پيدائيش 44

يُوسف رو چوندِي رو پيالو

پَڇي يُوسف آپرَي گھر رَي خاص نوڪر نَي لِڪ ۾ حُڪم ڏينو ڪہ، ”اِيئون مِنکون رَي ٻورون ۾ جِترو ڀِي ڌون او لي جاوَي، ڀري ڇوڙ ھانَ ھر ھيڪ را رُپيا اُوئي رَي ٻورَي رَي موڏَي ۾ راک ‏2 ھانَ مھارو چوندِي آݪو پيالو ڀِي اُوئون رَي نِنئي ڀائي رَي ٻورَي ۾ اُوئي رَي رُپيون ڀيڙو راک۔“ پَڇي جون يُوسف حُڪم ڏينو ھتو نوڪر اِيئوج ڪيئو۔

‏3 پَڇي ݾاڪݪي تارھي نوڪر اُوئون نَي گڏون ݾُوڌا بَئير ڪيئا۔ ‏4 جڏي او شھر ݾون ٿوڙا ٻاھر نڪريا، تو يُوسف آپرَي گھر رَي خاص نوڪر نَي ڪھيو ڪہ، ”جا، اُوئي مِنکون رو لارو ڪر، جڏي اوٿ پُگَي، تو اُوئون نَي ڪئي ڪہ، ’ٿون نيڪِي رَي بدلَي بُرائي ڪيئون ڪِي ھَي؟ ‏5 ٿون مھارَي مالڪ رو پيالو ڪيئون چورِي ڪيئو؟ ڪيونڪہ مھارو مالڪ اِيئي پيالَي ݾون پيئَي ھانَ ڦال ڀِي جووَي ھَي۔ ٿون اَي ݾُٺو ڪونھي ڪيئو۔‘“

‏6 پَڇي او خاص نوڪر اُوئون لاري گيو ھانَ اُوئون ݾون ݾجَي باتون ڪيئَي۔ ‏7 اِيئي تي اُوئون اُوئي نَي ڪھيو ڪہ، ”سائين، تُو اھڙَي باتون ڪيئون ڪرَي پڙيو؟ ايشوَر نِي ڪرَي ڪہ مھي ٿارا ٻونھا ڪو چورِي ڪرون۔ ‏8 ٿنَي تو خبر ھَي، او رُپيا جڪو مھورَي ٻورون ۾ نڪريا ھتا، او تو مھي آپ ڪنعان مُلڪ ݾون ٿَي ڪڍي لي آيا ھتا، تو پَڇي مھي ڪيئون ٿارَي مالڪ رَي گھر ݾون چوندِي جون ݾونَ چورِي ڪرتا؟ ‏9 سائين، جي مھون ۾ ڪَي ڪڍي او پيالو نڪرَي، تو ڀلي او ماريو جاوَي ھانَ مھي ڀِي ٿارا غُلوم ھوشون۔“ ‏10 اُوئي نوڪر ڪھيو ڪہ، ”ٺيڪ ھَي، جڪَي ڪڍي او پيالو نڪرشَي، تو او مھارو غُلوم ھوشَي ھانَ باقي آزاد ھوشَي۔“ ‏11 اِيئي تي ݾجون ڇيڪائِي ڪِي ھانَ آپرا آپرا ٻورا اُتاريا ھانَ کوليا۔ ‏12 پَڇي خاص نوڪر پيل موٽَي ڀائي رَي ٻورَي ۾ تلاشِي لِي ھانَ آخر ۾ نِنئي ڀائي بنيامين رَي ٻورَي رِي تلاشِي لِي، تو يُوسف رو چوندِي رو پيالو اُوئي رَي ٻورَي ۾ نڪريو۔ ‏13 اِيئي تي اُوئون آپرا گاڀا ڦاڙيا ھانَ ݾجائِي آپرا آپرا ٻورا گڏون ماٿَي راکي شھر ڏيݾا پاڇا آيا۔

‏14 جڏي يھُودا ھانَ اُوئي را ڀائي يُوسف رَي گھري پُگا، تو يُوسف اَڃون توڻي اوٿج ھتو۔ يُوسف را ݾجائِي ڀائي اُوئي رَي پگون ۾ کِريا۔ ‏15 اِيئي تي يُوسف اُوئون نَي ڪھيو ڪہ، ”ٿون اَي ڪِي ڪيئو؟ ڪِي ٿونَي خبر ڪونھي ڪہ ھُون ڦال جوئي ݾجو ڪئين ڏيکي ݾگھون ھون؟“ ‏16 اِيئي تي يھُودا ڪھيو ڪہ، ”ھمَي جڏي ايشوَر مھونَي ڏوھي ڪيئا ھَي، تو ھمَي مھي ڪِي ڪونھ ھانَ ڪيڪر ڪونھ ڪہ مھورو ڏوھ ڪونھي؟ اِيئي رَي ڪري مھي ھانَ او ڀِي جڪَي ڪڍي پيالو نڪريو ھَي، مھي ݾجائِي ٿارا غُلوم ھون۔“ ‏17 يُوسف ڪھيو ڪہ، ”ايشوَر نِي ڪرَي ڪہ ھُون اِيئون ڪرون۔ رُگو اوج مھارو غُلوم ھوشَي، جڪَي ڪڍي مھارو پيالو نڪريو ھَي، باقي خير خيريت ݾون پاڇا آپرَي اَبا ڪڍي جائو۔“

يھُودا رو بنيامين رَي ݾارُو مِنٿ

‏18 پَڇي يھُودا يُوسف رَي نيڙو جائي ڪيوَڻ لاگو ڪہ، ”اي مالڪ، مھنَي خبر ھَي ڪہ ٿي مِصر رَي بادشاھ آݪِي ڪار ھو، اِيئي رَي ڪري جي ٿي ناراض نِي ھوئو، تو ھُون ٿونَي آپرَي مُونھ ھيکلائي ۾ ھيڪ بات ڪرون۔ ‏19 ٿَي مھون ݾون پُوڇو ھتو ڪہ، ’ڪِي ‎ٿونرو ٻاپ جيتو ھَي ھانَ ٿونرو ٻيجو ڀِي ڪو ڀائي ھَي؟‘ ‏20 مھون ٿنَي ڪھيو ھتو ڪہ، ’مھورو اَبا بُوڍو ھَي ھانَ اُوئي رِي پيارِي لُگائِي ݾون ٻي ڏيڪرا جايا، جڪَي ۾ ھيڪ مُوئو رو ھانَ اُوئي رو اَي ڀائي، جڪو اُوئي رِي پيرِي ۾ جايو ھيکلو رھيو ھَي، اِيئي رَي ڪري مھورو اَبا، اِيئي ݾون تموم گھڻو پيار ڪرَي ھَي۔‘ ‏21 پَڇي ٿَي آپرَي ٻونھَي نَي ڪھيو ھتو ڪہ، ’اُوئي نَي مھَي ڪڍي لي آئو، تو ھُون اُوئي نَي جوئون۔‘ ‏22 مھون ٿونَي ݾُڻايو ھتو ڪہ، ’او ڇوڪرو آپرَي اَبا ݾون ڌار ڪونھي ھوئي ݾگھتو، ڪيونڪہ جي اِيئون ھويو، تو مھورو ٻاپ مري جاشَي۔‘ ‏23 پَڇي ٿَي آپرَي ٻونھون نَي ڪھيو ڪہ، ’جترِي توڻي ٿونرو نِنيو ڀائي ٿون ڀيڙو ڪونھي آوَي، اُترِي توڻي ٿي مھنَي آپرو مونڏو نِي بتايا۔‘ ‏24 جڏي ٿارا ٻونھا آپرَي اَبا ڪڍي گيا، تو مھون اُوئي نَي ݾجَي باتون ݾُڻائَي۔ ‏25 پَڇي ڪئينڪہ ڏِنون ݾون پَڇي، مھورَي اَبا مھونَي ڪھيو ڪہ، ’ڀڙي ڌون مول لي آئو۔‘ ‏26 مھون ڪھيو ڪہ، ’مھي ڪونھي جائُون، ڪيونڪہ جي مھورو نِنيو ڀائي مھون ڀيڙو ھالشَي، تو مھي جاشون، نِي تو مھي اُوئي مِنک نَي آپرو مونڏو ڀِي بتائي ڪونھي ݾگھتا۔‘ ‏27 ٿارَي ٻونھَي مھورَي اَبا مھونَي ڪھيو ڪہ، ’ٿونَي خبر ھَي ڪہ مھارِي پيارِي لُگائِي راخل ݾون ٻي ڏيڪرا ھويا۔ ‏28 ھيڪ تو مھنَي ڇوڙي گيو رو ھانَ مھَي ݾمجھو ڪہ اُوئي نَي ضرُور ڪو جھنگلِي جِنار کائي گيا ھوشَي، ڪيونڪہ اُوئي ݾون پَڇي، ڀڙي اُوئي نَي ڪڏي ڀِي ڪونھي ڏيٺو۔ ‏29 جي ھمَي ٿي اِيئي نَي مھَي ݾون لي جاشو ھانَ جي اُوئي نَي ڪئين ھويو، تو ھُون بُوڍاپَي ۾ اِيئي ڏُک رَي ڪري مري جائين۔‘ ‏30 اِيئي ڇوڪرَي ۾ تو ٿارَي ٻونھَي، يعني مھورَي اَبا رِي جان ھَي، اِيئي رَي ڪري جي ھُون اِيئي ڇوڪرَي بِنا، اُوئي ڪڍي پاڇو جائين، ‏31 تو جڏي ٿارو ٻونھو اَي ڏيکشَي ڪہ بنيامين ڪيٿ ھَي؟ تو بُوڍاپَي ۾ مھورَي اِيئي ڏُک ۾ او مري جاشَي۔ ‏32 ھُون ٿارَي ٻونھَي آپرَي اَبا آگھي، اِيئي ڇوڪرَي رو ذومن ھون ھانَ اَي ڀِي ڪھيو ڪہ، ’جي ھُون اِيئي نَي ٿَي ڪڍي نِي لي آئُون، تو ھُون ھميشا ٿارو ڏوھي رئين۔‘ ‏33 ھمَي ٿي مھنَي موڪل ڏيئو ڪہ ھُون اِيئي ڇوڪرَي رَي بدلَي ٿونرو غُلوم ھوئين ھانَ اَي ڇوڪرو آپرَي ڀايون ڀيڙو پاڇو جاوَي۔ ‏34 ڪيونڪہ ھُون ڇوڪرَي ݾون ٽاݪ ڪھڙو مونڏو لي آپرَي اَبا ڪڍي جائُون؟ ايشوَر نِي ڪرَي ڪہ ھُون آپرَي ٻاپ نَي اِيئي ڏُک ۾ مرتو ڏيکون۔“