رِي ھودِي ٺاوڻ رو حُڪم
17 پَڇي پرميشوَر مُوسيٰ نَي ڪھيو ڪہ، 18 ”تُو ھاٿ پگ ڌوئڻ رَي ݾارُو پيتل رِي ھيڪ ھودِي ھانَ پيتل رِي ھيڪ ڪُرسِي ٺائي ھانَ اُوئي نَي پويتر تنٻُو ھانَ ٻَليدون رِي جگھا رَي بِچ ۾ راکي۔ پَڇي اُوئي ۾ پوڻي ڀري 19 ڪہ ھارُون ھانَ اُوئي را ڏيڪرا آپرا ھاٿ پگ اُوئي ھودِي ݾون ڌوتا رَي۔ 20 جڏي او پويتر تنٻُو ۾ جاوَي، تو او آپرا آپرا ھاٿ پگ ڌوتا رَي ڪہ او مرَي نِي، جون او ٻَليدون رِي جگھا تي مھارِي شيوا رَي ݾارُو ٻاݪڻ آݪو ٻَليدون ڪرڻ آوَي، 21 تو او آپرا ھاٿ پگ ڌوئَي ڪہ او مرَي نِي۔ اَي ريت اُوئي رِي پيڙھِي ݾون پيڙھِي توڻي بيتِي رَي۔“
پويتر ڪرڻ رو تيل
22 پَڇي پرميشوَر مُوسيٰ نَي ڪھيو ڪہ، 23 ”تُو پويتر تيل رَي ݾارُو قيمتي ݾُرا مسالا لئي، يعني ڇَي ݾير تازو مُر، تين ݾير دالچِڻي، تين ݾير ݾُرَي لڪڙَي، 24 ڇَي ݾير ڪمال پَٽ ھانَ چار ݾير زيتُون رو تيل۔ اِيئون شيون رو وزن پويتر تنٻُو رَي حِساب ݾون ھووَي۔ 25 اَي ݾجو سيمون ݾُٺَي نمُونَي مِلائي ھانَ اُوئي ݾون پويتر ڪرڻ رو ݾُرو تيل ٺائي۔ اَئيج پويتر ڪرڻ رو تيل ھوشَي۔ 26 اِيئي تيل ݾون تُو اَي شيون پويتر ڪري، پويتر تنٻُو، وچن رِي ݾنڏُوڪ، 27 ٽيبل ھانَ اُوئي را ٺيڪر، ڏِيئو راکڻ آݪِي شئي ھانَ اُوئي را ٺيڪر، ڌُوپ ڪرڻ رِي جگھا، 28 ٻاݪڻ آݪَي ٻَليدون رِي جگھا ھانَ اُوئي را ݾجائِي ٺيڪر، ھودِي ھانَ اُوئي رِي ڪُرسِي۔ اَي ݾجَي شيون پويتر تيل لگائي پويتر ڪري۔ 29 تُو اُوئون نَي پويتر ڪري ڪہ او ݾَڦا پويتر ھوئي جاوَي۔ جڪو ڀِي اُوئون نَي ھاٿ لگاشَي، تو او ڀِي پويتر ھوئي جاشَي۔ 30 تُو ھارُون ھانَ اُوئي رَي ڏيڪرون رَي ماٿَي تي تيل ڍوڙي اُوئون نَي پويتر ڪري ڪہ او مھارَي ݾارُو پُوجاري ھوئي شيوا رو ڪوم ڪرَي۔ 31 تُو اِسرائيلي قوم نَي ڪئي ڪہ اَي تيل مھارَي طرفون ٿونرِي ھر ھيڪ پيڙھِي ݾارُو پويتر ڪرڻ رو تيل ھوشَي۔ 32 اَي تيل ڪَي ڀِي آڏمي رَي ڏيل تي نِي لگايا، نِي ڪو ٻيجو اھڙو تيل ٺاھيا، ڪيونڪہ اَي پويتر تيل ھَي ھانَ ٿونرَي ݾارُو پويتر رَي۔ 33 جڪو ڀِي اِيئي نمُونَي ڪئين ٺاوَي، جون اِيئي ۾ ڪئين ٻيجَي تي لگاوَي، تو او اِسرائيلي قوم ݾون ڪاڍيو جاشَي۔“
ڌُوپ ڪرڻ را مسالا
34 پرميشوَر مُوسيٰ نَي ڪھيو ڪہ، ”تُو ݾُرا مسالا، مُر، مصطگي (يعني پِستَي رَي بَڻ رو گُوند) لُوبون ھانَ ݾُرَي مسالون ڀيڙو وزن ۾ ھيڪ جِترو نِج گُوگݪ ڀِي لئي۔ 35 اُوئون ۾ لُوڻ مِلائي ھانَ اُوئي ݾون عطر ٺاوڻ آݪَي ڪاريگر آݪِي ڪار اُوئون ݾون ݾُرو، نِج ھانَ پويتر ڌُوپ ٺائي۔ 36 اِيئي ۾ ڪئين ݾِنيو پيݾي پويتر تنٻُو ۾ وچن رِي ݾنڏُوڪ رَي ݾومھو راکي، جيٿ ھُون ٿَي ݾون مِلتو رئين۔ اَي ٿونرَي ݾارُو ݾَڦا پويتر ھوشَي۔ 37 جڪو ڌُوپ تُو ٺائِي، اُوئيج نمُونَي ݾون تُو آپرَي ݾارُو ڪئين نِي ٺائي۔ ٿي او ڌُوپ مھارَي ݾارُو پويتر ݾمجھا۔ 38 جي ڪُڻ ݾُوگڻ رَي ݾارُو اُوئي جھڙو ڪئين ٺاوَي، تو او اِسرائيلي قوم ݾون ڪاڍيو جاوَي۔“