عيسُو رِي پيڙھِي
36
عيسُو جڪَي نَي ادُوم ڀِي ڪيتا، اُوئي رِي پيڙھِي اَي ھَي۔ 2 عيسُو، ڪنعاني قوم رَي ٻيئون ڇوڪريون ݾون بيئان ڪيئو۔ اُوئي رِي ھيڪ لُگائِي حِتي قوم رِي ھتِي، جڪَي رو نون عدا ھتو ھانَ او ايلون رِي ڏيڪرِي ھتِي، ٻيجِي لُگائِي حوِي قوم رِي ھتِي، جڪَي رو نون اُھليباما ھتو، اَي صبعون رَي ڏيڪرَي عنا رِي ڏيڪرِي ھتِي۔ 3 اُوئي ݾون پَڇي، اُوئي تيجو بيئان آپرِي قوم ۾ ڪيئو۔ اُوئي رِي لُگائِي رو نون بشامٿ ھتو، او اِسماعيل رِي ڏيڪرِي ھانَ نبايوت رِي ٻين ھتِي۔ 4 عيسُو رِي لُگائِي عدا ݾون اُوئي رو ڏيڪرو اليفز جايو ھانَ بشامٿ ݾون رعوايل جايو۔ 5 اُھليباما ݾون يائوس، يالام ھانَ قورح جايو۔ اَي عيسُو را ڏيڪرا ھَي، جڪو ڪنعان مُلڪ ۾ جايا۔6 پَڇي عيسُو آپرَي لُگائَي، ڏيڪرا ڏيڪرَي ھانَ گھر را ݾجائِي مِنک، ݾجائِي جِنار ھانَ آپرِي ݾجِي مال ملڪيت، جڪو اُوئي ڪنعان مُلڪ ۾ ڀيڙِي ڪِي ھتِي، آپ ڀيڙا ليئا ھانَ آپرَي ڀائي يعقُوب ݾون اݪگو، ھيڪَي ٻيجَي مُلڪ ڏيݾا گيو۔ 7 ڪيونڪہ اُوئون ٻيئون را مال ملڪيت اِترا تو ھويا ڪہ اُوئون ٻيئون رو ھيڪِي جگھا تي ريوَڻ ھانَ گُذارو ڪرڻ ڏُکيو ھتو۔ 8 اِيئي رَي ڪري عيسُو جڪَي رو ٻيجو نون ادُوم ھتو، او لڏي شعير رَي جابلُو علائقَي ۾ ريوَڻ لاگو۔
9 عيسُو ݾون ادُومي قوم ھوئِي، جڪو شعير رَي جبلون ۾ ريتا۔ عيسُو رِي پيڙھِي اَي ھَي۔ 10 عيسُو رَي ڏيڪرون را نون اَي ھَي۔ اُوئي رِي پيلڪِي لُگائِي عدا ݾون اُوئي رو ڏيڪرو اليفز جايو ھانَ ٻيجِي لُگائِي بشامٿ ݾون اُوئي رو ڏيڪرو رعوايل جايو۔
11 اليفز را ڏيڪرا اَي ھَي، تيمان، اومر، صفو، جعتام ھانَ قنز۔ 12 عيسُو رَي ڏيڪرَي اليفز ھيڪِي ٻونھِي تِمنع ݾون ڀِي بيئان ڪيئو، جڪَي ݾون اُوئي رو ڏيڪرو عماليق جايو۔ اَي ݾجائِي عيسُو ھانَ اُوئي رِي لُگائِي عدا را پوترا ھتا۔
13 رعوايل را ڏيڪرا اَي ھَي، نحت، زارح، سما ھانَ مِزا۔ اَي ݾجائِي عيسُو ھانَ اُوئي رِي لُگائِي بشامٿ را پوترا ھتا۔
14 عيسُو رِي لُگائِي اُھليباما، جڪو عنا رِي ڏيڪرِي ھانَ صبعون رِي پوترِي ھتِي، اُوئي ݾون عيسُو را اَي ڏيڪرا جايا، يائوس، يالام ھانَ قورح۔
15 عيسُو رَي اولادون ݾون جڪو قبيلون را ݾردار ھويا، او اَي ھَي۔ عيسُو رَي موٽَي ڏيڪرَي اليفز رَي اولاد ݾون ݾردار تيمان، ݾردار اومر، ݾردار صفو، ݾردار قنز، 16 ݾردار قورح، ݾردار جعتام ھانَ ݾردار عماليق۔ اَي اليفز را او ڏيڪرا ھَي، جڪو ادُوم مُلڪ ۾ جايا۔ اَي ݾجائِي عيسُو ھانَ اُوئي رِي لُگائِي عدا را پوترا ھتا۔
17 عيسُو رَي ڏيڪرَي رعوايل رَي ڏيڪرون ۾ جڪو ݾردار ھويا، او اَي ھَي۔ ݾردار نحت، ݾردار زارح، ݾردار سما ھانَ ݾردار مِزا۔ اَي او ݾردار ھَي، جڪو رعوايل ݾون ادُوم مُلڪ ۾ جايا۔ اَي ݾجائِي عيسُو ھانَ اُوئي رِي لُگائِي بشامٿ را پوترا ھتا۔
18 عيسُو رِي لُگائِي اُھليباما را ڏيڪرا جڪو ݾردار ھويا، او اَي ھَي۔ ݾردار يائوس، ݾردار يالام ھانَ ݾردار قورح۔ اَي ݾجائِي عيسُو رِي اُوئي لُگائِي اُھليباما را ڏيڪرا ھتا، جڪو عنا رِي ڏيڪرِي ھتِي۔ 19 عيسُو جڪَي رو ٻيجو نون ادُوم ھتو، اُوئي رَي اولادون ݾون اَي ݾردار ھتا ھانَ اُوئون رَي نون تي اُوئون را قبيلا ھويا۔
شعير حوري رِي پيڙھِي
20 ادُوم مُلڪ را اَصلي مِنک جڪو پيل اُوئي علائقَي ۾ ريتا، او حوري قوم رَي ھيڪَي مِنک شعير را اولاد ھتا۔ اُوئون را نون اَي ھَي۔ لوطان، سوبل، صبعون، عنا، 21 دِيسون، ايصر ھانَ دِيسان۔ اَي شعير را اولاد ھتا، جڪو ادُوم مُلڪ رِي حوري قوم را ݾردار ھويا ھانَ اُوئون رَي نون ݾون اُوئون را قبيلا ھويا۔
22 لوطان را ٻي ڏيڪرا ھتا۔ ھيڪَي رو نون حوري ھانَ ٻيجَي رو نون ھيمام ھتو ھانَ لوطان رِي ھيڪ ٻين ڀِي ھتِي، جڪَي رو نون تِمنع ھتو۔
23 سوبل را ڏيڪرا اَي ھتا، علوان، مانحت، عيبال، سفو ھانَ اونام۔
24 صبعون را ٻي ڏيڪرا ھتا۔ ھيڪَي رو نون آيا ھانَ ٻيجَي رو نون عنا ھتو۔ اَي اوج عنا ھَي، جڪَي نَي آپرَي ٻاپ صبعون را گڏا رڻ پَٽ ۾ چارتي بِݪا اُونَي پوڻي رَي ندَي لاڌَي ھتَي۔ 25 عنا را اولاد اَي ھتا۔ اُوئي رَي ڏيڪرَي رو نون دِيسون ھانَ اُوئي رِي ڏيڪرِي رو نون اُھليباما ھتو۔ 26 دِيسون را ڏيڪرا اَي ھتا، حمدان، اِشبان، يتران ھانَ ڪِران۔
27 ايصر را ڏيڪرا اَي ھتا، بِلھان، زعوان ھانَ عقان۔
28 دِيسان را ڏيڪرا اَي ھتا، عُوض ھانَ اران۔
29 حوري قوم ݾون جڪو ݾردار ھويا، او اَي ھَي۔ ݾردار لوطان، ݾردار سوبل، ݾردار صبعون، ݾردار عنا، 30 ݾردار دِيسون، ݾردار ايصر ھانَ ݾردار دِيسان۔ اَي اُوئي حوري قوم را ݾردار ھتا، جڪو شعير مُلڪ ۾ ريتا۔
ادُوم مُلڪ را بادشاھ
31 اَي او بادشاھ ھَي، جڪو اِسرائيلي قوم رَي بادشاھون ݾون پيل ادُوم مُلڪ تي بادشاھي ڪرتا۔
32 بعُور رو ڏيڪرو بالع ادُوم مُلڪ رو بادشاھ ھتو ھانَ اُوئي رَي شھر رو نون دِنھابا ھتو۔ 33 بالع رَي مرڻ ݾون پَڇي، اُوئي رِي جگھا زارح رو ڏيڪرو يوباب بادشاھ ھويو، جڪو بُصرا شھر رو ھتو۔
34 يوباب رَي مرڻ ݾون پَڇي، اُوئي رِي جگھا حُشيم بادشاھ ھويو، جڪو تيمان علائقَي رو ھتو۔ 35 حُشيم رَي مرڻ ݾون پَڇي، بِدد رو ڏيڪرو ھدد بادشاھ ھويو، جڪَي موآب رَي ميدون ۾ مدياني قوم نَي ھرايو ھتو۔ اُوئي شھر رو نون عوِيت ھتو۔ 36 ھدد رَي مرڻ ݾون پَڇي، اُوئي رِي جگھا شملا بادشاھ ھويو، جڪو مُسرقا شھر رو ھتو۔ 37 شملا رَي مرڻ ݾون پَڇي، اُوئي رِي جگھا سائُول بادشاھ ھويو۔ اُوئي رَي شھر رو نون رحوبوت ھتو، جڪو دريا رَي ڪپ تي ھتو۔ 38 سائُول رَي مرڻ ݾون پَڇي، اُوئي رِي جگھا عڪبُور رو ڏيڪرو بعل حنان بادشاھ ھويو۔ 39 بعل حنان رَي مرڻ ݾون پَڇي، اُوئي رِي جگھا حدر بادشاھ ھويو، جڪو پائو شھر رو ھتو۔ اُوئي رِي لُگائِي رو نون مھيطب ايل ھتو، جڪو مِطرد رِي ڏيڪرِي ھانَ ميضھاب رِي ڏوئترِي ھتِي۔
40 عيسُو رَي اولادون ݾون جڪو ݾردار ھتا، جڪون رَي نون تي قبيلا ھويا، او آپرِي قوم ھانَ آپرَي علائقَي ۾ حڪُومت ڪرتا۔ اُوئون را ݾردار اَي ھتا، ݾردار تِمنع، ݾردار علوا، ݾردار يتيت، 41 ݾردار اُھليباما، ݾردار ايلا، ݾردار فينون، 42 ݾردار قنز، ݾردار تيمان، ݾردار مبصار، 43 ݾردار مجد ايل، ݾردار عِرام۔ اَي آپرَي آپرَي ريوَڻ آݪَي جگھائون تي جيٿ اُوئون قبضو ڪيئو، اوٿ او ادُومي قوم را ݾردار ھويا۔ ادُومي قوم رو ڏاڏو عيسُو ھتو۔