پيدائيش 22

ايشوَر رو اڀراھيم نَي آزماوڻ

ڪئينڪہ ڏِنون ݾون پَڇي، ايشوَر اڀراھيم نَي آزماوڻ رَي ݾارُو اُوئي نَي ڪھيو ڪہ، ”اڀراھيم اي اڀراھيم۔“ اُوئي ڪھيو ڪہ، ”مالڪ ھُون حاضر ھون۔“ ‏2 پَڇي ايشوَر ڪھيو ڪہ، ”تُو آپرو پيارو ڏيڪرو اضحاق، جڪو ٿارو ھيڪج بارݾ ھَي، آپ ڀيڙو لي موريا رَي علائقَي ۾ جا ھانَ اوٿ رَي جبلون ۾ ھيڪ جبل، جڪو ھُون ٿنَي بتائين، اوٿ مھارَي ݾارُو اُوئي رو ٻاݪڻ آݪو ٻَليدون ڪري۔“

‏3 اڀراھيم ٻيجَي ڏِن ݾاڪݪي تارھي اُٺيو ھانَ آپرَي ڏيڪرَي اضحاق، ٻيئون نوڪرون ھانَ گڏَي نَي ڀيڙو ليئو ھانَ ٻاݪڻ آݪو ٻَليدون ڪرڻ رَي ݾارُو لڪڙَي بڍائي اُوئي جگھا ڏيݾا بَئير ھويو، جڪو ايشوَر اُوئي نَي بتائِي ھتِي۔ ‏4 بيتَي بيتَي تيجَي ڏِن اڀراھيم نَي او جبل اݪگِي ڀون ݾون ڏيکيجڻ ۾ آيو۔ ‏5 پَڇي اڀراھيم آپرَي نوڪرون نَي ڪھيو ڪہ، ”ٿي ايٿ گڏَي ڪڍي اُڀو۔ مھي ٻاپ ڏيڪرو ٻيئي اوٿ جائي ايشوَر آگھي شيش نِمائي ٿون ڪڍي پاڇا آئُون ھون۔“

‏6 پَڇي اڀراھيم ٻاݪڻ آݪَي ٻَليدون رَي ݾارُو لڪڙَي لي آپرَي ڏيڪرَي اضحاق نَي کڻائَي ھانَ آپ باݾڏي ٻاݪڻ رَي ݾارُو ٽونڊا ھانَ ڇُرِي لِي ھانَ ٻيئي بَئير ھويا۔ ‏7 اِيئي تي اضحاق آپرَي ٻاپ نَي ڪھيو ڪہ، ”اَبا“ اُوئي ڪھيو ڪہ، ”جِي، مھارا ڏيڪرا؟“ پَڇي اضحاق پُوڇو ڪہ، ”باݾڏي ھانَ لڪڙَي تو ھَي، پڻ ٻاݪڻ آݪَي ٻَليدون رَي ݾارُو گھيٽو ڪيٿ ھَي؟“ ‏8 اڀراھيم ڪھيو ڪہ، ”ڏيڪرا، ايشوَر آپ ٻاݪڻ آݪَي ٻَليدون رَي ݾارُو گھيٽَي رو بندوبست ڪرشَي۔“ پَڇي او ٻيئي آگھي بيتا گيا۔ ‏9 جڏي او اُوئي جگھا تي پُگا، جڪو ايشوَر اُوئي نَي بتائِي ھتِي، پَڇي اڀراھيم ٻَليدون رِي جگھا ٺائِي ھانَ اُوئي تي لڪڙَي راکئَي ھانَ پَڇي آپرَي ڏيڪرَي اضحاق نَي ٻونڌي اُوئي نَي ٻَليدون ڪرڻ رَي ݾارُو لڪڙيون رَي ماٿَي راکيو۔ ‏10 پَڇي اڀراھيم ڇُرِي لِي ھانَ آپرَي ڏيڪرَي نَي ݾِير باوڻ رَي ݾارُو آپرو ھاٿ بَݪايو۔ ‏11 اِيئي تي آڪاش ݾون پرميشوَر رَي فريشتَي رو آواز آيو ڪہ، ”اڀراھيم، اي اڀراھيم۔“ اُوئي ڪھيو ڪہ، ”جِي، ھُون حاضر ھون۔“ ‏12 پَڇي اُوئي ڪھيو ڪہ، ”تُو آپرَي ڏيڪرَي نَي ݾِير نِي با۔ اُوئي نَي ڪئين نِي ڪر، ڪيونڪہ ھمَي مھنَي خبر پڙِي ھَي ڪہ تُو ايشوَر ݾون ٻيئاجَي ھَي۔ اِيئي رَي ڪري تُو آپرو پيارو ڏيڪرو، جڪو ٿارو ھيڪج بارݾ ھَي، اُوئي نَي مھَي ݾون وڌيڪ ڪونھي ݾمجھو۔“ ‏13 پَڇي اڀراھيم لاري پاڇل ڦورِي ھانَ ھيڪ گھيٽو ڏيٺو، جڪَي را ݾِينگ ھيڪَي بَڻ ۾ ڦاٿوڙا ھتا۔ پَڇي اُوئي جائي او گھيٽو جھاليو ھانَ آپرَي ڏيڪرَي رِي جگھا تي ٻاݪڻ آݪو ٻَليدون ڪيئو۔ ‏14 اڀراھيم اُوئي جگھا رو نون يھووا يرِي راکيو، جڪَي رو مطلب ھَي، ”پرميشوَر بندوبست ڪرشَي۔“ اِيئي رَي ڪري آج ڏِن توڻي اَي ڪيتوڻو مشھُور ھَي ڪہ، ”پرميشوَر آپرَي جبل تي بندوبست ڪرشَي۔“

‏15 پَڇي ڀڙي آڪاش ݾون پرميشوَر رَي فريشتَي اڀراھيم نَي ھيلو ڪري ڪھيو ڪہ، ‏16 ”پرميشوَر ڪَي ھَي ڪہ ٿَي مھارو حُڪم منيو ھَي ھانَ آپرَي ڏيڪرَي نَي ڀِي جڪو ٿارو پيارو ھَي، مھَي ݾون وڌيڪ ڪونھي ݾمجھو، اِيئي رَي ڪري مھَي آپرو آپ ݾون ݾونݾ ليئو ھَي ڪہ، ‏17 ھُون ٿنَي برڪت ماٿَي برڪت ڏئين ھانَ ٿارِي پيڙھِي نَي بڌائي آڪاش رَي تارون ھانَ ݾمُوندر رِي بيݪُو آݪِي ڪار بڌائين ھانَ ٿارِي پيڙھِي آݪا آپرَي دُشمنون نَي ھراشَي ھانَ اُوئون رَي شھرون تي قبضو ڪرشَي۔ ‏18 ٿارِي پيڙھِي رَي وسيلَي دُنيا رَي ݾجَي قومون نَي برڪت ملشَي، ڪيونڪہ ٿَي مھارو حُڪم منيو ھَي۔“ ‏19 پَڇي اڀراھيم ھانَ اضحاق آپرَي نوڪرون ڪڍي پاڇا آيا ھانَ او ݾجائِي ڀيڙا ھوئي بيرسبع رَي ميدون ڏيݾا گيا ھانَ اڀراھيم اوٿ ريوَڻ لاگو۔

اڀراھيم رَي ڀائي نحُور را اولاد

‏20 ڪئينڪہ ڏِنون ݾون پَڇي، اڀراھيم نَي خبر پڙِي ڪہ اُوئي رَي ڀائي نحُور نَي آپرِي لُگائِي مِلڪا ݾون ڏيڪرا جايا ھَي۔ ‏21 نحُور رَي پيلڪَي ڏيڪرَي رو نون عُوض ھتو، ٻيجَي رو نون بُوز ھانَ تيجَي ڏيڪرَي رو نون قمُو ايل ھتو، جڪو ارام رو اَبا ھتو۔ ‏22 نحُور رَي ٻيجون ڏيڪرون را نون اَي ھَي، ڪسد، حزُو، فِلداس، اِدلاف ھانَ بيتو ايل۔ ‏23 اڀراھيم رَي ڀائي نحُور را اَي آٺ ڏيڪرا مِلڪا ݾون جايا ھتا۔ بيتو ايل رِي ھيڪ ڏيڪرِي ڀِي ھتِي، جڪَي رو نون ربقا ھتو۔ ‏24 نحُور آپرِي ٻونھِي ݾون ڀِي بيئان ڪيئو، جڪَي رو نون رُوما ھتو۔ اُوئي ݾون ڏيڪرا جايا۔ اُوئون را نون طبخ، جاحم، تخص ھانَ معڪا ھتو۔