اضحاق رو جنم
21
پرميشوَر جون ڪھيو ھتو، اِيئوج ݾارون تي مھربونِي ڪِي ھانَ آپرو واعدو پُورو ڪيئو۔ 2 ݾارون اُميد ݾون ھوئِي ھانَ ايشوَر رَي بتايوڙَي ٽيم تي اڀراھيم رَي بُوڍاپَي ۾ ݾارون نَي ڏيڪرو جايو۔ 3 اڀراھيم آپرَي ڏيڪرَي رو نون اضحاق راکيو، جڪَي رو مطلب ھَي، ”ھَݾڻ۔“ 4 جڏي اضحاق آٺون ڏِنون رو ھويو، تو اڀراھيم ايشوَر رَي حُڪم تي اضحاق رو کَتنو ڪيئو۔ 5 جڏي اضحاق جايو، تو اُوئي ٽيم اڀراھيم ݾئو ݾالون رو ھتو۔ 6 ݾارون ڪھيو ڪہ، ”ايشوَر مھنَي اِيئي عُمر ۾ خُوشِي ڏي ھَݾايو ھَي ھانَ ݾجائِي مِنک اَي بات ݾُڻي مھَي ڀيڙا ھاݾشَي۔ 7 مھارَي ڌڻِي نَي ڪُڻ ڪئي ݾگھتو ڪہ ڪڏي ݾارون آپرَي ٻاݪيون نَي ڏُوڌ پياڙشَي، پڻ تو ڀِي اُوئي رِي پيرِي ۾ مھنَي ڏيڪرو ھويو۔“ 8 جڏي اضحاق ڪئين موٽو ھويو، تو اُوئي رو ڏُوڌ ڇوڙايو ھانَ اُوئي ڏِن اڀراھيم خُوشِي ۾ ھيڪ موٽِي دعوت ڪِي۔ھاجرا ھانَ اِسماعيل نَي گھر ݾون ڪاڍڻ
9 ھيڪَي ڏِن ݾارون ڏيٺو ڪہ مِصري ٻونھِي ھاجرا رو ڏيڪرو اِسماعيل، جڪو اُوئي نَي اڀراھيم ݾون جايو ھتو، او ݾارون رَي ڏيڪرَي اضحاق نَي چِڙائي ھاݾتو پڙيو۔ 10 اِيئي تي ݾارون اڀراھيم نَي ڪھيو ڪہ، ”اَي ٻونھِي ھانَ اِيئي رو ڏيڪرو گھر ݾون ڪاڍ، ڪيونڪہ اِيئي ٻونھِي رو ڏيڪرو مھارَي ڏيڪرَي اضحاق ڀيڙو ٿارِي ملڪيت رو بارݾ ھوئي ڪونھي ݾگھتو۔“ 11 اِيئي بات رو اڀراھيم نَي تموم گھڻو ڏُک ھويو، ڪيونڪہ اِسماعيل ڀِي اُوئي رو آپرو ڏيڪرو ھتو۔ 12 پڻ ايشوَر، اڀراھيم نَي ڪھيو ڪہ، ”تُو آپرَي ڏيڪرَي ھانَ آپرِي ٻونھِي رَي ڪري پريشون نِي ھو۔ جون ݾارون ٿنَي ڪَي ھَي، اِيئوج ڪر، ڪيونڪہ جڪو واعدو مھَي ٿَي ݾون ڪيئو ھتو، او اضحاق رِي نسل ݾون پُورو ھوشَي۔ 13 ھُون اِيئي ٻونھِي رَي ڏيڪرَي اِسماعيل ݾون ڀِي ھيڪ قوم ٺائين، ڪيونڪہ او ڀِي ٿارو ڏيڪرو ھَي۔“
14 ٻيجَي ڏِن ݾاڪݪي تارھي اڀراھيم ٻاٽِي ھانَ پوڻي رِي ڏيڙِي ھاجرا رَي کوئَي تي راکِي ھانَ اُوئي نَي ھانَ اُوئي رَي ڏيڪرَي نَي گھر ݾون ٻاھر ڪاڍيا۔ ھاجرا اوٿ ݾون بُئِي گئِي ھانَ او بيرسبع رَي رڻ پَٽ ۾ اِيئا اُوئا ڦِرتِي رئِي۔ 15 جڏي ڏيڙِي رو پوڻي ختم ھويو، تو ھاجرا اِسماعيل نَي ھيڪَي بَڻ ھيٺا ݾُوئاݪي ڇوڙيو۔ 16 پَڇي او اݪگِي جائي ٻيݾي رئِي ھانَ آپرَي من ۾ ڪيوَڻ لاگِي ڪہ، ”ھُون آپرو ڏيڪرو مرتو جوئي ڪونھي ݾگھتِي۔“ پَڇي اوٿ ٻيݾي زور ݾون روئڻ لاگِي 17 ھانَ ڇوڪرو ڀِي روتو پڙيو۔ ايشوَر اُوئي ڇوڪرَي رو روئڻ ݾُڻيو ھانَ ايشوَر رَي فريشتَي آڪاش ݾون ھاجرا نَي ھيلو ڪري ڪھيو ڪہ، ”اي ھاجرا، ٿنَي ڪِي ھويو؟ ٻيئاج نِي، ڪيونڪہ ايشوَر ڇوڪرَي رو روئڻ ݾُڻيو ھَي۔ 18 ھمَي اُٺِي، آپرو ڏيڪرو کڻ ھانَ ݾنڀال، ڪيونڪہ ايشوَر اُوئي ݾون ھيڪ موٽِي قوم ٺاشَي۔“ 19 پَڇي ايشوَر رِي مھربونِي ݾون ھاجرا ھيڪ کُوھ ڏيٺو ھانَ اوٿ جائي اُوئي کُوھ ݾون ڏيڙِي ڀري آئِي ھانَ آپرَي ڏيڪرَي نَي پوڻي پياڙيو۔
20 ايشوَر اِسماعيل ڀيڙو ھتو۔ اِسماعيل رڻ پَٽ ۾ رئي موٽو ھويو ھانَ تير ھلاوڻ رو ڪاريگر ھويو۔ 21 جڏي او فاران رَي رڻ پَٽ ۾ ريتو، تو اُوئي ٽيم اُوئي رِي ما، مِصر مُلڪ رِي ھيڪِي ڇوڪرِي ݾون اُوئي رو بيئان ڪرايو۔
اڀراھيم ھانَ ابيملڪ رَي بِچ ۾ وچن
22 پَڇي اُوئون ڏِنون ۾ اِيئون ھويو ڪہ اُوئي مُلڪ رو بادشاھ ابيملڪ آپرِي فوج رَي آفيسر فيڪل ڀيڙو اڀراھيم ڪڍي آيو ھانَ اُوئي نَي ڪھيو ڪہ، ”ٿارَي ݾجَي ڪوم ۾ ايشوَر ٿَي ڀيڙو ھَي۔ 23 اِيئي رَي ڪري ھمَي تُو مھَي ݾون ايشوَر رو ݾونݾ لَي ڪہ تُو مھَي ݾون، مھارَي خاندان ݾون ھانَ مھارِي پيڙھِي ݾون دوکو ڪونھي ڪرَي، پڻ جھڙَي نمُونَي مھَي ٿَي ݾون ݾُٺو سلُوڪ ڪري آپرو فرض پُورو ڪيئو ھَي، اُوئيج نمُونَي تُو ڀِي آپرو فرض پُورو ڪرِي ھانَ مھَي ݾون ھانَ اِيئي مُلڪ ݾون وفادار رئِي، جڪَي ۾ تُو پرديسي ھَي۔“ 24 اِيئي تي اڀراھيم ڪھيو ڪہ، ”ھُون ݾونݾ ليئون ھون۔“ 25 پَڇي اڀراھيم، ابيملڪ بادشاھ نَي ھيڪَي کُوھ رَي بارَي ۾ مَيار ڏينِي، جڪَي نَي ابيملڪ بادشاھ رَي نوڪرون زورِي کوݾيو ھتو۔ 26 ابيملڪ بادشاھ ڪھيو ڪہ، ”مھنَي تو خبر ڀِي ڪونھي ڪہ اَي ڪوم ڪَي ڪيئو ھَي ھانَ ٿَي ڀِي مھنَي ڪونھي ݾُڻايو۔ ھُون تو آج پيلڪو گُھمرو ٿَي ݾون اَي بات ݾُڻون پڙيو۔“ 27 پَڇي اڀراھيم ھانَ ابيملڪ بادشاھ ھيڪَي ٻيجَي ݾون وچن ڪيئو ھانَ اڀراھيم اُوئي وچن رِي نِشونِي رَي ݾارُو ابيملڪ بادشاھ نَي رڍون ٻڪرَي ھانَ ڍگَي ڍگا ڏينا۔ 28 اڀراھيم ڌڻ ۾ رڍون را ݾات مادِي ڦݪيا ڌار ڪيئا۔ 29 ابيملڪ بادشاھ اُوئي ݾون پُوڇو ڪہ، ”رڍون رَي اِيئي ݾات مادِي ڦݪيون نَي ڌار ڪرڻ رو ٿارو ڪِي مطلب ھَي؟“ 30 اڀراھيم بݪتِي ڏينِي ڪہ، ”تُو رڍون را ݾات مادِي ڦݪيا مھَي ݾون لَي، جڪو اِيئي بات رِي گواھِي ھوشَي ڪہ اَي کُوھ مھَي کوتريو ھَي۔“ 31 اِيئي رَي ڪري اُوئي جگھا رو نون بيرسبع ھويو، جڪَي رو مطلب ھَي، ”ݾونݾ رو کُوھ“ ڪيونڪہ اُوئون ٻيئون اوٿ ݾونݾ ليئو ھتو۔