اِنصاف ھانَ ݾچائي ݾون بيوَڻ
23
پرميشوَر اَي ڀِي ڪھيو ڪہ، ”ٿي ڪو ڀِي ڪُوڙِي خبر نِي ھلايا ھانَ ڪَي خراب مِنک ڀيڙا مِلي ڪُوڙِي گواھِي نِي ڏيا۔ 2 تموم گھڻَي مِنکون نَي بُڇڙا ڪوم ڪرتا ڏيکي، ٿي اُوئون جھڙا نِي ھويا۔ ڪَي ڀِي فيصلَي ۾ تموم گھڻَي مِنکون ڀيڙا مِلي اھڙِي بات نِي ڪريا، جڪَي ݾون بي اِنصافي ھووَي۔ 3 ڪَي ڀِي فيصلَي ۾ غريب رِي طرفداري نِي ڪريا۔4 جي ٿونَي آپرَي دُشمن رو گڏو جون ڍگو رُلتو ملَي، تو ٿي ضرُور اُوئي نَي آپرَي مالڪ ڪڍي پُگايا۔ 5 جي ٿي آپرَي دُشمن رَي گڏَي نَي ڀار ھيٺا دٻيجوڙو ڏيکو، جي ٿونرو من نِي ڀِي ڪرَي، تو ڀِي ٿي ضرُور اُوئي رِي مدد ڪريا۔
6 ٿي ڪَي ڀِي غريب رو ناحقِي فيصلو نِي ڪريا۔ 7 ٿي ڪُوڙَي باتون ݾون اݪگا رھيا، ٿي بي ڏوھي ھانَ ݾاچَي مِنک نَي مارڻ رِي سزا نِي ڏيا، ڪيونڪہ ھُون ڏوھي مِنک نَي ضرُور سزا ڏئين۔ 8 ٿي رشوَت نِي ليا، ڪيونڪہ رشوَت اِنسون نَي اونڌا ڪرَي ھَي ھانَ او ݾاچَي مِنک رَي باتون ڦيرائي ڇوڙَي ھَي۔
9 ٿي ڪَي ڀِي پرديسي تي ظُلم نِي ڪريا، ڪيونڪہ ٿي پرديسي رو من اوݪکو ھو، ڪيونڪہ ٿي آپ مِصر مُلڪ ۾ پرديسي ھتا۔“
ݾاتوين ݾال ھانَ ݾاتوين ڏِن رَي بارَي ۾ حُڪم
10 پرميشوَر اَي ڀِي ڪھيو ڪہ، ”ٿي ڇَي ݾال آپرِي ٻنِي ۾ پوک پوکيا ھانَ اُوئي رِي پوک ڀيڙِي ڪريا، 11 پڻ ݾاتوين ݾال اُوئي ٻنِي ۾ ڪئين نِي پوکيا ھانَ اُوئي نَي اِيئج ريوَڻ ڏيا ڪہ اُوئي ۾ اُگڻ آݪِي پوک، ٿونرِي قوم را غريب کاوَي ھانَ جڪو پوک بچَي اُوئي نَي جھنگلِي جِنار کاوَي۔ ٿي آپرَي زيتُون ھانَ انگُورون رَي باگ ݾون ڀِي اِيئوج ڪريا۔
12 ٿي ڇَي ڏِن آپرو ڪوم ڪار ڪريا، پڻ ݾاتوين ڏِن آروم ڪريا، اِيئي رَي ڪري ڪہ ٿونرا ڍگا، گڏا ھانَ ٿونرِي ٻونھِي رو ڏيڪرو ھانَ پرديسي ڀِي آروم ڪرَي 13 ٿي اِيئي ݾجَي باتون تي بيتا رھيا، جڪَي رو مھَي ٿونَي ڪھيو ھَي۔ ٿي ٻيجَي ڪَي ڀِي ڏيوتا رِي پُوجا نِي ڪريا ھانَ نِي اُوئون رو نون ليا۔“
ݾال را تين موٽا پَرٻ
14 پرميشوَر اَي ڀِي ڪھيو ڪہ، ”مھارَي ݾارُو ݾال ۾ تين پَرٻ ملھايا۔ 15 ٿي ابيب مھيڻَي ۾ بِنا کَمير ٻاٽِي آݪو پَرٻ ملھايا، جڪَي رو مھَي حُڪم ڏينو ھَي۔ ٿي ݾات ڏِن بِنا کَمير ٻاٽِي کايا، ڪيونڪہ اِيئي مھيڻَي ۾ ٿي مِصر مُلڪ رِي غُلومي ݾون آزاد ھويا ھتا۔ ڪو ڀِي مھَي ڪڍي کالِي ھاٿ نِي آوَي۔ 16 جڏي ٿونرِي پوک ۾ پيلڪِي پيداوار آوَي، جڪَي رَي ݾارُو ٿون تموم گھڻِي محنت ڪِي ھتِي، اُوئي ٽيم ٿي لٻارَي ڪرڻ آݪو پَرٻ ملھايا۔ جڏي ٿي ݾال رَي آخر ۾ آپرِي محنت رِي پوک ڀيڙِي ڪرو، تو پوک ڀيڙِي ڪرڻ رو پَرٻ ملھايا۔
17 ھر ݾال ݾجائِي آڏمي ݾال ۾ تين گُھمرا مھارَي ݾارُو ٻَليدون لي آوَي۔
18 جڏي ٿي مھارَي ݾارُو ٻَليدون ڪرو، تو اُوئي رَي لوئِي ڀيڙو کَمير آݪِي ٻاٽِي رو ٻَليدون نِي ڪريا ھانَ جڪو جِنار ٿي مھارَي ݾارُو پَرٻ تي ٻَليدون ڪرو، تو اُوئون رِي چرٻِي ٻيجَي ڏِن رَي ݾارُو نِي راکيا۔
19 ٿي آپرِي ھر پيلڪِي پوک ۾ ݾُٺِي پيداوار رو حِصو پرميشوَر گھر ۾ لي آيا۔
ٿي ٻڪرِي را ڦݪ اُوئي رِي ما رَي ڏُوڌ ۾ نِي رونڌيا۔“
پرميشوَر را واعدا ھانَ حُڪم
20 پرميشوَر اَي ڀِي ڪھيو ڪہ، ”جوئو، ھُون ٿونرَي آگھي ھيڪ فريشتو ميلون ھون ڪہ او مارگ ۾ ٿونرِي ݾنڀال ڪرَي ھانَ ٿونَي اُوئي جگھا تي لي جاوَي، جڪو مھَي ٿونرَي ݾارُو تيار ڪِي ھَي۔ 21 ٿي خيال راکيا ھانَ اُوئي رِي بات منيا۔ جي ٿي اُوئي رِي بات ڪونھي منو، تو او ٿونَي معاف ڪونھي ڪرَي، ڪيونڪہ مھَي اُوئي نَي اِختيار ڏينو ھَي۔ 22 پڻ جي ٿي دِل ݾون اُوئي رِي بات منشو ھانَ جڪو ھُون ڪونھ او ݾجو ڪرشو، تو ھُون ٿونرَي دُشمنون رو دُشمن ھانَ ٿونرَي مُخالفون مُخالف ھوئين۔ 23 مھارو فريشتو ٿونرَي آگھي بيشَي ھانَ او ٿونَي اموري، حِتي، فرزي، ڪنعاني، حوِي ھانَ يبُوسي قومون رَي مُلڪ ۾ پُگاشَي ھانَ ھُون اُوئون مِنکون رو نون نِشون مِٽائي ڇوڙين۔ 24 ٿي اُوئون قومون رَي ڏيوتائون آگھي شيش نِي نِمايا، نِي اُوئون رِي پُوجا ڪريا، نِي اُوئون رَي ريتون تي بَيا، پڻ ٿي اُوئون رَي ڏيوتائون رَي مُورتَي ڀونگي ڇوڙيا ھانَ اُوئون را ٿونڀا ٽُڪڙا ٽُڪڙا ڪري ڇوڙيا۔
25 ٿي مھارِي ڀگتي ڪريا، تو پَڇي ھُون ٿونرِي ٻاٽِي پوڻي ۾ برڪت ڏئين ھانَ ٿونَي بيماريون ݾون اݪگا راکين۔ 26 ٿونرَي مُلڪ ۾ نَڪو تو ڪَي لُگائِي رو ٻاݪ ضائع ھووَي ھانَ نَڪو تو ڪو لُگائِي بونجڪِي رَي ھانَ ھُون ٿونرِي عُمر موٽِي ڪرين۔
27 ٿونرَي جاوڻ ݾون پيل او مِنک ٻيئاجي گھٻرائي جاشَي، جڪون ڪڍي ٿي جاشو۔ جڏي ٿي اُوئون ݾون جنگ ڪرشو، تو ھُون اُوئون نَي ھرائين ھانَ ٿونرا ݾجائِي دُشمن ٿون ݾون ناݾي جاشَي۔ 28 ھُون ٿون ݾون پيل حوِي، ڪنعاني ھانَ حِتي قومون ۾ کَکر ميلين، جڪَي او قومون آپرو مُلڪ ڇوڙي ناݾي جاشَي۔ 29 ھُون او قومون ھيڪَي ݾال ۾ ٿون ݾون ڪونھي ڪاڍون۔ اِيئون نِي ھووَي ڪہ ڌرتي ويرون ھوئي جاوَي ھانَ جھنگلِي جِنار بڌي جاوَي ھانَ او ٿونَي پريشون ڪرَي۔ 30 پڻ ھُون ھݪَي ھݪَي اُوئون نَي ٿون ݾون پرھا ڪاڍين، اِيئي نمُونَي ٿي تعداد ۾ بڌتا جاشو ھانَ مُلڪ را بارݾ ھوئي جاشو۔ 31 ھُون قُلزم ݾمُوندر ݾون لي فلستِي قوم رَي ݾمُوندر توڻي ھانَ رڻ پَٽ ݾون لي فرات دريا توڻي ٿونرَي حدون راکين۔ ھُون اُوئي مُلڪ را مِنک ٿونرَي ھاٿ ۾ ڏئين ھانَ او ٿون ݾون اݪگا ھوئي جاشَي۔ 32 ٿي اُوئون ݾون ھانَ اُوئون رَي ڏيوتائون ݾون ڪو ڀِي وچن نِي ڪريا۔ 33 ٿي اُوئون نَي آپرَي مُلڪ ۾ ريوَڻ نِي ڏيا۔ اِيئون نِي ھووَي ڪہ او ٿون ݾون مھارَي خلاف پاپ ڪراوَي، ڪيونڪہ جي ٿي اُوئون رَي ڏيوتائون رِي پُوجا ڪرشو، تو اَي ضرُور ٿونرَي ݾارُو ڦاݾِي ھوشَي۔“