ھارُون ھانَ اُوئي رَي ڏيڪرون نَي پُوجاري ٺاوڻ
29
پَڇي پرميشوَر مُوسيٰ نَي ڪھيو ڪہ، ”ھارُون ھانَ اُوئي را ڏيڪرا مھارَي ݾارُو پُوجاري ھوئي شيوا رو ڪوم ڪرشَي، اِيئي رَي ڪري تُو اُوئون نَي پويتر ڪرڻ رَي ݾارُو ھيڪ ٽوگھڙو ھانَ ٻي بي عيب گھيٽا لئي۔ 2 پَڇي تُو ڪڻڪ رَي آٽَي ݾون اَي شيون ٺائي جڪَي ۾ کَمير نِي ھووَي، ٻاٽِي، تيل ۾ گويوڙَي آٽَي رَي ٽِڪَي ھانَ تيل ݾون چوپڙيوڙَي ٻاٽَي۔ 3 اَي ھيڪَي ٽوڪرَي ۾ راکي ھانَ اُوئي ٽوڪرَي نَي ٽوگھڙَي ھانَ ٻيئون گھيٽون ݾُوڌو مھَي ڪڍي لي آئي۔ 4 پَڇي ھارُون ھانَ اُوئون را ڏيڪرا پويتر تنٻُو رَي در تي لائي اُوئون نَي پوڻي ݾون جھيلاڙي۔ 5 اِيئي ݾون پَڇي ھارُون نَي اُوئي را گاڀا پيرائي يعني ڪُڙتو، واسڪوٽِي رو نيچلو جُبو، واسڪوٽِي ھانَ سينو بند پيرائي ھانَ واسڪوٽِي ݾُٺَي نمُونَي ڀرت ڀريوڙو پَٽو اُوئي رَي ڪرڪ تي ٻونڌي۔ 6 پَڇي پوتيو اُوئي رَي ماٿَي تي راکي ھانَ اُوئي پوتئي ماٿَي خاص ݾونَي رِي پٽِي راکي۔ 7 پويتر ڪرڻ آݪو تيل لي اُوئي رَي ماٿَي تي لگائي ھانَ اُوئي نَي مھارَي نون رو ڪري۔ 8 پَڇي ھارُون را ڏيڪرا آگھي لائي اُوئون نَي ڪُڙتا پيرائي۔ 9 اُوئون نَي ڪرڪ را پَٽا ٻونڌي ھانَ پوتيا ٻونڌائي ڪہ رُگو او ھانَ اُوئون رِي پيڙھِي آݪا ھميشا رَي ݾارُو پُوجاري رو ڪوم ڪرتا رَي۔ تُو ھارُون ھانَ اُوئي را ڏيڪرا مھارِي شيوا رَي ݾارُو اِيئج نمُونَي چُونڊي۔ 10 تُو ٽوگھڙو پويتر تنٻُو آگھي لي آئي ھانَ ھارُون ھانَ اُوئي را ڏيڪرا آپرا آپرا ھاٿ اُوئي ٽوگھڙَي رَي ماٿَي تي راکَي۔ 11 اُوئي ݾون پَڇي او ٽوگھڙو مھارَي ݾومھو پويتر تنٻُو رَي در تي باڍَي۔ 12 پَڇي اُوئي ٽوگھڙَي رَي لوئِي ݾون ڪئينڪہ لي اُوئي نَي آپرِي اونگڙِي ݾون ٻَليدون رِي جگھا رَي ڪُنڊون تي ٺاھيوڙَي ݾِينگون تي لگائي ھانَ باقي ݾجو لوئِي ٻَليدون رِي جگھا رِي پاݪ ۾ ڍوڙي۔ 13 پَڇي اَونترون تي لاگوڙِي چرٻِي، جِگر رو ماٿلو پڙدو ھانَ ٻيئي گُڙدا ھانَ اُوئون رِي ماٿلِي ݾار لئي، پَڇي اَي ݾجائِي ٻَليدون رِي جگھا تي ٻاݪي۔ 14 پڻ اُوئي ٽوگھڙَي رو موݾ، کال ھانَ گوٻر، پويتر تنٻُو ݾون ٻاھر اݪگو ٻاݪي ڇوڙي، ڪيونڪہ اَي پاپون رو ٻَليدون ھَي۔15 پَڇي تُو ھيڪ گھيٽو لئي ھانَ ھارُون ھانَ اُوئي را ڏيڪرا آپرا آپرا ھاٿ اُوئي گھيٽَي رَي ماٿَي تي راکَي۔ 16 پَڇي تُو اُوئي گھيٽَي نَي باڍي ھانَ اُوئي رو لوئِي ٻَليدون رِي جگھا تي چوڌاري ڇونٽي۔ 17 پَڇي تُو گھيٽَي را ٽُڪڙا ٽُڪڙا ڪري باڍي، اُوئي را اَونترا ھانَ کُريا ڌوئي اُوئون ٽُڪڙون ھانَ نَݾ ڀيڙو، 18 اَي ݾجو گھيٽو، ٻَليدون رِي جگھا تي ٻاݪي ڇوڙي۔ اَي مھارَي ݾارُو ٻاݪڻ آݪو ٻَليدون ھَي۔ اَي مھارَي من نَي ڀاوڻ آݪو ݾُرو ٻَليدون ھَي۔
19 پَڇي تُو ٻيجو گھيٽو لئي، پَڇي ھارُون ھانَ اُوئي را ڏيڪرا آپرا آپرا ھاٿ اُوئي رَي ماٿَي تي راکَي۔ 20 تُو او گھيٽو باڍي ھانَ اُوئي رَي لوئِي ۾ ڪئينڪہ لي ھارُون ھانَ اُوئي رَي ڏيڪرون رَي کاٻَي ڪونون رَي پاپڙيون تي، ݾاجَي ھاٿ تي ھانَ ݾاجَي پگ رَي اَنگُوٺون تي لگائي، پَڇي لوئِي ٻَليدون رِي جگھا رَي چوڌاري ڇونٽي۔ 21 تُو ٻَليدون رِي جگھا ݾون لوئِي ھانَ پويتر ڪرڻ آݪَي تيل ۾ ڪئين لي ھارُون ھانَ اُوئي رَي ڏيڪرون رَي گاڀون تي ڇونٽي۔ اِيئي نمُونَي او ھانَ اُوئي را ڏيڪرا آپرَي آپرَي گاڀون ݾُوڌا پويتر ھوئي جاشَي۔ 22 تُو گھيٽَي رِي ݾار ھانَ موٽِي دُنب، اَونترون تي لاگوڙِي ݾار، جِگر رو ماٿلو پڙدو ھانَ ٻي گُڙدا ھانَ ماٿلِي چرٻِي ھانَ کاٻِي ݾاٿݪ لئي۔ او گھيٽو ھارُون ھانَ اُوئي رَي ڏيڪرون نَي پويتر ڪري چُونڊڻ رَي ݾارُو ھَي۔ 23 بِنا کَمير ٻاٽِي رِي ٽوڪرِي جڪو مھَي پرميشوَر رَي ݾارُو راکيوڙِي ھوشَي اُوئي ۾ ھيڪ ٻاٽِي، تيل ۾ گويوڙَي آٽَي رِي ٽڪِي ھانَ تيل رِي چوپڙيوڙِي ٻاٽِي لئي۔ 24 اَي ݾجَي شيون لي ھارُون ھانَ اُوئي رَي ڏيڪرون رَي ھاٿون تي راکي، پَڇي اِيئون نَي مھَي پرميشوَر رَي رُوبرو ھِلائي ڪہ اَي ھِلاوڻ آݪو ٻَليدون ھووَي۔ 25 تُو ݾجَي شيون اُوئون رَي ھاٿون ݾون لي ٻَليدون رِي جگھا تي ٻاݪڻ آݪَي ٻَليدون رَي ماٿَي ٻاݪي۔ اَي ٻاݪڻ آݪو ٻَليدون ھوشَي، جڪَي رِي خُوشبو مھَي پرميشوَر نَي پسند ھَي۔ 26 تُو ھارُون نَي چُونڊڻ رَي ݾارُو اِستعمال ھوئڻ آݪَي گھيٽَي رو سينو لي اُوئي نَي مھارَي ݾومھو ھِلائي ڪہ او ھِلاوڻ آݪو ٻَليدون ھووَي ھانَ اَي ٿارِي پتِي ھوشَي۔ 27 تُو ھارُون ھانَ اُوئي رَي ڏيڪرون نَي چُونڊڻ رَي ݾارُو اِستعمال ھوئڻ آݪَي گھيٽَي را ٽُڪڙا پويتر ڪري۔ اُوئي رو سينو مھارَي ݾارُو ھِلاوڻ آݪَي ٻَليدون رَي ݾارُو ھِلائي ھانَ اُوئي رِي ݾاٿݪ کڻڻ آݪَي ٻَليدون رَي ݾارُو کڻي۔ 28 اَي ݾجو اِسرائيلي قوم رَي طرفون ھميشا رَي ݾارُو ھارُون ھانَ اُوئي رَي ڏيڪرون رو حق ھوشَي، ڪيونڪہ اَي کڻڻ رو دون ھَي۔ اَي اِسرائيلي قوم رَي طرفون اُوئون رِي خيريت رَي ٻَليدون ۾ کڻڻ رو دون ھوشَي جڪو اُوئي رَي طرفون مھارَي ݾارُو ليئو جاشَي۔
29 ھارُون ݾون پَڇي اُوئي را پويتر گاڀا اُوئي رَي اولاد رَي ݾارُو ھوشَي ڪہ اُوئون رَي ماٿَي تي پويتر تيل لگائي مھارَي ݾارُو چُونڊيا جاوَي۔ 30 ھارُون رو ڏيڪرو جڪو اُوئي جگھا تي مھارو پُوجاري ھوشَي، جڏي او پويتر جگھا ۾ شيوا رَي ݾارُو پويتر تنٻُو ۾ جاوَي، تو او پويتر گاڀا ݾات ڏِن پيري راکَي۔
31 تُو ھارُون ھانَ اُوئي را ڏيڪرا چُونڊڻ رَي ݾارُو باڍيوڙَي گھيٽَي رو موݾ لئي ھانَ جائي ڪَي پويتر جگھا تي ٻاڦي۔ 32 پَڇي ھارُون ھانَ اُوئي را ڏيڪرا گھيٽَي رو موݾ ھانَ ٽوڪرِي ݾون ٻاٽَي لي پويتر تنٻُو رَي اوڱڻَي ۾ ٻيݾي کاوَي۔ 33 اُوئون نَي چُونڊڻ ھانَ پويتر ڪرڻ رَي ݾارُو جڪو شيون پاپون رو ايوَزَي ۾ ڏينِي جاشَي، او اُوئون نَي ڀِي کاوَي پڻ ٻيجو مِنک اُوئون ۾ ڪئين نِي کاوَي، ڪيونڪہ اَي شيون پويتر ھَي۔ 34 جي اُوئي موݾ جون ٻاٽِي ۾ ݾاڪݪي توڻي ڪئين بچَي، تو اُوئي نَي ٻاݪي ڇوڙي۔ او ڪڏي ڀِي نِي کاوَي، ڪيونڪہ او پويتر ھَي۔
35 تُو ھارُون ھانَ اُوئي را ڏيڪرا چُونڊڻ رَي ݾارُو اوج ڪري جڪَي رَي مھَي ٿنَي حُڪم ڏينو ھَي۔ تُو ݾات ڏِن اُوئون نَي چُونڊڻ رِي ريت ڪرتو رئي۔ 36 اُوئون ݾاتون ڏِنون ۾ تُو ھروز پويتر ھوئڻ رَي ݾارُو پاپون رَي ايوَزَي رو ٽوگھڙو باڍي ھانَ ٻَليدون رِي جگھا تي پويتر تيل ڍوڙي ڪہ او پويتر ھوئي جاوَي۔ 37 تُو ݾات ڏِن ٻَليدون ڪري ھانَ اُوئي نَي پويتر ڪري، تو ٻَليدون رِي جگھا ݾَڦا پويتر ھوئي جاشَي ھانَ جڪو ڀِي اُوئي نَي ھاٿ لگاشَي، او ڀِي پويتر ھوئي جاشَي۔“
ھروز را ٻَليدون
38 پَڇي پرميشوَر مُوسيٰ نَي ڪھيو ڪہ، ”تُو ھروز ھيڪ ھيڪ ݾال را ٻي ٻي گھيٽا ٻَليدون رِي جگھا تي چاڙھي۔ 39 ھيڪ گھيٽو ݾاڪݪي رو ھانَ ٻيجو شام رو ٻَليدون ڪري۔ 40 ھيڪَي گھيٽَي ڀيڙو ٻي ݾير آٽو جڪَي ۾ ھيڪ ليٽر ڪُوٽي ڪاڍيوڙو زيتُون رو تيل مِلايوڙو ھووَي ھانَ ٻَليدون رِي جگھا تي ڍوڙڻ رَي ݾارُو ھيڪ ليٽر انگُورون رو رس ڀِي ھووَي۔ 41 تُو شام رو ٻيجو گھيٽو ݾاڪݪي آݪِي ڪار آٽَي ڀيڙو ݾاگي نمُونَي انگُورون رو رس ڍوڙي ٻَليدون ڪري۔ اَي ٻاݪڻ آݪو ٻَليدون ھوشَي، جڪَي رِي خُوشبو مھَي پرميشوَر نَي پسند ھَي۔ 42 ٿي اھڙو ٻاݪڻ آݪو ٻَليدون ھيڪِي پيڙھِي ݾون ٻيجِي پيڙھِي توڻي پويتر تنٻُو رَي اوڱڻَي ۾ مھَي پرميشوَر آگھي ھميشا ڪرتا رھيا۔ اوٿ ھُون ٿونَي درشن ڏئين ھانَ ٿون ݾون باتون ڪرين۔ 43 اوٿ ھُون اِسرائيلي قوم ݾون مُلاقات ڪرين ھانَ او جگھا مھارَي اُجاݪَي ݾون پويتر ھوشَي۔ 44 ھُون پويتر تنٻُو ھانَ ٻَليدون رِي جگھا نَي پويتر ڪرين ھانَ ھُون ھارُون ھانَ اُوئي را ڏيڪرا چُونڊين ڪہ مھارا پُوجاري ھوئي شيوا ڪرَي۔ 45 ھُون اِسرائيلي قوم ڀيڙو رئين ھانَ اُوئون رو ايشوَر ھوئين۔ 46 پَڇي اُوئون نَي خبر پڙشَي ڪہ ھُون پرميشوَر اُوئون رو ايشوَر ھون جڪو اُوئون نَي مِصر مُلڪ ݾون ڪاڍي لي آيو ھون ڪہ ھُون اُوئون ڀيڙو رون۔ ھُونج پرميشوَر اُوئون رو ايشوَر ھون۔“