يعقُوب رو بيت ايل ڏيݾا جاوڻ
35
پَڇي ايشوَر يعقُوب نَي ڪھيو ڪہ، ”اُٺِي، بيت ايل ڏيݾا جا ھانَ اوٿج رَي۔ اوٿ مھارَي ݾارُو ٻَليدون رِي جگھا ٺا، جيٿ مھَي ٿنَي اُوئي ٽيم درشن ڏينو ھتو، جڏي تُو آپرَي ڀائي عيسُو رَي ٻِي ۾ ناݾي جاوتو پڙيو۔“ 2 اِيئي تي يعقُوب آپرَي خاندان ھانَ آپرَي ݾجَي مِنکون نَي ڪھيو ڪہ، ”ٿون ڪڍي جڪو ڀِي مُورتَي ھووَي، او نوکي ڇوڙو ھانَ آپرو آپنَي صاف ڪرو ھانَ آپرا گاڀا مَٽائو۔ 3 پَڇي آپي بيت ايل ڏيݾا ھالون ھانَ ھُون اوٿ اُوئي ايشوَر رَي ݾارُو ٻَليدون رِي جگھا ٺائين۔ اُوئيج ايشوَر مُصيبت رَي ڏِنون ۾ مھارِي مدد ڪِي ھانَ ھُون جيٿ ڀِي گيو، اوٿ او مھَي ڀيڙو ھتو۔“ 4 پَڇي اُوئون ڪڍي جترَي ڀِي مُورتَي ھانَ ڪونون ۾ تعويذ جھڙا ڦُول گھاتيوڙا ھتا، او ݾجائِي يعقُوب نَي ڏينا۔ يعقُوب او ݾجائِي اُوئي بلُوط رَي بَڻ ھيٺا ٻُوريا، جڪو سِڪم شھر رَي نيڙو ھتو۔5 پَڇي او اوٿ ݾون بَئير ھويا ھانَ آݾَي پاݾَي رَي شھرون آݪا ايشوَر ݾون اِترا تو ٻيئاجا ڪہ اُوئون يعقُوب ھانَ اُوئي رَي ڏيڪرون رو لارو ڪونھي ڪيئو۔ 6 پَڇي يعقُوب آپرَي ݾجَي مِنکون ݾُوڌو ڪنعان مُلڪ رَي لُوز شھر ۾ پُگو، جڪَي نَي ھڻون بيت ايل شھر ڪَي ھَي۔ 7 اوٿ اُوئي ايشوَر رَي ݾارُو ٻَليدون رِي جگھا ٺائِي ھانَ اُوئي جگھا رو نون ايل بيت ايل راکيو۔ ايل بيت ايل رو مطلب ھَي، ”بيت ايل رو ايشوَر۔“ ڪيونڪہ جڏي او آپرَي ڀائي رَي ٻِي ۾ ناٺو، تو ايشوَر اُوئي نَي اوٿ درشن ڏينو ھتو۔
8 اُوئون ڏِنون ۾ ربقا رِي ٻونھِي دبُورا مري گئِي ھانَ اُوئي نَي بيت ايل رَي نيڙو بلُوط رَي بَڻ ھيٺا ٻُورِي۔ اُوئي بَڻ رو نون الون بڪُوت راکيو، جڪَي رو مطلب ھَي، ”ڏُکون آݪو بلُوط۔“
9 يعقُوب رو فدان ارام رَي علائقَي ݾون آوڻ ݾون پَڇي، ايشوَر اُوئي نَي ڀڙي درشن ڏينو ھانَ اُوئي نَي برڪت ڏينِي۔ 10 ايشوَر اُوئي نَي ڪھيو ڪہ، ”پيل ٿارو نون يعقُوب ھتو، پڻ آج ݾون مِنک ٿنَي يعقُوب نا، پڻ اِسرائيل ڪشَي۔“ ايشوَر اُوئي رو نون اِسرائيل راکيو، جڪَي رو مطلب ھَي، ”ايشوَر ݾون مُقابلو ڪرڻ آݪو۔“ 11 پَڇي ايشوَر اُوئي نَي ڪھيو ڪہ، ”ھُون قُدرت آݪو ايشوَر ھون۔ ھُون ٿنَي تموم گھڻا اولاد ڏئين ھانَ ٿَي ۾ ھيڪ نا، پڻ تموم گھڻَي قومون پيدا ھوشَي ھانَ ٿارِي پيڙھِي ݾون بادشاھ ھوشَي۔ 12 اَي مُلڪ ھُون ٿنَي ڏئين، جڪَي رو وچن مھَي ٿارَي ڏاڏَي اڀراھيم ھانَ ٿارَي اَبا اضحاق ݾون ڪيئو ھتو ھانَ ٿَي ݾون پَڇي، ٿارَي اولاد نَي ڀِي اَي مُلڪ ڏئين۔“ 13 پَڇي جيٿ ايشوَر يعقُوب ݾون باتون ڪيئَي ھتَي، اوٿ ݾون آڪاش ڏيݾا بُوئو گيو۔ 14 پَڇي يعقُوب اُوئي جگھا تي يادگيرِي رَي ݾارُو ھيڪ پٿر اُڀو ڪيئو، جيٿ ايشوَر اُوئي ݾون باتون ڪيئَي ھتَي۔ پَڇي اُوئي پٿر تي انگُورون رو رس ھانَ زيتُون رو تيل ايشوَر رَي نون رو چاڙھيو۔ 15 جڪِي جگھا تي ايشوَر، يعقُوب نَي درشن ڏينو ھتو، يعقُوب اُوئي جگھا رو نون بيت ايل راکيو، جڪَي رو مطلب ھَي، ”ايشوَر رو گھر۔“
راخل رِي موت
16 پَڇي يعقُوب آپرَي خاندان ڀيڙو بيت ايل جگھا ݾون اِفرات شھر ڏيݾا بَئير ھويو۔ جڏي او مارگ ۾ ھتا، تو راخل را اُميدگارِي را ڏوکن شرُوع ھويا ھانَ ٻاݪ جِڻڻ ڏُکيو ھويو۔ 17 ٻاݪ جِڻتي بِݪا اُوئي را ڏوکن تموم گھڻا بڌي گيا، تو دائِي اُوئي نَي ڪھيو ڪہ، ”پريشون نِي ھو، ٿارَي ڀڙي ڏيڪرو ھويو ھَي۔“ 18 مرتي بِݪا راخل آپرَي ڏيڪرَي رو نون بِن اُوني راکيو، جڪَي رو مطلب ھَي، ”مھارَي ڏُکون رو ڏيڪرو۔“ پڻ يعقُوب اُوئي رو نون بنيامين راکيو، جڪَي رو مطلب ھَي، ”مھارو ڏيڪرو مھارو ݾاجو ھاٿ۔“ 19 جڏي راخل مُئِي، تو اُوئي نَي اِفرات، يعني بيت لحم شھر ڏيݾا جاوڻ آݪَي مارگ رَي پاݾَي ۾ مٽِي حوالي ڪِي۔ 20 پَڇي يعقُوب اُوئي مُڪوم تي ھيڪ پٿر اُڀو ڪيئو، جڪو آج توڻي راخل رَي مُڪوم تي موجُود ھَي۔
21 پَڇي يعقُوب يعني اِسرائيل آگھي بڌيو ھانَ اُوئي عدر مينار رَي پيلوڙَي پاݾَي جائي آپرو تنٻُو لگايو۔ 22 پَڇي او اُوئي علائقَي ۾ ريوَڻ لاگو۔ ھيڪ ڏِن اِيئون ھويو ڪہ يعقُوب رو موڀِي ڏيڪرو روبن آپرِي نگِي ما بِلھا ڪڍي گيو ھانَ اُوئي ڀيڙو ݾُوتو۔ بِلھا راخل رِي ٻونھِي ھتِي۔ پَڇي يعقُوب نَي اِيئي بات رِي خبر پڙِي۔
يعقُوب را ڏيڪرا
يعقُوب را ٻارھَي ڏيڪرا ھتا۔ 23 جڪو ڏيڪرا ليھا ݾون جايا، اُوئون را نون اَي ھَي۔ روبن جڪو يعقُوب رو موڀِي ھتو، شمعُون، لاوِي، يھُودا، اشڪار ھانَ زبولُون۔ 24 جڪو ڏيڪرا راخل ݾون جايا، اُوئون را نون اَي ھَي۔ يُوسف ھانَ بنيامين۔ 25 جڪو ڏيڪرا راخل رِي ٻونھِي بِلھا ݾون جايا، اُوئون را نون اَي ھَي۔ دان ھانَ نفتالي۔ 26 جڪو ڏيڪرا ليھا رِي ٻونھِي زِلفا ݾون جايا، اُوئون را نون اَي ھَي۔ جد ھانَ آشر۔ اَي ݾجائِي يعقُوب را ڏيڪرا ھَي، جڪو فدان ارام رَي علائقَي ۾ جايا ھتا۔
اضحاق رِي موت
27 پَڇي يعقُوب ممري نون رِي جگھا ۾ آپرَي ٻاپ اضحاق ڪڍي آيو، جڪو قريت اربع يعني، حبرُون شھر رَي نيڙو ھَي، جيٿ پيل اڀراھيم ھانَ اضحاق آپرو تنٻُو لگايو ھتو۔ 28 اضحاق رِي ݾجِي عُمر ھيڪ ݾئو اسِي ݾال ھتِي۔ 29 اضحاق تموم گھڻو بُوڍو ھويو ھانَ موٽِي عُمر ۾ مري آپرَي ٻاپ ڏاڏون ݾون جائي مِليو۔ پَڇي اُوئي رَي ڏيڪرون عيسُو ھانَ يعقُوب اُوئي نَي مٽِي حوالي ڪيئو۔