يعقُوب نَي ٻُورڻ رِي تياري
50
پَڇي يُوسف آپرَي اَبا رَي لاش نَي ٻاٿ گھاتِي ھانَ روئڻ ھانَ ميٺکَي ڏيوَڻ لاگو۔ 2 يُوسف سرڪاري حڪيم اَڻايا، جڪو ݾُرا مسالا لگائي لاش ݾنڀالتا۔ يُوسف اُوئون نَي حُڪم ڏينو ڪہ، ”مھارَي اَبا رَي لاش تي ݾُرا مسالا لگائو۔“ پَڇي اُوئون حڪيمون اِسرائيل رَي لاش تي ݾُرا مسالا لگايا۔ 3 اِيئي ڪوم ۾ پُورا چاليھ ڏِن لاگا، ڪيونڪہ ݾُرا مسالا لگاوڻ ۾ اِتراج ڏِن لاگتا۔ مِصري مِنک يعقُوب رَي ݾارُو ستر ڏِن ماتم ڪرتا رھيا۔4 پَڇي جڏي ماتم را ڏِن پُورا ھويا، تو يُوسف مِصر مُلڪ رَي بادشاھ رَي وزيرون نَي ڪھيو ڪہ، ”ٿي مھربونِي ڪري بادشاھ نَي ݾُڻائو ڪہ، 5 مھارَي اَبا مھنَي ݾونݾ ڏيرايو ھتو ڪہ، ’مھارَي مرڻ ݾون پَڇي، مھنَي ڪنعان مُلڪ ۾ اُوئي مُڪوم ۾ راکي، جڪو مھَي آپرَي ݾارُو ٺڙايو ھَي۔‘ اِيئي رَي ڪري مھربونِي ڪري مھنَي موڪل ڏَي ڪہ ھُون جائي آپرَي اَبا نَي ٻُوري پاڇو آئُون۔“ 6 پَڇي بادشاھ يُوسف نَي ڪھيو ڪہ، ”جون ٿَي آپرَي ٻاپ ݾون ݾونݾ ليئو ھتو، اِيئوج اُوئي نَي ٻُور۔“
7 پَڇي يُوسف آپرَي اَبا نَي ٻُورڻ رَي ݾارُو بَئير ھويو۔ اُوئي ڀيڙا بادشاھ را تموم گھڻا وزير، آفيسر ھانَ مِصر مُلڪ را موٽا موٽا مِنک ڀِي گيا۔ 8 يُوسف رو خاندان، اُوئي را ڀائي ھانَ اُوئي رَي ٻاپ رَي گھر آݪا ݾجائِي اُوئي ڀيڙا گيا۔ او رُگو ٻاݪ، رڍون ٻڪرَي ھانَ ڍور ڍگا جشن رَي علائقَي ۾ ڇوڙي گيا۔ 9 يُوسف ڀيڙا گھوڙا گاڏا ھانَ اُوئون را ݾَوار ڀِي گيا۔ اِيئي نمُونَي مِنکون رو موٽو ٽولو اُوئي ڀيڙو گيو۔
10 جڏي او يردن دريا رَي پيلوڙَي پاݾَي اَتد رَي ڏوڻون آݪَي پِڙ ڪڍي پُگا، تو اُوئون زور ݾون ڏُک آݪو ماتم ڪيئو۔ اوٿ يُوسف آپرَي اَبا رَي ڏُک ۾ ݾات ڏِن ماتم ڪرايو۔ 11 جڏي ڪنعان مُلڪ آݪون اَتد رَي پِڙ تي اھڙو ماتم ڏيٺو، تو ڪيوَڻ لاگا ڪہ، ”مِصري قوم رو ماتم، تو تموم گھڻو ڏُک آݪو ماتم ھَي۔“ اِيئي رَي ڪري اُوئي جگھا رو نون ابيل مِصرئيم ھويو، جڪَي رو مطلب ھَي، ”مِصري قوم رو ماتم۔“ اَي جگھا يردن دريا رَي پيلوڙَي پاݾَي ھَي۔
12 يعقُوب جون آپرَي ڏيڪرون نَي ڪھيو ھتو، اِيئوج اُوئون ڪيئو۔ 13 اُوئون اُوئي نَي لي جائي ڪنعان مُلڪ ۾ ممري جگھا رَي ݾومھو مڪفيلا رِي چُر ۾ ٻُوريو۔ اَي جگھا اُوئون رَي ڏاڏَي اڀراھيم، عقرُون حِتي ݾون مول لي مُڪومون رَي ݾارُو راکِي ھتِي۔ 14 يُوسف آپرَي اَبا نَي ٻُوري آپرَي ڀايون ھانَ ݾجَي مِنکون ڀيڙو مِصر مُلڪ ڏيݾا پاڇو آيو۔
يُوسف رو آپرَي ڀايون نَي ڀروسو ڏيوَڻ
15 يعقُوب رَي مرڻ ݾون پَڇي، يُوسف را ڀائي آپت ۾ ڪيوَڻ لاگا ڪہ، ”ھوئي ݾگھَي ڪہ يُوسف آپون ݾون دُشمنِي راکَي ھانَ آپڻِي ݾجِي بُرائي رو بدلو لَي۔“ 16 اِيئي رَي اُوئون يُوسف نَي اَي ڪئي ميليو ڪہ، ”اَبا، آپرَي مرڻ ݾون پيل، مھونَي اَي حُڪم ڏينو ھتو ڪہ، 17 ٿي يُوسف نَي ڪھيا ڪہ، ’ٿارا ڀائي ٿارا ڏوھي ھَي، اِيئي رَي ڪري تُو اِيئون نَي معاف ڪري۔‘ ھمَي مھربونِي ڪري مھورو ڏوھ مھونَي معاف ڪر، ڪيونڪہ مھي ڀِي اُوئي ايشوَر نَي منون ھون، جڪَي نَي آپڻو اَبا منتو۔“ يُوسف اَي باتون ݾُڻي روئڻ لاگو۔
18 پَڇي يُوسف را ڀائي اُوئي ڪڍي گيا ھانَ اُوئي آگھي جُھڪي ڪيوَڻ لاگا ڪہ، ”جو، مھي ٿارا غُلوم ھون۔“ 19 يُوسف اُوئون نَي ڪھيو ڪہ، ”ٻيئاجو نِي، ڪِي ھُون ايشوَر ھون؟ 20 ٿون تو مھَي ݾون بُرائي ڪِي ھتِي، پڻ ايشوَر اُوئي رَي بدلَي مھَي ݾون ڀلائي ڪِي ڪہ تموم گھڻا مِنک بچي جاوَي، جون ھڻون ھووَي پڙيو۔ 21 اِيئي رَي ڪري ٿي ٻيئاجو نِي۔ ھُون ٿونرِي ھانَ ٿونرَي خاندان رِي ݾنڀال ڪرتو رئين۔ اھڙَي نمُونَي اُوئي پريم ݾون آپرَي ڀايون نَي حوصلو ڏي ڀروسو ڏيرايو۔“
يُوسف رِي موت
22 يُوسف ھانَ اُوئي رَي ڀايون را خاندان مِصر مُلڪ ۾ رھيا۔ يُوسف ھيڪ ݾئو ڏَݾ ݾال جيتو رھيو۔ 23 يُوسف، اِفرائيم رِي تيجِي پيڙھِي ڏيٺِي ھانَ مُنسي رَي ڏيڪرَي مڪير را اولاد ڀِي ڏيٺا ھانَ اُوئون نَي رُماڙيا۔
24 پَڇي يُوسف آپرَي ڀايون نَي ڪھيو ڪہ، ”مھارَي مرڻ رو ٽيم نيڙو ھَي۔ ايشوَر ٿونَي ڪڏي ڀِي ڪونھي پونترَي۔ او ٿونَي اِيئي مُلڪ ݾون ڪاڍي اُوئي مُلڪ ۾ لي جاشَي، جڪَي رو واعدو اُوئي ݾونݾ لي آپڻَي ٻاپ ڏاڏَي اڀراھيم، اضحاق ھانَ يعقُوب ݾون ڪيئو ھتو۔“ 25 پَڇي يُوسف ݾونݾ لي اِسرائيلي قوم نَي ڪھيو ڪہ، ”ايشوَر ضرُور ٿونَي ياد ڪرشَي۔ اِيئي رَي ڪري جڏي ٿي ايٿ ݾون جائو، تو مھارَي ھاڏکَي ايٿ ݾون ضرُور لي جايا۔“
26 يُوسف ھيڪ ݾئو ڏَݾ ݾال رِي عُمر ۾ مري گيو۔ اُوئي رَي لاش تي ݾُرا مسالا لگايا ھانَ اُوئي نَي مِصر مُلڪ ۾ تابُوت ۾ راکيو۔