پرميشوَر را حُڪم منڻ
24
پَڇي پرميشوَر مُوسيٰ نَي ڪھيو ڪہ، ”تُو ھارُون ھانَ اُوئي را ٻيئي ڏيڪرا ندب، اَبيھو ھانَ اِسرائيلي قوم را ستر اَگووڻ لي مھَي ڪڍي اُونچا جبل تي آ۔ ٿي ݾجائِي اݪگا اُڀي مھارَي آگھي شيش نِمايا۔ 2 پَڇي تُو ھيکلو مھارَي نيڙو آئي، باقي مِنک اݪگا رَي۔ قوم را ٻيجا مِنک ٿَي ڀيڙا اُونچا نِي آوَي۔“3 پَڇي مُوسيٰ مِنکون ڪڍي جائي پرميشوَر رَي ݾجَي باتون ھانَ حُڪم ݾُڻايا ھانَ ݾجَي مِنکون ڀيڙون ھوئي بݪتِي ڏينِي ڪہ، ”جترَي باتون پرميشوَر ݾُڻائَي ھَي، مھي او ݾجَي منشون۔“ 4 پَڇي مُوسيٰ پرميشوَر رَي ݾجَي باتون لِکئَي ھانَ ݾاڪݪي تارھي جبل ھيٺا ھيڪ ٻَليدون رِي جگھا ٺائِي ھانَ اِسرائيلي قوم رَي ٻارھون قبيلون رَي حِساب ݾون پٿر را ٻارھَي ٿونڀا ٺاھيا۔ 5 اُوئي اِسرائيلي قوم را نوجوان ميليا جڪون ٻاݪڻ آݪا ٻَليدون چاڙھيا ھانَ ٽوگھڙا باڍي پرميشوَر رَي ݾارُو خيريت را ٻَليدون ڪيئا۔ 6 پَڇي مُوسيٰ آڌو لوئِي لي ٺيڪرون ۾ راکيو ھانَ آڌو لوئِي ٻَليدون رِي جگھا تي ڇٽيو۔ 7 پَڇي اُوئي او ڪِتاب ليئو جڪَي ۾ پرميشوَر را حُڪم لِکيوڙا ھتا ھانَ مِنکون نَي زور ݾون حُڪم پڙھي ݾُڻايا۔ مِنکون ڪھيو ڪہ، ”جڪو ڀِي پرميشوَر ڪھيو ھَي، مھي او ݾجَي باتون منشون۔“
8 پَڇي مُوسيٰ بچوڙو لوئِي لي مِنکون تي ڇٽيو ھانَ ڪھيو ڪہ، ”جوئو، اَي لوئِي اُوئي وچن رو نِشون ھَي جڪو پرميشوَر ٿون ݾجون ݾون ڪيئو ھتو، جڏي اُوئي آپرا حُڪم ٿونَي ڏينا ھتا۔“
9 پَڇي مُوسيٰ، ھارُون، ندب، اَبيھو ھانَ اِسرائيلي قوم را ستر اَگووڻ جبل تي اُونچا گيا۔ 10 اُوئون ايشوَر نَي ڏيٺو جڪَي نَي اِسرائيلي قوم آݪا منتا ھانَ اُوئي رَي پگون ھيٺا نيلم رَي پٿر رو فرش ھتو جڪو آسمون آݪِي ڪار آڇو ھتو۔ 11 اِسرائيلي قوم رَي اَگووڻون ايشوَر نَي ڏيٺو، تو ڀِي ايشوَر اُوئون نَي ڪو ڀِي نُقصون ڪونھي ڏينو ھانَ اُوئون اوٿج کاڌو پيئو۔
مُوسيٰ سينا جبل تي
12 پَڇي پرميشوَر مُوسيٰ نَي ڪھيو ڪہ، ”تُو جبل تي مھَي ڪڍي آ، تُو اُترِي توڻي اوٿ اُڀو رئي جترِي توڻي ھُون ٿنَي پٿر رَي تڪتَي نِي ڏيئون۔ اُوئون تي مھَي آپرا حُڪم ھانَ شريعت لِکي ھَي ڪہ تُو اُوئون نَي ݾيکاوَي۔“ 13 پَڇي مُوسيٰ ھانَ اُوئي رو مددگار يشُوع اُٺيو ھانَ مُوسيٰ ايشوَر رَي جبل تي چڙھڻ رَي ݾارُو بَئير ھويو۔ 14 جاوتَي بِݪا مُوسيٰ، اَگووڻون نَي ڪھيو ڪہ، ”جترِي توڻي مھي پاڇا نِي آئُون، اُترِي توڻي ٿي ايٿ ٻيٺا رھيا ھانَ جوئو، ھارُون ھانَ حُور ٿون ڀيڙا ھَي۔ جي ڪيرو فيصلو ھووَي، تو او اُوئون ڪڍي جاوَي۔“
15 پَڇي مُوسيٰ جبل تي چڙھڻ لاگو ھانَ باڏݪ، جبل نَي ڍڪي ڇوڙيو۔ 16 پرميشوَر رو اُجاݪو سينا جبل تي اُتريو ھانَ باڏݪ ڇَي ڏِنون توڻي جبل نَي ڍڪي راکيو۔ پَڇي ݾاتوين ڏِن پرميشوَر باڏݪ ݾون مُوسيٰ نَي ھيلو ڪيئو۔ 17 اِسرائيليون نَي جبل رِي چوٽِي تي پرميشوَر رو اُجاݪو ٻاݪڻ آݪَي باݾڏي جھڙو ڏيکيجڻ ۾ آيو۔ 18 مُوسيٰ باڏݪ رَي بِچ ݾون ھوئي جبل تي چڙھيو ھانَ او چاليھ ڏِن ھانَ چاليھ راتون اوٿج رھيو۔