يعقُوب رو عيسُو ݾون مِلڻ
32
پَڇي يعقُوب ڀِي اوٿ ݾون آپرِي منزل ڏيݾا بَئير ھويو ھانَ مارگ ۾ اُوئي نَي ايشوَر را فريشتا ڀيڙا ھويا۔ 2 يعقُوب اُوئون نَي ڏيکي ڪھيو ڪہ، ”اَي ايشوَر رو لشڪر ھَي۔“ يعقُوب اُوئي جگھا رو نون محنايم راکيو، جڪَي رو مطلب ھَي، ”ٻيئون لشڪرون رِي جگھا۔“ 3 پَڇي يعقُوب آپرَي ڪئينڪہ مِنکون نَي آپ آگھي ادُوم مُلڪ رَي شعير علائقَي ۾ آپرَي ڀائي عيسُو رَي ݾارُو نياپو ميليو 4 ھانَ اُوئون نَي ݾمجھائي ڪھيو ڪہ، ”ٿي جائي مھارَي مالڪ عيسُو نَي اَي ڪھيا ڪہ، ’ٿارَي ٻونھَي يعقُوب ڪھيو ھَي ڪہ ھُون اِترا ڏِن آپرَي مومَي لابن ڪڍي ھتو۔ 5 ھمَي مھَي ڪڍي مھارا آپرا ڍگا ڍگَي، گڏا، رڍون ٻڪرَي، ٻونھَي ھانَ ٻونھا ھَي۔ مھَي آپرَي مالڪ نَي اَي نياپو اِيئي رَي ڪري ميليو ڪہ مھَي تي ٿارِي دايا رِي نظر ھووَي۔‘“6 جڏي نياپو ڏيوَڻ آݪا يعقُوب ڪڍي پاڇا آيا، تو اُوئون ݾُڻايو ڪہ، ”مھي ٿارَي ڀائي عيسُو ڪڍي گيا ھتا۔ او چار ݾئو آڏميون ڀيڙو ٿَي ݾون مِلڻ آوَي پڙيو۔“ 7 اَي ݾُڻي يعقُوب تموم گھڻو ٻيئاجو ھانَ پريشون ھويو۔ پَڇي اُوئي آپ ڀيڙا آيوڙَي مِنکون، رڍون ٻڪريون، ڍگَي، ڍگيون ھانَ اُونٺون را ٻي ٽولا ٺاھيا۔ 8 ڪيونڪہ اُوئي ݾوچو ڪہ جي عيسُو ھيڪَي ٽولَي تي حملو ڪري اُوئون نَي مارَي، تو ٻيجا تو ناݾي بچي جاوَي۔
9 پَڇي يعقُوب پراٿنا ڪِي ڪہ، ”اي مھارَي ڏاڏَي اڀراھيم ھانَ مھارَي اَبا اضحاق را ايشوَر، اي پرميشوَر، ٿَي مھنَي ڪھيو ھتو ڪہ، ’آپرَي وطن ۾ آپرَي عزيزون ڪڍي پاڇو جا ھانَ ھُون ٿنَي برڪت ڏئين۔‘ 10 ٿَي آپرَي ٻونھَي تي جڪو مھربونِي ھانَ ڀلائي ڪِي ھَي، ھُون اُوئي جھڙو ڀِي ڪونھي، ڪيونڪہ ھُون رُگو آپرِي گيڏِي لي اِيئي يردن دريا رَي پيرا گيو ھتو، پڻ ھمَي مھَي ڪڍي ٻي ٽولا ھويا ھَي۔ 11 ھُون ٿنَي مِنٿ ڪرون ھون ڪہ تُو مھنَي مھارَي ڀائي عيسُو رَي ھاٿون بچا، ڪيونڪہ مھنَي ٻِي ھَي ڪہ ڪيٿ او آئي، مھارَي لُگايون ھانَ ٻاݪون ݾُوڌو مھنَي مارَي نِي۔ 12 پڻ ٿَي آپ مھنَي ڪھيو ھتو ڪہ، ’ھُون ٿَي ݾون ڀلائي ڪرين ھانَ ٿارا اولاد ݾمُوندر رِي بيݪُو جِترا، اِترا تو بڌائين ڪہ اُوئون نَي ڪو ڀِي گِڻي ڪونھي ݾگھَي۔‘“
13 يعقُوب او رات اوٿج رھيو ھانَ جڪو ڪئين اُوئي ڪڍي ھتو، اُوئي ۾ آپرَي ڀائي عيسُو رَي ݾارُو اَي ڌڻ تحفَي ۾ ڏيوَڻ رَي ݾارُو چُونڊيو۔ 14 ٻي ݾئو ٻڪرَي ھانَ بيݾ ٻڪرا، ٻي ݾئو رڍون ھانَ بيݾ گھيٽا۔ 15 ٽيھ ڏُوڌ آݪَي اُوٺڻَي ھانَ اُوئون را ڦݪيا، چاليھ ڍگَي، ڏَݾ ڍگا، بيݾ گڏَي ھانَ ڏَݾ گڏا۔ 16 يعقُوب ڌار ڌار ڌڻ ٺائي آپرَي نوڪرون نَي ڏينا ھانَ اُوئون نَي ڪھيو ڪہ، ”ٿي مھَي ݾون پيل ندِي ٽِپي ھالو ھانَ ڌڻ رَي بِچ ۾ ڪئين بِٿِي راکيا۔“ 17 اُوئي ݾجون ݾون پيلڪَي ڌراڙ نَي ݾمجھايو ڪہ، ”جڏي مھارو ڀائي عيسُو ٿنَي ڀيڙو ھووَي ھانَ ٿَي ݾون پُوڇَي ڪہ، ’تُو ڪُڻ ھَي ھانَ ڪيٿ جائِي؟ ھانَ اَي ڌڻ ڪيرو ھَي؟‘ 18 اِيئي تي تُو ڪئي ڪہ، ’مالڪ، اَي ٿارَي ٻونھَي يعقُوب رو ڌڻ ھَي، جڪو اُوئي آپرَي مالڪ عيسُو نَي تحفَي ۾ ڏيوَڻ رَي ݾارُو ميليو ھَي ھانَ او آپ مھون لاري آوَي پڙيو۔‘“ 19 اُوئي ٻيجَي، تيجَي ھانَ ݾجَي مال رَي ڌراڙون نَي ݾمجھايا ڪہ، ”جڏي ٿي مھارَي ڀائي عيسُو ݾون مِلو، تو ٿي ڀِي اِيئوج ڪھيا۔ 20 اَي ڀِي ڪھيا ڪہ، ’ٿارو ٻونھو يعقُوب آپ مھون لاري آوَي پڙيو۔‘“ يعقُوب ݾوچو ڪہ آپ جاوڻ ݾون پيل، اَي تحفو ميلي ھُون آپرَي ڀائي عيسُو نَي خُوش ڪرين رو ھانَ پَڇي اُوئي ݾون مِلين۔ ھوئي ݾگھَي ڪہ اِيئي نمُونَي او مھَي ݾون منيجَي۔ 21 پَڇي اُوئي را تحفا اُوئي ݾون پيل ندِي پار گيا، پڻ او آپ اُوئي رات اوٿج آپرَي ٽولَي ڀيڙو رھيو۔
يعقُوب رو مَلھ بِڙھڻ
22 اُوئيج رات يعقُوب اُٺيو ھانَ آپرَي ٻيئون لُگايون، ٻيئون ٻونھيون ھانَ اِگيارون ڏيڪرون نَي لي يبوق ندِي رَي پيلوڙَي پاݾَي گيو۔ 23 اُوئون ݾجون نَي ندِي ٽِپاوڻ ݾون پَڇي، او پاڇو آيو ھانَ جڪو ڪئين اُوئي ڪڍي ھتو، او ݾجو ندِي رَي اُوئي پاݾَي ميليو۔ 24 پڻ يعقُوب اوٿج ھيکلو رھيو۔ پَڇي اوٿ ھيڪ مِنک آيو ھانَ او ڏِن اُگڻ توڻي اُوئي ݾون مَلھ بِڙھتو رھيو۔ 25 جڏي اُوئي مِنک ڏيٺو ڪہ او يعقُوب ݾون کٽي ڪونھي ݾگھتو، تو اُوئي مَلھ ڪرتَي بِݪا يعقُوب رِي ݾاٿݪ آݪِي رگ جھالي مروڙِي، تو اُوئي رِي رگ چڙھي گئِي۔ 26 پَڇي اُوئي مِنک ڪھيو ڪہ، ”مھنَي جاوڻ ڏي، ڪيونڪہ ڏِن اُگڻ آݪو ھَي۔“ اِيئي تي يعقُوب ڪھيو ڪہ، ”ھُون ٿنَي اُترِي توڻي جاوڻ ڪونھي ڏيئون، جترِي توڻي تُو مھنَي برڪت نِي ڏَي۔“ 27 تو اُوئي مِنک پُوڇو ڪہ، ”ٿارو نون ڪِي ھَي؟“ اُوئي بݪتِي ڏينِي ڪہ، ”يعقُوب۔“ 28 اُوئي مِنک ڪھيو ڪہ، ”آج ݾون پَڇي، ٿارو نون يعقُوب نا، پڻ اِسرائيل ھوشَي، ڪيونڪہ تُو ايشوَر ھانَ آڏميون ݾون مَلھ بِڙھيو ھانَ جيتي گيو۔“ 29 پَڇي يعقُوب اُوئي نَي ڪھيو ڪہ، ”مھربونِي ڪري مھنَي آپرو نون ݾُڻا۔“ اُوئي ڪھيو ڪہ، ”تُو مھَي ݾون مھارو نون ڪيئون پُوڇَي ھَي؟“ اَي ڪئي اُوئي يعقُوب نَي برڪت ڏينِي۔ 30 يعقُوب اُوئي جگھا رو نون فني ايل راکيو، جڪَي رو مطلب ھَي، ”ايشوَر نَي رُوبرو جوئڻ“ ھانَ ڪھيو ڪہ، ”مھَي ايشوَر نَي رُوبرو ڏيٺو، تو ڀِي بچي گيو۔“