پيدائيش 34

دينا رِي عِزت لُٽڻ

يعقُوب رِي ڏيڪرِي دينا جڪو ليھا ݾون جائِي ھتِي، او اوٿ رَي ڇوڪريون نَي جوئڻ رَي ݾارُو اُوئون ڏيݾا گئِي۔ ‏2 جڏي اوٿ رَي علائقَي رَي حوِي قوم رَي بادشاھ حمُور رَي ڏيڪرَي سِڪم، دينا نَي ڏيٺِي، تو اُوئي نَي کڻي گيو ھانَ اُوئي رِي عِزت لُٽِي۔ ‏3 سِڪم رو من يعقُوب رِي ڏيڪرِي دينا ݾون لاگو ھانَ او اُوئي رَي پريم ۾ ميٺَي ميٺَي باتون ڪرڻ لاگو۔ ‏4 پَڇي سِڪم آپرَي ٻاپ حمُور نَي ڪھيو ڪہ، ”مھارو بيئان اِيئي ڇوڪرِي ݾون ڪرا۔“

‏5 جڏي يعقُوب نَي اِيئي بات رِي خبر پڙِي ڪہ سِڪم مھارِي ڏيڪرِي دينا رِي عِزت لُٽِي ھَي ھانَ اُوئي ٽيم اُوئي را ڏيڪرا مال چارڻ جھنگ ڏيݾا گيوڙا ھتا۔ اِيئي رَي ڪري يعقُوب اُوئون رَي آوڻ توڻي چُپ رھيو۔ ‏6 پَڇي حمُور بادشاھ آپرَي ڏيڪرَي رو ٽاٻر موگڻ رَي ݾارُو يعقُوب ڪڍي گيو۔ ‏7 جڏي يعقُوب را ڏيڪرا جھنگ ݾون پاڇا آيا ھانَ آپرِي ٻين رَي بارَي ۾ اَي بات ݾُڻِي، تو اُوئون نَي تموم گھڻو ڏُک ھويو ھانَ تموم گھڻِي ريݾ آئِي، ڪيونڪہ سِڪم، يعقُوب رِي ڏيڪرِي ݾون زور زبردستي ڪري اِسرائيلي قوم رِي بي عِزتي ڪِي ھتِي، جڪو اُوئي نَي ڪرڻِي نِي ھتِي۔

‏8 پَڇي حمُور اُوئون نَي ڪھيو ڪہ، ”مھارو ڏيڪرو سِڪم ٿارِي ڏيڪرِي نَي من ݾون پريم ڪرَي ھَي، تُو اُوئي رو بيئان مھارَي ڏيڪرَي ݾون ڪرا، تو ٿارِي تموم گھڻِي مھربونِي ھوشَي۔ ‏9 اھڙَي نمُونَي آپي آپت ۾ گِناتپِي ڪرون ھانَ آپرَي ڏيڪرَي ھيڪَي ٻيجَي نَي ڏيئون ھانَ ليئون۔ ‏10 ٿي مھون ڀيڙا رو۔ اَي ݾجو مُلڪ ٿون آگھي ھَي۔ جيٿ ڀِي ٿونرو من ڪرَي، ٿي اوٿ رئي ݾگھو ھو ھانَ ڪاروبار ڪري آپرِي ملڪيت ٺائي ݾگھو ھو۔“ ‏11 پَڇي سِڪم يعقُوب ھانَ اُوئي رَي ڏيڪرون نَي ڪھيو ڪہ، ”ٿي مھَي تي مھربونِي رِي نظر ڪرو ھانَ اِيئي رَي بدلَي ٿي مھنَي جڪو ڀِي ڪشو، ھُون او ڪرين۔ ‏12 ٿي جِترا ڀِي پَشا ھانَ جڪو ڀِي مونگشو، ھُون ٿونَي ڏئين، پڻ دينا رو بيئان مھَي ݾون ڪرائو۔“ ‏13 سِڪم اُوئون رِي ٻين دينا رِي عِزت لُٽِي ھتِي، اِيئي رَي ڪري يعقُوب رَي ڏيڪرون سِڪم ھانَ اُوئي رَي ٻاپ حمُور نَي دگابازي ݾون بݪتِي ڏينِي ڪہ، ‏14 ”مھي اِيئون ڪونھي ڪري ݾگھتا ڪہ ھيڪَي اھڙَي مِنک نَي آپرِي ٻين رو ھاٿ ڏيئون، جڪَي رو کَتنو ڀِي ڪونھي ھويوڙو، ڪيونڪہ اَي مھورِي بي عِزتي ھَي۔ ‏15 پڻ مھورِي ھيڪ شرط ھَي، جي ٿي مھون آݪِي ڪار آپرَي ھر ھيڪ آڏمي رو کَتنو ڪرائو، تو پَڇي مھي ٿونرِي اَي بات منشون۔ ‏16 پَڇي آپي ھيڪَي ٻيجَي ݾون ڏيڪرَي ليشون، ڏيشون ھانَ ٿون ڀيڙا ريشون ھانَ آپي ݾجائِي ھيڪ قوم ھوشون۔ ‏17 جي ٿي مھورِي بات ڪونھي منو ھانَ کَتنو ڪونھي ڪرائو، تو پَڇي مھي مھورِي ٻين ايٿ ݾون لي، بُوئا جاشون۔“ ‏18 حمُور ھانَ اُوئي رَي ڏيڪرَي سِڪم نَي اُوئون رِي شرط پسند آئِي۔ ‏19 اُوئي جوان اَي ڪوم ڪرڻ ۾ ڪو ڀِي دير ڪونھي ڪِي، ڪيونڪہ اُوئي نَي يعقُوب رِي ڏيڪرِي ݾون تموم گھڻو پريم ھتو۔ سِڪم آپرَي پُورَي خاندان ۾ تموم گھڻو عِزت آݪو مِنک ھتو۔

‏20 پَڇي حمُور ھانَ اُوئي رو ڏيڪرو سِڪم شھر رَي در تي گيا، اوٿ او آپرَي شھر رِي پنچائيت نَي اَي ݾمجھاوڻ لاگا ڪہ، ‏21 ”يعقُوب ھانَ اُوئي رَي مِنکون رِي مرضِي ھَي ڪہ آپون ڀيڙا رَي، اِيئي رَي ڪري آپي اُوئون نَي اِيئي مُلڪ ۾ ريوَڻ ھانَ ڪاروبار ڪرڻ ڏيئون، ڪيونڪہ آپون ڪڍي اُوئون رَي ݾارُو اِيئي مُلڪ ۾ تموم گھڻِي جگھا ھَي۔ آپي اُوئون ݾون ڏيڪرَي ليئون ھانَ ڏيئون۔ ‏22 او آپون ڀيڙا ريوَڻ ھانَ ھيڪ قوم ھوئڻ رَي ݾارُو خُوش ھَي، پڻ آپون نَي اُوئون رِي ھيڪ شرط منڻِي پڙشَي ڪہ آپون اُوئون آݪِي ڪار ھر ھيڪ آڏمي رو کَتنو ڪرائُون۔ ‏23 آپي ڪيئون نِي اُوئون رِي اَي بات منون، تو پَڇي او آپون ڀيڙا ريشَي۔ پَڇي اُوئون رو مال ملڪيت ھانَ جڪو ڪئين اُوئون ڪڍي ھَي، او ݾجو آپڻو ھوئي جاشَي۔“ ‏24 اِيئي تي اُوئي شھر رَي ݾجَي مِنکون حمُور ھانَ اُوئي رَي ڏيڪرَي سِڪم رِي بات منِي ھانَ ݾجَي آڏميون کَتنو ڪرايو۔

‏25 پَڇي تيجَي ڏِن، جڏي اُوئي شھر را آڏمي ڏوکن ۾ ھتا، تو يعقُوب رَي ڏيڪرون ۾ دينا را ٻي ݾَگا ڀائي شمعُون ھانَ لاوِي آپرَي آپرَي تلوارون لي يڪدم شھر تي حملو ڪيئو ھانَ ݾجائِي آڏمي ماري ڇوڙيا۔ ‏26 اُوئون حمُور ھانَ اُوئي رَي ڏيڪرَي سِڪم نَي ڀِي تلوار ݾون ماريو ھانَ سِڪم رَي گھر ݾون آپرِي ٻين دينا نَي ڪاڍي لي آيا۔ ‏27 اُوئي ݾون پَڇي، يعقُوب رَي ݾجَي ڏيڪرون اُوئي شھر ۾ جائي ݾجَي آڏميون را لاش ڏيٺا، تو اُوئون شھر رو ݾجو ڪئين کوݾي ليئو، ڪيونڪہ اوٿ اُوئون رِي ٻين رِي عِزت لُٽيجِي ھتِي۔ ‏28 اُوئون رڍون ٻڪرَي، ڍگَي ڍگا ھانَ گڏا ھانَ جڪو ڪئين اُوئون رَي شھر ھانَ ٻنِي ۾ ھتو کوݾي ليئو۔ ‏29 اُوئون رو ݾجو ڌن ھانَ جڪو ڪئين اُوئون رَي گھرون ۾ ھتو ݾجو کوݾيو ھانَ اُوئون رَي لُگايون ھانَ ٻاݪون نَي ٻونڌي لي گيا۔

‏30 پَڇي يعقُوب آپرَي ڏيڪرون شمعُون ھانَ لاوِي نَي ڪھيو ڪہ، ”ٿون تو مھنَي مُصيبت ۾ گھاتيو رو، ڪيونڪہ ھمَي اِيئي مُلڪ را ڪنعاني ھانَ فرزي قوم مھَي ݾون نفرت ڪرشَي۔ آپي تو ٿوڙا ھون۔ او ڀيڙا ھوئي مھَي تي حملو ڪرشَي، پَڇي مھنَي ھانَ مھارَي خاندان نَي ماري ڇوڙشَي۔“ ‏31 اُوئون بݪتِي ڏينِي ڪہ، ”تو ڪِي مھي ماٺ ڪري ٻيٺا ريتا؟ اُوئي تو مھورِي ٻين رِي عِزت لُٽِي، جھڙو ڪَي بُڇڙِي لُگائِي ݾون ڪيئو جاوَي ھَي۔“