پيدائيش 43

يُوسف رَي ڀايون رو ڀڙي مِصر مُلڪ جاوڻ

ڪنعان مُلڪ ۾ ڏُڪاݪ اَڃون ڀِي وڌيڪ ھوتو گيو۔ ‏2 جڏي مِصر مُلڪ ݾون لايوڙو ڌون ختم ھوئڻ لاگو، تو يعقُوب آپرَي ڏيڪرون نَي ڪھيو ڪہ، ”ٿي جائي ݾجون رَي ݾارُو ڀڙي ڪئين ڌون مول لي آئو۔“ ‏3 اِيئي تي يھُودا اُوئي نَي ڪھيو ڪہ، ”اُوئي مِنک مھونَي سختِي ݾون ڪھيو ھتو ڪہ، ’جترِي توڻي ٿي آپرو ڀائي، آپ ڀيڙو ڪونھي لي آئو، اُترِي توڻي ٿي مھنَي آپرو مونڏو ڀِي نِي بتايا۔‘ ‏4 اِيئي رَي ڪري جي تُو مھورو نِنيو ڀائي مھون ڀيڙو ميلِي، تو مھي جاشون ھانَ ڌون مول لي آشون، ‏5 پڻ جي تُو اُوئي نَي ڪونھي ميلَي، تو مھي ڀِي ڪونھي جائُون، ڪيونڪہ اُوئي مِنک ڪھيو ھتو ڪہ، ’جترِي توڻي ٿونرو ڀائي ٿون ڀيڙو ڪونھي آوَي، اُترِي توڻي ٿي آپرو مونڏو ڀِي مھنَي نِي بتايا۔‘“ ‏6 اِيئي تي يعقُوب ڪھيو ڪہ، ”ٿون تو مھنَي موٽِي مُصيبت ۾ گھاتيو رو۔ ٿون اُوئي مِنک نَي ڪيئون ݾُڻايو ڪہ ٿونرو ھيڪ ٻيجو ڀِي ڀائي ھَي؟“ ‏7 اُوئون ڪھيو ڪہ، ”او مِنک گھڙِي گھڙِي آپڻَي خاندان رَي بارَي ۾ مھون ݾون پُوڇتو رھيو ڪہ، ’ڪِي ٿونرو اَبا اَڃون توڻي جيتو ھَي؟ ڪِي ٿونرو ٻيجو ڀِي ڪو ڀائي ھَي؟‘ اِيئي رَي ڪري مھون اُوئي رَي سوالون را جواب ڏينا۔ مھونَي ڪھڙِي خبر ھتِي، او ڪشَي ڪہ، ’ٿي آپرو ڀائي ايٿ لي آئو۔‘“

‏8 پَڇي يھُودا آپرَي اَبا يعقُوب نَي ڪھيو ڪہ، ”بنيامين نَي مھَي ڀيڙو ميل، تو مھي جاشون ڪہ تُو، مھي ھانَ مھورا ٻاݪ مرڻ ݾون بچي جاوَي۔ ‏9 ھُون اِيئي رو ذومن ھون۔ ھُون اِيئي نَي پاڇو لائي ٿنَي ڏئين۔ جي ھُون اِيئون نِي ڪرون، تو ھُون ھميشا رَي ݾارُو ٿارو ڏوھي ھوئين۔ ‏10 جي مھون اوٿ جاوڻ ۾ اترِي دير نِي ڪِي ھووَنت، تو ٻيجو گُھمرو ھوئي آئي جائُون تو۔“

‏11 اِيئي تي اُوئون رَي ٻاپ يعقُوب اُوئون نَي ڪھيو ڪہ، ”جي اَي بات ھَي، تو اِيئون ڪرو ڪہ آپرَي ٻورون ۾ آپڻَي مُلڪ رِي مشھُور پوک ۾ ڪئين اُوئي مِنک رَي ݾارُو تحفو لي جائو، جھڙَي نمُونَي ٿوڙِي ݾُرِي لاک، ٿوڙِي ماکِي، ٿوڙا گرم مسالا، پِستا ھانَ بادوم۔ ‏12 آپ ڀيڙا ٻيڻا رُپيا ڀِي لي جائو، ڪيونڪہ ٿونَي او پَشا ڀِي ڏيوَڻا ھَي، جڪو ٿونرَي ٻورون ۾ پاڇا راکيا ھتا۔ ھوئي ݾگھَي ڪہ او غلطِي ݾون گھاتيا ھووَي۔ ‏13 آپرو ڀائي بنيامين ڀِي آپ ڀيڙو لي ڇيڪا اُوئي ڪڍي جائو۔ ‏14 قُدرت آݪو ايشوَر ڪرَي ڪہ او مِنک ٿون تي مھربون ھووَي ڪہ او ٿونرَي ڀائي شمعُون ھانَ بنيامين نَي ڀِي ٿون ڀيڙو ميلَي۔ جي ھُون بي اولاد ھوئي جائُون، تو ڀلي ھوئي جائُون۔“

‏15 پَڇي اُوئون آپ ڀيڙا ݾجائِي تحفا ھانَ ٻيڻا رُپيا ليئا ھانَ بنيامين نَي ڀِي آپ ڀيڙو لي بَئير ھويا ھانَ مِصر مُلڪ پُگي، يُوسف آگھي حاضر ھويا۔ ‏16 جڏي يُوسف بنيامين نَي اُوئون ڀيڙو ڏيٺو، تو اُوئي آپرَي گھر رَي خاص نوڪر نَي ماٺو ماٺ ۾ ڪھيو ڪہ، ”اَي مِنک مھارَي گھري لي ھال ھانَ پھرُو باڍي ٻاٽِي تيار ڪرا، ڪيونڪہ اَي مِنک ٻيپار رِي ٻاٽِي مھَي ڀيڙِي کاشَي۔“ ‏17 اُوئي نوڪر اِيئوج ڪيئو، جون يُوسف ڪھيو ھتو ھانَ اُوئون آڏميون نَي يُوسف رَي گھر لي گيو۔

‏18 جڏي نوڪر اُوئون نَي يُوسف رَي گھري لي آيو، تو او ٻيئاجي ڪيوَڻ لاگا ڪہ، ”لاگَي ھَي ڪہ اُوئون رُپيون رَي ڪري آپون نَي ايٿ لي آيا ھَي، جڪو پيلڪَي گُھمرَي آپڻَي ٻورون ۾ راکيا ھتا۔ ھمَي او آپون تي الزوم لگائي آپڻا گڏا کوݾي ليشَي ھانَ آپون نَي غُلوم ٺاشَي۔“ ‏19 اِيئي رَي ڪري او يُوسف رَي خاص نوڪر ڪڍي گيا ھانَ در تي اُڀي ڪيوَڻ لاگا ڪہ، ‏20 ”سائين، مھي تو پيل ڀِي ايٿ ڌون مول ليوَڻ آيا ھتا، ‏21 پڻ پاڇا جاوتي بِݪا رات رو مھي ھيڪِي جگھا تي اُڀا۔ جڏي مھون آپرا ٻورا کوليا، تو مھورا ڏينوڙا رُپيا مھون ݾجون رَي ٻورون ۾ پڙيا ھتا۔ اِيئي رَي ڪري مھي او رُپيا آپ ڀيڙا لي آيا ھون۔ ‏22 مھي ڌون مول رو ليوَڻ رَي ݾارُو ٻيجا ڀِي رُپيا لي آيا ھون۔ مھونَي خبر ڪونھي ڪہ ڪَي مھورَي ٻورون ۾ مھورا ڏينوڙا رُپيا پاڇا راکيا ھتا۔“

‏23 اُوئي خاص نوڪر ڪھيو ڪہ، ”پريشون نِي ھوئو ھانَ ٻيئاجو نِي، ڪيونڪہ ٿونرا رُپيا تو مھنَي مِليا را۔ پڻ جڪو رُپيا ٿونرَي ٻورون ۾ نڪريا ھَي، ھوئي ݾگھَي ڪہ او ٿونرَي ٻاپ رَي ايشوَر راکيا ھووَي۔“ پَڇي او نوڪر اُوئون رَي ڀائي شمعُون نَي ٻاھر ڪاڍي اُوئون ڪڍي لي آيو۔ ‏24 پَڇي او نوڪر اُوئون نَي يُوسف رَي گھري لي آيو ھانَ اُوئون نَي ھاٿ پگ ڌوئڻ رَي ݾارُو پوڻي ڏينو ھانَ اُوئون رَي گڏون نَي گاݾ ڏينو۔ ‏25 جڏي اُوئون نَي خبر پڙِي ڪہ يُوسف ٻيپار رِي ٻاٽِي مھون ڀيڙِي کاشَي، تو اُوئون يُوسف نَي تحفا ڏيوَڻ رَي ݾارُو تيار ڪري راکيا۔

‏26 جڏي يُوسف گھري آيو، تو او تحفا اُوئي ڪڍي لي گيا ھانَ آپرا شيش نِمائي اُوئي آگھي جُھڪيا۔ ‏27 يُوسف اُوئون ݾون خير خبر پُوڇِي ڪہ، ”ٿونرَي ڏوڪرَي اَبا را ڪھڙا حال ھَي، جڪَي رَي بارَي ۾ ٿون پيل ݾُڻايو ھتو؟ ڪِي او اَڃون جيتو ھَي؟“ ‏28 اُوئون بݪتِي ڏينِي ڪہ، ”ٿارو ٻونھو، مھورو اَبا اَڃون توڻي جيتو ھَي ھانَ ݾاجو ݾُورو ھَي۔“ پَڇي اُوئون ڀڙي آپرا شيش نِمائي اُوئي آگھي جُھڪيا۔ ‏29 پَڇي اُوئي آپرَي ڀائي بنيامين ڏيݾا جويو، جڪو اُوئي رِي ݾگِي ما رو ڏيڪرو ھتو ھانَ ڪھيو ڪہ، ”ڪِي ٿونرو ݾجون ݾون نِنيو ڀائي اَي ھَي، جڪَي رَي بارَي ۾ ٿون مھنَي پيل ݾُڻايو ھتو؟“ پَڇي اُوئي بنيامين نَي ڪھيو ڪہ، ”ڏيڪرا، ايشوَر ٿنَي برڪت ڏَي۔“ ‏30 آپرو نِنيو ڀائي ڏيکي اُوئي رو جِي ڀريجو ھانَ اوٿ ݾون ڇيڪو بُوئو گيو ھانَ آپرَي ڪمرَي ۾ جائي روئڻ لاگو۔ ‏31 پَڇي او آپرو مونڏو ڌوئي ٻاھر نڪريو ھانَ آپرو آپنَي ݾنڀاليو ھانَ نوڪرون نَي طعوم لي آوڻ رو حُڪم ڏينو۔ ‏32 نوڪرون يُوسف رَي ݾارُو ڌار ھانَ اُوئي رَي ڀايون رَي ݾارُو ڌار ھانَ اُوئون ڀيڙا کاوڻ آݪَي مِصريون رَي ݾارُو ڌار ٻاٽِي راکِي، ڪيونڪہ مِصري مِنک عبراني قوم ݾون نفرت ڪرتا ھانَ اُوئون ڀيڙا ٻاٽِي ڪونھي کاوتا۔ ‏33 جڏي ڀايون نَي يُوسف آگھي اُوئون رِي عُمر رَي حِساب ݾون ترتيب ݾون ٻيݾاڙيا، تو او حيرون ھوئي ھيڪَي ٻيجَي نَي جوئڻ لاگا۔ ‏34 پَڇي يُوسف آپرِي ميز ݾون اُوئون ڏيݾا ٻاٽِي ميلِي، پڻ بنيامين نَي ٻيجون ݾون پونچ گُھمرا وڌيڪ ڏينِي ھانَ اُوئون يُوسف ڀيڙو کاڌو پيئو ھانَ خُوشِي ملھائِي۔