يعقُوب رَي آخري باتون
49
يعقُوب آپرَي ڏيڪرون نَي اَڻايا ھانَ ڪھيو ڪہ،”ٿي ݾجائِي ڀيڙا ھوئي مھارَي باتون ݾُڻو،
ڪہ آوڻ آݪَي ڏِنون ۾ ٿون ݾون ڪِي ڪِي ھوشَي۔
2 اي يعقُوب رَي ڏيڪرون، ٿي ݾجائِي ڀيڙا ھوئي ݾُڻو
ھانَ مھارِي بات تي ڌھيون لگائو۔
3 اي روبن، تُو مھارو موڀِي ڏيڪرو ھَي،
تُو مھارِي طاقت ھَي
ھانَ مھارِي جوانِي رو پيلڪو ڦل۔
بيشڪ تُو تموم گھڻو عِزت آݪو ھانَ طاقت آݪو ھَي۔
4 پڻ تُو ٻوڏ رَي پوڻي آݪِي ڪار ھَي،
جڪو ڪڏي ڀِي اُڀتو ڪونھي،
ڪيونڪہ تُو آپرِي نگِي ما ڀيڙو ݾُوتو
ھانَ اِيئي نمُونَي ٿَي آپرَي ٻاپ رِي بي عِزتي ڪِي۔
اِيئي رَي ڪري ھمَي ٿنَي ڪو ڀِي عِزت ڪونھي ملَي۔
5 شمعُون ھانَ لاوِي، ٿي ٻيئي ڀائي ھيڪ جھڙا ھو۔
ٿونرَي تلوارون ظُلم را ھٿيار ھَي۔
6 ھُون ٿونرِي صلاح تي ڪڏي ڀِي ڪونھي بون
ھانَ نَڪو ٿونرَي ٽولَي ۾ شامل ھوئون۔
ڪيونڪہ ٿون ريݾ ۾ خُون ڪيئا
ھانَ آپرِي مرضِي ݾون ڍگون نَي لُولھا ڪيئا۔
7 لعنت ھَي ٿونرِي ريݾ تي جڪو تموم گھڻِي ھتِي۔
لعنت ھَي ٿونرَي ظُلم تي جڪو تموم گھڻو ھتو۔
ٿونرِي پيڙھِي آپرِي قوم ۾ ھانَ اِسرائيل مُلڪ ۾ بِکري جاشَي۔
8 اي يھُودا، ٿارا ڀائي ٿارِي بکوڻ ڪرشَي،
تُو آپرَي دُشمنون ݾون کٽي جائِي
ھانَ ٿارَي ڀايون را اولاد ٿَي آگھي جُھڪشَي۔
9 اي مھارا ڏيڪرا يھُودا، تُو جوان شينھن جھڙو ھَي،
جڪو جِنار رو شِڪار ڪري بُوئو جاوَي ھَي
ھانَ شينھن آݪِي ڪار ڇِپ ھڻي ٻيٺو رَي ھَي،
ٿارِي ڪُڻ حرڪت ڪرشَي؟
10 اي مھارا ڏيڪرا يھُودا، ٿارِي پيڙھِي ݾون بادشاھي،
ڪڏي ڀِي ختم ڪونھي ھووَي
ھانَ او ھميشا توڻي بادشاھي ڪرتا ريشَي۔
جترِي توڻي او ݾاچو بادشاھ نِي آوَي،
جڪَي آگھي قومون جُھڪشَي۔
11 ٿارِي پيڙھِي رَي مِنکون رَي انگُورون رَي بيلون
اترَي تو گھڻَي ھوشَي،
ڪہ او آپرا جوان گڏا اُوئون بيلون ݾون ٻونڌشَي
ھانَ اُوئون ڪڍي انگُورون رو رس اِترو تو گھڻو ھوشَي،
ڪہ او آپرا گاڀا انگُورون رَي رس ݾون ڌوشَي۔
12 اُوئون رَي اونکَي انگُورون رَي رس رَي ڪري راتَي ريشَي،
ھانَ اُوئون را ڏونت ڏُوڌ رَي ڪري آڇا ريشَي۔
13 اي زبولُون، ٿارِي پيڙھِي ݾمُوندر رَي ڪپ تي ريشَي،
جيٿ ٻيڙا اُڀَي ھَي۔
اُوئون رَي علائقَي رِي حد صيدا شھر توڻي ھوشَي۔
14 اي اشڪار، ٿارِي پيڙھِي جوان گڏَي آݪِي ڪار مضبُوط ھوشَي،
جڪَي تي ٻيئون ئِي پاݾَي ٻورا ݾٿيوڙا ھووَي ھَي،
تو ڀِي او ٻيٺو رَي ھَي۔
15 ٿارِي پيڙھِي آروم ڪرڻ رِي ݾُٺِي جگھا
ھانَ ݾُٺو علائقو ڏيکي،
آپرو ڪونڌو ڀار کڻڻ رَي ݾارُو جُھڪاشَي،
بيشڪ اُوئون نَي مجبُورِي ۾ غُلوم ھوئي ونگار ۾ ڪوم ڪرڻو پڙَي۔
16 اي دان، ٿارِي پيڙھِي اِسرائيلي قوم رَي ٻيجون قبيلون آݪِي ڪار،
آپرِي قوم رو اِنصاف ڪرشَي
17 ھانَ او مارگ تي ٻيٺوڙَي زھريلَي ناگ آݪِي ڪار ھوشَي،
جڪو گھوڙَي رَي کُر تي ڏنگ ھڻَي ھَي،
تو اُوئي رو ݾَوار لاري کِرَي ھَي۔“
18 پَڇي يعقُوب پراٿنا ڪري ڪھيو ڪہ،
”اي پرميشوَر، ھُون ٿارِي مُگتي رَي اِنتظار ۾ ھون۔“
19 يعقُوب جد نَي ڪھيو ڪہ،
”ٿارِي پيڙھِي تي ڌاڙيلون را ٽولا حملو ڪرشَي،
پڻ او پاڇا بَݪي اُوئون تي حملو ڪري اُوئون نَي ناݾاڙي ڇوڙشَي۔
20 اي آشر، ٿارَي پيڙھِي رَي مِنکون رِي ٻنِي ۾ ݾُٺو ڌون ھوشَي،
جڪَي ݾون بادشاھون رَي ݾارُو تموم ݾُٺو طعوم تيار ھوشَي۔
21 اي نفتالي، ٿارِي پيڙھِي ھيرڻ آݪِي ڪار ھوشَي،
جڪَي را ڦݪيا تموم گھڻا ڦُوٽرا ھووَي ھَي۔
22 اي يُوسف، تُو ڦلدار بيل آݪِي ڪار ھَي،
جڪو پوڻي رِي ندِي رَي نيڙِي لاگوڙِي ھووَي ھَي،
جڪَي رَي ٽاݪَي ڀيت تي بِکريوڙَي ھووَي ھَي۔
23 دُشمن تيرون ݾون ٿارِي پيڙھِي تي حملو ڪرشَي
ھانَ اُوئون نَي مارشَي ڏُک ڏيشَي۔
24 پڻ ٿارِي پيڙھِي اُوئون نَي ھراشَي،
ڪيونڪہ آپرِي ڪموڻ جھالڻ رَي ݾارُو
اُوئون رَي ھاٿون ھانَ ٻوھيون نَي
قُدرت آݪو ايشوَر طاقت ڏيشَي،
جڪَي تي مھارو وِشواس ھَي۔
اوج اِسرائيلي قوم رو ݾنڀالڻ آݪو ھانَ رُکاݪو ھَي۔
25 مھارو ايشوَر، ٿارِي ݾجِي پيڙھِي رِي مدد ڪرشَي۔
اوج قُدرت آݪو ايشوَر، اُوئون نَي آڪاش ݾون
ھانَ ڌرتي ݾون تموم گھڻَي برڪتون ڏيشَي
ھانَ او اُوئون نَي اولاد رَي برڪتون ڀِي ڏيشَي،
ڪہ او تموم گھڻا ھوئي جاوَي۔
26 ٿارَي ݾارُو مھارِي اَي آشيرواد،
مھارَي ٻاپ ڏاڏون رَي پراٿنائون ݾون وڌيڪ
ھانَ زمونَي رَي جبلون رَي چوٽيون ݾون ڀِي موٽَي ھَي۔
اي يُوسف، ايشوَر ڪرَي ڪہ اَي آشيرواد ٿَي تي ھووَي،
ڪيونڪہ تُو آپرَي ڀايون ۾ موٽو ڪيئوڙو ھَي۔
27 اي بنيامين، ٿارِي پيڙھِي بگھڙ جھڙِي خطرناڪ ھوشَي۔
او ݾاڪݪي تارھي شِڪار ڪرشَي
ھانَ شام رو کوݾيوڙو سيمون بِݪاشَي۔“
28 اِيئي نمُونَي يعقُوب آپرَي ھر ھيڪ ڏيڪرَي نَي اُوئون رَي حِساب ݾون برڪتون رَي ݾارُو آشيرواد ڏينِي۔ اُوئي رَي اِيئون ٻارھون ڏيڪرون ݾون اِسرائيلي قوم را ٻارھَي قبيلا ھويا۔
يعقُوب رِي موت
29 پَڇي يعقُوب آپرَي ڏيڪرون نَي ݾمجھايا ڪہ، ”ھمَي ھُون مرڻ آݪو ھون ھانَ آپرَي ٻاپ ڏاڏون ݾون جائي مِلين۔ اِيئي رَي ڪري مرڻ ݾون پَڇي، مھنَي ٻاپ ڏاڏون ڪڍي اُوئي چُر ۾ راکيا، جڪو عقرُون حِتي رِي ٻنِي ۾ ھَي 30 اَي مڪفيلا آݪِي چُر جڪو ڪنعان مُلڪ ۾ ممري نون رِي ٻنِي رَي ݾومھو ھَي۔ اَي چُر مھارَي ڏاڏَي اڀراھيم اُوئي ٻنِي ݾُوڌِي عقرُون حِتي ݾون مول لِي ھتِي ڪہ او مُڪومون رَي ݾارُو آپڻِي وِراثت ھووَي۔ 31 اوٿ مھارو ڏاڏو اڀراھيم، ڏاڏِي ݾارون مھارو اَبا اضحاق ھانَ مھارِي ما ربقا ٻُوريوڙا ھَي ھانَ اوٿ مھَي آپرِي لُگائِي ليھا نَي ڀِي ٻُورِي ھَي۔ 32 اَي ٻنِي ھانَ چُر حِتي قوم ݾون مول ليئوڙِي ھَي۔“ 33 پَڇي جڏي يعقُوب آپرَي ڏيڪرون نَي اَي ݾمجھايو، تو پَڇي اُوئي آپرا ھاٿ پگ بِڇوڻَي تي ݾِڌا ڪيئا ھانَ دم ڏي آپرَي ٻاپ ڏاڏون ݾون جائي مِليو۔