يُوسف ھانَ اُوئي را ڀائي
37
يعقُوب ڪنعان مُلڪ ۾ ريوَڻ لاگو، جيٿ اُوئي رو ٻاپ پرديسي ھوئي ريتو۔ 2 يعقُوب رَي خاندان رِي بات اَي ھَي۔جڏي يُوسف ݾَترَي ݾالون رو ھتو، تو او آپرَي ڀايون ڀيڙو رڍون ٻڪرَي چارتو، جڪو اُوئي رَي نگَي مائون بِلھا ھانَ زِلفا را ڏيڪرا ھتا۔ يُوسف اُوئون رَي خراب ڪومون رَي خبرون آپرَي ٻاپ نَي ݾُڻاوتو۔
3 يعقُوب جڪَي رو ٻيجو نون اِسرائيل ڀِي ھتو، او آپرَي ݾجَي ڏيڪرون ݾون وڌيڪ يُوسف نَي پريم ڪرتو، ڪيونڪہ او بُوڍاپَي ۾ اُوئي رِي پيارِي لُگائِي راخل ݾون جايو ھتو۔ يعقُوب اُوئي نَي ھيڪ خاص رنگيلو جُبو ڀِي ݾيݪائي ڏينو ھتو۔ 4 جڏي اُوئي رَي ڀايون ڏيٺو ڪہ مھورو اَبا، يُوسف نَي مھون ݾون وڌيڪ پريم ڪرَي ھَي، تو او اُوئي ݾون ݾاݪ ڪرڻ لاگا ھانَ ڀلَي نمُونَي ٻولتا ڀِي ڪونھي۔
5 پَڇي يُوسف ھيڪ ݾپنو ڏيٺو ھانَ جائي آپرَي ڀايون نَي ݾُڻايو، تو او اِيئي تي اُوئي ݾون اَڃون ڀِي وڌيڪ ݾاݪ ڪرڻ لاگا۔ 6 يُوسف آپرَي ڀايون نَي ڪھيو ڪہ، ”مھارِي ھيڪ بات ݾُڻو، مھنَي ھيڪ ݾپنو لاڌو ھَي ڪہ، 7 جڏي آپي ٻنِي ۾ ݾِٽون را گڏا ٻونڌتا پڙيا، تو اِيئون ھويو ڪہ مھارو گڏو اُڀو ھويو ھانَ ٿونرا گڏا مھارَي گڏَي رَي چوڌاري اُڀا ھويا ھانَ او اُوئي آگھي جُھڪيا۔“
8 اِيئي تي اُوئي رَي ڀايون اُوئي تي ٺٺولَي ڪري ڪھيو ڪہ، ”ڪِي تُو واقعي مھون تي بادشاھ ھوئي بادشاھي ڪرِي؟“ اِيئي نمُونَي يُوسف را ڀائي ݾپنون ھانَ باتون رَي ڪري اُوئي ݾون وڌيڪ ݾاݪ ڪرڻ لاگا۔
9 پَڇي يُوسف ڀڙي ھيڪ ٻيجو ݾپنو ڏيٺو ھانَ او آپرَي ڀايون نَي ݾُڻايو ڪہ، ”مھارِي بات ݾُڻو، مھنَي ھيڪ ٻيجو ݾپنو لاڌو ھَي ڪہ ݾُورج، چندر ھانَ اِگيارَي تارا مھارَي آگھي جُھڪيا۔“
10 ڀايون نَي ݾُڻاوڻ ݾون پَڇي، جڏي اَي ݾپنو اُوئي آپرَي ٻاپ نَي ݾُڻايو، تو اِيئي تي اُوئي رَي ٻاپ اُوئي نَي ڇينڀي ڪھيو ڪہ، ”ٿنَي اَي ڪھڙو ݾپنو لاڌو ھَي؟ ڪِي ھُون ٿارِي ما، ٿارا ڀائي ݾاچيلي ٿَي آگھي جُھڪشون؟“ 11 اُوئي را ڀائي اُوئي ݾون وڌيڪ ݾاݪ ڪرڻ لاگا، پڻ اُوئي رَي ٻاپ اَي بات آپرَي من ۾ راکِي۔
ڀايون رو يُوسف نَي بيچڻ
12 ھيڪ ڏِن يُوسف را ڀائي سِڪم شھر رَي نيڙا آپرَي ٻاپ رَي رڍون ٻڪرَي چارڻ گيا ھتا۔ 13 اِيئي تي يعقُوب، يُوسف نَي ڪھيو ڪہ، ”ٿارا ڀائي سِڪم شھر ڏيݾا مال چارڻ گيا ھَي، تُو اُوئون ڪڍي جا۔“ تو اُوئي ڪھيو ڪہ، ”ھاوي اَبا، ھُون جائين۔“ 14 اِيئي تي يعقُوب، يُوسف نَي ڪھيو ڪہ، ”تُو جا ھانَ ٿارَي ڀايون رِي ھانَ رڍون ٻڪريون رِي خبر لي آ، ھانَ مھنَي ݾُڻا۔“ پَڇي اُوئي يُوسف نَي حبرُون رِي وادِي ݾون بَئير ڪيئو۔
يُوسف پينڏو ڪرتو ڪرتو سِڪم شھر رَي نيڙو پُگو۔ 15 اوٿ ھيڪَي مِنک اُوئي نَي ميدون ۾ اِيئا اُوئا ڦِرتو ڏيٺو، تو پُوڇو ڪہ، ”تُو ڪينَي جووَي پڙيو؟“ 16 يُوسف ڪھيو ڪہ، ”ھُون آپرَي ڀايون نَي جوئُون پڙيو۔ جي ٿنَي ڪئين خبر ھَي، تو مھنَي مھربونِي ڪري ݾُڻا ڪہ او ڪيٿ رڍون ٻڪرَي چارَي پڙيا۔“ 17 اُوئي مِنک ڪھيو ڪہ، ”او ايٿ ݾون گيا را، ڪيونڪہ مھَي اُوئون ݾون اَي ݾُڻيو ھتو ڪہ، ’ھالو تو آپي دُوتان علائقَي ڏيݾا ھالون۔‘“ اِيئي تي يُوسف آپرَي ڀايون نَي جوتو جوتو دُوتان علائقَي ۾ پُگو ھانَ جائي آپرَي ڀايون نَي جوئي ليئا۔
18 اُوئون اݪگِي ڀون ݾون يُوسف نَي آوتو ڏيٺو، تو اُوئي رَي ڀايون يُوسف رَي پُگڻ ݾون پيل، يُوسف نَي مارڻ رِي صلاح ڪِي۔ 19 او آپت ۾ ڪيوَڻ لاگا ڪہ، ”او جوئو، ݾپنا جوئڻ آݪو آوَي پڙيو۔ 20 ھمَي ݾُٺو موقعيو ھَي، آئو تو آپي اُوئي نَي ماري ڪَي اُونڏِي کڏ ۾ نوکون ھانَ آپي اَي ڪشون ڪہ اُوئي نَي جھنگ را جِنار کائي گيا ھَي۔ پَڇي جوشون ڪہ اُوئي را ݾپنا ڪيڪر پُورا ھووَي ھَي۔“
21 جڏي اُوئون رَي موٽَي ڀائي روبن اَي بات ݾُڻِي، تو اُوئي يُوسف نَي آپرَي ڀايون ݾون بچاوڻ رَي ݾارُو اُوئون نَي ڪيوَڻ لاگو ڪہ، ”آپي اُوئي نَي مارون نِي، 22 ھانَ ڪيئون ھاٿ لگائُون؟ آپي اُوئي رو خُون نِي ڪرون، پڻ رڻ پَٽ ۾ جڪو اُونڏِي کڏ ھَي، اُوئي ۾ نوکون۔“ ڪيونڪہ روبن رِي مرضِي ھتِي ڪہ اُوئي نَي بچائي آپرَي ٻاپ ڪڍي لي جاوَي۔ 23 جڏي يُوسف آپرَي ڀايون ڪڍي پُگو، تو ڀايون اُوئي رو خاص رنگيلو جُبو اُتاريو۔ 24 پَڇي اُوئون يُوسف نَي اُوئي اُونڏِي کڏ ۾ نوکي ڇوڙيو۔ اُوئي ٽيم او کڏ ݾُوڪوڙِي ھتِي۔
25 پَڇي او ݾجائِي ٻاٽِي کاوڻ ٻيٺا۔ جڏي او ٻاٽِي کاوتا پڙيا، تو اُوئون جِلعاد رَي علائقَي ݾون اِسماعيلي قوم رو ھيڪ ٽولو آوتو ڏيٺو۔ اُوئون رَي اُونٺون تي گرم مسالا ھانَ نمُونَي نمُونَي رِي ݾُرِي لاک لڏيوڙِي ھتِي۔ او اَي ݾجو سيمون لي مِصر مُلڪ ڏيݾا جاوتا پڙيا۔ 26 اِيئي تي يھُودا آپرَي ڀايون نَي ڪھيو ڪہ، ”جي آپي آپڻَي ڀائي نَي مارشون ھانَ اُوئي رو خُون لِڪاشون، تو آپون نَي ڪھڙو فائدو؟ 27 اُوئي نَي مارڻ ݾون ڀلو ھَي ڪہ آپي اُوئي نَي اِسماعيلي قوم رَي واپاريون نَي بيچون، ڪيونڪہ او آپڻو ڀائي ھانَ رت ھَي۔“ اُوئي رَي ڀايون اُوئي رِي بات منِي۔ 28 جڏي اِسماعيلي قوم را واپاري جڪو مديان مُلڪ را ھتا، اُوئون رَي نيڙا پُگا، تو يُوسف رَي ڀايون اُوئي نَي کڏ ݾون گيݾلي ٻاھر ڪاڍيو ھانَ اُوئي نَي واپاريون نَي چوندِي رَي بيݾ ݾِڪون ۾ بيچي ڇوڙيو۔ او واپاري يُوسف نَي لي مِصر مُلڪ ڏيݾا گيا۔
29 اُوئي ٽيم روبن اوٿ ڪونھي ھتو۔ جڏي او کڏ تي پاڇو آيو ھانَ ڏيٺو ڪہ يُوسف تو کڏ ۾ ھائِي ڪونھي، تو اُوئي ڏُک ۾ آپرا گاڀا ڦاڙيا۔ 30 پَڇي او آپرَي ڀايون ڪڍي گيو ھانَ ڪھيو ڪہ، ”يُوسف تو اوٿ ھائِي ڪونھي، ھمَي ھُون ڪِي ڪرون؟“
31 پَڇي اُوئون ٻڪر باڍيو ھانَ اُوئي رو لوئِي يُوسف رَي جُبَي تي لگايو۔ 32 پَڇي او جُبو لي آپرَي ٻاپ ڪڍي آيا ھانَ ڪيوَڻ لاگا ڪہ، ”مھونَي اَي جُبو لاڌو ھَي۔ اِيئي نَي ڀلَي نمُونَي جو، ڪيٿ اَي يُوسف رو تو ڪونھي؟“ 33 يعقُوب او جُبو اوݪکيو ھانَ ڪھيو ڪہ، ”اَي جُبو، تو مھارَي ڏيڪرَي يُوسف رو ھَي۔ ضرُور ڪو جھنگلِي جِنار اُوئي نَي ماري کائي گيو ھَي۔“ 34 اِيئي تي يعقُوب ڏُک ۾ آپرا گاڀا ڦاڙيا ھانَ ڏُک آݪا گاڀا پيري تموم گھڻا ڏِن آپرَي ڏيڪرَي رَي ڏُک ۾ روتو رھيو۔ 35 يعقُوب را ڏيڪرا ھانَ ڏيڪرَي اُوئي نَي تسلِي ڏي ماٺ ڪراوتا، پڻ او ڪيرِي ڀِي بات ڪونھي ݾُڻتو ھانَ روتو رھيو۔ او اَي ڪيتو ڪہ، ”ھُون مرڻ توڻي آپرَي ڏيڪرَي يُوسف رَي ݾارُو ڏُک ڪرتو رئين۔“ اِيئي نمُونَي او يُوسف رَي ݾارُو روتو رھيو۔
36 مديان مُلڪ رَي واپاريون يُوسف نَي لي جائي مِصر مُلڪ رَي ھيڪَي مِنک نَي بيچي ڇوڙيو، جڪَي رو نون فوطيفار ھتو ھانَ او فرعُون يعني، مِصر مُلڪ رَي بادشاھ رَي چوڪيدارون رو اَگووڻ ھتو۔